ياوجودي

[حمد الدليهي]

ياوجودي وجد منهو من ورى سلوى ووده
ينسمح له عند ابوسمراء ويسهجها تماني
شايبٍ له ذودٍ باطراف الحساء والمنع ضده
لاسجين ولاطليق وطاوع ظروف الزماني
طيبٍ من راس ابوه وطيبٍ من راس جده
من مقاديم الرجال ومن عريبين المجاني
كل ماعدو هل الطولات له ربعٍ تعده
مكرمٍ جاره ومكرم كل محتاجٍ وعاني
كل ماقام ايتنهت حط كفه فوق خده
والبلا لالاح برق وخايل اسهيل اليماني
حده الوضع السياسي والا انا حده موده
ماحدى الشايب على ذوده مْن الفرقا حداني
كن شلفا ذياب ابن غانم على صدري تقده
هيمنت في فعلها وارهت على حدب المحاني
كل مادلبح جهام الليل حاربت المخده
اتجرع مر فرقى صاحبٍ حبه كواني
مادريت اني متيّم فيه لين اعلن مصده
شي جاء قيس الملوح في عشق ليلاه جاني
تمضي الايام عجله والأمل عيا يرده
والحياة يْدور دايرها وفقدانه طواني
لا التفت عين اشقرٍ لاتاق في يمة مهده
شايفٍ ربداً خريش ولا لحقها مايعاني
كن ثوبه من تحت خصره ليا قفى يشده
والنحر طلة صباحٍ فيه تجديد الأماني
والقصايد من هجوسي فيه دايم مستجده
اتلذذ في تواصيفه وتوليف المعاني
مابقى الا غير اسولف بالحسن مافيه قده
وان ذكرت اسمه هو اجمل اسم ينطق به لساني