الشعر

[حمد الدليهي]

الشعر له عندي مقام ومكانه
ومنزهه عن فاسد الهرج تنزيه
فيه اتفنن واتنقى اسمانه
افرح ليامن زان وان شان اعزيه
محشوم دايم عن دروب الاهانه
من وين ماوجهت عارف مغازيه
اتعب على قدره واعلّيه شانه
ماني على سود السوالف مْقزيه
ماخذ على المد الخليجي ضمانه
وان ماعرفت الفرس عارف حوازيه
في غير ربي ماخذيت استعانه
ماصرت شاعر بالأوادم تمهزيه
حافظ مثل كلٍ لْسانه حصانه
وكلٍ على طبعه يْواجه مْوازيه
والشاعر اللي اللي مايجوّد لسانه
على خطاه الناس تقدر تجازيه
ماهو على ماقال فارس زمانه
لابد له من يكشف امره ويخزيه