صباح فيه استبشر الشعب من عاد

[حمد الدليهي]

زاح الظلام وغرد الطير نشّاد
والنور حل وكل دامس يزيحه


صباح فيه استبشر الشعب من عاد
الحاكم اللي مانوفي مديحه

عاد ومعه عاد ابتسامات واعياد
كل الكويت برجعته مستريحه

عليه الاعين ماتهنالها رقاد
حزة غيابه والخواطر جريحه

والشعر لجله ينظمه كل قصاد
من دون ذكره ماتصد القريحه

القايد اللي قاد ماهوب ينقاد
له حنكةٍ بسياسةٍ له صحيحه

شال الكويت وحطها فوق الأشهاد
يراقبها عن كل هزعه وطيحه


خلا مكانتها تنامى وتزداد
براقها في كل دوله لميحه


دامت كويت العز في فخر وامجاد
والامن فيها خايبٍ من يزيحه