احب الخفجي ..

[KFJ3000]

مرحبا ..
بصراحه انا بنت الخفجي ومولوده فيها وماعرفت وطن غيرها بحياتي كلها هي انا والله لو بس اقرا اسمها بأي محل كأني قاريه اسمي الرباعي انبسط احس انها تعنيني حيل ..
المهم .. بعد هالمقدمه انا عندي سؤال ..

متى نبدا ؟؟؟؟؟ :confused:

اقصد متى نقب على وجه الدنيا و نصير مدينه كبيره فيها كل شي؟ انا بصراحه مدري اوجه هالسؤال لمين بالضبط كان دايم هالسؤال يحوس بقلبي وقلت عاد لازم اسأله واللي يصير يصير ..
(( لاتصدقون ترا اللي يصير يصير غير انكم تطردوني من المنتدى :D )) هههههههههههه

انا اشوف انو كل المدن والقرى اللى حوالينا تطورت وتغيرت بس احنا هذا احنا ماغير بيوت جديده تنبنى ومن عرفت الخفجي ما انبنى فيها شي جديد غير حي الخليج !!
لاكبرنا ولا تطورنا ولا تقدمنا هذا احنا من يوم عرفتنا !! نبني محل مانهدم ونهدم محل مانبني !!
حتى الشوارع هي نفسها غيروا اسمها ولازلنا سكان الخفجي الاصليين نطلق عليها اساميها القديمه !! يمكن لاننا نشوف انو مافيه شي تغير ؟؟
نفس الشارع يحفرونه ويرجعون يردمونه وعلى هالحال سنين وبنين !! طيب وبعدين ؟
نبي شي جديد نبي مرافق جديده نبي شي ينحط لخدمتنا وبليز لحد يحاول يستفيد منه نص شباب الخفجي عاطلين والبنات بعد وكل الاشياء اللي تفتح يبيلها فلوس !! مافيه شي بلاش؟
حتى حديقة الدفاع القدييييييييمه اللي كنا نروحلها وحنا صغار نتمرجح فيها صارت بفلوس yd.885 طيب وبعدين ..
ممكن نتطور؟ طيب خلاص مافيه مشكله يصير كل شي بفلوس بس على الاقل يصير على مستوا !! يعني الواحد يدفع فلوس بشي يسوا !!
نبي نستاااانس ترا من حقنا احنا بشر مو شرط كل مانبي نغير جو رحنا برا ترا والله حرام ..
والمصيبه احنا اهل الخفجي حاقرينها !! طيب ليش نحقرها ؟ :mad:
البنات مايلبسون من الخفجي لانو مايتنزلون والاطفال مايروحون ملاهي الخفجي لانو ماهي حلوه مثل حقت الكويت والرجال حتى الحلاقه لابغوا يحلقون راحو يحلقون بالكويت !!وكل مانقول لاحد الخفجي والخفجي قال ماباقي الا !!!! طيب ليش؟
حتى يوم فتح فيها سيتي ماكس اول جمله سمعتها (( احلى يالخفجي والله تطورتي وصار فيك سيتي ماكس الحين كل اهل الخفجي يطقمون !! )) طبعا بنبره سخريه .. طيب وش المانع؟ وليه مايطقمون ؟ هم شاحذين الملابس ولا شارينها بفلوس؟ وليه (( احلى يالخفجي!! )) ليه الحقرااان !! ترا انقهر من هالكلام yd.885
ليش اهل الخبر مايحقرونها ؟ ليش كلهم يشترون من نفس المحلات ويلبسون مثل بعض؟ ليش اهل الرياض مايحقرونها ؟؟
ليش اهل الكويت مايحقرونها؟؟
واكثر عباره اسمعها ومن بنات الخفجي لبعضهم وتقهرني (( صرتي مثل بنات الخفجي !! )) وكأنهم لما يقولونها يعني حاقرين الخفجي وبناتها وش فيهم بنات الخفجي؟؟؟ ايه انا من بنات الخفجي ومستواي الخفجي متعلمه ومثقفه ومتربيه وابيض الوجه واعرف اللي لي واللي علي وموناقصني شي .. ايه انا بنت الخفجي واحبها واموت عليها ماعرفت ديره غيرها وماعشت غير فيها ولفيت الدنيا ورحت وجيت بس ما ارتاح غير هنا !! ليش الاجانب يعرفون قدر الخفجي واحنا مانعرفه ؟؟
ليش نستغلها ونحاول نستفيد منها وبس من غير مانسوي فيها شي ؟؟ :frown:
كل الحراميه اللي خربوها ماهم من اهلها يجون يسرقونها ويروحون بس احنا اهلها
بليز لا نخربها لا نهدمها لا نوسخها ولانحقرهاااااااااااااا خل نحافظ عليها ونصير راقيين ونحبها تراها تجنن ياحبيلها .. :D

