القوافي الصعبه

[حمد الدليهي]

لماذا



شحيح فـي مـد المحبْـه لمـاذا=بخيل عمرك مابعد قلت لـي خـذ
هذا مع هذا وهذا وهذا=ماشذ واحد وانت في منّهجكْ شـذ
سحابتـك تنثـر مطـرهـا رذاذا=واشوف ماها مابعد طش لـي رذ
شجـاع طـاح ولاذ بحمـاك لاذا=واصبح أسير وُينّْسي جهده الفـذ
قلبي لغيرك ماجعلته مـلاذا=طحت بهواك وغذ من لاذبك غـذ
نبـذت كـل الغيـد لجلـك نبـاذا=وبذت خفى .. تجتاحني سبتك بـذ
انت الوحيد اللـي خذيـت اتخـاذا=والا ان غيرك سالفـه كلهـا هـذ
فيك الحلا ماهو في هـذا ولاذا=وطرفك لاسلهم جيت كلي إليّا قذ
لاعاد تسأل ليّْهْ أحبـك لمـاذا=هاك الأجابه .. ميّت بحبك وخذ

[حمد الدليهي]

مع السلامه

مع السلامه وهي ماهـي مـن الخاطـر=قـررت أودعـك توديعـه بـلا رجعـه
وانحي سوات النفيض اللي بـلا ماطـر=قفيت عنّْـك وانـا فـي داخلـي وجعـه
طـال انتظـاري وانـا متأمـل وناطـر=لكن حمام الوفاء لي ماطرب سجعه
بالأمس اجابـه لجـل عينـاك واخاطـر=واليوم ماعاد لي في يمتـك نجعـه
شاطر في رايك وانا بالراي ماشاطر=كل ٍ على جنبه اللـي ريّْحـه ضجعـه
والآيه اللـي تطابـق فيـك فـي فاطـر=وشخصيتك لـو تطـاول مابهـا شجعـه
بيّـن نشـاط الكسـول وبيّـن الشاطـر=الهجر يامعذبـي حـدك علـى الهجعـه
مهره أصيلـه ماهيـب الناقـه الفاطـر=والحـر ماتـاق طلعـه يمـة البجـعـه
وختامهـا وِخسـاره مـاهـو العـاطـر=فجعتنـي فجعـة ٍ مابعدهـا فجـعـه

[حمد الدليهي]

آيل للسقوط

لي وليف ٍ ماهـو آيـل للسقـوط=ولّفتْه لي عند غيري ماولـف
محتوى فكري وانـا منّـه مخلـوط=فـي غـلاف القلـب كلـه منغلـف
سبّْتـه ذوُقـت عذالـي حـنـوط=في نهار ٍ فيه كـل ٍ يصطلـف
انتهى شوط وُبقـى مذخـور شـوط=فـي مبـاراة ٍ .. حقيقـه تختلـف
حارس المرمـى مفهـيْ ومحطـوط=مـادرى موجـود وإلا انّـه ذلــف
الفريـق اللـي يضـمـه للهـبـوط=كنت أظنه حـارس ٍ مالـه خلـف
عايش ٍ دنيـاه فـي هـم وضغـوط=هم ماهو هم عين ولاسلـف
اثريّْ الهقوات ماهي في شـروط=شفت في عينـي ودنيانـا تلـف
الحرامـي يعتـرف ماجـاه ســوط=اعجـب القاضـي حرامـي ماحلـف
شال حمّله فوق ظهَره ْنوط نوط=تالف ٍ مخه ومخيّ ماتلـف
مايجي بحمـاي فـي لحظـه يحـوط=لي ملفْ وله حسب نهجـه ملـف

[حمد الدليهي]

مجاهيم وغشاش

سلام ياللي حاش طيب وُفْاء حاش =شيـخ ٍ تسلسـل شِيخـتْـه مالطشـهـا
شيخ ٍ وصيته ناش نجـم الجـدي نـاش =ياكـم كـبـد ٍ بلـهـا مــن عطشـهـا
اسمه ليامن مر راسي علي شـاش =وكـن الكنـوز احوشـهـا وافترشـهـا
تسقـط ملاييـن الأوادم وهـو عــاش =تـفـداه قــوم ٍ ماتـرخْـص دبشـهـا
فهد ابـن عجـران لـه داخـل الجـاش =مكانة ٍ هـو حرهـا هـو وُحشهـا
اهـل القلـوب اللـي مجاهيـم وغشـاش =قامـت علـي ياشيـخ تلـوي خششهـا
لـولاك جبـت السالفـه كلـهـا كــاش =ذكـرت ذيـك الناهقـه مـع جحشـهـا
لعنـت خيّرهـم مـن الطـاش للـطـاش =قلـت الجنايـز قـلـت هــذا نعشـهـا
أخـر زمـن ياشيـخ رعيـان الادبـاش =تبـي تسيّـد يــوم خـلـت عششـهـا
عمشا يحرشها ورى السور عماش =الله كشـف فعـل العـفـون وغششـهـا
ياشيخ عظمي مـاورى عظمـي اعـراش =جنـب الأسـد يبطـون محـد ٍ نهشـهـا
شاعرك تدري فيه ماهـوب بطـاش =الا لاشاف القوم تخطي بطشهـا
هجـاد والا طلـعـة الـنـور مغـبـاش =مـن يقـرب الشجـرة لايامـن حنشهـا
اصبـر يجيـك العلـم مـع كـل طـراش =والعـش تـدري بيضتـه مـن فقشـهـا

