المشاعر

[حمد الدليهي]

قبل القروبات

اتلفّت بالمراقي وادور لـ طوُيل
فيه تبهيجة هوى النفس لاجاء ضيقها

هامته فرجه وتنّفيهْ سلوان وبديل
مهبط اللي تنحدر له بعد تحليقها

فيه تشخيّص النواظر لطلعٍ مايميل
والحرار يعززه طلعها تتويقها

والطواري وضعها بين حط وبين شيل
تدفع اقدامي على الشاهقه واويقها

والشعر لامن نظمته ماواجه مستحيل
كل صعباته مْبشّر على تطريقها

المشاعر ترفض الهزل وتروم الجزيل
والبحور تْغوص لاخر مدى تعميقها

كل معلومه لها عندي اثبات ودليل
اتخيّر واتفنن على تنسيقها

ماتبّين مثل شقراء تعارض كل خيل
مااجهل الساحه ومدرك هوى ذويقها

وان مدحت امدح من الناس كساب الجميل
وان هجيت انسف قوافل بشر واعيقها

وان تغزلت اثري الشعر بالطرف الكحيل
فقت ليلى العامريه معَ عشيقها

وان وصفت ارسم خيالي ماهوب امتار ميل
انقل الصورة وحارص على تدقيقها

شاعرٍ قبل القروبات وسناب الصهيل
قبل تطبيل الجماهير في تصفيقها

قبل تغريدة تويتر ورتويت الوكيل
والردود اللي تهافت علي تعليقها

عارف ابراهيم واسباب سموه الخليل
عارفٍ نجد المسمى وضلع طويقها

وابرهه لاجابوا اسمه عرفت ان فيه فيل
غزوته في سورة الفيل جاء توثيقها

والنهار إليا تنفس يزول وحل ليل
والغروب يراقب الشمس في تشريقها

والسنين افوات واطوّل عمر .. عمر النخيل
والجبال الشم ماهو سهل تسليقها

والكلام انواع فيه المصفّى والغسيل
والتجارة بالمكاسب على تسويقها

من شراء التقليد ماعاش في جودة اصيل
السلع ينّغش من لاعرف تفريقها

والرجال اشكال والمقتدي عكسه يعيل
والحظوظ تْصيب وتخيب في توفيقها

والكرم يبقى صفة جود ماهو للبخيل
والخلايق معطي ارزاقها خليقها

والجهل تعطيل للمجتمع في كل جيل
والمدارس تنميه فكر في تطبيقها

والتمني مايحقق على الواقع حصيل
كم وكم لي حاجةٍ ماحصل تحقيقها

والعوايد والمفاهيم داهمها دخيل
قلت ما اصدق وعيني نجح تصديقها

يابحر جده ما اشبّهك في بحر الجبيل
كم على شاطيك عبره خفى تخنيقها

صار صدري سجن والهم في وسطه نزيل
واحبستني غبر الايام في تطويقها

والخطا والصح في قوم صمت وقوم قيل
هيمنت منظومة الكذب في تلفيقها

وانت ياغيمٍ تزبّر وطشه مايسيل
ماترجّتك الاراضي تبلل ريقها

ماجهل ذواقة الزبد خضاض الصميل
عند بدوٍ .. قايم ابليس في تفتيقها

مايشيل الحقد فالناس تمسيح المُزيل
في شدوقٍ مبغضه واكشفت نطيقها