يمكن اللي يقرا هالكلام يحس انو ماله مناسبه او حتى ماله داعي بس والله حره بقلبي وحبيت اطلعها وسامحوني ان كنت ضايقتكم ,,

[غلاوي2011]

الحمد لله فيه احد مثلي إذا قالوا اسم الخفجي ولا قريته بمكان اموت من الوناسه كنهم مادحيني ولا يقولون رابحه مليون:D:biggrin:
والخفجي غاليه علينا ونحبها بكل حالاتها والله ان شارع من شوارع الخفجي يسوى عندي كل المدن:)
لا ابشرك هالحين اهل الكويت يتسوقون من الخفجي منتشرين بالاسواق كن ما عندهم اسواق ومجمعات بس كلا بعقله راضي :rolleyes:
اما سالفه التطقيم بقولك موقفين يضحكون بصراحه
"مره معلمتين كانوا مطقمين من غير اتفاق طبعاً ما طقموا من الخفجي ههههههه
المهم وش سوت وحده منهم هههههههههههه هههههههههه ماراحت لحصصها وبلغت الاداره انها تعبانه وعندها هبوط وحاسه بدوخه وما تقدر تروح حصصها من التعب وهي بغرفه المعلمات ميته من القهر ليش فلانه مطقمه معاي الحين الطالبات بعرفون من وين جبتها وبكم وقاعده تدور احد يجي ياخذها علشان تستئذن"

ومره ههههههه بزواج كلهم من قرايبهم مطقمين لما حضرت وحده من قرايبهم وشافت البنت استجنت ودقت على زوجها ورجعت للبيت وغيرت وجت ولا بعد زعلانه ومنتفخه لانه شاريه فستانها بالشي الفلاني وهذي شاريه مثله"
قمه المسخره والفضاوه وإذا مطقمه معاك خير يا طير عسى ماشر ما صنعوا الا قطعه وحده مخصصه لك ولا محد يشتري بهذا السعر الا انتي يعني محد عنده فلوس الا انتي سلامات
والي تقول صرتي من بنات الخفجي خير انتي منين ان شاء الله وإذا مو من الخفجي وش جايبك لها:confused:
(اكيد من جمالها وهدؤها وقلوب اهلها الي على بعض)
:102::102::101: تسلمين لنا يالخفجي يا بعد الدنيا كلها:102:101:::102:

[لحن الحزن]

هلا فيك اختي الكريمة وشاكر لك هذا الموضوع الطيب

وكلنا امل بأن يتحقق كل ما نتمناه لهذا الوطن كاكل ولهذا الجزء كمدينة الخفجي نريد الرقي والتقدم والتطلع الى المستقبل بروح جديده ...


ولكن بأختصار نستطيع تلخيص مشكلتنا بشيئين هما اساس مشكلتنا

اولهم الطبال وثانيهما الجاهل ...

ومشكلتنا بهؤلاء الاثنين ان وجدت جاهل وجدت له طبالين ومستعدين للردح والرقص الى ساعات متأخره لدرجة الاعياء والارهاق لاجسادهم وحناجرهم واصابعهم ...

واما طبال يتبعه الجهلاء فيكونون له صوناً وصوتاً وحماين لعرينه

هذه هي مشكلتنا اختي الكريمة بكل اختصار

ولك كل التحايا والتقدير

[I have a dream!]

فديييييييييييييت الخفجي بس..
باي شكل كاااانت..

[الياسمين]

لا وزيدك الخيمه لاتنسينها:D <<<<فديتها احبها توسع الصدر
الكل مستقلها ويوووه تروحون للخيمه تلوع الكبد ومافيها شيء حلو ومستحيل اخذ منها شيء
وكل ما اروح لها القاها زحمه اجل من وين هالزحمه والكل يقول ووووع وووع
اكره هالنوعيه من البشر ترا الدنيا بساطه ببساطه ماله داعي التعنطز وشوفة النفس اللي لو انها صدق تنبلع بس كذب يعني انا ما روح وهي كل يوم فيها:mad: عيب والله المشكله يحسبونا مهبل نفهم ترا:biggrin:
وبالعكس الواحد يكون مكروه بهالحاله وماتاخذيني راحتك معاه .