[حمد الدليهي]

ضيف ماسنجر

استنفرت حالتي واصبحت فـي دِنّجـر=من يوم شخصك منعني وصله وهاجـر
بُعدك على القلب وثق طعنـة الخنجـر=خنجر جفا والجفا من سيرتـه ضاجـر
نجرت لـك بالمـوده وانـت ماتنّجـر=متحيـزم ٍ محـزم الصـده ومتعاجـر
يلين قاسي وقاسـي وانـت متحنّجـر=وليا متـى وانـت لامؤمـن ولافاجـر
اجي علـى يمتـك متحـادي وُمنّجـر=جـرت معاطيـش ذود ٍ وردت ساجـر
ضفتك في قلبي ماضفتك ضيف ماسِنّجر=ياللي عيونك هدبهـا كاسـي الحاجـر
خصرك مضمّر وصدرك ماهو مطنّجـر=تسلب عقول البشر في حسنك الغاجـر
غلطه ووضعي يشابه مسكـة الحنّجـر=عشقت لي بنت شيخ وُمنصب وتاجـر

[حمد الدليهي]

ابصم بالعشر

ياصدق منهو قال في بعض الأوادم خذ وخـل=ماخالفه هذا الكـلام الصـح وابصـم بالعشـر
من يتبع اهل المعمعه يطلع وسط راسـه نخـل=مادام ماهم في رزانة عقل والا فـي قشـر
انا تفحصت البشر شخلتهم شخل شخـل=لقيت الاغلب منّهم ماهـو علـى هيئـة بشـر
قيّمت بعض رجالهم .. والا (النساء) مالي دخل=صح وخطا متساويه في سلمهم علـى النشـر
كف الكرم ماينتوصف وصفهـا كـف البخـل=لاصارت الحسنات واللي عكسها دايـم خشـر
الذيب يفعل مافعل والا الرخل تبقى رخـل=من وين ماتسـرح وتمـرح بالنهايـه تنحشـر

[حمد الدليهي]

لعبة روس

غياهب وانت ياالأبداع فيني منهل الألغاز =قصيده والطلاسم من بدايتها ليا اخرها
تراديد الأنا من غير فعل تخالف الأنجاز =وحزات المهمه ماتبي شخص ٍ يأخرها
انا مامقصدي فايز ولافوزي ولافواز =محيط ٍ يلتطم موُجه ولاحسّْب بواخرها
ولاهو زود لكن عارف الجيّد من الممتاز =صعيبات القوافي ماتتعبني واصخْرّْها
قوايمها سليمه مابعد قامت على معكاز =أعطرها من الكادي والازرق منّه ابخرها
اشوف بعيني الصوره وحاط اطرافها البرواز =وفيها ضرس والبرواز مثل السوس ينخرها
وفيّها للجمل مشّهد وقيد ٍ للجمل وحجاز =وفيها للنهر منظر وعذب الماء ِ يزخرها
وشفت الشط والبصره وشفت الفاو والأهواز =مناطق تنشطر قسمين ماتحمي مفاخرها
وفيها لعبة رياضه تُسمى لعبة الجمباز =ماهي لعبة بنات الروس لعبة روس ذاخرها
طلاسم وانتهت غايب خبرها يكفي الإيجاز =وهذا غيض من فيض وكنوز المال داخرها

[حمد الدليهي]

قلبي عرجّلْه

مـرت علـي ماهـي طفوقـه وعجّلـه=جمالهـا ملّـفْـت وطـاغـي وُبـاهـر
غرو ٍ شوي. شوي خطوات رجّله=يسلـب عقـول اللـي يشوفـه وُقاهـر
فتـان عـرض لـي وسلهـم بنجـلـه=حرْيّـف شـاطـر بالتغـنـج ومـاهـر
مثـل العـرج يمشـي وقلبـي عرجّلـه=عرجة قطامي ٍ على الخـرب شاهـر
طـاف وُتعـدى عاشـقـه ماهرجّـلـه=يجمـع محاضـر هيبتـه والمظـاهـر
بيـن الحنايـا العـوج قلبـي نسجّلـه=مرتع غـلا مـن صـادق الـود زاهـر
اكبـر خطـا واليـه يـومـه فرجّـلـه=خـلاه مـن بيـن المخاليـق ظـاهـر

[حمد الدليهي]

امام وخطيب

يابومشلح ٍ خالط شعالـه رمـاد وُبيـج=ياكثـر النمونـه منّـه بالسـوق معروضـه
تحسبنّْهْ ابوحليقه وهو وارد أم عريج=كمومه ورى درعـا تفصْـلْ ومقروضـه
تخيّلجْ ولالك في خليج العـرب تخليـج=مادامك مريـض افكـار والنفـس ممروضـه
إمـام وُخطيـب و خطبتـك كلهـا تحـريـج=صلاتـك ماهـي مثـل الصلـوات مفروضـه
ياشيخ ٍ مزيّيّـف طبلولـك هـل التهريـج=ولاتدري أنك شيـخ فـي بنـد ابـو فوضـه
ترى بند ابوفوضه شيوخه بلا تتويج=على شاشة التلفاز صاروا لنا موضه
يروج لهـم دايـم قليـل الحيـا ترويـج=يـروج لهـم وعهـود الاخـلاص منقوضـه
طوابيـر لاهـم فـي مهـمـه ولاتخـريـج=واصابـع يميـن البطـش لابـد معضوضـه
زيـاده علـى التعـداد ومبنـجـه تبنـيـج=فئـه ماتطعمـهـا حــلاوه ولاحمـوضـه

[حمد الدليهي]

المؤشر

القلـب مـن صـدك علي مايبشّـر=والمـوت برقـه لاح وامطـر وُراعــد
ياصاحبي دشّر هـل الحكـي دشّـر=ومسعـد يشابـه بالنوايـا مساعـد
اذنـك لاترخيّهـا لـصـوت المحـشّـر=شـوره علـى جمـع الشمـل مايساعـد
نـاس ٍ سوالفهـم سـوات المـؤشّـر=مره نزول وُمـره يصيـر صاعـد
ويقشـرون البـيـض لــو ماتقـشّـر=ويسيسـون البيـت مالـه .. قواعـد
المبـتـسـم ماتـفـرقـه بالمـكـشّـر=والحلو يِقْلّبّ مر لا لا تباعد
انا عميـل الخيـر وان جانـي الشّـر=مانيـب مستسلـم ولانيـب قاعـد
امـر تدلـل وارفـع اصبـعّْـكْ واشّــر=حاضر ماأجـل مطلبـك بالمواعـد
وظفّت قلبي لـك وغيـرك مطشّـر=حبـك فـي قلبـي مايجـيّـه التقـاعـد

[حمد الدليهي]

قدام خشم الريم

العش باقي فيه تحذيفة الريش=بين الغصون اللي تمايح تعلّق
والفرخ طار وصاير ٍ عشه عشيش=تصغير عش وحلّق الطير حلّق
طير ٍ كفخ يطرد ورى لقمة العيش=وانا حصاتي في يديني وافلّق
قدام خشم الريم والذيب والجيش=حطيت لي سِلّْم عليه اتسلّق
اصعد وللقمه كفوفي مناويش=وعيون اخو سلمى تويق وتبلّق
يشوف له دوله والارزاق تحويش=دولة ادب ودروبها ماتغلّق
فاز الذكي ومضيّع العرف درويش=دربه زلق كم فيه عابر تزلّق

[حمد الدليهي]

ياشيخ ياللي من ورى الحد ياشيخ=تعال وافتح لك دروج المكاتب
حاكم على شعبه يوجه صواريخ =وحاكم على شعبه يزيد الرواتب
وحنا وابو متعب تحالف وتاريخ=يعجز يفرقنا روائي وكاتب
مطنوخ في فعله وحنا مطانيخ=دوم نتفاخر فيه بااعلى المراتب
ولائنا صامد ولا فيه تشريخ=مالاتبه مع ساير الوقت لاتب
هجيج والا ذود الامه مناويخ=متكاتفين ومحتوين المعاتب

[حمد الدليهي]

كوكتيل كاس الغدر

يالله وانت المعتلي يالواحد الفرد البصير=يامنقدذ ٍ يونس وهو في داخل الحوت ونجا
ياخالق ٍ هذا طويل وخالق ٍ هذا قصير=ومثبت جبال الحجاز مثبت ٍ سلمى واجا
ارفع إليك مدبرات العيش وابغاك النصير=في حزة ٍ لاتاه عبدك فيك ماخاب الرجا
صيّرت في تدبير عونك بالزمن مالا يصير=لجئـتلك مسلم ومؤمن عند غيرك مالجا
ادعوك واخفض لك جناح الذل في سكة مصير=ضعيف لك وحدك وبعض الناس عرضته حجا
اعطيتهم نبذة دروس الشعر في صبح وعصير=في مدح والا في ثنا والا فخر والا هجا
كوكتيل كاس الغدر شرّبه عندهم مثل العصير=الحقد معهم سجته والطيب معهم ماسجا
الوقت دايم يكشف اللي منهجه ملعون صير=مهما تبيّن تحت نور الشمس والا في دجا

[حمد الدليهي]

غصن الأمل

غصن الأمل وقّف نموُّه ويابس =يسبر عسى تهدي له الغيمه رْذاذ
على الرخا .. كل ٍ تنفّذ وقابس=والا على الأزمات ياقل الانقاذ
لي حاجة ٍ من دونها القفل كابس=القفل مفتاحه ورى الباب مالاذ
وجهي بشوش وُجه الأيام عابس=النفس ماتقبل ولانيب وخاذ
بيارق امجادي قبل عصر هابس=تاريخ مايحتاج للشرح يااستاذ
حتى ولو جسمي مايلقى ملابس=اخير لي عاري ولا صرت شحاذ

[حمد الدليهي]

هاجر حمام السلام

البارحه كان ليلـي صعـب جـداً صعـب=بانت مواريه لي من قبل وقـت العصـر
غديت دوله بلا سلطه وفوضـت شعِب=والشعب داخل حـدوده ماطلـع منحصـر
هاجر حمام السلام وكـل شـارع رعـب=يعني مصايب وسلب ونهـب بالمختصـر
ياهو تعب مابعـد مثلـه غزانـي تعـب=ولو طاول الحال عمري من وجوده قصر
وكل السبب من لعب بالقلب فعـلاً لعـب=لعب لعب لعب ياسر في دفاع النصر
خلا الجماهير تهتـف والمـدرب زعـب=والنصر ذاق الهزيمه والهـلال انتصـر
الصد يزعج مـن الهامـه لّْحـد الكعـب=والوصل يشبه لّْنهر النيل غـذى مصر

[حمد الدليهي]

أرمل الأفكار

دارت الأيــام والـعـاقـل تـأمــل=ماتقـدم خيـر يمنـى كــل طـاغـي
الأصـايـل تسـتـجـد وماتـسـمّـل=ماتخالفنـي وانـا صـاحـي دمـاغـي
الأصـابـع كل ماقـامـت تنـمّـل=زاغ قلـب الفـارس اللـي مايـزاغـي
والحليـب اللـي بقـى ماهو مشمّـل=ضايفـه موجود فـي نبـذة بـلاغـي
ارمـل الأفـكـار يقـعـد ويتـرمّـل=مايحقـق شهـرة جميـحـي وُنـاغـي
مـن تعـذّرْ عـن لـزومـه ماتجـمّـل=هيكل ٍ في ثوب وعقال وُشماغي
خطوتـه للخـلـف منـبـوذ ٍ مهـمّـل=من صفـوف المجتمـع لاغيّـه لاغـي
الجمْـل لاصـار يـجـزع ماتحـمّـل=لو هدرمرّه يصير أمرار راغـي
الثـوابـت واضـحـه ماتنـتـزمّـل=يفرق الرافض عـن اللـي قـال باغـي
الغنـايـم للـعـزوم الـلـي مصـمّـل=ماتحققـهـا سوالـيـف الـفـراغـي
مـن يتابـع نقـص غيّـره مايكـمّـل=عاش همـه دام للنـاس استساغـي

[حمد الدليهي]

خلـوه ياخذنـي


نهيّـتـهـمْ واشـوفـهـم ماتنـيـهـو=وانـا معـي شاهـد وشـاهـد وحـجّـه
علـى عماهـم فـي خطـاهـم تبيـهـو=وصاروا مثل طيـر ٍ تقـفـاه عـجّـه
افضلهـم اللـي بالتلـفـق تزيـهـو=اليّـا تحيّـزمْ شــوف ظـلـه يهـجّـه
الداهيه غيّـره رجـال ٍ تديهـو=مثل الذيابـه كـل ريع ٍ تلجّـه
مابـه تقهـوى مابـه إلا تقيـهـو=يابوزبـادي لـك زباديْـك رجّــه
يبقى هلا ممشـاي ماهـو هليهـو=ياللـي تخلـطـون التـمـر والتـرجّـه
مااحاول اسهى مع جمـوع ٍ تسيهـو=راسي مايرضى سيطرت قوم دجّـه
واللـي تعلـق فـيـه قلـبـي وُتيـهـو=تيهة مساري قيس مـع كـل فجّـه
خلـوه ياخذنـي علـى مايـبـي هــو=فـي طاعتـه فيـمـا يبيـنـي مـوجّـه
ملّهى مع اللي بالسوالف تليهو=اسـج فـي طاريـه سـجـه وسـجّـه