ماتصيـر احـداث مـن غيـر السبـايـب

[حمد الدليهي]

التكاتف عز

هذه ِ القصيده تم إلقاءها اثناء ملتقى قبيلة بني خالد في مدينة عنك عام 2007م المخصص للتبرع لــ ِ فوزي الدرعان بقضية قتل بعدما تنازل عنه صاحب الشأن جزاه الله خيراً.

تجري الأيام باافراح ومصايب=التساوي مابعد صارت تساوي
السلام ايمين ويسار الحرايب=يطوي شعوب العرب حاوي ولاوي
ماتصير احداث من غير السبايب=والحدث قسمه وبالله الرجاوي
ماكتب للعبد بامر الرب صايب=والحذر مافك من جور البلاوي
الرخا وقته ماهو مثل الصعايب=كل شرباكه لها قاضي فتاوي
التكاتف عز هيبه للقرايب=قوة ٍ تردع نوايا كل غاوي
التشاور حقق الغايه وجايب=جايب ويقضي على قمع الدعاوي
مرحبا في ربعنا والفال طايب=سيلنا مع سيلكم دربه نحاوي
يوم جيتونا ومنهين الطلايب=ابشروا بالخير والمعبود قاوي
مايعوّد منّكم رجال خايب=كل جرح وله طبيب وله مداوي
ماتثنى كل شاب وكل شايب=لجلكم ينساق ويهون الغلاوي
بشروا من دمعها يذرف سكايب=تلبس ثياب الفرح والحزن ذاوي
تبتسم وتشم ذعذاع الهبايب=تنثر القذله وترمي بالغطاوي
الفرج مضمون والشيطان غايب=علموها تهتني والذيب عاوي
فوزي الدرعان حنا له كتايب=جمع يتبع جمع من مال وعزاوي
جسم واحد كلنا ماهي غرايب=مايصيب الكبد يلحق بالكلاوي
وقفة ٍ تشفي ماهي وقفة دعايب=والمفتح مايوصف بالعماوي
من زمان ٍ فات وعصور ٍ ذهايب=والخوالد مدهم مد ٍ رهاوي
يمنحون الخيل واسمان النجايب=للبعيد وللقريب وللجلاوي
دارنا باامان ماهي في نهايب=دام ابومتعب لها حر ٍ نداوي
خادم البيتين فكاك النشايب=للمواطن عز ماعهده جفاوي
من عصى ربه ودل وعاد تايب=عند رب الخلق في خير وغناوي