:101: لصاحبة الموضوع
الخفجي:102:

[شمس الرائدية]

تصدقون :rolleyes:
آلحين بالذات وبـ ظل الآوضاع اللي عايشنها
ما نبي آلا الآمن والآمان وأن الواحد ينام ويقعد وهو مرتاح ..
عمركم قلتوا اللهم أنعم علينا بنعمة
الآمن والآمان :redface:

[لحن الحزن]

تصدقون :rolleyes:
آلحين بالذات وبـ ظل الآوضاع اللي عايشنها
ما نبي آلا الآمن والآمان وأن الواحد ينام ويقعد وهو مرتاح ..
عمركم قلتوا اللهم أنعم علينا بنعمة
الآمن والآمان :redface:

هلا فيك اختي الكريمة

صادقه في كلامك ونحن جميعا نقول الحمدلله على هذه النعمة وادامها الله علينا

ولكن ايضا لا مانع من التطور والرقي بوضع نعمة الامان وهذا واجبنا تجاه الوطن

ولك كل التحايا والتقدير

[شمس الرائدية]

أحس التطور ماوراه ألا
تغير النفوس والطباع والبعد عن عاداتنا وتعاليم ديننا ..
ما نبي تطور بالخفجي أتركوا الخفجي بلحالها خلوها صبخه :frown: والله حلوه ..

[حزن الأمواج]

لا مانـوآفق على انها تقعد زي ماهي..

على كذا كل واحد يركب له عربه ولا يسوق سيـاره

نواكب العصر والتطور


مانبي نبذخ ولا نبي نفسـق


المدينه فيها كل شي...نفط وشركات ومنطقـه مقسـومه وعلى الحد...وعلى البـحر

وفيها كورنـيش ولا اروع..

حرام ماتستغل ويكون فيها جميع المرافق


الواحد لاجاء يتسووق يبتلش..

لامحلات ولا ماركات ولا شي


مالك الا الكويت والدمام ..





الله يزيـّـنهـا



لبيـه يالخفـجي دآر العـزّ مخبـوره..الـرووح من دونـها والله نفنيـها ..

[لحن الحزن]

أحس التطور ماوراه ألا
تغير النفوس والطباع والبعد عن عاداتنا وتعاليم ديننا ..
ما نبي تطور بالخفجي أتركوا الخفجي بلحالها خلوها صبخه :frown: والله حلوه ..



هلا فيك اختي الكريمة

لا يوجد احد لا يحب التطور الراقي والهادف

ولكن هل تعلمين ان الخفجي في خطر كبير اولاً كثرت الفئران بسبب التراكمات لبقايا الابنيه او الطرقات وهناك خطر النفايات اعزك واعز القارئين وروائحها الكريهة الخطيرة

حرق النفايات وخاصة في موقعها الجديد خطير جداً جداً جداً بصوره لا تتصور

يعني هناك نفايات سامه يمنع حرقها ومع هذا يتم حرقها ونحن من يدفع الثمن ...


التصحر هناك الكثير من عوامل التصحر بدأت في الظهور لدرجة ان السنوات القادمه سوف تخلف كميات هائله من التصحر والرمال المتطايره ...

التطور اختي الكريمة ليس في جهاز موبايلي او لاب توب لا هناك تطورات ايجابيه يجب ان نخطوها

ولك كل التحايا والتقدير

[شمس الرائدية]

ياأخي يوم الخيام وبيوت الشعر والغنم ماكان فيه فئران :biggrin: << شفت ماكانوا متطورين ونظيفين :eek:
والنفايات وين تبيهم يودونها يعني اكيد بتكون قريبه من المنطقه وندري لها سلبيات ..
والتصحر من ذنوبنا ربي يتوب علينا ..
الله يعطيك العافيه وما قصرت وآنت تحب الآقتباسات :biggrin:

[غلاوي2011]

صح ما كان فيه فيران بس فيه عقارب وديبان
والواحد مايكره ان تكون مدينته من احلى المدن وارقاها ونتمنى تتطور للاحسن و الافضل
اما النفيات وين يودونها هذي كبيره على الاقل يبعدونها 30او40 كيلو عن المدينه اكثر ما عندنا الصحاري والبران
اما التصحر ما ادري وين راح اسبوع الشجره خبري فيه نفعله ايام ما كنا ندرس نطلع للساحه ويخلونا نزرع ونسقي الزرع:Dوناسه،،،،، ليش ما يطلعون الطلاب رحلات ويزرعون :biggrin:

[لحن الحزن]

ياأخي يوم الخيام وبيوت الشعر والغنم ماكان فيه فئران :biggrin: << شفت ماكانوا متطورين ونظيفين :eek:
والنفايات وين تبيهم يودونها يعني اكيد بتكون قريبه من المنطقه وندري لها سلبيات ..
والتصحر من ذنوبنا ربي يتوب علينا ..
الله يعطيك العافيه وما قصرت وآنت تحب الآقتباسات :biggrin:


هلا فيك اختي الكريمه

انتي حاولي تميزين بين البيئة الطبيعية وهي حياتنا ايام زمان فهذه بيئة طبيعية

اما مانعيشه اليوم هو شبه دمار كل بيت او ربما اغلب البيوت بجانبها مخلفات بناء من حجاره وغيرها وتحتوي هذه الاماكن على مخابئ للفئران والكلاب اعزكم الله وغيرها


وايضا بالنسبة لسحابات الحريق النفايات اعزكم الله هذه تحتوي على سموم قاتله

اما بالنسبة للنفايات فهناك طريق كثيره للتخلص منها فمثلاً نفايات الحجاره من المنازل نستطيع استخدامها لردم الحفر وغيرها من الاراضي لتكون بنيه ارضية قوية بعد تحطيمها ودكها ...


اما النفايات الاخرى نستطيع التخلص منها بطريق حضاريه بدل حرقها وتدمير الجو وتدميرنا معها بسبب الحرق ...

والتصحر ايضا من ذنوبنا ومن فعل ايدينا ...وهناك حلول كثيره له واقل هذه الامور اماطة الاذى عن الطريق والكلمة الصادقة

مشكلتنا يا اختي بمن لا توجد بداخله غيره على وطنه وان يكون مجرد انسان عائش بها لا يبالي والله يكفينا شر عدم المبلاه لانها مميته وقاتله وتضع الانسان اقرب الى مخلوقات اخرى

فيد بيد نستطيع بناء المحافظة ويد بيد نستطيع بناء وطن كامل بنظامة ونظافته ورقية

ولكن نحتاج ان نعش بالمسؤولية وان وجودنا في هذه الدنيا لاصلاحها وليس الاكل والشرب كسائر السوائب

ولك كل التحايا والتقدير

[لحن الحزن]

صح ما كان فيه فيران بس فيه عقارب وديبان
والواحد مايكره ان تكون مدينته من احلى المدن وارقاها ونتمنى تتطور للاحسن و الافضل
اما النفيات وين يودونها هذي كبيره على الاقل يبعدونها 30او40 كيلو عن المدينه اكثر ما عندنا الصحاري والبران
اما التصحر ما ادري وين راح اسبوع الشجره خبري فيه نفعله ايام ما كنا ندرس نطلع للساحه ويخلونا نزرع ونسقي الزرع:dوناسه،،،،، ليش ما يطلعون الطلاب رحلات ويزرعون :biggrin:


هلا فيك اختي الكريمة علقة على موضوع الماضي والحاضر والاختلاف البيئي ..

الواحد مايكره على قولك ان تكون مدينته احلى ولكن ماهي الطريقة هل بالندم والتمني

وكما يقول بيت الشعر ( وما نيل الامانى بالتمنى ولكن تاخذ الدنيا غلابا )

ان كان الكسل وصل الى قلوبنا واستحلها واصبحنا عبيداً لها مذلولين اذلنا الله في الدنيا واصبحنا على ما نريد قاصرين

ولهذا اختي اخي الكريم ان لم تكون قلوبنا تشعر بالمسؤوليه وهي من ابسط امورنا كمسلمين فلا عيب علينا ان وصل بنا هذا التخلف الى هذا الحد

اذا ابسط الامور عجزنا عن قيامها فهل تريدون تطور ورقي اتصور ان النتيجة مستحيل والف مستحيل

علينا ان نبدأ بصغار الامور اولاً لنصل الى كبارها

والله ولي التوفيق

[غلاوي2011]

اخي الكريم
مافيه مسؤولية و لاعندهم قدره على تحمل المسؤولية واكبر دليل ثلاث ارباع الموظفين طالعين من دواماتهم قبل انتهاء الدوام وإذا سأل عنهم المدير كلموهم زملائهم ورجعوا والعذر كنت في جوله استطلاعيه او تفتيشية
وإذا التزمت بالدوام قعدوا يضحكون عليك ويقولون متخلف ليش ما تهرب ليش ما تتاخر ليش ماتغيب
طيب إذا طعتكم من بيتحمل مسؤولياتي ويقوم بشغلي ولا يتعطلون خلق الله علشان مالي خلق وبعدها تعالوا قولوا دوائر الخفجي فيها وفيها وانتم السبب:mad:
"من عمل منكم عملاً فليتقنه"yd.885

[من عالم اخر]

يا حبي لك يا لحن الحزن , دآيم معـآرض على كل شي :biggrin:

بس بصرآحه , هالموضوع بالذات انا معك :cool:

واحترامي لصاحبة الموضوع

[ابو فايز]

السلام عليكم :smile:
لازم التطور لان هذا زمن التطور والخفجي مدينة ساحلية مفروض فيه منتزهات وحدائق ومجمعات وفعاليات...

[الدموع تنزف]

بصراحه الخفجي من مايحبه
اصل الي طلعوامن الخفجي اكثر من عشر سنوات لحد الحين يحبونها

كلنا لخفجي

[ستروبري]

بصراحه الخفجي من مايحبه
اصل الي طلعوامن الخفجي اكثر من عشر سنوات لحد الحين يحبونها

كلنا لخفجي

صحيح هالكلام ....

كان جار لي يعمل في عمليات الخفجي المشتركة وتقاعد

وذهب الى الرياض لكي يستقر هناك ولكن لم يستطيع التحمل والله العظيم

ورجع الي الخفجي

وقابلت ابنه يقول ابوووي نفس علينا:biggrin:

((Magic Yalkhafji)) ياحبي لها:101:

[طال السفر]

ياحـؤؤبي للخفجـي صراحـه مافي مثلهآ ررآحـه وهدووء الله لايغـير علينآ

[عميل فدرالي]

لبىىىىىى الخفجي

انا اشتغل برا الخفجي ومن اطلع منها اتضايق


لبى ديرتي

[KFJ3000]

شاكره تفاعلكم الرائع وبصراحه هذه اول مره بحياتي اكتب موضوع بمنتدانا ويكون يعبر عن شي بنفسي وما اكذب لو قلت اني كنت متوقعه انو اهل الخفجي يحبونها بس مع هذا تفاجئت لما قريت ردودكم ..
الله لا يحرمنا ديرتنا الحلوه والغاليه وترا احنا طيبين وكويسين واحنا اللي محلينها ويا جماعه ترا محنا محتاجين لا مسؤولين ولا غيره عشان نخلي ديرتنا حلوه وننبسط فيها اهم شي اننا نبطل نحاسه لاني وانتم بعد مثلي تعرفون انو النحاسه منتشره والتخريب بين المراهقين مثل العسل على قلوبهم مايشوفون جدار جديد الا مايحلى الرش والتخطيط عليه ومن هالفعايل كثير ..
شوفو انا عن نفسي وربي يشهد علي اني حاولت اصلح من وضع الخفجي من خلال التاثير بشخصيات الجيل الجديد اشتغلت فتره بالتعليم على عقد طبعا وكنت دايم احسس البنات بالمسؤوليه ناحية كوكبنا الارض وديرتنا الخفجي وكنت دايم احثهم عالحفاظ على البيئه ودايم طبعا ابدى بنفسي مافيها شي لما نعزل القمامه وانتم بكرامه ونسوي اعادة تدوير ووالله انو كان فيه بنات كثير يتفاعلون معاي وتغيرت شخصياتهم ميه بالميه ترا التغيير للافضل ماياخذ مننا مجهود والانسان بطبعه فطرته صالحه ويحب يعيش بمكان افضل ويحافظ عليه الى جانب اعادة التدوير كنا نعمل مع بعض طبعا انا والبنات وبيني وبينكم حتى الاداره مادخلتها بالموضوع والى يومكم هذا طلعت وتركت المدرسه وهم مايدرون عن الدور اللي كنت اسويه والتوعيه اللي كنت انشرها بين الطالبات لانو ماكان هالشي يهمهم بالبدايه عرضت نسوي حملات ومن هالقبيل بس محد اهتم قمت اشتغلت لحالي علمت البنات ارشاد الاستعمال يعني التوفير وهالشي مو عيب بالعكس اننا نرشد استخدام الماء والكهرباء وحتى الاشياء اليوميه اللي نستخدمها كلينكس واوراق وحتى المويه اللي نشربها لما كنا نلاقي غرشة مويه باقي فيها شوي مانرميها باللي فيها ناخذ المويه ونصبها على الشجر الموجود بالمكان بعدين نرمي الغرشه الفاضيه وباقي السندويشات كنا نقطعها ونحطها بالساحه للطيور ياكلون منها او نوديها للماشيه باي محل وما اكثر من الاغنام بالخفجي مثل هالتصرفات البسيطه لو صارت عاده عند الاطفال او حتى الكبار مع الوقت بتصير طبع وبنصك حتى على اوروبا ..
وفيه اشياء ثانيه كثير يغفلون حتى بالمدارس انهم يعلمونها للاطفال مثل حرام الكذب حرام السرقه حرام الفتنه حرام نقل الكلام حرام التخريب حرام الطمع اللي ودى الناس بستين داهيه واشياء كثير حرام مركزين على اشياء صحيح انها مهمه لكن لاتقل اهميه عن الاشياء اللي ذكرتها وكل اللي على بالهم انو هالاشياء الاطفال مقتنعين بحرمتها فمافيه داعي نركز عليها !!
ياجماعه النظافه من الايمان لازم نسوي اعادة تدوير للقمامه ولاتقولون يسوون لا مايسوون بس بالمناسبات العامه يسوون ولا طول السنه محد يمنا !! ووعلب البيبسي لوما انو الهنود صارو يكسبون من وراها ولا كان ليلحين بالشوارع بالكوم مثل اول !! يعني لازم نشرط للهنود عشان نتخلص من المخلفات ويفرزونها لنا ويسوونلها اعادة تدوير؟
وبعدين ليه مايسوون مصانع انتاج نسيج او حتى ورق ومشاريع تحتاج ايدي عامله يشغلون فيها البنات والشباب اللي قاعدين بدون شغل !!
ليش مايفتحون معاهد مهنيه تعلم نجاره وسباكه وكهربا الهنود كلونا ولو يتركونا نضيع وماعاد نقدر نعيش بدونهم !!
انا ما ابغى اتوسع بالكلام ويصير كلامي اكبر مني ومانقدر عليه بس اللي نقدر عليه اننا نربي عيالنا يحبون ارضهم ويحبون اهلها ومايناحسون احد ومثل مايحافظون على البيت يحافظون على الشارع وبليز للشباب لا تفحطون بالشوارع تراكم ازعجتونا وخربتوا كفرات سياراتكم وماله داعي تضيعون من كيس اهلكم بدون داعي ..

واشكر مره ثانيه كل من احب الموضوع وكل من يحب الخفجي حبيبتنا ..

[بارونة الخفجي]

بالنسبه لي :D
احب الخفجي بيت بيت :D
دار دار:biggrin:
حاره حاره:cool:
شارع شارع:rolleyes:
لفه لفه:biggrin:
زنقه زنقه:confused:
قلب قلب:biggrin:
وين وين:cool:
حرمه حرمه:D
شايب شايب:redface:
اخ واخت:rolleyes:
ابله ابله:biggrin:
شرطي شرطي:wink:
دفاع مدني:rolleyes:
جندي جندي:D
خيمه خيمه:biggrin:
احب الخفجي يانااااااااااااااااااس ابووس ترابها اناااا
والله احنا اللي مواليد الخفجي لا بالذات اللي بمستشفى الشركه القديم يووووووووووه احب الخفجي اقوى شي
بيت بيت:D دار دار:biggrin:
ههههههههههههه لا امزح هههههههههههههه :biggrin:


كلنا الخفجي ولا عنك يالخفجي صدود = قطعةً منا وفينا وعدت مجملا

وكلنا للتضحية والتصدي والصمود = من يريد منازلتنا نقوم له إنزلا

مادخل في صفنا مرجفون ولا شرود = تعقل العيّال منا وحنا العيّلا

الشجاعه ورث أهلنا جدود عن جدود = للعوارف دار ندوه وللجهل جهلاyd.885

[KFJ3000]

فديتك يا بارونتناااااا ..

ويشرفني اكون من مواليد مستشفى الشركه القديم خخخخخخخخخخخخخ

انا وانت

سوا..سوا

زنقه..زنقه

ههههههههههههههههههههه

[ابن عماش]

ليش نستغلها ونحاول نستفيد منها وبس من غير مانسوي فيها شي ؟؟ :frown:
كل الحراميه اللي خربوها ماهم من اهلها يجون يسرقونها ويروحون بس احنا اهلها
بليز لا نخربها لا نهدمها لا نوسخها ولانحقرهاااااااااااااا خل نحافظ عليها ونصير راقيين ونحبها تراها تجنن ياحبيلها .. :d



كلام بالصميم !

[ابو سامي2]

وانا بعد انولدت بمستشفى الشركة القديم :biggrin:

واتمنى ان الخفجي بيوم من الاياام تصك على الخبر :biggrin: اتمنى:rolleyes:

[دانة الكون]

وانا بعد من مواليد مستشفى الشركه القديم
شكلنا معمرين حنا ههههههههههه

[ستروبري]

خيمه خيمه:biggrin:

:biggrin: اعجبتني هذي


ذكرتيني بأيام يالله ....

اوما مستشفى الشركة شخباااري


اذكر اول مانولدت على طول لبست ورحت الجمعية..<<<تجي ولا:eek:

[شمس الأصيل]

الله يجزاكي الجنه اختي ..............!!

والله ودكي انها ماتتطور للتطور الباذخ إلا خلنا على بعض وحبايب

لانصير نفس الدمام والمناطق الكبيره اللي شغلتكـ تقضيها

أقل حاجه 4 ساعات من كبرها وعدد سكانها وكذالكـ والله ماودنا لابمجمعات

ولااسواق كبيره هذا ستي ماكس جانا وجاب !!!!! معاه والله يكفينا شره

ووالله يافي يوم من الأيام ان نقول كلنا ياليتها ماتطورت ولا وكبرت


تحياآآآتي

؟؟؟...؟؟؟...؟؟؟

[بارونة الخفجي]

خيمه خيمه :biggrin: نسبه للخيمه اللي بيفتحونهااا :biggrin:
بعدين شكل المنتدى كلهم من مواليد مستشفى الشركه :cool:

[KFJ3000]

اجل لازمنا قسم لمواليد مستشفى الشركه
ههههههههههههههههههههههههههه

الامل انو تطور الخفجي بمضمونها وبشكلها يعني مو شرط تكبر وتصير مساحتها شاسعه لانو هالشي مش معقول وخصوصا انو كل اللي حولنا صباخي !! (( درس جغرافيا )) خخخخخ
مثلا اوروبا وامريكا يكون فيها قرى او مدن صغيره وحتى سكان هالمناطق يعتبرون قروين بس نظاف يبردون القلب ولما تدخلها تكون قمة النظافه والترتيب وكل شي بمحله الصحيح ومافيه اي منظر مؤذي للعين !! تلاقيهم محافظين على بلدتهم وعلى نظافتها وطبيعتها وكانهم كلهم عايشين ببيت واحد كبير مو كل واحد ببيت .. مايعانون من اي نوع من التلوث لا سمعي ولا بصري ولا بيئي .. حنا هنا حتى الباصات الصبح تفقع مخك وانت مالك خص !!
وش المانع ماتكون الخفجي كذا ؟؟

[الدموع تنزف]

كل شي جايز يااختي ما احديكره الخفجي
ومستشفي رقم 1 اه اه يذاك الايام

[الفيصــل]

صدقتي الخفجي مافيها تطوير
كفتريا جواهر نفس سندويشاتهم من 10 سنين ماغيروها :biggrin:
أتكلم جد :
التطوير يعتمد على مدى الميزانية المصروفة من أمانة المنطقة الشرقية
لمحافظة الخفجي للمشاريع التنموية
إذا صرفت مبالغ يجب الرقابة على هذه المبالغ أين تصرف في الخفجي
ومحاسبة البلدية والمحافظ وكل من له صلة عند التقصير
الخفجي مدينة مهمة لما وهبها الله من نفط
وهي ايضاً منطقة حدودية واجهة بلد
ونتمنى من لجنة الفساد التي انشأها خادم الحرمين في القرارات الجديدة
الشئ الكثير لكافة مدن ومحافظات وقرى المملكة
وشكراً لكِ

[الدموع تنزف]

الخفجي كذاحلوه

[KFJ3000]

الخفجي والله شكلها بتظل الجيب اللي الكل يحط ايده وياخذ منه ومحد يحط فيه !!

[فيصل الجدي]

لا انشالله ما تتغير الخفجي تبقى على وضعها مستانسين كذا

[بارونة الخفجي]

احبك خفجي:biggrin:

[شامان]

ماألومكم في حب الخفجي يا أهل الخفجي الأصليين (العشيرقيين)

[البقى في حياتك]

يالبيه يالخفجي بس
اكثر شي فقدته الكورنيش yd.885
تسلمين عالموضوع جبتيه عالجرح

[/ خط أحمر /]

وردتني رسالة على جوالي تحمل في طياتها حكمة رائعة " الجميع يفكر في تغيير العالم ولكن لا أحد يفكر في تغيير نفسه "

نحن في المحافظة أحيانا نكون السبب في التخلف لماذا نرمي النفايات في الشوارع ونقول هناك تقصير من عمال النظافة ؟؟؟؟


ولماذا نخرب ونشخبط على الواجهات البحرية ونلوم البلدية ؟؟؟

لا بد لنا إن كنا نريد تطور المحافظة أن نطور أنفسنا ونطور علاقاتنا ببعضنا حتى يمكننا عمل شيء فيه تطور للمحافظة

وإلا لو كان ديدننا دائما هو أن نلقي اللوم على الآخرين فلم نستفيد غير الإثم جراء الغيبة

[ŘễMẾmβER Mẻ]

ي حلو الخفجي :rolleyes:

[رمز الأنوثه]

فديت الخفجي بس
باااي شكل تكون كبيره صغيره اللي تكون
لو أسكن بخيمه يالبيه بس
الله لا يغير علينااا كذاا حلوو و الله جد ماا أبيهاا تتطور كذا كاافي
تقبلي مررورري

[سعود السبيعي]

وانا بعد انولدت بمستشفى الشركة القديم :biggrin:

واتمنى ان الخفجي بيوم من الاياام تصك على الخبر :biggrin: اتمنى:rolleyes:


هذا اذا حجت البقر على قرونها اما تصك على الخبر كثرني منها :d

[خفجاوي موت]

عمار يالخفجي

[جميلة الشاشة]

اية ياحبيلك يالخفجي الحمدللة اني لقيت احد زيي يحب الخفجي وغيور عليها
ياناس واللة مافية زي الخفجي منطقة شرحة واهلها ناس يهبلون ومرة اجتماعيين ومافية احد سكن فيها من برا الا وارتاح فيها وماعاد يبي يتركها
الي نبية في الخفجي مجمعات ومطاعم على مستوى راقي ومرافق حيوية توسع الصدر
وشوية اهتمام بس
وتطلع ديرتنا احلى ديرة فديت الخفجي ومن سكن فيها

[خفجاوي موت]

لبيـه يالخفـجي دآر العـزّ مخبـوره..الـرووح من دونـها والله نفنيـها ..

يالبية يالخفجي
يالبى بحرها وشوارعها واسواقها القديمة
عمار يالخفجي
بس اللحين احس ان الخفجي تغيرت قبل مع ان الامور بسيطة لكن وناسة وفلة
لكن تبقى اغلى ديرة عندي بالوجود
على الرغم اني ماني ساكن فيها اجيها زيارة مابين وقت والاخر بس تبقين غالية يالخفجي

[عميل فدرالي]

لبى الخفجي وحبيبتي حااااايل :102:

[بحر الغلا]

زين لقيت احد مثلي مابي الخفجي تتغير كذا تهبببببببببببل.


انا بعد معاكم من مواليد مستشفى الشركة القديم .الى ألحين ريحة العلاج بخشمي حق الأطفال اللي نشربه ولونه وردي وثقييييل مثل ثقل اللبن علاج حق اللوز . وفيه منه مثل شكل اللبن . وريحة الديتول بالمستشفى فايحه يالبييييييييه.

اذكر عضيت دكتور فلبيني كان بالغصب يعطيني دواء كنت بالابتدائي:: متخلف

[روحك من روحي]

يالبية يالخفجي
يالبى بحرها وشوارعها واسواقها احبببببببببببببببببببببببببببك يااااااااااااااااااااااااااالخفجي

[هيله يارمانه]

صح لسانك لحن الحزن قلت اللي بخاطري وفرت علي تعب الكتابه

شـكــ وبارك الله فيك ـــرا لك ... لك مني أجمل تحية .

[saya]

و الله مشتاقه للخفجي yd.885 .. يآآآآلبى بس :101: ..

[احبك الوفاء]

موفق بإذن الله ... لك مني أجمل تحية .

[الاورنس]

احس الموضوع بناتي بس ودي اشارك

شكرا..

[خفجاوي موت]

بحر الغلا
لا اله الا الله
ذكرتني بعلاج الشركة
الزهري
يالبى ذيك الايام
الله واكبر

[عاشق كامري]

انا من اهل الخفجي > يالبيه اموت على الخفجي بسس :D
بس بصراحه انا مشتاق للخفجي لاني عشت فيه احلا اياام > ادرس بالدمام yd.885
ومدري كيف احس الخفجي الجو يختلف عن الدمام ومدن اخرى هههه

بس النسبه التطور
يليت يطورون النقل الجماعي > من يومني صغير هو نفسه ماتغير و القطار الى بالدمام تطور وصار احلى واحد :biggrin:

ويليت بعد يحطون قطار و مطار يصير اكوسس شي

شكرآ لك على الموضوع

:biggrin:

[سليمان الصقر]

والله ماراح تطورون يا أهل الخفجي ولا ينتهي الفساد والخراب إلا إذا راح ( واحد بس ) أعرفه زين

[الحزن ب القلب]

اولايعطيييس الف عافيه ع فتحس لهاذا الموضوع:101:..يالبى تراب الخفجي وبس واتمنى لو يطورون الخفجي لأن والله مايصير كذا احسه ظلم وش معنى الكل تغير الا احنا ليش؟؟ليش مافي احد يدافع ويتكلم ليش ؟؟احنا بنات مافي ايدنا شي انسويه بس الشباب وينهم ليش مايتحركون بس مهما صار ومهما يكون راح نضل نعشق الخففففجي يالبيه:102:كلنا معس يالخفجي تطورتي ولا ماتطورتي بنضل نحبس:102:

[مجرد إنسانه]

والله معك حق بكل الي قلتيه


ونفس السؤال انا دآيم آردده ليش الخفجي مآتطور زي غيرهـآ ..:frown:

ليه آحنـآ وش نـآقصنـآ ..

الخفجي محتاجه ومحتاجه كثثثثر واهم حاجه محتاجينها

مولات :biggrin:

زي ا لعالم والله تعبنا من الخطوط كل مابغينا حاجه ي الله ع الكويت ولا



الدمام :mad:

حتى المنتزه النسائي الي هو المتنفس الوحيد مافيه تطور نهائي

وكانه فاتحينه لنا صدق < صصرنا مانحب نروحله لانه ممل جدا ومافيه جديد

ويوم سوو مول سو مول كبر يدي من ادخل من البوابه اشوف نهايته

ليه ي عـآلم طايحين من عينهم لـ هدرجه :confused:

شي يقهر وربي

بس رغم ذالك نحب الخفجي وتسوى عندنا الكثير :101: