يوميات عبرود في شوارع الرياض

[عبرود]

بسم الله الرحمن الرحيم



السلام عليكم ورحمة الله وبركاته


اما بعد


أعتذر على كتابة القصص باللغة العامية لأني بصراحه ما أعرف أكتبها باللغة الفصحى وإذا كتبتها بالفصحى بخربط كثير




المقدمة

انا انسان يخاف الله كثيراً ويؤمن بالقضاء والقدر حيث سبق وان عملت بوظيفه محترمه براتب محترم ولله الحمد وعملت في هذه الوظيفه لمدة خمس سنوات وشهران فقط ولكن أمر الله فوق كل شيء
حيث تم فصلي من العمل أنا ومجموعه من الزملاء عددنا اكثر من 150 موظف بسبب أمرٍ ما حدث لي قبل سنتين وسوف اذكر هذا الامر في موضوع لاحق

المهم بعد ما فصلت من العمل جلست أبحث عن وظيفة ولم يكتب الله لي الرزق وبعد عناء دام لمدة سنتين ، فكرت بأن أشتري ليموزين وأشتغل عليه حتى يكتب الله لي الرزق بوظيفة طيبه

المهم

في هذا الموضوع بكتب لكم بعض المواقف اللي تصير لي مع بعض الزبائن اللي أوصلهم مشاويرهم في شوارع الرياض ويمكن في المستقبل القريب في شوراع جده على حسب الظروف اللي تجبرني اروح لجده

وبصراحه أنا لقيت بعض المواقف المضحكه والمحزنه والمفيده في نفس الوقت وبعض القصص اللي أحس انها من الخيال ولا اتوقع بأن تحدث في الرياض وهي حقيقية خلال عملي على اليموزين وقلت في نفسي خلني اكتبها على شكل حلقات ويمكن في المستقبل تستفيدون شي من هذي المواقف والقصص


طبعاً بداية شغلي في الليموزين بدأت في ثالث يوم في شهر رمضان المبارك من عام 1428هـ وإلى يومنا هذا
وبصراحه اول مشوار وأول زبون وصلته كان رجال شايب في العمر وجنسية إماراتيه وكان المشوار من شارع الشميسي إلى شارع البطحاء
ولما وصلته للمكان اللي يبيه قلت له مابي اخذ منك شي بس ابيك تدعي لي بالتوفيق عشان ربي يبارك لي في هذي الشغله
والحمد لله من بعدها انا بنعمه ولله الحمد

وأسأل الله القدير رب العرش العظيم بأن يوفقني في هذه العمل وأن يبعد عني المشاكل وشر الفتن ما ظهر منها وما بطن
إنه سميع مجيب


نبدأ بالحلقات


الحلقة الأولى

كلعادة كلّ يوم أقوم الصباح الساعة 8 صباحاً عشاني في رمضان ولا في الايام العاديه اقوم قبل صلاة الفجر وأدخل دورة المياة وأغسل وجهي وأتوضى وأنظف أسناني ولازم اهم شي تنظيف أسناني عشان تدرون إذا ركبت الزبون اجلس أسولف معه ولازم تكون ريحت فمّي زينه وبعدها البس ثيابي وأتطيب وأتعطر وأدلع نفسي عشان تعرفون إذا ركب معي الزبون شم ريحتي ولقاها زينه يمكن يقول لي ابيك كل يوم توديني وتجيبني وبعدها اكسب من وراه بعد الله سبحانه رزق طيب وبعدين اروح اصلي الفجر ومن بعد صلاة الفجر وبعدين اركب السياره وأقول دعاء الركوب وأقول أذكار الصباح على بال ما تسخن السياره وبعدها أطلع من عند بيتنا ويبدأ الشغل وسبحان الله احس الشغله الوحيده اللي يبدأ الشغل حقها من بعد ما تطلع من باب البيت

المهم

من بعد ما أطلع من البيت أبدأ أتلفتت يمين ويسار في الشارع ودور لي على واحد واقف ولا على بزر اوديه للمدرسه ولا على موظف أوديه لشغله ولا على واحد ماسك شنطته ويبي يروح للمطار عشان يسافر وعلى على وحده مطلّقه معها شنطتها تبي تروح بيت أهلها ولا على واحد معه ظرف مليان فلوس يبي يروح للبنك عشان يودع فلوسه ولا على واحد معه ملف علاقي أخضر وفيه أوراقه وشهاداته ويبي يقدم على كليه أو على وظيفه أو على أي شي بس اهم شي يسنّع عمره

وسبحان الله كل الزباين اللي أركبهم الصباح تصير ريحتهم زينه وحلوه وأما إذا جيت أركب الزباين من بعد صلاة الظهر
وأخصاً طلاب المدارس تشم ريحتهم افففف مرررره مشكله تشم ريحت ماصات وريحت طباشير وريحت مقصف وريحت طوابير
ههههههههههه
قسماً بالله لو الواحد فيهم لو مشا من جنب جدار كان طاح الجدار من قوة الريحة بصراحه أنا ودي أعرف ليش الناس هذي ما تحط دواء عرق أو يشترون لهم معطرات من بودي شوب أو نكتار وهي خاصه للجسم وتخلي ريحت الجسم إذا عرّق تصير زينه

المهم نرجع لموضوعنا

وبعد ما يركب الزبون تبدأ المواقف


مره من المرات ركبت لي حرمتين وشكلهم طالبات من طلاب جامعة الملك سعود اللي في عليشه وكنت ماخذهم من طريق النهضه ولما ركبو معي
قالو لي : نبي جامعة البنات اللي في عليشه
قلت لهم : ان شاء الله

المهم

وحنّا في الطريق
كان في واحد حمار الله يكرم الحمار عنه وغبي الله يكرم الغبي عنه وقليل أدب الله يكرم قليل الأدب عنه كان واقف من بعيد وراكب لكزس وكان جالس يطالع في البنات وكان يبي يرقمهم والقهر أننا في شهر رمضان وفي الصباح يعني الاخ مافكر في الصيام والعياذ بالله ولا فكر باللي يسويه هل هو حرام ولا لا
المهم

الاخ بدأ يلحق وراي وعلى باله أني هندي أو باكستاني وكان يمشي من جنبي وإذا مشا من جنبي ألف عليه بشويش عشان أحجر له بالرصيف وأبيه يصدم أو يحك في الرصيف وكان يدق لي بوري وكنت أنا مسوي نفسي ما اشوفه ولاني منتبه له وكنت أسوي نفسي غشيم في السواقه واضرب فرامل بقوه في وجهه عشان لو يصدمني والله لأنزل وأتوطى في بطنه

المهم

الاخ الذكي عفواً قصدي الغبي الله يكرم الغبي عنه كان ملصق الصدام حقه بالصدام حق موتري من الخلف وكنت أنا مسرع شوي ولما قربت من عند المفرق اللي يطلعني من الفرعي على العام لفيت بسرعه هههههههههههههههههه
والأخ لف وراي بسرعه بس ما حسب حساب الرصيف اللي أنا كنت ملحم فيه وبعدها رقا الرصيف وصقع الرفرف حقه من قدام وجلس يدق لي بوري من قوة القهر وبعدها ووقف ونزل يشوف سيارته وأنا قد رحت عنه وبعدت وأفتكيت من شره وأفتكيت من البنات اللي كانو راكبين معي بعد مانزلتهم من السيارة

معليش نكمل معكم بعض المواقف في الحلقه القادمه لأنه بصراحه جاني النوم

وللحديث بقية


محبكم في الله وسائق الليموزين / عبرود

[أبو رائد]

أخونا الغالي / عبرود

الله يوفقك .. لما يحب ويرضى

وسلمت .. على هذه الحلقة الأكثر من رائعة


مواقف رائعة .. ومضحكة .. وبنفس الوقت نستفيد منها

من خلال معرفة سلوكيات المجتمع ..


لك الشكر والتقدير ،،

[نجمة السهيل]

تو اعرف ان البوري هرن السياره طيب ماخفت يصير له حادث جبير وتكون انت السبب يا سائق اليموزين

دمت بخير
نجمة السهيل

[نوني الامير]

ياحليلك ...كل هذا والبنات ماهم دارين عن شي؟؟؟؟؟؟؟؟؟؟؟

منت هين شكلك ... انا من الذين انضموا إلى قائمة المتابعين ....

الله يوفقك ... ويرزقك الرزق الطيب دوماً ...

:101:

[عبرود]

قبل ما أبدأ بالحلقه الثانيه احب اشكل كل عضو وكل قارء تم مروره على موضوعي المتواضع وإن شاء الله يكون اعجبكم

معزبنا ومدير منتدانا ابورائد / بصراحه تشرفت بمرورك على موضوعي المتواضع وأن شاء الله يكون عند حسن ضنك

الاخت نجمة سهيل / اولاً تشرفت بمرورك
وثانياً مع احترامي الشديد للقراء والأعضاء انا اعتبر كل شاب وكل رجل يبحث عن المعاكسات ومطاردة النساء مثل حذائي اعزك الله والأشكال هذي اتمنا من الدوله ان تتعامل معهم مثل ما تتعامل معهم دولة الإمارات الشقيقه وهو تشهيرهم بالجرائد وحلق رؤسهم

الاخ العزيز توني أمير / اولاً تشرفت بمرورك
وثانياً احب اعطيك معلومه عندي نظام اتبعه في عملي على الليموزين إذا لحقني أي كلب اكرمك الله مثل صاحب الكزس لا اتناقش معه الا إذا لمس سيارتي بعدها اعرف اخذ حقي مثل الناس وإذا كان ينظر فقط لا اهتم فيه بال اعتبره مثل الرصيف لا اعطي أي اهتمام


أسأل الله القدير رب العرش العظيم بأن يهدي شباب المسلمين وأن يعصمهم عن شر الفتن ما ظهر منها وما بطن إنه سميع مجيب


نبدأ بالحلقه



الحلقة الثانية


هذا الحلقة صارت احداثها في وسط شهر رمضان
رحت لخويي وهو ساكن في حي الروضه قريب من مخرج 11 ولما وصلت عنده اذن المغرب وأكلنا تمر مع شوي لقيمات مع شوي بسبوسه وبعدين رحنا للمسجد أسمه مسجد خديجة بنت خويلد وهو مسجد جديد ما شاء الله عليه

المهم

كان نظام خويي في فطور رمضان يحط الفطور بعد صلاة التراويح مو مثلنا بعد صلاة المغرب على طول
المهم
الرجال الله يجزاه خير عزمني على مطعم بصراحه مررررره روعه بس غااالي شوي وهو مطعم اسمه مطعم الألب وهو أكل سويسري وبصراحه نظام المطعم تقول جالس في احدا بيوت السويسرين اللي في جبال الألب اللي تغطيها الثلوج
وبصراحه كانت طريقة تقديم الأكل حلوه بالمرررره
وهي
تطلب لحم او سمك او دجاج ويجيبونه لك نيّ توه ما طبخ ويجيبون معه وجار والوجار هذا بالحجازي يسمونه كانون وهو اللي فيه جمر عشان تشوي اللحم اللي يجيبونه لك
وبعدها تجلس تشوي لنفسك وتاكل بس والله حركه حلوه بس مثل ماقلت لكم عيبه غالي شوي
القصه
لما جينا بنروح للمطعم
خوي ما شاء الله عليه معاه لكزس 460 موديل 2007 لما ركبنا السياره وجينا بنطلع من البيت شاف سيارتي وقال لي الليموزين هذا لك
قلت له : إيه
قال لي : تكفى خلنا نروح فيه ودي اسوقه وشوف كيف شكلي بالليموزين
قلت له : مو مشكله بس شرط تحاسبني على المشوار
هههههههههههه
كنت امزح معه
وبعدها رحنا للمطعم بسيارتي وكان هو اللي يسوق

معليش احس اني طلعت برا الموضوع
نرجع لموضوعنا وهو مواقفي مع الزبائن الليموزين
طبعاً المواقف كثيره
بس
اليوم بقول لكم أهم ثلاث مواقف صارت لي في شهر رمضان

الأول محزن والثاني يقهر وأحس انه ابتلاء من رب العالمين والثالث مفرح وتعويض عن الموقفين اللي صارو لي قبلها

اولاً الموقف المحزن

بصراحه انا لما طلعت من بيت خويي وكان بيته ما شا ء الله في حي كله بيوت راقيه وكله ناس تحس انهم ما شاء الله عليهم شبعانين من الدراهم(فلوس)
القصه وما فيها

وأنا جالس في السياره قبل ما اتحرك من بيت خويي شفت لي حرمه عجوز طالعه من احد البيوت اللي قريبه من بيت خويي وبصراحه شفتها تمشي وسط الحاره والشارع العام بعيد عنها قلت في نفسي شكلها تبي ليموزين
المهم
مريت من عندها ودقيت بوري وبعدها شافتني وأشرت لي وركبت معي
وقالت لي : تكفى ياولدي أبي أي مسجد في حي العليا أو شارع التحليه أو التخصصي
قلت لها : ان شاء الله
وبصراحه وحنّا في الطريق
قالت لي : ياولدي ماتعرف احد من أهل الخير يفزع لي في علاج بنتي الله يشفيها لي
قلت لها : والله اهل الخير اللي اعرفهم واجد بس المشكله من اللي يسخر لهم بأنهم يساعدونك
قالت لي : والله ياولدي أنا عندي بنت ومريضه بمرض مايعلم فيه الا الله وعلاجها قالو لي في امريكا وأنا ياولدي حرمه ضعيفه ولا عندي شي اقدر أساعدها فيها غير أدعي الله سبحانه وتعاله بأن يشفيها

بصراحه بعدها ضاق صدري

قلت له : الله يعينك وبعدها عرفت وش كانت تبي بالمساجد اللي في حي العليا وشارع التحليه او التخصصي
وبعدين نزلتها عند المسجد اللي في اخر شارع التحليه والقريب من مركز الدفاع المدني قلت في نفسي إن شاء الله تلقا لها واحد من أهل الخير يفزع لها في موضوعها
وبصراحه لما جت تنزل
قالت لي : كم حسابك ياولدي
قلت لها : حسابي ابيك تنزلين وتدعين لأمي بالشفاء وتدعين لي بالتوفيق
وبعدها الله يهديها جلست تبكي وتصيح في السياره وهي تدعي لي وبيني وبينكم حسيت انها صادقه في كلامها

أسأل الله العلي القدير بأن يشفي بنتها وأن يفرج همها وهم كل مسلم


وثانياً الموقف اللي احس انه ابتلاء من رب العالمين وهو يقهر من قلب

دخلت شارع العروبه في حي السليمانيه ولما وصلت عند سوبرماركت بنده وقفتني حرمه
وقالت لي : ابيك توديني لحي البديعه عند الاسواق الشعبية

قلت لها : إن شاء الله

قالت لي : بكم توديني

قلت لها : بـ 20 ريال

وبعدها ركبت بدون ما تكاسر وبدون ما تعترض عن قيمت المشوار

الحاصل

لما وصلتها لمشوارها وجت تنزل قالت لي كلام نزل علي مثل الصاعقه والعياذ بالله

قالت لي : بصراحه ياخوي أنا ماعندي فلوس وإذا تبي حسابك رح دبر لك مزبن أو شقة مفروشة وبعدها خذ حسابك على راحتك
وبصراحه كان صوتها وهي تقول لي الكلام هذا فيه نبرة حزن والمشكله كان عمرها على ما اعتقد ما بين 40 والـ 35
المهم
بعدها
قسماً بالله العظيم بغت عيني تدمع من القهر

وقلت لها : انزلي وسكري الباب والله يستر علينا وعليك وإن شاء الله ربي بيعوضني حسابي منك
وبعدها صكت الباب ومشيت وأنا أمشي حسيت ان ابليس ملعون الوالدين جالس جنبي على الكرسي ويقول لي : ياعبرود ياغبي أرجع لها وخذ حسابك على راحتك والله فرصه ما تتعوض
وبعدها تعوذت من أبليس وجلست استغفر وأقول الحمد الله الذي عافاني ولم يبتليني

آ خ خ خ خ خ خ بس


والموقف الثالث والمفرح واللي عوضني عن المواقف الثلاثة

كنت امشي من عند كوبري جسر الخليج وكان اتجاهي لجهة الغرب وكان فيه محلات تأجير السيارات اللي تحت الكوبري وكانو واقفين إثنين من الشباب وهو من أهل عفيف وكانو عتبان

وكان أعمارهم تقريباً على 20 سنه وبصراحه اشكالهم تقول دشير وراعين هجوله ومشاكل بس والله العظيم طلعو عن ألف رجال
لما وقفت لهم
قال لي : الاخ سعودي هلا والله
ابك نبي مستشفى الإمان ونبي نسجل موعد هناك وبعدين نبيك تودينا عند ملعب استاذ الملك فهد
قلت لهم : خير ان شاء الله من هنا لمستشفى الإيمان باخذ منكم 25 ريال ومن مستشفى الإيمان إلى ملعب الملك فهد باخذ منكم 30 ريال
وبعدها
قالو لي : مو مشكله بس اهم شي نوصل بسرعه للمستشفى

المهم

لما وصلنا للمستشفى لقينا الدكتور خلص دوامه وبعدها

قالو لي : خلاص ودنا للأستاذ الملك فهد
وحنّا في الطريق نمشي
قال لي الولد : ابك يالرجال تعرف محل يبيع فاكس

قالت لهم : هذا حنّا قريبين من حراج بن قاسم خلنا نشوف لكم فاكس يمكن عندهم
وبعدين قلت لهم : وش تبون بالفاكس
قال لي : والله أبوي موصينا وقال لنا إذا رحتو للرياض جيبو معكم فاكس

وبعدها جلسنا ندور في الحراج حق بن قاسم تقريباً نصف ساعه ولا لقينا شي وبعدها
قال لي : ابك خلاص رجعنا شكلنا تأخرنا على أهلنا

القصه أنا كنت متفق معهم على 25 ريال وعلى 30 ريال والمجموع 55 ريال وكنت بصراحه خايف من أشكالهم وقلت في نفسي شكلهم لما أوصلهم بيسحبون علي ويضحكون علي ويجحدوني
وبصراحه كل التوقعات اللي قلتها طلعت العكس
قبل ما انزلهم قال لي واحد فيهم

ابك انت وش ترجع
قلت له : انا شمري
قال لي : والله والنعم ابك انتم ناس راعين كرم

ولما وصلتهم لمكانهم اللي يبونه

قال لي اللي راكب قدام : ابك انت شمري وانت كريم بس والله ما تصير اكرم مني وبعدها دفع لي 80 ريال على المشاوير اللي وديتهم لها وأنا كنت متفق معهم على 55 ريال وقلت له : ليش تدفع لي الزياده
قال لي : ابك الزياده حقت الدوران في الحراج عشان نشتري فاكس

وبعدها خاب ضني فيهم
وقلت لهم : هذا جوالي متى ما بغيتو شي دقوي علي وانا ان شاء تحت الخدمه في أي وقت
وبعدها جلست ادعي لهم وأقول الله يوفقهم ويفرج همّهم ويرجعهم لأهلهم في عفيف على خير


اخ خ خ خ خ خ خ خ

بصراحه احس اني تعبت وأنا اكتب الموضوع

عن اذنكم بروح مشوار مع ولد عمي اسمعه يدق لي بوري

وللحديث بقية في الحلقة الثالثة مع يوميات عبرود في شوارع الرياض


محبكم في الله وسائق الليموزين : عبرود

[نوني الامير]

اذنك معك ,,,, :smile:


yx.019


اسلوبك غير شكل... :tongue:

زين محد يستقعد لك ... ساعتها بتبلش....:cool:

[حماد التميمي]

ابي ابوس راسك ياعبرود ,,

انشهد انك رجـال ,,

والله يفتح لك ابواب الرزق من حيث لا تحتسب ,,

والله يعطيك القوه والصلاح والعافية ويبعد عنك الفتن ماظهرا منها ومابطن

[أحمـــد]

أسأل الله القدير رب العرش العظيم بأن يهدي شباب المسلمين وأن يعصمهم عن شر الفتن ما ظهر منها وما بطن إنه سميع مجيب




آآآآآآآآآآآآآآآآآآآآآآآآميــــن وجـــزاك اللــه خيـــر يــاعبـــرووووود ...



<<<<< أنضـــم لقـــائمـــة المتــابعيـــن ..



عبـــروووود اللــه يـــوفقـــك وييـــسر لــك أمـــرك ويـــرزقـــك علـــى نيتــك الطيبـــه ان شــاء اللــه



ســــــــــــــــــــــلاااااااااااااااااااااااااا ااااام :101:

[الدووووخي]

الله يوفقك ويرزقك يارب ’’’

[نجمة السهيل]

والله شي

<<<<<<<<<<<<<< متااااااااااااااااااااابعه بصمت

[*&* جوري *&*]

مثل ماقلت أخوي عبرود .. وظيفتك / هي الوظيفه الوحيدة الي تبدأ من أول ماتسكر باب البيت ..
الله يعطيك خيرها ويكفيك شرها ..

المواقف الي قلتها : حلوة وعفوية .. وموقع الجمال فيها : ( العبرة ) ..
تصادف ناس كثير .. من ثقافات مختلفة ومناطق مختلفه ( الله يعينك من جد ههههههههه ) ..




سؤال خارج النص / ليش مختار إسم ( عـبرود ) ؟؟


متابعين لك .. والله يوفقك .. ويعطيك على قد نيتك ..

[حنين]

http://www.alraidiah.com/vb/uploaded/mals.gif




ماشاء الله عليك اسلوبك روووووووووووووووعه



الله يوفقك ويرزقك الوظيفه اللي في بالك






http://www.alraidiah.com/vb/uploaded/mals2.gif

[ســـــوار]

اتابعك يا عبود ممتاز... وتلقائـــي

[عبرود]

قبل أن ابدأ بالحلقه احب ان اشكر كل عضو وكل قارء تم مروره على موضوعي المتواضع وان شاء الله اعجبكم

الاخ أو الأخت جوري : اولاً تشرفت بمرورك
وثانياً سبب أختياري لأسم عبرود مثل سبب اختيارك لأسم جوري
وثالثاً فكرة الاسم أخذتها من خياط اخيط عنده في الرياض أسمه خياط عبرود ومعنا كلمت عبرود هي رأس الرصاصه التي تخرج من البندق وهذا المعنا عند اهل الشمال في السعوديه


نبدأ بالحلقة


الحلقة الثالثة

طبعاً مثل ماقلت لكم في السابق جميع المواقف هذي حدثت في شهر رمضان عام 1428هـ

الموقف الأول

يقول المثل خذ الحكمه من أفواه المجانين بصراحه قبل كم يوم كنت طالع من حي عرقة وكنت نازل من الكوبري اللي ينزلك على جامعة الملك سعود وأنا واقف عند الأشارة حقت سوبرماركت التميمي جاني رجال ما شاء الله عليه حجمه بدون مبالغة كبر الكامري اللي أنا راكبها وكان لابس لبس مرتب بس المشكله وش هي أنه اول ما ركب وبدون مقدمات
قال لي : قسماً بالله العظيم ماني مدخن معك والله العظيم ما ادخن معك
وأنا بصراحه كنت مفجوع شوي وبعدين
قلت له : طيب مو مشكله لا تدخن بس وين تبي أوصلك ؟

قال لي : إذا دخنت ابيك تظربني قدام العالم

وأنا بعدها عرفت أن الرجال مو صاحي وفيه شوية مس والعياذ بالله وبيني وبينكم بصراحه كنت ميت من الخوف لأنه ما شاء الله عليه جسمه عبارة عن مدرعه لو زعل علي يمكن يخطفني أنا والسيارة مع بعض والله العظيم ما تعوق معه

المهم تدرون وش قلت له

قلت له : بصراحه أنا بلف يسار مع الحارة عشاني معزوم عند شباب على السحور
وكنت ابي اصرّفه

المهم

وبعدها نزل على طول
وقال لي : سأل صحابي الرسول صلى الله عليه وسلم وقال له هل المسلم يزني يارسول الله قال نعم وقال له هل المسلم يسرق يارسول الله قال نعم وقال له هل المسلم يكذب يارسول الله قال لا وبعدها قفل الباب بقوة
وبعدين أنا كنت ابي ارد عليه
وقلت له : يا اخ اسمعني
وقال لي : اقول انقلع يلا ضف وجهك بسرعه
وأنا بعدها على طول مشيت بسرعه وكنت مرعوب (خايف)
لذا صدق المثل اللي يقول خذ الحكمه من أفواه المجانين سبحان الله على أن عقله شوي رايح فيها ألا انه بصراحه احرجني بالحديث اللي قاله لأني بصراحه كنت اكذب عليه عشان كنت ابي اصرّفه ولو شفتوه والله ما تلوموني


الموقف الثاني


بعد ربع ساعه من تصريفي للرجال المجنون شفت لي حرمه عمرها تقريباً 45 سنه ومعها بنتها ووقفتني
وقالت لي : نبي حي البديعه عند سوق الرياض الدولي
قلت لها : إن شاء الله
قالت لي : بكم ؟
قلت لها : 25 ريال
وبعدها ركبت على طول هي وبنتها

الحاصل

لما كنت في الطريق أنا كنت على باللي يبون أسواق القرية الشعبيه اللي في البديعه واللي قريبه من نادي النصر
هههههههههههههههههههههه
ولما وصلنا للأسواق القرية الشعبيه

قالت لي الحرمه : الله يجزاك خير ياولدي بصراحه مشيتنا في البديعه وتبي الصراحه من زمان ما تمشينا فيها عاد يلا الله يجزاك خير رجعنا عند سوق الرياض الدولي وبصراحه احس انك خربطت وضيّعت صح ولا لا ؟
قلت له : إيه والله أني خربطت بس ماعليكم بنخصم لكم من قيمة المشوار
وبصراحه الله يجزاها خير لما وصلتها عند بيتهم اللي جنب السوق عطتني 25 ريال + 10 حقت التضييعه اللي ضيعتهم فيها
وقالت لي : هذي 10 حقت التمشيه اللي مشيتنا فيها في البديعه ومره ثانية فرّق بين القرية الشعبية وسوق الرياض الدولي وخلك منتبه زين

وبصراحه بعدها انحرجت وحسيت نفسي غبي

ههههههههههههههههههههههههههههههههه

آ خ خ خ خ خ

عن أذنكم بكمل معكم باقي المواقف في حلقه ثانيه عشان الحين بروح مشوار مهم


وللحديث بقية


محبكم في الله وسائق الليموزين / عبرود

[طليفيح]

أسأل الله القدير رب العرش العظيم بأن يهدي شباب المسلمين وأن يعصمهم عن شر الفتن ما ظهر منها وما بطن إنه سميع مجيب

امين امين ...

متابعين عبرووووووووود ...

عن أذنكم بكمل معكم باقي المواقف في حلقه ثانيه عشان الحين بروح مشوار مهم

متابعينك ياحيي وننتظر الحلقه الجااااااااااااااااااااايه ...:biggrin:

[مـثـل الـ ح ـلـم]

السلام عليكم


اسعد الله اوقااتكم بكل الخير


اول شي احييك اخووووي على المجهوود الرااائع في سرد القصص لنا بشكل راائع

ومميز

والصرااحه قليل من يتكلم عن المواااقف بمثل هذي الجراائه

والكثير يزيد وينقص بس مشااء الله انت اخووي ابدعت

اقول عسى الله يووفقك ويرزك ويستر عليك

ومشااء الله بالريااض ومن خلااال الفتراات اللي جيت فيها حصلت فيها شباااب مشااء الله عليهم

اخلااق وادب

اخوووي كلنا سعداء في توااجد معنا في هذا المنتدى الرااائع

واسئل الله ان تكب لك كل مااهو يسر وبركه


في انتظااار البااقي ولا تبخل علينا

دمت بكل الخير

تقبل فااائق احتراامي

[الجوووري]

ياهلا وغلا


عبرود

مقالاتك رائعة واسلوبك الطريف والممتع اروع

ماشاء الله عليك


خروج عن النص


< والله اني كل ماقريت موقف علت ضحكتي عن الضحكة الاولى :D




متابعتك من اول مقالة اضفتها .. ولكني كنت منشغله عن الرد ..




الله يوفقك ويسعدك


ومتابعين وبالإنتظااااااار بلا شك



:101:

[فهدالقحطاني]

وسلمت .. على هذه الحلقة الأكثر من رائعة

[عبرود]

أولاً احب أشكر كل عضو وكل قارء تم مروره على موضوعي المتواضع وإن شاء الله اعجبكم

وثانياً احب أن أجيب على بعض الأسأله اللي تجيني عن طريق الإيميل

س1 / ممكن تقول لي ابعد مسافه وصلتها واقرب مسافه وصلتها ؟

ج1 / ابعد مشوار رحت له هو عند مفرق رماح على طريق الدمام
وأقرب مشوار رحت له على مسافة 15 متر بـ 5 ريال كنت بوصل حرم عجوز للجهه المقابله للشارع في شارع العليا العام لانه كان مررره مزحوم

س2 / متى بتنزل اخر حلقه ليومياتك ؟

ج2 / بصراحه اخر حلقه علمها عند الله وبصراحه من سؤالك احس انك طفشت من الموضوع هههههههههههههههههههههههه


نبدأ بالحلقة



الحلقة الرابعة

طبعاً احداث هذه المواقف حصلت في شهر رمضان المبارك

الموقف الأول

وقبل ما ابدأ بالموقف الأول أبي من كل عضو او كل قارء بأن يدعو لصاحب هذا الموقف لأنه رجل محتاج دعواتنا جميعاً وهو رجل عليه ديون ومحكوم عليه بالسجن بعد عيد الفطر المبارك حتى يسدد ديّنه


كنت امشي في حي النسيم في شارع النخيل وشفت لي ولد في المرحله المتوسطه وكان واقف ومعه كتب المدرس وأشر لي
وقال لي : ابيك توديني للمدرسه وبعدين تودي ابوي معك لمشوار وسط الرياض
قلت له : مو مشكله بس وين ابوك
قال لي : اول شي كم المشوار
قلت له : مشوارك مع مشوار ابوك يكلف 30 ريال
قال لي : طيب لحضه بنادي ابوي
وبعدين ركب معاي أبو الولد وسلم علي وبعدها سكت لين نزلنا ولده للمدرسة وبعد ما نزل الولد جلس الأبو يصيح ويبكي وأنا بيني وبينكم ضاق صدري لأني بصراحه إذا شفت الرجال يصيح مهما كان الرجال سواء هندي ولا سعودي ولا أي كان قسماً بالله يضيق صدري بالمره وبعد عشر دقائق من الصياح
قلت له : أذكر الله وأستغفر بك
وبعدها جلس يذكر الله يستغفر الله وبعدين
قالت له : عسى ما شر وشفيك يالشيخ
قال لي : مافيني شي ابيك توديني لقسم شرطة الديرة
قلت له : ابشر
وبعد دقايق
قال لي : وش اسمك
قلت له : اسمي عبرود
قال لي : تكفى يا اخ عبرود ابيك تدعيلي بأن ألله يفرج همي وإذا تعرف احد يساعد الناس فتكفى دلني عليه والله اني رجال علي ديون ومبالغ ماليه لازم اسددها ولا بنسجن بعد العيد على طول
وبعدها جلست ادعي له في خاطري وقلت له الله يفرج همك ويفك اسرك ان شاء الله
وبعدها
قال لي : والله اهلي مايدرون أني بنسجن بعد العيد والمشكله عندي امي لو تدري اني بنسجن قسماً بالله بيصير لها شي وهي حرمه مريضه بالقلب
وبعدها ضاق صدري بزياده
قلت له : إن شاء الله ربك يحلها بس انت اكثر من الاستغفار واكثر من قيام الليل في العشر الاواخر وربك بيفرج همك بإذنه عز وجل
وبعدها نزلته وهو ضايق صدره وكان رايح لقسم الشرطه عشان يوقع على تعهد بأن يحضر بعد العيد

بيني وبينكم شي يقهر بس الشكوى لله


الموقف الثاني

من حضي السيء دخلت شارع المعارض في العصر يوم الخميس وكانو الشريطيه مالين الشارع ما شاء الله عليهم وإول ما دخلت أشرو لي خمس اشخاص والتفو حول السياره
وقالو لي : ها يالرجال تبيع
وبعدها جلست اطلع فيهم واحد واحد وكنت حاقد شوي
وقلت لهم : والله لو حنّا مو في رمضان كنت قلت لكم شي ثاني بس يلا اللهم اني صائم لو سمحتو قفلو الباب قبل ما ينجرح صيامي

وبعدين كل ما مشيت ثلاث متر شفت لي واحد يأشر وبعدها جلست اوس وس قلت في خاطري اخاف يكون شريطيه وبعدها افطر من جد واخاف يكون زبون وبعدين يروح علي المشوار وبعدين قررت ان اطلع من الشارع بسرعه على طول عشان لو طولت فيه شوي يمكن تجيني حالة أغماء من كثر ما اشوف اللي يأشرون في الشارع

الموقف الثالث والأخير لهذه الحلقة

اشر لي واحد رجال كبير في السن وفي حي الروضه وفي شارع الحسن بن علي
وقال لي : تكفى ابيك توديني للدرعيه
قلت له : مو مشكله تفضل
قال لي : بكم ؟
قالت له : بـ 25 ريال
قال لي : والله ما معي غير 10 تكفى ودني وإن شاء الله ربي بيعوضك خير
وقسماً بالله العظيم ثم قسماً بالله العظيم ثم قسماً بالله العظيم إن كلمته صدقت تدرون ليش لأني لما نزلت الرجال وجيت اطلع من الدرعيه وقفني رجال
وقال لي : الحق وراي للبيت ابيك تودي عيالي وزوجتي للسوق غرناطه في مخرج 9
قلت له : ابشر
ولما وصلت عند بيته وجيت اتفق معه
قال لي : بكم المشوار
قلت له : بـ 30 ريال
قال لي : انت رجال تستاهل وأعطاني 100 ريال
قسماً بالله جلست اتذكر كلام الشايب لما قال لي ودني وإن شاء الله ربي يعوضك خير

صدق المثل اللي يقول أرضى بالقليل يأتيك الكثير

معليش بصراحه احس اني دخت وأنا اكتب الحلقه عن اذنكم بروح أخذ لي قيلوله قبل صلاة العصر

وللحديث بقية



محبكم في الله وسائق الليموزين / عبرود

[نجمة السهيل]

<<<<<<<<<<<<<<<<<<< متابعه بصمت

[نوني الامير]

مي تو .... :$

....:101:

[الدووووخي]

يعطيك العافيه عبرود ’’’

[عبرود]

قبل أن أبدأ أحب أشكر كل عضو وكل قارء تم مروره على موضوعي المتواضع وإن ِشاء الله اعجبكم



نبدأ بالحلقة





الحلقة الخامسة

طبعاً جميع المواقف حصلت في شهر رمضان

في هذي الحلقة بقول لكم موقفين مضحكه والموقف الثالث مضحك ويقهر في نفس الوقت



الموقف الأول

كنت امشي من عند البنك الامريكي اللي في حي الملز ومريت من جنب الثانوية التجارية وشفت لي طالب من طلابها واقف يأشر ووقفت عنده
وقلت له : سم
قال لي : ابيك توديني لسكن الحرس الوطني حق خشم العان

طبعاً أنا في حياتي ما رحت لهذا السكن
المهم
قلت له : تامر أمر بوديك بـ 20 ريال
وبعدها الولد ركب بدون ما يحتج أو يعترض على السعر وبعدين أنا جلست اضحك في وجهه
وقال لي : وشفيك تضحك
قلت له : شكل المكان بعيد مرررره
قال لي : لا قريب ماعليك انت رح بس وإن شاء الله يصير خير

قلت له : والله شكله بعيد والدليل انك ركبت بدون ما تعترض على السعر

الحاصل

وصلنا لسكن الحرس بعد عناء دام اكثر من ساعه الا ربع من الزحمه
والله العظيم بيت الولد بدون مبالغه من البوابه إلى البيت مثل ما تقولون من برج الفيصله إلى اليورمرشيه اللي في شارع التخصصي

المهم

انا تقبلت الوضع وعرفت قيمة المشوار الحين
المشكله
لما جيت بطلع من السكن والله العظيم جلست تقريباً ربع ساعه لأن البيوت كلها تتشابه واللي قهرني في الموضوع أني كل شوي أمر من عند كامري لونها اسود واقفه عند احد البيوت وبعدها عرفت اني مضيّع وبعدين شفت لي واحد
وقالت له : تكفى يالشيخ أنا رجال موصل لي واحد قبل شوي بـ 20 ريال وأبيك توصلني للبوابه وببعطيك الـ 20 اللي خذيتها من الزبون قبل شوي
وبعدها جلس يضحك علي
وقال لي : الحق وراي



الموقف الثاني

أخذت لي حرمتين من عند اسواق الأندلس اللي في شارع العليا
وقالو لي : نبيك توصلنا لسوق الشفا مول في حي الشفا
قلت لهم : بـ 25 ريال

وبعدها ركبو ولما وصلتهم للشفا مول بدأ الرزق ينفتح علي قسماً بالله جلست في حي الشفا تقريباً ساعة ونصف ما بين سوق الشفا مول وسوق ستي مول فرع الشفا كل شوي اخذ عائله من الشفا مول وأوصلهم لستي مول فرع الشفا وأخذ عائله من ستي مول الشفا وأوصلهم للشفا مول وجلست تقريباً وبدون مبالغه سبع مرات وأنا أروح وارجع وكل ما نزلت عائله جتني عائله الثانية تركب على طول

المهم

جلست اضحك وبعدين انتبه لي واحد من عيال العوائل اللي اوصلهم
وقال لي : وشفيك تضحك
قلت له : في شي فبالي يضحكني
المسكين مايدري أني كل شوي أخذ ناس من الشفا مول وأرجع مره ثانيه

الضحكه في الموقف كله
أني اخر عائله وصلتهم لحي فواز في أخر الرياض ولما نزلتهم وأنا طالع من الحي أشرت لي حرمه ومعها بنت صغيره عمرها على ما اعتقد 4 سنوات وهم اصلهم من البدو
وقالت لي : ابك نبي سوق الشفا مول
قلت لها : بـ 15 ريال
قالت لي : طيب لحضه

وبعدها بدت تطلع الفضائح دخلت لبيتهم وطلعت معها حرمتين وثلاث بزارين ( اطفال) وبعدها بدأ مشوار العذاب
طبعاً البزارين (أطفال) كلهم بنات واعمارهم متقاربه ما بين 4 سنوات إلى 3 سنوات
وكلهم ركبو قدام وسبحان الله على الرغم من اعمارهم صغيره إلا السنتهم اكبر من اعمارهم ما شاء الله عليهم

هههههههههههههههههههههههههههه
قالت البنت الصغيره لخويتها الثانيه : ابك هذا سواقكم
قالت لها : إيه
وانا جالس اطالع فيهم واضحك
وبعدين
قالت لها : ابك عاني عيون سواقكم كأنه عيون فلبيني
هههههههههههههههههههههههه

ما ألومها تقول الكلام هذا لأن عيوني حاده وإذا ضحكت تختفي

المهم

قالت الصغيره للثانيه : ابك عاني وجهه احسن من وجه ابوك
وردت عليها الثانيه وقالت : ابك يخسا وجه ابوي احسن منه
وانا جالس اطالع فيهم واضحك

وبعدين عطيت البنت اللي كانت تطالع فيني أربع حبات من علكه بطعم الفراوله
وقلت لها : تقاسموها أنتي وخوياتك
قالت لي : يهبون والله ما ياخذون شي
ههههههههههههههههههههههه
ردت عليها خويتها وتبي تاخذ منها علكه
وقالت لها : منيره أنا عندي دفتر في البيت وقلم لونه احمر إذا رجعنا للبيت بخليك تكتبين فيه بس اول شي عطيني علكه وبعدين بخليك تكتبين
ههههههههههههههههههههههههه
والله بعدها مت من الضحك عليهم

أ خ خ خ خ خ خ خ خ

تصدقون والله العظيم وانا اطالع في البنت اللي عطيتها العلكه تمنيت اني متزوج وعندي بنت مثلها وبنفس العمر لأنها بصراحه أنا نقطة ضعفي الأطفال
الله يعوضنا خير إن شاء الله


الموقف الثالث والأخير

كنت في حي الريان تقربياً الساعه عشرة الصباح وأشر لي واحد من أهل الجنوب وكلامه جنوبي بحت
وقال لي : ابيك توصلني الصناعيه القديمه
قلت له : ابشر
قال لي : بكم ؟
قلت له : بـ 15 ريال
قال لي : طيب
المهم
بعد ماركب هههههههههههه جلست اطالع في وجهه وكان وجهه مكرمش شوي وتوه صاحي من النوم
قلت له : شكلك سهران
قال لي : يارجال هذا الولد مسهرني لين بعد الفجر
قلت له : عسى ما شر
قال لي : لا مافيه شي بس كان الزرار حق اللبس حقه يضغط على ظهره من ورا وبعدين قلت لأمه يا مرا شلو عقلش وش بالولد
قالت لي : مدري عنه
قلت لها : طيب هيا روحي سوي له اكل ولا أي شي الولد يصيح وفيه شي اكيد
وبعدين سوينا له حليب ولا هو راضي يشرب وما زال يبكي وبعدين جلست اتحسس على جسمه شوي شوي لين وصلت لزرار اللي في ظهر حق اللبس ولقيته يضغط على ظهره ولما سحبته حسيت انه ارتاح وبعدها فسخت الولد ورحت وعبيت الطشت وعطيته دش وخليته يتروش ويلعب بالمويه شوي
وكان ولده عمره اربع شهور
المهم
قلت له : انت شكلك من برا الرياض
قال لي : صدقت انا اصلاً كنت عسكري في تبوك وفصلت من عملي الحين جالس ادور وظيفه في الرياض عشان اصرف على عيالي
قلت له : الله يعينك
قال لي : ما شاء الله كيف الليموزين
قالت له : والله في خير طيب وانصحك تشتري واحد ترا فيه مكسب بس يبيله واحد وسيع صدر
قال لي : المشكله ماعندي سياره وسيارتي بعتها عشان واحد أبن سته وستين كلب
قلت له : ياخي استغفر وقل اللهم أني صائم
قال لي : والله هذا حيوان ويستاهل الجزمه
قلت له : ياشيخ اتسغفر مهما كان ما يصير تسبه كل هذا السب وبعدين انت الغلطان ليش تتسلف منه
قال لي : أنا ما تسلفت منه أنا كفلته في موضوع وبعدين الحيوان سحب علي وبعد كم شهر جت الشرطه العسكريه وقالت لي إذا ما سددت فلوس الرجال اللي انت كافله ترا بنسجنك وبعدها بعت السياره وسدد اللي عالي وكان مقداره 45 ألف ريال
قلت له : طيب السياره شاريها اقساط ولا كاش
قال لي : هذي هديه من أخوي الله يكثر من امثاله معطينياها عشان هدية الزواج والله العظيم ما تهنيت فيها اكثر من شهرين والمشكله كنت في شهر العسل
وبعد لما وصلته للمشوار
قال لي : ها ما تسوي لي تخفيظ عشان ارجع بالباص
قلت له : خلاص أباخذ منك عشرة ريال وبسامحك بالخمسة ريال الباقي
وبعدها نزل
وقال لي : الله يكثر من امثالك

بيني وبينكم شي يقهر انك تكفل واحد وبعد فتره يسحب عليك ويورطك في المشاكل واللي يقهر اكثر انك في المستقبل تخاف ولا تكفل احد حتى اعز الناس لك

معليش عن اذنكم بروح اصلي الفجر

وللحديث بقية


محبكم في الله وسائق الليموزين / عبرود

[فارس]

واو عيوني تعبت وانا اقرا ومشكور على يومياتك

[محب الصف الأول]

بسم الله الرحمن الرحيم
الأخ عبرود شكلك تشتغل في الدعيات التجارية وانت ماتدري اوتدري, هذا الكلام في لحلقة الأولى
وهذا نص كلامك

(أو يشترون لهم معطرات من بودي شوب أو نكتار وهي خاصه للجسم وتخلي ريحت الجسم إذا عرّق تصير زينه) ولا اقول الا بارك الله فيك يانشمي وكثر الله من امثالك
اخوك محب:101:

[محب الصف الأول]

على فكرة عبرود ارجوك لاتروح الى جده لان سيارات جده كلها ليموزينات وانا اكره اليموزينات لانها تتسبب في كثير من الحوادث حيث اغلب السائقين هم غير سعودين ولكفالة أولها شهامة واخرها ندامه

[رووان]

الله يجزاك ربي العااافيه

ع سرد هذه الحلقات بطلاقه وشكل مفصل

احسنت في الكتابه وكننا كنا معك في تلك المواقف

صورتها في مخيلتنا

واااصل وفالك المتاااابعه

رووان

[الجوريه]

عبرود الف شكر لك
من جد ونااااااااااااااااسه

[عبرود]

قبل أن أبدأ احب اشكر كل عضو وكل قارء تم مروره على موضوعي المتواضع وأن شاء الله اعجبكم



الاخ العزيز محب الصف الأول : اولاً تشرفت بمرورك
وثانياً يقول الرسول صلى الله عليه وسلم ( وأحب لأخيك المسلم ما تحب لنفسك) لذى اقول لك انا رجال إذا عحبني شي احب اعلم الناس عنه لذا كلامي عن العطورات او عن المطاعم او عن أي شي تقرأه هو عباره عن نصائح وليس اعلانات
وأبشر بعزك في خاطري أشياء كثيره بس انت علمني في أي مدينه ساكن وانا اقول لك وش تشتري منها



نبدأ بالحلقه



الحلقة السادسة

ومازلنا في مواقف شهر رمضان

بصراحه اليوم بقول لكم موقفين فقط لأنه بصراحه الموقف الأول اللي بقوله يقهرني وعن عشر مواقف والثاني كوميدي شوي


الموقف الأول

كلعادة دايماً أمشي بين الأسواق المراكز التجاريه عشان ناخذ لنا زباين
المهم
لما مريت من عند أسواق الأندلس اللي في شارع العليا أشر لي هذاك البزر عفواً قصدي هذاك الولد وكان واقف مع أهله ومن كلامهم عرفت انهم من اهل الحجاز ولما جا يتكلم جلس يطالع فيني وكأنه شاف له جنّي أو وحش وبعدين
قال ميد أمه : يا أمي السواق هادا سعودي ايش رايك نركب معاه ولا لا
قلت له أمه جعلها الصلاح : لا ياولدي صرّفو
وبعدها قسماً بالله من القهر بغيت اسحب الولد مع شعره وركبه بالغصب وأقول لأمه ياتركبين ولا بخطف ولدكم وبعدها بوصلهم ببلاش عشان يفتكون من العقده المتخلفه هذي
هههههههههههههههه

وبعدها رحت وجلست افكر من القهر وش قصة الناس هذي يعني عشاني لابس ثوب والباكستاني والهندي لابس بدله وبنجابي ما يركبون معي
بصراحه حسيت من اكثر الزبائن كأنهم يقولون يا أنك تلبس جنز وبدله ولا ما نركب معك وانا عاد اقول حامض على بوزكم والله ثم والله ثم والله ماني مغير لبسي إلى أن تقوم الساعة
وتصدقون ودي يصدر أمر من الدولة بأن جميع سواقين الليموزينات من جنسيات مختلفة بالتقيد بلبس الزّي السعودي عشان يكون رمز للدولة قدام الضيوف اللي يجون من خارج السعودية
وتصدقون لما صارت لي الحركة هذي تذكرت قصة قالها لي واحد من زملاء العمل السابق وهو واحد من أهل مكه الله يذكرة بالخير أسمة احمد عزوز
يقول
أنه مرة من المرات كنت أشتغل في شركة بن لادن في مدينة جدة في قسم صيانة الأجهزه الكهربائيه مثل الدشوش والستلايتات والتلفزيونات وكاميرات المراقبة ،،، إلخ
المهم

يقول لي أنه أول ما أشتغل في الشغلة هذي قال له مدير الشغل إذا أحد سألك من الزبائن وش جنسيتك قل له انك فلبيني أو ماليزي أو أي شيء عشانه بصراحه كانت ملامحة مثل أهل شرق آسيا

المهم

يقول لي أنه كل ما دخل بيت من البيوت العوائل السعودية وسأله صاحب البيت انت وش جنسيتك يقول له مره انه فلبيني ومره ماليزي ومره اندنوسي ومره جاوي
هههههههههههههههههه

ويقول مره من المرات جتني النخوة وقلت والله إذا أحد سألني وش جنسيتك بقول لهم أني سعودي
وبصراحه كانت غلطة عمره

الحاصل

أنه مرة من المرات راح بيت ناس تجار من أهل جدة وكان عندهم الرسيفر حق التلفزيون عطلان وكان يبغاله تسليك عشان يشتغل زين
لمهم

يقول وأنا جالس تحت الطاولة وأمدد الأسلاك كانت العائلة الكريمة جالسة في الصالة وكلهم بنات ومافي ولا أي ولد بينهم وكانو يسولفون ويمزحون مع بعض
الله يستر عليهم

المهم

يقول


وأنا تحت الطاولة اشتغل جتني وحده من البنات دقت رجلي وقالت لي أنت
يارفيق أيش جنسيتك ؟

يقول والله من القهر قلت لها أنا سعودي
هههههههههههههههههههههههههههههههههههه

وبعدها يقول قسماً بالله الأزعاج اللي كان في الصالة أختفى في خلال ثواني
وبعد ثواني جاني رجال صعيدي وسحبني من تحت الطاوله
وقال لي : براااااااا يلا براااااااا
قلت له : أيش في ياواد
قال لي : اقولك برااااااااااااا مش عاوزين أي حاجة برااااااااااااا
قلت له : طيب لحضه باخذ العدة
قال لي : مافي عدة العدة برسلها لكم بعدين يلا برااااااااااااااااا

هههههههههههههههههههههههههههه

وبعدها طلعت وجلست افكر ايش الفرق بيني وبين الهندي والباكستاني والفلبيني والله شي يقهر

وبصراحه ما ألومة من بعد الموقف اللي صار لي هذا


الموقف الثاني

أشرت لي حرمة هندية أو بنقلاديشية والله مدري وش الجنسية بالضبط في شارع العليا بالقرب من العزيزية مول
وقالت لي : بابا انا ابقا سكن هق مستشفى الهمادي (الحمادي)
قلت لها : 15 ريال
قلت لي : مافي مشكلة
وبعدين ألتفتت ورا وأشرت لقبيلة كاملة من الهنود والبنقلاديشيين وكان عددهم تقريباً وبدون مبالغة ستة حريم وبعدها انا انفجعت وجلست افكر
قلت الحين هذولي وشلون بيركبون
قسماً بالله ركبو كلهم جنب بعض وحسيت ان الكامري حقتي بتنفجر من الضيق اللي ورا
وبعدها مشيت وأنا في الطريق جالس أستمع صوت كلامهم وبصراحه حسيت نفسي جالس في مزرعتنا عند شبك الدجاج كلهم يقولون
بق بق كر بق فر نمشباتحمنياسبضث ح

من جد صدع راسي لو أدري أنهم كذا كان قلت لهم المشوار بـ 50 ريال بس خلاص هذي عبرة وفي المستقبل يبطون عظم اركبهم مرة ثانية

أ خ خ خ خ خ خ خ خ خ خ خ

تصدقون أنا الحين جالس افكر في الولد الحجازي اللي قال ميد أمه يا أمي هادا سعودي
ودي اشوفه وحلق شعره بس عشان ابرد اللي في خاطري


وللحديث بقية


محبكم في الله وسائق الليموزين / عبرود

[حنين]

http://www.alraidiah.com/vb/uploaded/mals.gif



ماشاء الله عليك ياعبرود


بصراحه نشوف اغلب الليموزينات اللي يسوقونها شباب سعوديين كلم مياعه

عندك مثلا اللي عند المملكه اغلبهم سعووديين واخر شياكه

تتقرف منهم

علشان كذا صار فيه رفض للسعودي








http://www.alraidiah.com/vb/uploaded/mals2.gif

[هتاف الشوق]

اولا احب اهني الرائدية السباقة لكل رائع

استضافة عبروود انجاز وابداع

يضيف اوسمة تميز للرائدية اضافة الى اوسمتها

رغم انقطاعي عن النت والمنتديات

الا انه شدني بريد الرائدية

حنين لم افوى على مقاومته

اقوى من لقاء الحبيب بمحبوبته

وفوجئت اكثر بروعة عبرود

اخي عبرود00

وفقك الله ورزقك من واسع فضله

وخزائنه التي لاتنفذ

واذكرك فقط اخي عبرود

انت تشكر الله على نعمه بذكر رزقك

وهذا ما وعد به الرحمن لمن بكر

عبرووود

عاشقة جديدة لقصصك انضمت الى عشاق كتابتك

فلا تطيل علينا

وبخصوووص الولد الحجازي هههههههه

اصبر عليا وانا اجبلك خبره هههههههههه

<< حجازية قح ههههههههههههههههههه

[أبو رائد]

أهلا وسهلا بالجميع ..

وكاتبنا المميز ( عبرود ) مبدع بكل ماتحمله الكلمة من معنى

فهنيئا لنا بهذا الكاتب المميز

ومازلنا متابعين بشغف كل ما يكتبه عبرود


ولكم التحية ،،

[عبرود]

قبل ان ابدأ بالحلقة احب ان اشكر كل عضو ولك قارء تم مروره على موضوعي المتواضع وأن شاء الله يكون اعجبكم


الاخ أو الاخت هتاف الشوق / تشرفت بمرورك

معزبناً أبو رائد : أحب أن اشكرك على ما تقوم به من اعلان لمواضيعي المتواضعه وأن شاء الله يكون فيها بعض الفوائد للقراء والأعضاء



نبدأ بالحلقة



الحلقة السابعة


طبعاً أنا لما أشتريت الليموزين طلبت من بعض الناس بأن ينصحوني وش أسوي في الليموزين
بعضهم قال لي لا تدور في الأحياء مثل حي الفيصليه ومثل حي النسيم ومثل حي النظيم
وبعضهم قال لي لا تركب أي واحد خال (أسود البشره)
وبعضهم قال لي لا تركب شباب صغار في السن
وبعضهم قال لي انتبه من الأشكال اللي تحس انهم مجرمين
وأنا بصراحه صار لي موقف للأسف عكس النصايح اللي نصحت فيها من قبل

والدليل الموقف الأول

في ثالث أيام العيد كنت امشي في شارع الستين في حي الملز ولما وقفت عند أشارة مستشفى قوى الأمن أشرو لي اربع شباب ما شاء الله عليهم كل واحد لابس احسن لبس وأشكالهم محترمه للأسف وركبو معي
وقالو لي : بكم توصلنا لكوبري الفحص الدوري عند طريق الدمام
قلت لهم : بـ 20 ريال
قال لي واحد فيهم : تستاهل اكثر حنا بنعطيك 50 ريال
وبصراحه من كلمتهم هذي حسيت أن وراهم شر
وسبحان الله اللي كان راكب قدام وجالس جنبي كان لسانه وسخ وكلامه مررره وسخ وكنت
اقوله له : ياخي اتقي الله عيب عليك تقول الكلام هذا انت اكبر من الكلام اللي تقوله
قال لي : طيب انا اسف
وبعدها كرر كلامه ولا أهتم بالكلام اللي قلته له
وبعدين سألته
قلت له : كم عمرك ؟
قال لي : 40 سنه
وهو طبعاً عمره 17 أو 18 سنه بالكثير
وبعدها نغزني قلبي وقلت اكيد وراهم شر
وكان في واحد من اللي راكبين في الخلف
قال لي : انت وش اصلك ؟
وأنا بصراحه لما أحد يسألني السؤال هذا تجيني حالة غثيان وحالة نفسيه بسبب حقارة السؤال لأني أعرف اللي سأل السؤال هذا رجال فيه كبرياء وغرور وتخلف وتعصب قبلي
المهم
أنا رديت عليه
وقلت له : انا من السعوديه
هههههههههههههههه
قال لي : من جد انت من وين ؟
قلت له : أنا من السعوديه ومن جزيرة العرب
هههههههههههههه
قال لي : أفا يعني ما تعرف أصلك من وين
قلت له : أنا شمري من حائل
قال لي : اهاااا
قلت له : طيب انت من وين ؟
قال لي : انا من أحسن قبيله في السعوديه
قلت له : طيب من وين ؟
قال لي : انا من قبيلة (؟؟؟؟؟؟)
قلت له : ما شاء الله تبارك الله الله يوفقك
قال لي : حنا أحسن ناس في السعوديه ومافينا أي عيب
قلت له : اخوي كل قبيله فيه الطيب وفيها البطال
قال لي : تخسا حنا غير
أنا بعدها أنقهرت
وقلت له : طيب أبيك تروح تزور أي سجن في السعوديه وشف كم واحد من قبيلتك موجود في السجن
قال لي : أقول تخسا والله مافي ولا أحد
وبصراحه لما حلف بالله وقال والله مافي أحد بعدها عرفت أن اللي راكبين معي كلهم راعين مشاكل
وسبحان الله قلبي نغزني وقلت في خاطري الله يستر شكلهم بيسون شي معي
وبعدها جلست طول الطريق اكثر من الأستغفار وأتعوذ من الشيطان وقلت الله يستر
وسبحان الله
لما وصلت لمشوارهم
ههههههههههههههههههههههههههه
نزلو من السياره وأنحاشو كلهم وكان المكان اللي نزلو فيه مظلم
وبعدها تحمدت ربي بأنهم سو كذا ولا كان في بالي بأنهم بيسرقوني وبيسرقون السياره حقتي
ولاحظو أنهم كانو شباب ما شاء الله عليهم لابسين أحسن لبس وأشكالهم محترمه بس في النهاية طلعو حراميه

اما الموقف المعاكس لهؤلاء الشباب

كنت ماشي في شارع خالد بن الوليد ( انكاس) وأشر لي ولد كان في نفس عمر الشباب اللي ركبتهم قبل كذا وكان شكله سبحان لله مخيف وكان الشماغ اللي لابسه متقطع وهيئته تقول أنه حرامي
وبصراحه أنا ميزتي ما احب اشك في احد ولا أحب أسوء الضن في أحد لأن بعض أضن أثم
المهم
ركبت الولد
وقال لي : ابيك توصلني محل الاتصالات اللي في شارع الحسن بن علي عشان ابيع جوالي
قلت له : ابشر
قال لي : بكم ؟
قلت له : بعشره ريال
وبعدها ركب ولما وصلنا للسوق الجوالات قال لي اصبر بس عشر دقايق بروح ابيع الجوال وبعدين ابيك توصلني مشوار ثاني
أنا بعدها قلت في خاطري افاااا شكله من نفس الفصيله اللي انحاشو
بس خاب ضني المره هذي
لأن الولد رجع لي بس للأسف ما باع الجوال وقال لي بصراحه يا أخ عبرود مدري وش اقول لك
قلت له : خير وش فيك ؟
قال لي : بصراحه مافي احد اشترى الجوال وانا بصراحه كنت معتمد على قيمة الجوال عشان اعطيك حق المشوار
والله بعدها لما شفت كلامه معي صادق انا رحمته
وقلت له : ماصار الا الخير وإن شاء الله ربي يعوضنا خير
وقلت له : تبي اوصلك للمحل اللي خذيتك منه
قال لي : تسلم والله مشكور

خلاصة الكلام

الشباب اللي كانو لابسين لبس محترم طلعو حراميه والشاب اللي كان لبسه ملفت للنظر طلع ولد ناس وصادق وأمين
لذا لا احد يحكم الواحد بلبسه أو بكلامه

الموقف الثاني

كنت امشي من عند فندق الهولودي إن وطلع من الفندق هذاك الرجال اللي شايل شنطة لاب توب
المهم
الرجال شكله أوروبي أو أمريكي وأنا جلست اكلمه بالانجليزي
وقلت له : كان أي هيلبيو ( تبي مساعده)

لاحضو كلامه معي بالحرف الواحد

قال لي : هلا والله الأخ من السعوديه
طبعاً أنا مستغرب من اسلوبه بالكلام
قلت له : ايه
قال لي : كيف حالك
قلت له : بخير
طبعاً هو يتكلم معي اللغة العربيه الفصحى كأنه مسلسل مكسيكي
قال لي : شيء جميل أن يعمل الرجل السعودي في مجال الليموزين
وأنا جالس اطالع فيه واضحك
قلت له : شكراً
وبعدين جلسنا نسولف مع بعض عن حياته في السعوديه وهل حصل له مضايقات من احد
قال لي : في الحقيقه لم اتوقع بأن تكون السعوديه مثل هكذا
وبعدين أنا سألته عن لغة العربيه
وقال لي : في الحقيقه أنا درست اللغة العربيه في الجامعات الأمريكيه عندنا مثل ما تدرسون اللغة الأنجليزية عندكم
وقال لي : جلست ادرس اللغة العربية مدة سته سنوات
وبعدين دخلنا في سواليف عن عاداتهم وتقاليدهم اللي بصراحه ترفع الضغط لأنه مسيحي
وفي الاخير
قال لي : لقد أعجبت بك أريد رقم هاتفك لكي توصلني أي مكان ارغب في الذهاب إليه لاحقاً
قلت له : خير إن شاء الله
وبعدها عطيته رقمي ونزلته واعطاني بخشيش 10 ريال زياده
من جد زبون طيب

معليش عن اذنكم بروح مشوار مهم

في الحلقه القادمه بقول لكم موقف بصراحه اعتبره من الخيال وما الوم أي احد يكذبني إذا قلته لأني انا ماني مصدق إلى الأن


وللحديث بقية


محبكم في الله وسائق الليموزين / عبرود

[حنين]

http://www.alraidiah.com/vb/uploaded/mals.gif



ماشاء الله عليك ياعبرود


سلسه رائعه

وبالاخير صار الاجنبي احسن واحد فيهم

عبرود


طلب بسيط

ان تضع كل حلقه بموضوع مستقل علشان الكل يدري انك نزلت الموضوع





http://www.alraidiah.com/vb/uploaded/mals2.gif

[كوجي]

اللــه يـــوفقـــك وييـــسر لــك أمـــرك ويـــرزقـــك علـــى نيتــك الطيبـــه ان شــاء اللــه

[عبرود]

قبل أن ابدأ أحب أن اشكر كل عضو وكل قارء تم مروره على موضوعي المتواضع وإن شاء الله ولقيتم الشيء المفيد


الاخ أو الاخت حنين : بصراحه انا فكرت بأن اضع كل حلقه في موضوع مستقل بس لما اسوي لها بحث في القوقل بيطلع لي اكثر من كذا رابط وبيصير البحث صعب مررره
وقلت خلها في موضوع واحد عشان الواحد يلقاها مره وحده


الاخ الكوجي : تشرفت بمرورك وأسأل الله القدير رب العرش العظيم بأن يوفقك ويفرج همك إنه سميع مجيب


نبدأ بالحلقة






الحلقة الثامنة


طبعاً مثل ما وعدتكم باحلقة الماضيه وقلت لكم أني بقول لكم موقف بصراحه اعتبره خيالي وفي نفس الوقت مرعب شوي وبيني وبينكم الكلام اللي بقوله ما الوم إي احد يكذبني فيه لأني أنا بنفسي ماني مصدق اللي صار لي مع الموقف هذا



المهم

الموقف الأول المخيف بعض الشيء

كنت امشي عند كوبري الخليج بالقرب من محلات تأجير السيارات وشفت لي لليموزين واقف يتفاهم مع زبون على السعر وفجأه شفت الزبون صك باب الليموزين بقوه

وقال لسائق الليموزين : انقلع ضف وجهك

طبعاً أنا لما شفت الموقف قلت في خاطري شكل الزبون هذا راعي مشاكل خلني بس أوخر عنه
وبعدين شافني وأشر لي

وقال لي : وقف يالحبيب

بعدها فكرة وقلت في خاطري وقف وإذا سوا أي حركه مالها داعي انزل وتفاهم معه

وبعدين

قال لي : بكم توصلني للبديعه عند مفرق بلال بن رباح
قلت له : بـ 20 ريال

قال لي : مدامك سعودي والله تستاهلها احسن من الباكستاني ابن الكلب
ههههههههههههههه

استغفر الله

المهم

لما ركب اول شي سواه فتح الدريشه وطلع جسمه من الدريشه وجلس يصرخ بصوت عالي
ويقول : شفتو ركبني راعي الليموزين شفتو كيف ركبني والله العظيم ركبني
وكان يكلم الناس اللي تمشي على الرصيف وبصراحه
أنا بعدها ضاق صدري وقلت في خاطري وشفيه هذا لا يكون مجنون

المهم

صك الدريشه وجلس على الكرسي وخلا ظهره على الدريشه ووجه علي وجلس يتكلم ويهذري كلام بصراحه انا قلت في خاطري شكله مجنون وكان كل جمله يخلص منها
يقول بعدها : واثق الخطوة يمشي ملكاً

وبعدين جلس يطالع فيني
وقال لي : انت عيونك دايماً تدمع شكلك تدعي لواحد مريض منهو هذا المريض ؟
بصراحه لما قال لي الكلام هذا انا قلت في خاطري ياولد شكله فيه جن والظاهر الجني الليكلمني الحين
وبعدين
قلت له : بصراحه انا ادعي لأمي بالشفا كل يوم
وقال لي : وشفيها ؟
قلت له : فيها فشل كلوي
وبعدها
قال لي بصوت عالي : بسرعه عطني قلم بسرعه يلا بسرعه
طبعاً يقولها وهو يصرخ
وأنا من قوة الخوف بغيت انط من السياره
ههههههههههههههههه
استغفر الله
ولما اعطيته القلم كتب رقم جواله وبعدين كتب اسمه
وأسمه خالد بن محمد بن خالد ال؟؟؟؟؟
وقال لي : بذمتك أسمي مو مثل اسم أمير
قلت له : صدقت والله كأنه أمير
قال لي : شف ترا بذمتك هذا رقم جوالي إذا شفت أمك أسألها وقل لها أن خالد بن محمد ال؟؟؟؟؟ بيتبرع بكليته لك وشف وش تقول لك وتكفى رد علي تراها في ذمتك إذا ماسألتها
وأنا بصراحه إلى الأن ما سألت أمي لأنه بصراحه الرجال أحس انه فيه بعض المسْ
وقال لي : انا اصلاً كنت مثل الأمير بس بعد ما مات أبوي راح كل شي عني وكنت اركب جيب لكزس وكنت اركب شبح بس بعد ما مات ابوي راح كل شي

وأنا بصراحه طول الطريق من كوبري الخليج إلى أن وصلت حي البديعه وأنا ما اقول الا جملتين طول الطريق
وهي
والله انك صادق
والله يعينك
والله انك صادق
والله يعينك
وبيني وبينكم سوا حركه معي بعدها خفت منه . والحركه هي

طبعاً أنا دايماً احط عندي في مسجل السياره شريط قصص الأنبياء للدكتور طارق سويدان وكنت حاط في المسجل في هذاك اليوم قصة نبي الله سليمان لما عذب الجن وطبعاً لما ركب الرجال معي أنا ماشغلت الشريط أبداً ولما قربنا للمكان اللي هو يبيه

قال لي انا باخذ شريط طارق سويدان اللي في المسجل لأني احب اسمع قصة نبي الله سليمان وكيف عذب الجن
لاحظو أنا ماشغلت المسجل ولا هو شاف الشريط وكان الشريط في المسجل
وطبعاً أنا بعد ما سمعته يقول الكلام هذا قسماً بالله خفت منه قلت شكله ساحر أو فيه جني بس الله يستر
وبعدين أنا سألته سؤال قلت خلني اشوف وش السبب اللي خلاه يصير بهذي الحاله
قلت له : ليش حالتك النفسيه تعبانا ؟
قال لي : والله العظيم أنا كنت اصب للامير سلطان بن عبدالعزيز قهوه وشاهي تصدق الشي هذا ولا لا
قلت له : طيب مافيها شي إذا صبيت للأمير سلطان بن عبدالعزيز شاهي وقهوه
وقال لي : والله العظيم أنت أول واحد يصدقني بالشي هذا وبعدها سحب راسي وجلس يحب راسي وانا كنت خايف وقلت يمكن يبي يعض راسي أو يعض أذني
وبعدين قال لي مدري ليش طردوني من العمل
طبعاً أنا كنت جالس اتسمع ولا قلت له شي بعد ما سألته السؤال الأول
وقال لي : والله مالي ذنب أنا كنت انظف المسدس وبعدين طلعت طلقه ودخلت في راس خوي وانا ماكنت ادري عن المسدس انه فيه رصاصه والله العظيم ماكنت ادري وبعدها جلس يبكي
وبعدين عرف سبب حركاته معي في السياره وسبب الحركات اللي يسويها معي من استهبال وصراخ وصياح
عشانه كان عسكري في وزارة الدفاع وكان منصدم نفسياً لأنه قتل خويه
وبعدين لما قربنا عند حارتهم
قال لي : لف يمين
ودخلت أنا يمين من الحاره
وبعدين شفنا ولد يمشي في الضلام وعمره تقريباً 19 سنه وكان طويل شوي وكان معطينه ظهره وهو يمشي يعني مانقدر نشوف وجهه وهو يمشي
وبعدها قال لي : شفت الولد هذا قسماً بالله جميل جداً ماشاء الله عليه بس سبحان الله مايكمل إلا وجه الله وعيبه شي واحد مايتكلم
وبصراحه لما وقفنا عند الولد
جلس يأشرون لبعض
وقال الولد للزبون اللي معي : ايه اه يوه أيه أيييه
وقال له الزبون : أيه أيه أه أ ه بوه يوه إيه
وبعدين قال لي الزبون : تدري وش يقول لي الولد
قلت له : وش يقول لك
قال لي : يقول لي غريبه كيف ركبك الرجال معه ولا خاف منك
قلت له : قل له أنا ما اخاف الا من اللي خلقني وانت رجال طيب إن شاء الله ومافيك شي
وبعدها جلس يبكي ويصيح
وقال لي : بصراحه انت أول واحد يصدقني ويقول لي الكلام هذا الله يخليك كل يوم تعال عندنا الله يخليك والله ما أسوي لك شي بس تكفى تعال عندنا
وبصراحه لما قال لي الكلام هذا حسيت ان كلامه طالع من قلب ورحمته وحسيت أن اهله وجماعته يستهبلون عليه ويهزؤنه
وبعدين قال لي : هذا الولد الابكم يصير ولد عمي
قلت له : الله يوفقه لك ويشفيه
وبعدين قال لي أمنية بصراحه حسيت ان الولد مخه فيه شوي تحسن
قال لي : تصدق يالشيخ ودي أنقل عند الحدود السوريه والحدود الأردنيه أو الحدود السعوديه
قلت له : ليش ؟
قال لي : عشان إذا جاء وقت البعث إلى أرض المحشر أكون قريب من هناك
وبعدين جلس يتكلم مع تقريباً عشر دقايق وأنا بيني وبينكم كنت مستعجل وفي نفس الوقت خايف شوي وقلت في خاطري شكل الليله هذي ماتعدي على خير وشكل الرجال هذا مامعه فلوس وبعدها بينزل ولاهو معطيني شي
وبعد عشر دقايق من النقاش والتصريف عشان امشي من عنده عطاني عشرين ريال وبعدين عطاني عشره ريال وقال لي هذي حقت التأخير
والله العظيم بعدها لما نزل جلست ادعي له من كل قلبي لأن بصراحه وضعه صعب مع الناس

أسأل الله القدير رب العرش العظيم بأن يشفيه ويفرج همّه
إنه سميع مجيب

الموقف الثاني وهو موقف كوميدي شوي


كنت امشي بالقرب من مستشفى مدينة الملك فهد الطبيه وكانت الساعة تقريباً 7 ونص صباحاً وكان فيه شايب عمره تقريباً 90 سنه واقف على الشارع وأشر لي ووقفت عنده
وقال لي : بكم توصلني لأم الحمام
قلت له : بـ 15 ريال ياخالي
قال لي : انا بعطيك 30 ريال ولا تدري بعطيك 50 ريال ياحرامي
هههههههههههههههههههههههه
قلت له : ليش ياخالي تقول لي حرامي بين البايع والمشتري يفتح الله
قال لي : انا دايماً أركب بـ 7 ريال
قلت له : ابشر أنا بوصلك بـ 5 ريال بس لا تزعل
ههههههههههههههههههه
ولما ركب معي مسك اذني وجلس يقبصها ويقول لي تبي تسرقني تبي تاخذ 15 ريال ياحراامي
بصراحه انا كنت راحمه عشان عمره الكبير وبصراحه لو تشوفون وجهه ترحمونه لأن وجهه ما شاء الله كأنه وجه طفل رضيع بس شايب مررره
وبعدين قلت له : انت من وين ياخال
قال لي : انا من نجران بس أخر مره رحت للنجران في عهد الملك سعود
وباقي حياتي كلها في الرياض



الموقف الثالث والأخير وكذلك كوميدي بعض الشيء


كنت امشي في شارع الضباب بالقرب من طريق خريص وأشر لي شاب ووقفت عنده
وقال لي : ابيك توصلني غبيره
قلت له : ابشر
قال لي : بكم ؟
قلت له : بـ 15 ريال
قال لي : معليش ما اقدر ادفع الا 10 ريال فقط

قلت له : ما اردك يلا اركب
المهم
لما وصلنا عند حارتهم
قال لي : لف مع اخر الشارع يمين
ولما لفيت جتني سياره مسرعه وصدمتني من الخلف وبعدها سيارتي انحذفت عن مسارها وتغيرت جهة السياره من الشرق للغرب وبعدين أنا انقلب راسي شوي وكان في بالي أني انا رقيت فوق رصيف
وقلت للزبون: وش اللي صار شكلي ركبت رصيف
قال لي : لا في واحد صدمنا وأنحاش
وبعدها جلست اضحك من القهر
نزلت وشفت السياره انحاشت وشفت صدامي انعدم شوي
وبعدين
قلت ميد الزبون : يارجال ماصار الا كل خير اهم شي سلامتك
المهم
لما وصلنا للاخر المشوار
من قوة الفجعه اللي صارت للزبون
بدال مايعطيني 10 ريال عطاني 15 ريال
وبعدها جلست اضحك
قلت في خاطري: شكله خايف مني

ههههههههههههههههههههههه


عن اذنكم بصراحه جاني النعاس بروح انام لي شوي

وللحديث بقيه مع مواقف الليموزين


محبكم في الله وسائق الليموزين : عبرود

[المطلعه]

السلام عليكم ورحمة الله وبركاتـه

موضووع في غاية الجمـال

ومواقف رائعه ومخيفه وظريفه

والاروع من ذلك هو كاتب الموضووع وقلبه الكبيرر وسعة صدره في تعامله مع الناس

الله يكثر من امثالك

والله يوفقك في الدنـيا والاخرهـ

ويرزقك بكـل خـير ويبعد عنكـ الشر والشيطان

اللهم آآآمين

والله يعطيك العافيه على الموضووع

شكـرا

[أحمـــد]

والله العظيم بعدها لما نزل جلست ادعي له من كل قلبي لأن بصراحه وضعه صعب مع الناس

أسأل الله القدير رب العرش العظيم بأن يشفيه ويفرج همّه
إنه سميع مجيب



اللـــه يشفيـــه ويشفـــي جميـــع مـــرضى المسلميـــن ...



اللـــهم آآآآآميـــن آآآآميـــن ..





<<<<< متـــابـــع وبحمـــاس يـــاعبــــرود



اللـــه يـــوفقـــك يـــاشيــــخ ...





:101:

[حنين]

http://www.alraidiah.com/vb/uploaded/mals.gif



ماشاء الله عليك

كل حلقاتك رووووعه واتمنى انها ماتنقطع


القصه الاولى مره اضحك ومره ارحم الزبون

ضحكتني يوم قلت خفت يعضني مع اذني او راسي ههههههههههههههههههههههه
الله يشفيه يارب

مواقف رائعه





http://www.alraidiah.com/vb/uploaded/mals2.gif

[نوني الامير]

اللهم آمين.....

يوميات رائعة جداً ....

رحمته المسكين هذا من أثر الصدمة أكيد ...


<<< متواجده بصمت ....

[أبو رائد]

حلقات بغاية الرووعة

ومازلنا متابعين .. لما تكتب يا عبرووود

الله يعطيك العافية


وتسلم على مواضيعك القيمة

[نوني الامير]

عبرود سلامتها الوالده .. "نسيت "

[الدووووخي]

قال لي : انا بعطيك 30 ريال ولا تدري بعطيك 50 ريال ياحرامي
هههههههههههههههههههههههه
قلت له : ليش ياخالي تقول لي حرامي بين البايع والمشتري يفتح الله
قال لي : انا دايماً أركب بـ 7 ريال
قلت له : ابشر أنا بوصلك بـ 5 ريال بس لا تزعل
ههههههههههههههههههه

هههههههههههه ’’’

الله يرزقك اخوي عربود ويشفي والدتك يارب ’’’

[عبرود]

أحب أن أشكر كل عضو وكل قارء تم مروره على موضوعي المتواضع وأن شاء الله اعجبكم

واحب ان اشكر كل من دعاء للوالده بالشفاء وأسأل الله القدير بأن لا يراكم مكروه في من تحبون
إنه سميع مجيب الدعاء


نبدأ بالحلقة

الحلقة التاسعة


الموقف الأول

وهذا الموقف عبارة عن رسالة خاصة لكل سعودي ورسالة عامة لكل خليجي لأنه بصراحه الموقف هذا فشلني مرررره مع الزبون

كنت امشي في شارع خالد بن الوليد وأشر لي رجال من الجنسية المغربية
وقال لي : ابي شارع الحسن بن علي
قلت له : ابشر
قال لي : بكم ؟
قلت له : بـ 10 ريال

وبعدها ركب معي

ولما ركب

قلت له : الاخ من المغرب ؟

قال لي : أيه نعم

قلت له : وين تشتغل فيه ؟

قال لي : اشتغل في صالون حلاقة في حي العليا

وبعدين
قلت له : بصراحه انا قرأت كتاب اسمه السجينة لوحده مغربية اسمها مليكا أوفقير بصراحه في الكتاب هذا فيه وصف لبعض المناظر للمغرب ودي اشوفها لأن الوصف في الكتاب مرره حلو

قال لي : حياك الله في أي وقت
وبعدين قال لي كلام بصراحه ضاق صدري منه

قال لي : انت سعودي ؟

قلت له : أيه

قال لي : للأسف بقول لك كلام بس اتمنا أنك ماتزعل مني

قلت له : لا عادي قل اللي تبي

قال لي : بصراحه انا وجماعتي في المغرب كنّا ماخذين عنكم فكره سيئة مررره بس لما وصلت للسعودية وشفت حياتكم هنا في السعودية ندمت عن الفكره السيئة اللي كنت ماخذها عنكم وبعدها حبيتكم اكثر

قلت له : افااا ليش وش سمعت عننا في السعودية ؟

قال لي : انا ما سمعت عنكم شي انا أشوف عنكم شي عندنا في المغرب بصراحه يزعل الواحد

قلت له : ليش وش شفت ؟

قال لي : ياخي عندنا سواقين الليموزينات إذا ركب معهم زبون امريكي او أوروبي أو يهودي يقول له أي متحف تبي تروح له أي منتزه تبي تروح له أي مطعم تبي تاكل فيه

اما السعودي والخليجي بالذات لما يركب مع سواق الليموزين يقول له سائق الليموزين أي مرقص تبي تروح له أي بار تبي تشرب فيه أي مكان تبي تاخذ منه بنت جميله وأي تاجر تبي تشتري منه حشيش ومخدرات

عشان كذا لا تلومني لما اخذ عنكم فكرة سيئة
وبعدين قال لي : والمشكله عندنا أي واحد من اهل الخليج سواء كان كويتي أو إمارتي أو قطري أو بحريني نقول عنه سعودي لأنكم انتم واجهة دول الخليج

بصراحه لما قال لي الكلام هذا ضاق صدري وكان ودي يكون عندي سلطه في الدولة أصدر أمر بأرجاع كل السعودين اللي خارج السعودية واللي ماعندهم دراسة او شغل

وبعدين
قال لي : وللأسف علماء الدين عندكم حلّلو عندكم زواج اعتبره حرام
قلت له : أي زواج ؟
قال لي : زواج يخلي الزوج يتزوج حرمه فقط للجنس وبعدين اذا فكر يسافر من المكان اللي فيه الحرمه يطلقها
وكان قصده على ما اعتقد زواج المسيار او المتعه

وبعدين انا قلت له : لا بالعكس العلماء عندنا حرمو الزواج هذا ويمكن انت سمعت الفتوه من شيخ صوفي أو علماني

وقال لي : بصراحه لما جيت للسعودية وشفت شعبها وشفت تنظيمكم في الصفوف وخشوعكم في الصلاة بعدها كل الأفكار السئية اللي كانت في باللي ً راحت من عقلي وتغيرت

لذى من الموقف هذا ودي من كل سعودي وكل خليجي يخاف ربه ويتقي الله في اللي يسويه في الخارج ياخي انتم تمثلون بلدكم والله الحركات اللي تسونها عند العالم الثانية تشوه بلدكم حسبي الله عليكم

يالله يارب جعل كل واحد يسافر للخارج ونيته وسخة انك تخرب عليه السفره وتخليه يبطل
آآآمين



الموقف الثاني


كنت امشي في حي الجنادرية طبعاً الحي هذا بالقرب من كلية الملك فهد الأمنيه وبالقرب من حي النظيم
وكانت الساعه تقربيباً 8 صباحاً

المهم

وأنا امشي في هذا الحي أشر لي واحد شمري وكان جسمه مثل جسم محمد الدعيع الله يذكره بالخير وكان عمره تقريباً خمسين سنه وكان لابس ثوب وشماغ بدون عقال وكانت لحيته خفيفه وفيها بعض الشيب

المهم

قال لي : بكم توصلني للنسيم الشرقي

قلت له : بـ 20 ريال
قال لي : تكفى يابعد حيي والله ما معي الا 10 ريال بس تكفى يابعد حيي لا تردني

قلت له : ابشر بعزك اركب

المهم بعد ماركب
قال لي : قال لي عن اذنك بتتن (بدخن)
قلت له : معليش ياخالي التدخين ممنوع من وزارة الموصلات
قال لي : ماعليك من وزارة المواصلات
وبعدها طلع البكت وطلع له سجاره ويبي يولعها
وبعدين انا
قلت له : ياخالي بصراحه انا ما احب احد يدخن في سيارتي تكفى نزل سجارتك

قال لي : يا حيي وشفيكم انت وأخوي كلكم ما تبوني ادخن ياخي ارحموني تكفون والله بنتحر السبب انتم ياخي ليش ماتخلوني اعيش مثل العالم
وبعدها جلس يصرخ علي ويسب في أخوه
ويقول لي : ياخي أخوي امام مسجد ولا يخاف الله كل يوم يقفل علي باب الغرفه من بعد ما ارجع من العمل حتى أروح للعمل ويدخل علي الاكل من تحت الباب كأني حيوان ليش كذا يسوي فيني لييش ولا يخليني اطلع من الغرفه الا إذا جونا ضيوف وإذا اجتمعنا في الشبّه حقتنا وبعدين جلس يبكي شوي


وبيني بينكم انا ضاق صدري وبعدين عرفت ان الرجال عنده انفصام في الشخصية

وبعد دقيقه من اللي صار بيني وبينه
قال لي تكفى شغل لي شريط اغاني ابي سلام العبدالله ولا الصريخ ولا اقول لك شغل لي فهد العبد المحسن ولا خالد السلامه تكفى يابعد حيي تكفى شغل أي شي ابي استانس وابي ارقص قبل ما ارجع للبيت تكفى
وكان يهز كتوفه مثل الرقاصات والعياذ بالله
وبعدها عرفت انه مريض عقلياً بس المشكله انه يشتغل في مركز صحي في حي النسيم الشرقي
وبعدين لما وصلنا لأخر المشوار
قال لي : تكفى ياجدي تكفى ابيك تجي للشبة حقتنا عشان اخوي يفتح لي باب الغرفة تكفى تعال الله يخليك والله إذا ما احد جانا اخوي مايطلعني من الغرفة

وتبون الصراحه لما نزلته قسماً بالله دمعت عيني وجلس افكر فيه وشلون عايش هذا
الحمد لله الذي عافاني مما ابتلاه وفضلني على كثيرنً ممن خلق تفضيلاً

عن اذنكم اكمل معكم بعدين لأني بصراحه نعست ودي انام

وللحديث بقية مع مواقف الليموزين

وقبل ما أنام ودي اقول رساله للشباب اللي يسافر للخارج

انتم ياللي تسافرون للخارج اتقول الله في اللي تسونه هناك
حسبي الله ونعم الوكيل

محبكم في الله و سائق الليموزين / عبرود

[حنين]

http://www.alraidiah.com/vb/uploaded/mals.gif




ماشاء الله عليك

الله يستر على شبابنا ويعطيهم حريمة السفر برى


وبالنسبه للي يدخن

احسن سويت فيه لا يدخن (( ياغريب كن أديب))


والله يشفيه من اللي فيه

سلسله رائعه






http://www.alraidiah.com/vb/uploaded/mals2.gif

[نوني الامير]

الموقف الأول كان مره معبر عن واقع مرير نعيشه وهذا الجد ...


واللهم آمين ^!^

الموقف الثاني رحمته بس هذا حال الدنيا محد فيها مرتاح .....الله يكون في عونه ويساعده ...

وأنا ضد كل شاب مدخن يسئ لنفسه وللناس اللي حوله ,,,

ونوم العوافي ،، بإنتظار الباقي....


:101:

[عجاج]

ياهلا والله

أخــــوي

عبرود

الله يجزاك خير ويرزقك ويعطيك الصحة والعافية ويشفي والدتك ويطول عمره .

أمتعتنا بسرد هذه المواقف الطريفة أمتعك الله بالعافية والجنة ,,,,

[دودي أموري]

والله يا عبرود اتمنى ان سواقيين التاكسي يجيوا ياخذا دورة عندك او يقراوا موضوعك
شكلهم من جمب النت ههههههههه
الله يوفقك وييسر لك ويسهل لك كل امورك

[حزن]

يومياتك يوماً ما ستكون رواية

أغمضت عيني ورأيت غلافها و إعلاناتها في المكتبات

فعلاً تستحق

أسلوب متميز ونقل صورة حقيقة للمجتمع

أتمنى أن تأخذ كلامي على محمل الجد

وتفكر في كتابة يومياتك كرواية

متابعة بشغف

ح ـزن

[عبرود]

قبل أن أبدأ أحب أن أشكر كل عضو وكل قارء تم مروره على موضوعي المتواضع وإن شاء الله يكون فيه بعض الفوائد

سوف أجيب على بعض الأسأله اللي ترسل لي عن طريق الأيميل

س1: كم يطلع لك في الشهر من شغل الليموزين ؟

ج1: بصراحه إذا كان الوضع فترة دراسه ودوامات فأطلع في الشهر راتب موظف الدولة ما بين المرتبة السادسه والخامسه
أما في الأجازات فأطلع راتب موظف ما بين المرتبه الرابعه والثالثه

س2: بصراحه ياعبرود أحس انك تتفق مع سائق لليموزين وتخليه يروي لك القصص والمواقف وانت تكتبها لنا بأنها صارت لك ؟

ج2: يقول المثل كلن يرا الناس بعين طبعه
ههههههههههههههههههههههههههههه

الأخ أو الأخت حزن : اولاً تشرفت بمرورك على موضوعي المتواضع
وثانياً بخصوص الكتاب بصراحه الفكره في بالي من زمان بس المشكله ابي دعم مادي عشان اسوي الكتاب والكتاب بأذن الله بيكون بأسم (عبرود) وهو كتاب فيه بعض المواضيع والقصص اللي فيها مواقف وعبر يستفاد منها الجميع



نبدأ بالحلقة





الحلقة العاشرة

اسم الحلقة

أحساس عبرود في شوارع الرياض

ههههههههههههههههههههههههههه

حلوه كلمت احساس
ياحياطي احس اني مدلّع
هههههههههههههههههههههه

المهم

في هذه الحلقه بقول لكم احساسي لما امشي في كل شارع من شوارع الرياض وبصراحه الفكره هذي جتني من احد الزبائن لما ركب معي

وقال لي : بصراحه الرياض فيها كل الجنسيات وفيها كل العادات والتقاليد
وبصراحه الرجال ما كذب تدرون ليش ؟


بقول لكم ليش


لأني


لما امشي في شارع الامير ممدوح بن عبدالعزبز في حي السليمانيه احس نفسي في سوريا او في الاردن والدليل كثرة المحلات السوريه والاردنيه والشاميه بشكل عام وكذلك السكان في نفس الحي كلهم اشوام ودوافير
ههههههههههههههههههه
حلوه كلمت دوافير احس اني جالس في ملحق

ولما امشي في شارع الشميسي احس اني في باكستان والسبب كثرة الباكستانيه هناك وكثرة محلاتهم من مطاعم ومحلات ملابس وكل شي يختص بالباكستانيه حتى المستوصفات كلها باكستانيه والله بعض الأوقات احس ان فيه فيل بيمشي من قدامي من قوة الاحساس في هذاك الشارع
هههههههههههههههههههههه

وولما امشي في شوارع حي الربوه او حي الريان او حي الروابي او حي السلام احس نفسي في القصيم من كثرة القصمان هناك والدليل تشوف السياراتهم اللي تشوفها بكثره في القصيم وهي الهايلوكسات والجيوب الربع والجيوب الشروكي والشاصات حتى الشوارع بأسماء مدن القصيم وحتى المحلات تبيع منتجات قصيمه واكثرها بأسم ناس من القصيم والدليل شف محل حلويات ركن القصيم في حي الربوه فرع وفي حي السلام فرع والمسافه بينهم قريبه
هههههههههههههههههههه

ولما أمشي في شارع الخزان من جهة عمارة الخالدية أحس نفسي في شوارع القاهره في مصر بسبب كثرة المحلات المصريه من ملابس ومطاعم مقاهي بس ناقص تاكسي من تكاسي مصر اللي يجي لونها ابيض وأسود وبعدها يصير الوضع مصري من جد
ههههههههههههههههههههه

ولما امشي في شارع البطحاء احس بأحساسين الاحساس الاول احس اني امشي في شوارع الفلبين والاحساس الثاني احس اني امشي في شوارع بنقلادش والهند وسبحان الله في هذا الشارع تشوف الجنسيات الآسياويه بشكل مخيف لدرجة انك تمشي وتحس انك في دولتهم من قوة البكتيريا اللي تشوفونها هناك وبعض الأوقات اتخيل ان فيه ناس معها ثعبان كوبرا وتجلس تصفر له عشان يرقص لها
ههههههههههههههههههه


ولما امشي في شوارع النسيم احس اني في محافظة ساجر أو عشيره أو عفيف او مهد الذهب بالرغم اني ماعمري رحت لهذيك المناطق بس احس كذا مدري ليش لأن البدو في هذيك المنطقه كثيرين ما شاء الله عليهم وانا امشي في هذيك اشوارع احس ان فيه بعير بيقطع قدامي وانا لو من امارة الرياض كان احط لوحة عبور جمال عشان يحس الواحد من قلب بأنه في احد المناطق اللي ذكرت
ههههههههههههههههههههههههههههه

ولما امشي في شوارع الفيصليه احس نفسي في جيبوتي او في أوغندا او نيجيريا بسبب كثرة الخوال هناك
بعض الاوقات احس ان فيه اسد أو وحيد القرن بيقطع الشارع قدامي من قوة الاحساس
هههههههههههههههههههههههههههههه
لذى نصيحه لا احد يروح المنطقه هذيك الا وراكب جيب لاندروفر القديم ومعاه بندق صيد ولابس شورت بيج وقميص بيج وعليه قبعة الصيادين اللي نشوفها في قنوات دسكفري
هههههههههههههههههههههههههههههه

ولما امشي في شوارع منفوحه او العود احس نفسي في جازان او في بيشه بسبب كثرة الجيازنه والبياشه هناك

ولما امشي في شارع المطار القديم وبالذات بعد ما اتعدى سوق الشعله احس اني في عام 1981 م هههههههههههههههههههه
لأن الفنادق في هذاك الشارع قديمه مررره مثل فندق المطلق او فندق قصر الرياض او فندق المطار او فندق صحاري القديم حتى لما تدخلها تشوف الفرش والموكيت حق الفندق قديم مرررررره


ولما امشي في شارع التحليه أو الثلاثين العليا احس نفسي في شارع الشنزليزيه في باريس أو في شارع إجول رود او شارع اكسفورد في لندن أو شارع السولودير في لبنان بسبب كثرة القاهي وكثرة محلات الشوكولاتات مثل باتشي والذواقه لابونير وشوكولاين وكثرة المطاعم العالميه من هنديه وصينيه ولبنانيه وإيطاليه وكذلك كثرة محلات العطور مثل قزاز وبقشان للعطور ومحمود سعيد والجماز للعطور
وبيني وبينكم لما امشي في هذي الشوارع احس بخوف عظيم من رب العالمين بسبب الفتن والاشياء المحرمه اللي اشوفها هناك
الله يهدي ضال المسلمين إلى طريق الحق


ولما امشي في طريق الملك فهد وبالذات من تقاطع خريص مع الملك فهد بأتجاه الشمال احس اني امشي في طريق الشيخ زايد اللي في دبي بسبب كثرت ناطحات السحاب وكثرت الابراج


وأخر شيء لما أمشي في شوراع حي الملز احس نفسي طفل صغير تدرون ليش لأني أول ما طلعت على وجه الدينا وعرفت شي اسمه رياض عشت في حي الملز من أيام الطفوله واحس اني في عهد الملك خالد

اما باقي شوراع الرياض اللي ما ذكرتها بصراحه ما ادري وش احس فيها لأني ما امشي فيها كثير


اخ خ خ خ خ خ خ خ خ


اخيراً خلصت


ان شاء الله تكون الحلقه عجبتكم


وفي الحلقه القادمه بكمل معكم باقي المواقف اللي تصير لي في شوارع الرياض



محبكم في الله وسائق الليموزين وأبو احساس مرهف/ عبرود

[حنين]

http://www.alraidiah.com/vb/uploaded/mals.gif





والله انك صادق ياعبروود

عرفت توصف بدقه

ماشاء الله عليك





http://www.alraidiah.com/vb/uploaded/mals2.gif

[*&* جوري *&*]

الرياض وما أدراك ما الرياض ..

للصراحه زرتها 3 مرات ..

الأولى : عشان أسجل في الجامعه ( يوم واحد ) / وكرهت الدنيا ومن فيها يوم رحت ..

الثانيه : عشان مؤتمر البعثه جلست فيها 5 ايام / حسيت بقيمة الوقت وكيف إن الإنسان لازم يكون عندة هدف بحياته ..

بس أول ما وصلنا قلت لزوجه أخوي : خير ان شاء الله وش عندهم أهل الرياض اليوم ؟
قالت لي ليه ؟ قلت الساعه 8 الصبح وزحمه السيارات غريبه .. لايكون فيه عيد وطني ولا المنتخب فايز واحنا ماندري ؟
فطست ضحك عليي وقالت لى يادلوعه إحنا في الرياض .. تعرفين يعني شنو الرياض ؟
هذي ماهي زحمه .. هذي رواقه الصبح :confused:

وكل ماطلعنا مشوار : حطيت يدي على قلبي .. السيارات لاصقه ببعض وكلن يسرع
تقول مصر الثانيه هههههههههههههه



والمرة الثالثه : كانت كشته على قولتهم .. رحت مع إختي وزوجها ( تقول عزول :biggrin:) ..
بس ماظل حي مادخلناة من كثر مالفينا .. وفعلا حسيت ان كلامك صحيح ..

في بعض المناطق يجيك إحساس غريب .. خصوصا مع المباني الضخمه والتكديس السكاني

بس لما رجعت للشرقيه .. عرفت شقد الدنيا حلوة .. والحياة رايقه :cool:..



شاكرة لك أخوي عبرود ..

[نوني الامير]

الرياض المزعج فيها كثرة السكان بس تضم كل أنواع الحضارات وأنواع الناس من مختلف الجنسيات ...

الزحمة شي ملل بالحياه عندنا .... شكل الناس عندنا مايقدروا النوم .... :)


صادق بالوصف .. عبرووود ماخليت شي أصلاً ...:)

الله يقويك بإنتظار المزيد .. :101:

[عبرود]

أحب أن أشكر كل عضو وكل قارء تم مروره على موضوعي المتواضع وإن شاء الله عجبكم




الحلقة الحادية عشرة


قبل ما ابدأ بالمواقف بنصحكم على فطور جربته قبل كم يوم بصراحه مرررره لذيذ
في يوم من الايام كنت واقف عند احد اشارات المرور اللي في شارع ممدوح بن عبدالعزيز بحي السليمانية بالرياض وكانت الساعه 8 صباحاً وجالس افكر وين افطر فيه وأنا واقف عند الأشارة جلست اطالع في اعلان لجبنة تشدر المراعي القابلة للدهن وكان الأعلان فيه صورة لقارورة جبنة تشدر قابلة للدهن ومن فوقفها يد ماسكة خبز تميس ومكتوب في أعلى الصورة جربها بالتميس
وبعدها جلست افكر في الصورة وقلت خلني اجربها اليوم يمكن تطلع لذيذه وبعد ما فتحت الأشارة وقفت عند مطعم القرموشي واشتريت منه خبز تميس بسكوت ودخلت للبقالة اللي جبنه واشتريت جبنة تشدر المراعي القابلة للدهن وبعدين رحت للبيت وسويت لي بريق شاهي بالحبق وجلست افطر
قسماً بالله ثم قسماً بالله ثم قسماً بالله أللي مسوي الاعلان حق الجبنة المراعي وكاتب جربوها بالتميس انه صادق وبيني وبينكم اول مره اشوف دعاية قول وفعل
لذى انصحكم تجربون الفطور هذا وتراه ينفع نقنقة خفيفه بعد المغرب وانت جالس مع اهلك تسولف أو عشاء خفيف بس اهم شي التميس يكون بسكوت من أي فرع من فروع القرموشي وبعدها بتدعون لي


المهم

نبدأ المواقف


الموقف الأول

طبعاً الموقف هذا ينطبق عليه المثل اللي يقول
اللهم طولك ياروح
ههههههههههههههههههههههههههههههه

يوم من الايام كنت امشي في احد حواري البطحاء وكانت الساعة 9 صباحاً على ما اعتقد

المهم

وانا امشي في وسط الحاره أشرت لي حرمه عجوز هههههههههههه لاحظو قللت لكم حرمه عجوز بس بمواصافت بنت عمرها 10 سنوات الله يحفظها
وكانت من أهل الجنوب ومن خميس مشيط بالذات

المهم

وقالت لي : ابومحمد نبيك توصلنا لنقل الجماعي
قلت لها : إن شاء الله
قالت لي : بكم ؟
قلت لها : بعشرين ريال
قالت لي : أنا افدى هالوجه ان ما معي الا عشره ريال والله ياولدي انا حرمه مسكينه
قلت لها : مو مشكله ابوصلك بعشره ريال
قالت لي : الله يحفظ امك وابوك انتظر اجيب الشنطه

وانا انتظر في السياره طلع لي ولدها ما شاء الله عليه عمره على ما اعتقد 20 سنه ووسيم وكان لبسه مرتب ونظيف وقبل ما يركب معي جلس يطالع فيني بنص عين وانا كنت لابس النظارات الشمسيه واطالع فيه واسوي نفسي ما اشوفه
وبعدين ركب جنبي وهو ساكت لا سلم علي ولا قال ولا كلمه وبعد ثواني طلعت امه من البيت وشايله شنطه كبيره وبعدها انا حقدت على الولد وقلت في نفسي ليش الحيوان ما يشيل مع امه الشنطه حسبي الله عليه

المهم

بعد ما ركبت الحرمه بدأ مشوار القلق والعذاب
وحنا في الطريق
قالت لي الحرمه : يابو محمد انت سعودي ؟
قلت لها : ايه
قالت لي : يابومحمد هذا الليموزين لك ولا للشركه ؟
قلت لها : خاص فيني
قالت لي : اهاااااااا
وبعدين
قالت لي : يابومحمد عن اذنك وقفني عند البقاله دقايق ابي اشتري اكل حق الطريق عشان ما نجوع في الطريق وحنا مسافرين
وبعدها قالت لي جمله بسببها وقف شعر راسي

قالت لي : يابو محمد انتبه لولدي لا يهرب منك
وبعدها انا طارت عيوني وبغت النظارات الشمسيه تطيح من وجهي
وجلست اطالع في الولد من فوق لتحت وأقول في نفسي وش اللي يخلي الولد ينحاش وفجأه شفت رجول الولد بدون نعال الله يكرمكم وبعدين جلس الولد يطالع فيني وهو ساكت كأنه يفكر في شي وجلس يطالع فيني لمدة طويله وانا اقول في نفسي شكله يبي يظربني كف او يشق ثوبي او أي شي
وبعدها عرفت ليش الولد ما شال الشنطه مع امه لما جت تركب معي لأن الولد الله يشفيه عنده مرض في عقله على ما اعتقد انفصام بالشخصيه

المهم

بعد دقايق نزّل الولد الشماسه وكان يطالع في المرآية حقت الشماسه وبعدين جلس يتفل على يده ويحط التفال على شعره وبعدين اخذ الماء الموجود جنبي وفك القاروره وحط شوي مويه على يده وجلس يمسح على شعره وكان يبي يصلح شعره بالماء وبعدين ركبت امه معي
وقالت لولدها : ما شاء الله عليك ياحمودي طالع كأنك امير
والولد يطالع فيني وفي أمه ويضحك
وانا اطالع فيه ومصدوم من الموقف

المهم

وحنا في الطريق
قالت لي الحرمه : ابو محمد اصب لك شوي قهوه ؟
قلت لها : انا صائم ياخاله
قالت لي : ليش تصوم ؟ اهااااا انت صائم عشان اليوم اثنين شكلك تصوم الاثنين والخميس صح
ههههههههههههههههههه
قلت لها : ياخاله انا صائم عشان اقضي صيامي لأني فطرت في شهر رمضان عشاني كنت ماسك خط ومسافر لمكه اخذ عمره
قالت لي : اهااااااا
وبعدين قالت لي : يابومحمد كم عمرك ؟
قلت لها : عمري 31
قالت لي : متزوج ؟
قلت لها : لا
قالت لي : ليش ما تزوجت حرام عليك
ههههههههههههههههههههههه
استغفر الله العظيم
قلت لها : ان شاء الله بتزوج بعدين
قالت لي : بابومحمد وين ساكن ؟
قلت لها : في حي الربوه
قالت لي : ياخي غالي حي الربوه ليش ما تسكن في حي الشميسي او حي منفوحه احسن لك وارخص لك
هههههههههههههههههههههههههههه
وبعدين
قالت لي : بابومحمد فين تشتغل ؟
قلت لها : عاطل
قالت لي : حرام عليك ليش ما تشتغل بوظيفه رسميه
مسكينه شكلها ما تدري ان الوضع رايح فيها من زمان
قالت لي : يابومحمد وش اصلك
قلت لها : شمري
قالت لي : شمري وساكن في الرياض
ههههههههههههههههههههههههههههههههههه
قلت لها : انا مثلك انتي من الجنوب وجايه اللرياض
وبيني وبينكم انا ارتفع ضغطي بسبب كثرة كلامها معي
وبعدها
قلت لها : ياخاله عن اذنك تكفين خليني اسمع الشريط وانا كنت حاط شريط طارق سويدان عن السيره النبويه
وبعدين قالت لي : الشريط هذا حق عائض القرني
ههههههههههههههههههههه
قلت لها : لا
قالت لي : طيب ليش ما تسمع لعائض القرني والله انه طيب
ههههههههههههههههههههههه
اللهم طولك ياروح
واخيراً وصلنا لمحطة النقل الجماعي
قالت لي : يابومحمد فيه رحله الحين لخميس مشيط
قلت لها : والله مدري ياخاله
قلت لي : ليش ما تدري
هههههههههههههههههههههههههههههههههههههههههههههههههه ههههههههههههههههههههههههههههههههههههههه
وبعدها نزلت وراحت الله يوصلها بالسلامه ويعين الركاب اللي في الباص معها



الموقف الثاني

طبعاً هذا الموقف من شوراع مدينة جدة واللي يقص لي القصه واحد من اخوياي من سكان جده كان عنده زياره للرياض وبرضو معاه لليموزين في جدة
واسمه موسى الله يوفقه ويفرج همّه

المهم

قلت له : ها ياموسى كيف الليموزين في جده
قال لي : ماعليه شغله طيب بس فيه فتن عظيمه والعياذ بالله
قلت له : الله يعينك طيب ما صار لك موقف غريب في جده
قال لي : المواقف كثيره وبيلها جلسه
قلت له : طيب قل موقف واحد بس
قال لي : بقول لك موقف صار لواحد من اخوياي
قلت له : وش هو ؟
قال لي : هذا واحد من اخوياي معه ليموزين ومره من المرات أشر له واحد من الشباب في شارع على ما اعتقد شارع الاربعين او السبعين المهم وقفه واحد
وقال له : لو سمحت نبيك توصلني لحي بريمان
قال له سائق الليموزين : مو مشكله ابشر
وركب الزبون وبعدين
قال لسائق الليموزين : لحضه لحضه فيه ثلاثه من اخوياي بناخذهم من قدام معهم اغراض يركبونها معنا افتح لهم الشنطه
وبعدين لما فتح الرجال الشنطه شاف الشباب شايلين اكياس ثقيله مررره ولما جا ينزل عشان يساعدهم مسك بيده الزبون اللي كان راكب جنبه وقال له : والله ما تنزل خلاص الشباب بيشيلون الاكياس بدون مساعد والله ما تنزل
وبعدها سواق الليموزين نغزه قلبه وشك في الموضوع
وبعدين وهو في الطريق جته فكره جهنميه وقف عند محطة بنزين ونزل من السياره واتصل على واحد من اخوياه كان يشتغل في شرطة جده
وقال له : يافلان انا معي شباب بصراحه شاك في امرهم وابيك بسرعه تجي توقفني عشان تفتشهم وتشوف وش معهم في الكيس
قال له خويه : انا موقعي بعيد عنك بس انت حدد لي موقعك عشان ارسل لك دوريه توقفك وتفتشك على راحتك
قال له انا في حي الصفا وفي طريقي لحي بريمان من عند كوبري بريمان
وبعدين

بلغ الشرطي على العمليات بأن فيه لليموزين فيه ركاب مشتبه فيهم

المهم

وهم ماشين في الطريق اشرت الدوريه لليموزين وامره بالوقوف بجهاز الميكروفون ولما وقفو انحاشو الركاب اللي كانو راكبين في الخلف واما الراكب الامامي كان بينحاش بس مسك فيه سواق الليموزين حتى مسكت فيه الشرطه ونزلوه وركبوه معهم ولما فتشو الاكياس اللي معهم حصلو على مجموعة اسلحه كثيره الظاهر خاصة لليبع
المهم بعد فتره تقابل سائق الليموزين مع خويه اللي في الشرطه
وقال له : شفت الزبائن اللي ركبتهم معك وكانو معهم اسلحه
قال له : ايه وشفيهم
قال له الشرطي : هذولي مطلوبين امنياً وإذا احد وصلهم للمكان اللي في بريمان يدخلونه معهم الحوش ويقتلونه
الله يستر علينا من زبائن الرياض
من جد بعد الموقف هذا ودي الدوله تصرف لنا بدل خطر
هههههههههههههههههههههههههههه
معليشششششششششششششششش
عشم ابليس في الجنة


الموقف الثالث والأخير

بصراحه الموقف هذا شوي مؤثر ومحزن

مره من المرات كنت امشي في احد شوارع حي النسيم وكانت الساعه 8 صباحاً على ما اعتقد
وكنت مركب معي زبون ولما نزلته عند بيتهم وسط الحاره وانا طالع من الحارة أشر لي رجال كبير في السن وعمره على ما اعتقد 63 سنة وكان لابس ثوب مغربي لونه بنّي

وقال لي : ابيك توصلني لمستشفى الحرس الوطني
قلت له : ابشر
قال لي : بكم ؟
عشان المشوار قريب
قلت له : بـ 10 ريال
قال لي : انا بعطيك 15 لأن المشوار شوي بعيد وانا سواق لليموزين في السابق واعرف الاسعار والأصول اصول
وبعدها انا ضحكت له
وقلت له : انت كريم وحنا نستهال

المهم

وحنا في الطريق
قلت له : من وين ياخالي
قال لي : معك عواد العنزي من الشمال بس عايش في الرياض بعد ما تقاعدت من العسكرية

قلت له : ونعم والله

قال لي : وبلحيتك

قلت له : سلامات عسى ما شر وش عندك بالمستشفى
قال لي : انا رجال عندي فشل كلوي وابي اروح اغسل وانا كل يومين اروح
قلت له : الله يشفيك ويفرج همّك

المهم

وحنا في الطريق ومع زحمت السيارات كان الطريق واقف بسبب الزحمة وكان الرجال ساكت وبعدين انا جلست اناظر الرجال بنصف عين طعباً انا لابس النظارات الشمسيه وهو مايشوف عيوني وانا اطالع فيه

وكان الرجال يناظر على جهة اليسار وهو سرحان ويفكر بشي بس مدري وش هو

وفجأة وهو سرحان نزلت دموع من عينه وهو مبتسم
بيني وبينكم انا ضاق صدري من المنظر

وبعدين

قلت له : وش فيك ياخالي عسى ما شر
قال لي : وهو مبتسم لا مافي شي بس تذكرت ام العيال بصراحه اشتقت لها بالحيل
قلت له : ليش ام العيال مو ساكنه معكم في الرياض
قال لي : ام العيال توفت قبل ثلاث سنوات
قلت له : الله يرحمها
قال لي : تدري ليش ابكي
قلت له : عشانها صح
قال لي : في ايام الغزو كنت مشترك في حرب الخليج وكنت متحمس للحرب وبعدين وانا جالس معها على الفطور وكنت بفطر قبل ما اروح للجبهه عشان اشارك مع الحرس الوطني بالحرب
قالت لي : كل بشويش وشفيك مستعجل ترا الدنيا ماهي طايره
قلت لها : ابي الحق على الجبهه
قالت لي : يعني الجبهه اغلى منّي
قلت لها : اقول الكلام هذا مو وقته
قالت لي : خير ان شاء الله بيجي يوم وتشتاق لي بالمرره
وبصراحه الحين انا مشتاق لها بالمررره ودي اموت اليوم قبل بكره عشان اشوفها لأني بصراحه فقدتها بالحيل

والله العظيم لما قال لي الكلام هذا بعدها ما قدرت اطالع فيه وصرت اطالع جهة اليسار عشان ما يشوف عيوني وجلست عيني تدمع من الحزن على كلامه
وبصراحه ما الومه يبكي

أسأل الله القدير رب العرش العظيم بأن يجمعهم مع بعض في جنات النعيم إنه سميع مجيب

في الحلقة القادمة لا تفوتكم بقول لكم قصتي مع السكران حسبي الله عليه

وللحديث بقية


محبكم في الله وسائق الليموزين / عبرود

[حنين]

http://www.alraidiah.com/vb/uploaded/mals.gif



مبدع مبدع ياعبرووود

بالنسبه للجبن والخبز هو حلو من زمااااااااااااااان وعايشين عليه

اما الموقف الاول رووعه ونشبه العجوز توسع الصدر

اما الولد الله يشفيه


والموقف الثاني

قرأة الاذكار في الصباح والمساء ان شاء الله انها تحفظ الانسان من كل مكروه والحافظ الله


والموقف الثالث والله يبكي

الله يجمعه مع زوجته وع كل من يحب اللهم امين


تسلم ياعبرود










http://www.alraidiah.com/vb/uploaded/mals2.gif

[عبرود]

قبل أن أبدأ أحب أن أشكر كل عضو وكل قارء تم مروره على موضوعي المتواضع وإن شاء الله اعجبكم


نبدأ بالحلقة



الحلقة الثانية عشرة


الموقف الأول
بصراحه الموقف الأول هذا اعتبرة خاص للعزوبيه اللي مثلي

في يوم من الأيام كانت الساعة عشرة ليلاً وكنت طالع من مخرج 15 بحي الريان متجه إلى مخرج 14 ولما مريت من عند ستي ماكس فرع حي الربوة اللي قبل مخرج 14 أشر لي واحد سوداني وأسمه عبدالرحيم محمد عباس والسوداني هذا موظف يشتغل في مصنع بلاستيك وبصراحه انا اعتبره دكتور في علم النفس لأنه قال لي كلام خلاني اندم على عمري اللي راح وانا عزوبي وأنا بقول لكم جزء من الكلام اللي قال لي

المهم

قال لي : عليك الله انا داير اروح للصناعية اللي عند سوق حراج بن قاسم
قلت له : ابشر
قال لي : بكم ؟
قلت له : بـ 20 ريال
قال لي : علي الطلاغ (الطلاق) انا اصو جاي من هناك بـ 15 ريال إذا داير 15 خليني اركب ما داير خليني أشوف لي ليموزين تاني
قلت له : آآآآآييي دايرين 15 ما نقول لا
وبعدها جلس يضحك علي وركب
قال لي : الاخ سعودي
قلت له : آآآآييي
وبعدين قلت له شف يازول إذا بتزعل عشان كلمت آآآييي مو مشكله ماني قايلها
قال لي : لاكين أزعل شنوو ياخي دي كلمه كويسة
قلت له : بصراحه أنا لما جيت اشتري الليموزين من المعرض كان فيه محاسب سوداني ولما قلت له آآآييي قال لي شوف يازول انت راجل تحب تستهزأ بالناس وهذا الكلام ما كويس عيب عليك ياخي حنّا بني أدمين هههههههههههههههههههه
قال لي : دا أصو سوداني عصبي ويمكن جالو موغف (موقف) مع واحد سعودي كان بيستهزء بيهو لذا لا تهتم بكلامو

المهم

سألني
وقال لي : عندك عيال ولا لا ؟
قلت له : بصراحه ما تزوجت إلى الأن
قال لي : ليه ياخي انت هسع عمرك كم ؟
قلت له : 31 سنة
قال لي : عليّ الطلاغ (الطلاق) عمرك ضاع ساكت
هههههههههههههههههه
قلت له : الشكوه الله
قال لي : طيب السبب شنو عدم زواجك إلى الأن
قلت له : بصراحه يازول انا ماعندي وظيفه رسمية عشان اصرف على زوجتي
قال لي : طيب والليموزين دا شنو ؟
قلت له : بصراحه الليموزين جديد واشتريته قبل رمضان بيومين وما تأقلمت معه إلى الأن
قال لي : طيب الليموزين دا ما بيجيب لك فلوس ؟
قلت له : الا والله بس الوظيفه احسن من الليموزين
قال لي : بصراحه عمرك ضاع ساكت ياخي انت لما بتنزلني هسع بتاخد الـ 15 ريال وبتروح تشتري فيها عشاء من مطعم بخاري او من مطعم مندي
بس لما تكون متزوج تدخل بيتكم تلقى زوجتك مجهزه لك مثلاً سلطه خضار مع الخبز والله يازول على الطلاغ (الطلاق) صحن السلطة زاتو بتحس انه صحن ذبيحه لأنه معمول بيد زوجتك
وبعدين قال لي بصوت فيه شوي من الحماس والعصبيه : ياخي خدوهم فغراء (فقراء) يغنيكم الله ياخي والله العظيم يازول حياتك هادي تتغير بعد الزواج وعلاقتك مع الناس بتتغير وبتصير الناس تحترمك حتى لو كنت صغير في السن برضو يحترموك ويضربون لك 1000 حساب

وبعدين

قال لي : لمواخزا انتم يالخليجين بشكل عام والسعوديين بشكلاً خاص عيبكم شيئين
قلت له : وش هي ؟
قال لي : التكبر وكلمة عيب
قلت له : التكبر على ايش ؟
قال لي : على الناس وعلى الاجانب وعلى الناس الضعيفه
قلت له : طيب كلمة عيب وش فيها
قال لي : اصو الكلمة هادي مسببه لكم الخساير والكلام الفاضي
قلت له : وشلون ؟
قال لي : انتم لما تعزمو أي شخص في بيتك او في مطعم بتقدمو لو اكل اكثر من طاغتو(طاقته)
مثلاً تذبح لو ذبيحه ويكون لوحدو ما معاهو حدا
تصدق يازول لو الذبيحه هذي ذبحت في السودان كان اكلت نص سكان الخرطوم
وتاني حاجه لما تكونو في مطعم بتدفع الفلوس كامله بدون ما تشتركو بغيمة (بقيمة) الاكل
قلت له : طيب هذا يازول من باب الكرم
قال لي : كرم شنو ياخي المشكله حتى الفغير(فقير) بيدفع عن صاحبو

المهم

لما دخلنا الصناعية حقت حراج بن قاسم كان قدامنا مطب صناعي بس حجمه كبير شوي
ولما طلعت فوق المطب حكت السياره من تحت وكان بصوت خفيف وبعدين
قال لي : ياخي دا أصّو ما مطب دا عليّ الطلاغ (الطلاق) جبل ودايرليهو لاندكروزر
هههههههههههههههه

وبعدها نزلته وراح وتركني في هواجيس عن الزواج

أخ خ خ خ خ خ خ
حسبي الله على الظالم



الموقف الثاني

مره من المرات كنت امشي في شارع الثميري حق سوق الزل وركب معي ولد كان عمره على ما اعتقد 16 سنة ولما ركب جلس يفكر ويضحك ضحكه خفيفه وفي عيونه دموع تبي تطلع بس ما سكها من قوة القهر وكانت الضحكه اللي في وجهه ضحكت واحد مقهور

المهم

سألته
وقلت له : عسى ما شر وشفيك ؟
قال لي : وهو يضحك ضحكة قهر كنت امشي داخل حارة شارع الثميري وبعدها طلعو لي اثنين من الشباب وكانو متلثمين ومعهم سكينه
وقالو لي : عطنا جوالك بسرعه ولا تراني بذبحك
وبعدها عطيتهم الجوال بكل هدوء وبرود وانا قلبي يتقطع من القهر والله العظيم ماني مصدق اني في السعودية
وبعدها جلس يفكر ويهوجس بينه وبين نفسه وكانت عيونه تمتلي من دموع القهر

وبصراحه انا عندي فكره ودي الدولة تطبقها
وهي
ياخذون من كل سجن من سجون المملكة سجين واحد ويكون عليه قضية سرقة وتكون سمعته قويه ومشهورا بين السجناء
وبعدها يقطعون يد السجين المشهور قدام السجناءالباقين واللي قضاياهم عباره عن سرقة وسطو على البيوت يعلنون الخبر في التلفزيون عشان باقي الحرامية اللي خارج السجن يدرون ان فيه تطبيق لحد السرقة
والله العظيم بعدها بيبطلون السرقه وبتصير بعدها الكل في أمان

لأن بصراحه الان الحرامية يطبقون المثل اللي يقول
من أمن العقوبة أساء الأدب
وهذا سبب كثرة السرقات عندنا
لأنه مره من المرات في برنامج شبابx شباب اللي يقدمه المذيع مهدي بخاري كانت فيه حلقه من الحلقات خاصة مع بعض سجناء سجن بريمان في جده وكان من ضمن السجناء سجين عمره على ما اعتقد 19 سنه ولما سأله المذيع
قال له : ها ياولدي انت أيش قضيتك ؟
قال للمذيع : انا مسجون عشاني سرقت مسجل سياره وبصراحه هذي خامس مره ادخل فيها السجن عشان سرقه
لاحضو بكل برود يقول هذي خامس مره يعني لو يدري ان فيه ناس بتقطع يده كان ما كرر عملته

بس ما اقول الا الله يستر علينا




الموقف الثالث


مره من المرات كنت امشي في طريق الملك فهد وكنت ماسك خط الخدمة ومتجه لشارع التحلية ولما مريت من عند فندق الفيصلة أشر لي رجل الأمن حق الفندق
وقا لي : في زبون عند مدخل الفندق يبي لليموزين
قلت له : ابشر

ولما جيت عند المدخل وأشوف ذاك الرجال اللي لابس لبس محترم وشكله برستيج ولما ركب معي ما قال ولا كلمة وكانت ريحته ما شاء الله مرررره روعة

وفجأة

طالع فيني
وكان يكلمني وهو سكران ولسانه ثقيل

وقال لي : أبي حييييي الررررررراااائد عند سووووبرمااااركت التميييمي

قلت له : ابشر

ولما طلعت من مدخل الفندق
جلست افكر وش اسوي مع السكران الله يستر بس اهم شي يكون معه فلوس عشان يحاسبني

وبعدين جلس يطالع فيني وبعدين حط أصبع السبابه عند خشمي
وقال لي : انتم يا سووووااااقين الليمووووززززينااااات اكبر مسخرة
قلت له : صدقت
ههههههههههههههههههههه
قال لي : صح ولا لا
قال له : صح
قال لي : انااااا اليووووووم مبسووووووووط واحب اكون مبسوووووط عندك مانع قل لي إذا عندك ماااااانع
قلت له : لا والله ما عندي مانع اهم شي انت تنبسط
وانا بصراحه اقول في نفسي الله يعدي الليلة على خير
وبعدين جلس يطالع فيني
وقال لي : وش قااااعد تقوووول تراااني اسسسسمعك

قال له : ما قلت شي

قال لي : اشوووه

وبعدين جلس يطبل على الطبلون ويغني بصوت خفيف وشوي يرقص رقص خفيف وبعدين شغل الرادو على قناة ام بي سي اف ام وبعدها انا حقدت وقفلت الرادو
قال لي : ليييشششش تقفلة

قلت له : عشان ما يخرب مزاجك مع الموسيقا
وانا بصراحه كنت ابي اقفلة عشاني ما احب اسمع اغاني لأنه حراااااااام

وبعدين

قال لي : تشرب دخاااااان
قلت له : لا والله اشرب عصير منجا فقط
قال لي : لا ياشيخ تستهبل انت
قالت له : لا والله ما استهبل بس احاول

وبعدها جلس يطالع فيني وهو مبتسم وانا اطلع فيه بنص عين واهوجس في نفسي قلت شكله الحين بيطلع سلاح ولا سكين وبيقعد يهبل فيني في ذا الليل

وبعدين قبل ما نوصل للعنوان اللي هو قال عليه

قال لي : تشوف النور الأحمر اللي في أخر الشارع
قلت له : أيه اشوفها
طبعاً مافي لا نور ولا بطيخ بس كنت ابي اخذه على قد عقله
قال لي : هذا النور حق كاميرا
معك الكاميرا الخفيه
ههههههههههههههههههههههه


الاخ كان يستهبل علي

قلت له : اخ خ خ خ الله يخسك والله اني جالس افكر وشلون اصرفك

قال لي : بصراحه عجبتني ماخفت مثل باقي سواقين الليموزينات الهنود والباكستانيه
قلت له : افا ليش دايماً تسوي مع كل واحد كذا
قال لي : والله إذا انا رايق استهبل عليهم بس انت جالس تسايسني بالكلام وانا ابي اهبل فيك بس ما عرفت
هههههههههههههههههههههههههه
قلت له : والله انا كان تفكيري كله عن قيمة المشوار هل بتعطينياه ولا لا
وبعدها لما وصلنا للماكن اللي هو يبيه طلع الحساب في العداد 22 ريال
وقال لي : والله تستاهل 50 ريال
ههههههههههههه
وبعدها
قلت له : اجل المره الثانية كثر من الشراب عشان تعطيني اكثر
وبعدها جلس يضحك وهو نازل


اشوه خلصت

بصراحه اصابعي تعبت بسبب الكتابه

وللحديث بقية

محبكم في الله وسائق الليموزين / عبرود

[الدووووخي]

الله يقويك اخوي عبرود ’’’

مواقف فيه الحزن والطريف ’’’

[حنين]

http://www.alraidiah.com/vb/uploaded/mals.gif




ماشاء الله عليك

والله انك حكيم وتقدر تتصرف بحكمه وعقل

موقف السوداني رووعه وكلامه عين العقل

اما الولد اللي انسرق جواله الله يعوضه بأحسن منه


والموقف الاكثر من رائع موقف السكران هههههههههههههههههههههههههههههههه


بصراحه ممثل رااائع


تسلم على هالمقاله


ننتظرك بشغف




http://www.alraidiah.com/vb/uploaded/mals2.gif

[*&* جوري *&*]

هههههههههههههه

مواقف غريبه عجيبة ..

الله يصبرك على هالأشكال الي تشوفها كل يوم ..


وهالوظيفه محتاجه رجال قلبه قوي ويساير الوضع .. ونت ماشاء الله منت مقصر ..

الله يعطيك على قد نيتك ويرزقك خير الدنيا والآخرة قول آآآمين ..

[نوني الامير]

عجبتني حكاية السكران :)

انت شكلك صرت تخاف من كل واحد يركب معك :)

الله يحفظك .. ويقويك ... :101:

[عبرود]

قبل أن أبدأ أحب أشكر كل عضو وكل قارء تم مروره على موضوعي المتواضع وإن شاء الله وجدتم فيه الشيء المفيد


نبدأ بالحلقة



الحلقة الثالثة عشرة


الموقف الأول

مره من المرات كنت موصل حرمه مع ولدها لسوق الديره اللي قريب من امارة الرياض ولما نزلتهم جتني حرمتين من الباب الثاني وركبو بدون ما يكاسروني بالسعر وبعدين
قالت لي وحده فيهم : ابيك توصلنا لشارع السويلم حق العطورات
قلت لهم : ان شاء الله
وحنّا وسط الزحمة كانت وحده فيهم تسألني
وتقول لي : توصل مدرسات وطالبات للمدارس والجامعات
قلت لهم : ايه
قالت لي : طيب بكم توصلنا
قلت لهم : بصراحه انا الحين عندي ناس اوصلهم ولا عندي وقت اقدر اوصلكم فيه
قالت لي : طيب تعرف احد يوصلنا عن طريقك
قلت لهم : اعرف واحد بس انه جديد على الشغله ولا اقدر اضمنه لكم
قالت لي : لا نبي واحد عنده خبره في الشوارع

المهم

بعد ما وصلنا لشارع السويلم عند محلات العطور
قالو لي : خلاص وقفنا هنا

ولما نزلو قالو لي : ها كم حسابك ؟
قلت لهم : عشره ريال
ولما عطتني وحده فيهم العشره
قالت لي وهي تدخل السوق بسرعه : هيه شف وش مكتوب بالعشره

ولما قرأت المكتوب بالعشره بصراحه ندمت اني وصلتهم
الحيوانه كانت كاتبه
( بنت ابوها اتصل نصل = ؟؟؟؟؟؟؟؟0555)
حسبي الله ونعم الوكيل


الموقف الثاني

مره من المرات كنت امشي من عند سوق المعيقلية وأشر لي هذا الرجال المطوع وكان من اهل حائل وكان عنده شغل بالرياض وبيرجع بعد كم يوم


المهم

قال لي : بكم توصلني حي الخليج
قلت له : بـ 20 ريال
قال لي : ياحيي مدامك سعودي ابشر بعزك
وبعد ما ركب معي بدأت سواليف الطريق
وقال لي : ها كيف الليموزين معك عسا ان شاء الله به ربح
قلت له : الحمد لله به خير بس بنفس الوقلت فيه فتن عظيمة والعياذ بالله لو الواحد ما يخاف الله قسماً بالله يروح فيها ويضيع مستقبله بس ما اقول الا الله يصبرنا
قال لي : شكلك تشوف بلاوي به الليموزين ؟
قلت له : والله اشوف العجب العجاب
قال لي : وش اخر البلاوي اللي صارت لك
قلت له : عن الموقف الاول اللي ذكرته في بداية الحلقه حق العشره ريال
وبعدها قال لي عن موقف صار لواحد من اخوياه بس موقف فيه حركه ذكيه
قال لي : هذا واحد من اخوياي مطوع وملتزم ورجال يخاف الله وكان الرجال مرررره وسيم وكان عنده مشكله وهي ان وجهه ما يطلع فيه شعر الا قليل جداً
قلت له : وشلون ما يطلع فيه شعر ؟
قال لي : يعني ما يطلع له شنب ولا دقن الا دقن خفيفه جداً ما ينشاف الا اذا قربت له وكان ما شاء الله عليه جميل
المهم
مره من المرات راح يوصل امه واخوه واخته للسوق وكان جالس بالسياره ينتظرهم
وهو جالس ينتظر
جته بنت جريئة جداً وفتحت عليه الباب وركبت بدون أي مقدمات
وقالت له : يلا امش شف لك أي مكان بسرعه
وهو بعدها انفجع وانبهر من الموقف اللي صار له
وقال لها : يا اختي انا ماني راعي الحركات هذي اتقي الله وانزلي الله يهديك
قالت له : والله اذا ما مشيت بشقق هدومي وقول انك خاطفني
وبعدها الذكي جلس يفكر عن حيله يبي يصرف فيها البنت
ما شاء الله عليه
تدرون وش سوى ؟

نزل وفتح الباب حق البنت وجلس يصرخ
ويقول : اقول انزلي حسبي الله عليك انتي طالق طالق طالق وخلي اهلك ينفعونك يلا انزلي انا ما ابيك انتي طالق اقول انتي طااااالق
وبعدها جلس يسحبها مع الباب والبنت انصدمت من الحركه اللي سواها فيها وماتت من القهر
وبعدها هو ركب سيارته ومشى من عندها والظاهر غير موقفه اللي كان واقف فيه عشان ينتظر اهله
ههههههههههههههههه
من جد عجبني
أسأل الله القدير رب العرش العظيم بأن يحفظ أبناء المسلمين من شر الفتن وشر المعاصي
انه سميع مجيب


معليش اكمل معكم باقي المواقف في الحلقه القادمة لأني بصراحه مررره تعبان

وانتظروني في الحلقة القادمة مع موقف توصيلي للجثة من مخرج 15 إلى نهاية مخرج 16 بحي السلي

قبل ما أنهي الحلقة أحب اوصيكم بقراءة سورة الكهف يوم الجمعه ترا فيها اجر عظيم وتحفظ الواحد من المشاكل وترا وقتها من بعد شروق شمس الجمعه إلى وقت غروبها لا تفوتكم تكفون

للحديث بقية

محبكم في الله وسائق الليموزين / عبرود

[حنين]

http://www.alraidiah.com/vb/uploaded/mals.gif



تسلم ياعبرود

بالنسبه للبنات ياكثر البنات الفالتات

الله يهدي الجميع

بصراحه انتظر موقف الجثه على احر من جمر






http://www.alraidiah.com/vb/uploaded/mals2.gif

[نوني الامير]

بإنتظار الحلقات القادمه ...

أما البنات من جد الله الهادي إلى سواء السبيل ...بس حركته قويه .. ذكي !!

:101:

[موجة بحر]

تسلم أخوي عبرود

صراحة أسلوبك مشوق واحلى ما فيه بساطته

لكن بنبه على حاجة اللي لولاها يمكن ماشفت ردي

لأني ما أحب الردود بصفة عامة

المهم ذكرت تطبيق حد السرقة وليش ما يطبق

وحبيت اقوللك ان الحد هذا ما يطبق حسب الشرع

الا في ظروف نادرة جدا وشروطه كثيرة مرررة

وهذا رحمة من ربنا
وأتمنى تستفسر من اهل العلم كمان عشان تتأكد

الكلام هذا من الدكتور اللي يدرسنا ثقافة اسلامية

تحياتي

[الدووووخي]

الله يعينك اخوي عبرود على المواقف هذي ’’’

والله يسهل امورك يارب ’’’

وننتظر موقف الجثه ’’’

[أزف الرحيل]

الله يسهل ............دروبك ويحفظك

ولا تحرمنا..................... وجودك..........


اختك أزف الرحيل...................

[الجوووري]

<<< متآبعهـ



ومره اضحك ... ومره اتحسر على حال المسلمين ..

بس ماشاء الله عليه

ذهين وذكي اللي تحرشت فيه البنـت


الله يستر على الجميع


ويهديهـم



دام قلمك نابضاً ياعبرود


لاعدمنآك ..

:101:

[غير كل البشر]

السلام عليكم ورحمة الله وبركاته

بصراحه أنا ابي أبدي أعجابي بكتابتك الي هي من الواقع

بصراحه كتاباتك روعه وشي خياااااااااااااااااااال

واصل باقي الحلقات

وانا من متابعين الحلقات

أتحري الحلقه الجاي بكل حماس للقراءه ومعرفه أحداث الناس وهمومهم من شارع الرياض

وشكرا لك

والله يقويك ويثبتك على دينك وعملك والله يشفي امك يارب اللهم أمين

وأن شاء الله أني بدعي لها كل يوم بصلاتي الله يشفيها ويخليها لك يارب

أختك الصغير : غير كل البشر :101:

[عبرود]

قبل أن أبدأ أحب أن أشكر كل عضو وكل قارء تم مروره على موضوعي المتواضع وإن شاء الله وجد فيه الشيء المفيد



نبدأ بالحلقة


الحلقة الرابعة عشرة


قبل ما أبدأ بالمواقف اللي تصير لي مع الزبائن بقول لكم عن حي من احياء الرياض اسمه على ما اعتقد حي الواحه ويقع خلف قصور العويضه اللي على طريق الملك عبدالله

المهم

قبل أجازة الحج خذيت لي طالب من جامعة الامير سلطان بن عبدالعزيز اللي على طريق الملك عبدالله وبصراحه الولد ما شاء الله عليه شكله ولد نعمه باين من ريحته ولبسه المرتب

المهم

قال لي : ابيك توصلني قدام على طريقك
قلت له : أبشر
وكان موقع بيته في حي الواحه على ما اضن وبصراحه نزلته عند بيت ما شاء الله تبارك الله مرررره روعه وبصراحه المشوار قيمته خمسة ريال وعطاني عشرة ريال من قوة الكاش اللي معه الله لا يضرّه
وبعدها جلست ادور في الحارة واتفرج على البيوت اللي هناك قسماً بالله ثم قسماً بالله ثم قسماً بالله لو معي مثل ثروة الوليد بن طلال وخيروني بقصر أو ببيت مثل هذي البيوت والله ما اشتري الا مثل هذي البيوت اللي هناك وابي مثل مساحتها وهي على ما اعتقد مساحتها على 900 متر أو 1000 متر والله العظيم في بيوت في هذا الحي عليها تصاميم تخليك غصب تجلس تتفرج عليها من روعة التصميم وبصراحه احس اللي مصمم البيوت هذي واحد راعي مزاج رايق مررره لذا انصحكم تاخذون جولة في هذاك الحي وبعدها ما تلوموني اذا شفتو تصاميم البيوت ما شاء الله تبارك الله

أللهم أرزقنا الجنه


نرجع لمواقفنا مع الكستمر اقصد الزبائن اللي اوصلهم

الموقف الأول

كنت امشي عند سوق الزل اللي في شارع الثميري واشر لي رجال كبير في السن على ما اعتقد عمره 60 سنه بس مواصفاته ما شاء الله عليه 40 من قوة الصحه اللي هو فيها ما شاء الله عليه

المهم

قال لي : ابيك توصلني حي النظيم
قلت له : ابشر
قال لي : بكم ؟
قلت له : بـ 30 ريال
قال لي : تستاهل
وبعدها ركب معي وكان معه كيس فيه 7 عقل (جمع عقال) وسبع طواقي (جمع طاقية) وسبع علب شماغ بروجيه بس مدري كم مقاساتها وبعدين سألته
قلت له : ماشاء الله شكلك تبيع شمغ وعقل وطواقي
وبعدها جلس يضحك علي
وقال لي : انت متزوج ؟
قلت له : لا والله باقي ما تزوجت
قال لي : اهااا اجل اذا تزوجت بقول لك وش اسوي بالعقل والشمغ والطواقي
ههههههههههههههه
قلت له : افااا ليش ؟
قال لي : هذي العقل والشمغ والطواقي شاريها لعيالي عشان عندنا عرس بعد أسبوع وابيهم يلبسونها
قلت له : ما شاء الله كم عندك ولد ؟
قال لي : عندي 12 ولد
قلت له : طيب معقوله ما يقدرون يشترون لهم شمغ وطواقي وعقل بنفسهم
قال لي : لا انا ما خلي احد يطلع برا البيت ولا يروح محل الا وانا معه
قلت له : ليش كم اعمارهم ؟
قال لي : اصغر واحد فيهم عمره 4 سنوات والأوسط عمره 16 سنه
قلت له : ما شاء الله تبارك الله طيب اللي عمره 16 سنه ليش ما يشتري بنفسه شماغ وطاقية
قال لي : برضو ما اخليه يطلع برا البيت ياويل اللي ما القاه في البيت
قلت له : حتى الحاره ما يطلع لها ؟
قال لي : ايه حتى الحاره ما يطلع لها بس وقت الصلاة يمشون قدامي ويرجعون قدامي

المهم

لما وصلنا عند حارتهم
ههههههههههههههههههههههههههههههههههههههه
كانو عياله واقفين ومجتمعين عند باب البيت وسبحان الله كأنهم حاسين ان اللي راكب الليموزين ابوهم والله في خلال جزء من الثانيه تشوفهم يدخلون البيت بسرعه كانهم جرابيع يبون يدخلون الجحر
هههههههههههههههههههههههه
وبعدها جلس يقول : اوريك فيهم الحيوانات
قلت له : ليش ياخالي مافيها شي اذا جلسو عند باب البيت
قال لي : انا ماعندي بزارين يجلسون عند البيبان
قلت له : ترا ياخالي كذا بتخليهم يتعقدون منك
قال لي : طز فيهم
بصراحه بعدها انا سكت قلت في خاطري هو حر في عياله
بس تبون الصراحه الشيء هذا غلط

لأن المثل يقول
الشيء إذا زاد عن حده ينقلب ضده
يعني لما الواحد يشد على عياله بزياده على اللزوم بعدها لما يكبرون والله العظيم أي شي تافه قدامهم يشوفونه يجلسون يناظرون فيه ببجاحه ويمكن يوصل الأمر إلى تكسيره وتخريبه
لذى نصيحه لكل أب أسره بأن يربي عياله مثل صيد السمك بالسناره
وهو بأن يرخي الحبل شوي ويشد عليه شوي ولا يشده مررره ولا بعدين بينقطع الحبل في اخر المطاف

الموقف الثاني

طبعاً هذا الموقف صار في يوم عرفه أي قبل العيد
كنت ماشي من عند سوق الرياض مول وأشر لي واحد من أهل الجنوب وكان معه شنطه وأكياس فيها ملابس جديده وكيس فيه حلاوة سنيكرز وكيكه وعلبة لبن وقارورة ماء
وكان الوقت قبل صلاة المغرب بـ عشر دقايق لانه كان صايم صيام يوم عرفه

المهم

قال لي : ابيك توصلني حي الروضه عند خياط ناخذ ملابسي من هناك وبعدين تطلعني المطار
قلت له : أبشر
قال لي : بكم ؟
قلت له : الروضه بـ 15 ريال والمطار بـ 50 ريال
بعدها ركب معي
وقال لي : الللله ياخرجنا
قلت له : عسى ما شر وش فيك ؟
قال لي : ياخي انا اسافر للخارج بعض الاوقات وأروح للبنان ومصر وماليزيا والمغرب وأشوف حريم بدون عبايات ومع هذا محترمات اما هنا في هذا السوق تشوفهم لابسين عبايات ومتغطيات ولكن للأسف لبسهم ضيق ومخصر ويجلسون يطالعون في الشباب ويتحارشون معهم والله شي يقهر يارجل
قلت له : يارجال وما خفي فهو أعظم الله يستر على محارمنا بس
وبعدها دق جواله ورد عليه
وجلس يقول : هلا بعمري هلا بقلبي انا افدى هالصوت ياروحي ياشيخه

بعدها انا ضاق صدري قلت في خاطري هذا ما يستحي على وجهه وكان على بالي انه يكلم خويته او صديقته
وبعدين لما قفل الخط
قلت له : ما شاء الله شكلك راعي غزل وكنت ابي اشوف ردت فعله
قال لي : لا يارجل عيب عليك
قلت له : اجل جالس تكلم مين قبل شوي
قال لي : هذي عمري وقلبي ونور عيوني زوجتي اللللله يحفظها
هههههههههههههههههههههههههههه
قلت له : الله يخليها لك ان شا ءالله
وبعدين قلت له : ياخي شكلك عزوبي مو باين عليك انك متزوج
قال لي : ياخي انا موظف في شركة الاتصالات ومتزوج قبل شهرين وزوجتي عايشه في الجنوب وتشتغل مدرسه ولا لقيت لها نقل للرياض وبصراحه فقدت زوجتي ولي عنها الحين شهر بالضبط وابي اروح للمطار عشان اسافر لخميس مشيط واشوفها هناك
قلت له : اجل متحمس على الاجازه
قال لي : استناها بفارغ الصبر بس الله يخارجنا
وبعدين جلسنا نسولف عن حياته في الرياض
فقلت له : طيب انت عايش مع مين هنا ؟
قال لي : انا عايش لوحدي
قلت له : اجل تجتمع مع اخوياك في الليل
قال لي : تبي الصراحه بس ما ابيك تزعل
قلت له : لا عادي خذ راحتك
قال لي : بصراحه انا اكثر اخوياي من اهل الرياض وبصراحه شباب الرياض مع احترامي لك فيهم شوي غرور وفيهم شوي تكبر ياخي اذا طلعنا مع بعض لازم تلبس رسمي وتشخص كأنك بتروح لعرس او عزيمه مهمه وبعدين اذا جلست معهم يجلسو يترقون علي كاني مو سعودي
وبصراحه صرت اجلس مع اليماني والهندي حق المغسله واجلس اسولف معهم كل يوم ونشتري غدا وعشى مع بعض وبصراحه جلستي معهم احسن من ان اجلس مع اخوياي حقين الرياض والعمل
قلت له : الله يعينك
وبعدين سكت شوي
وقال لي : ياخي والله العظيم عندنا في الجنوب تجار ما شاء الله عليهم الواحد يملك ثروه بستطاعته يشتري نص الرياض ومع هذا تشوفه متواضع جداً ويلبس لبس عادي وعياله تشوفهم محترمين واخلاقهم عاليه اما انتم ياحقين الرياض للاسف ولا تزعل مني مغرورين شوي
على إيش مدري
هههههههههههههههههههههههههههه
وبعدين وحنا في الطريق للمطار جلس يرقص
ويقول : ياخي انا اليوم مبسوط مررره
قلت له : جعله دوم ان شاء الله
قال لي : اخ خ خ خ والله مشتاق للأهل ولزوجتي
وبعدها نزلته المطار

المهم

تبون الصراحه كلامه عن بعض اهل الرياض صحيح الا من رحم الله وهو ان فيهم شوي غرور وتكبر على بعض الناس وهذا الشيء للأسف اشوفه في بعض أقاربي
بس ما اقول الا الله يهدي الجميع



الموقف الثالث
وهو اغرب مشوار واغرب موقف صار لي من يوم اشتريت الليموزين

وهو موقف الجثه اللي وصلتها من مخرج 15 إلى نهاية مخرج 16 بحي السلي وبالقرب من عند بوابة سكن الحرس الوطني

المهم

وانا ماشي في طريق الـ 100 من عند مخرج 15 أشر لي هذا الرجال اللي لابس ثوب كله بقع دم وكان واقف في الشارع الثاني بحي السلام ولفيت له وفتحت الدريشه وكان ثوبه مثل ماقلت لكم فيه بقع دم
وقال لي : معي جثه ابيك توصلها لي نهاية طريق مخرج 16 بحي السلي عند سوبرماركت روم
وانا بصراحه كنت خايف شوي
قلت له : ابشر
قال لي : بكم ؟
قلت له : بـ 15 ريال
قال لي : انا بعطيك 20 ريال بس ابيك توصلها بسرعه
قلت له : ابشر
وبعدين جاب الجثه وكان حاطها في كيس زباله كبير اسود وهو شايلها كانت ثقيله شوي وكانت فيه نقط دم تنقط من الكيس
قلت له : لحضه الله يخليك خلني اجيب شي افرش فيه الشنطه عشان ما تبقع الشنطه لي تكفى
وبعدين شفت لي كرتونين فاضيات وشقيتهم من النصف وفرشت فيهم الشنطه وبعدها شلنا انا والرجال الجثه وركبناها وكانت ثقيله مرره وكان وزنها على ما اعتقد 120
وانا بصراحه كنت خايف شوي
وبعدين وصف لي الرجال العنوان وعطاني رقم جوال الرجال اللي بياخذ مني الجثه عشان اسلمها له اذا وصلت هناك طبعاً الرجال ما ركب معي بس عطانياها وقال لي وصلها هناك
قلت له : طيب ليش ما تركب معي
قال لي : انت شكلك ثقه ومنت مسوي فيها شي وانا بصراحه مشغول شوي

المهم

وانا في الطريق جلست افكر وش اسوي في الجثه هل اخذ الجثه وأسلمها للجهات المختصه ولا لا وبعدين قلت في خاطري يارجال المره هذي مشيها
وبعدين لما وصلت للعنوان اللي وصفه لي الرجال دقيت على الرجال اللي بيستلم الجثه مني وسلمته الجثه وبعدها مشيت من عندهم بسرعه عشان ما احد يشوفني
بس تدرون وش هي الجثه
÷
÷
÷
÷
÷
÷
÷
÷
÷
÷
÷



الجثه عباره عن ذبيحة حاشي كامله مع راسها
هههههههههههههههههههه
بس الغريب انه ما كان معي راكب فقط الذبيحه اوصلها من فرع لملمحة لحوم إلى فرع ثاني في حي السلي
والجهه المختصه اللي كنت ابي ابلغ عن الذبيحه عندها هي البلديه
بس قلت يارجال والله محد مسوي لك شي في البلديه
لانه بصراحه نقل الذبيحه بدون ثلاجه شي مقرف بس الشكوه لله


قبل ما أختم الحلقة أحب انصحكم بزيارة الأقارب ترا والله العظيم فيها خير وفيها اجر عظيم واللي زعلان من احد من أقاربه يروح يتصالح معه ترا الدنيا ما تدوم لأحد تسامح مع اللي زعلان معه قبل ما يموت أو تموت انت

والرسول صلى الله عليه وسلم يقول
لا يدخل الجنه قاطع رحم

لذا نصيحه بادر بزيارة الأقارب قبل فوات الأوان


وللحديث بقيه مع زبائن الليموزين



محبكم في الله وسائق الليموزين / عبرود

[غير كل البشر]

متابعه بصمت

مشكووووووووووووووووووور

[حنين]

http://www.alraidiah.com/vb/uploaded/mals.gif





اصلا قصور العويضه تكفيك تبهرك ببنايتها


اما الموقف الاول

الاب بيجيه يوم يتحسف على اللي يسويه في عياله اذا كبرو بيتمردون عليه


والموقف الثاني والله شي يحز بالخاطر اذا هو اخذ موقف كذا عن اهل الرياض

انا عن نفسي اشوف التكبر والغرور زحب المظاهر بالمجتمع النسائي بس ماتوقعت انه واصل للرجا بعد

اما الموقف الاخير اللي انتظره من فتره


صارت ذبيحه

واقول وش هالجرأة تاخذ شخص ميت بدوون ما يركب الرجال معك

شكلك بايع نفسك

وبالاخير ذبيحه



تسلم على هالمقالات الرووووعه




http://www.alraidiah.com/vb/uploaded/mals2.gif

[عبرود]

الحلقه الخامسة عشرة


الموقف الأول


بصراحه فيه بعض الحريم هداهم الله يقهرونك في بعض الحركات والطامّة الكبرى واللي تفقع مرارتي إذا قالت ياخزيااااه سعودي

اخ خ خ خ خ خ
بس

المهم

كلعادة إذا جيت اصلي لازم قبل ما ادخل أي مسجد احب دايماً اتطيب لأنه بصراحه لما تصلي وريحتك طيب تحس بخشوع وانت تصلي
وانا دايماً احط دهن عود معتق هندي مع ورد طائفي بصراحه الخلطه هذي إذا حطيتها تخلي كل من مر من جنبي يسألني وش الطيب اللي انت حاطه لذى نصيحه انكم تجربونها وهي تباع عند الشركه العربيه للعود ربع توله دهن عود هندي معتق مع ربع توله ورد طائفي قطفه أولى قيمتها 570 ريال بس والله خياليه

المهم

مره من المرات وقفت أصلي العشاء في جامع الامام تركي بن عبدالله اللي يصلي فيه مفتى المملكه الشيخ عبدالعزيز آل الشيخ حفظه الله
ومثل ماقلتلكم قبل ما ادخل المسجد لازم اتطيب

المهم

بعد ما طلعت من المسجد دخلت لشارع سوق الديره وأشرو لي ثلاث حريم ولما وقفت عندهم
قالت لي وحده فيهم : حي الملز شارع الظهران بـ 15 أوكيه

قلت لها : ان شاء الله

وبعدها ركبو معي ولما ركبو معي

الحرمه اللي كانت راكبه في الوسط
قالت : يعنبو ذا الهندي ريحته زينه

وانا ساكت ماقلت شي لأني عندي نظام اتبعه دايماً
إذا ركبت معي أي حرمه ما احب اسولف معها مهما صار الا اذا كانت حرمه عجوز ممكن اتكلم معها

اما الحريم اللي من الأربعين ونازل بس اقول لهم يمين ولا يسار ولا طوالي أو اوقف هنا فقط

لأنه بصراحه لو فتحت باب معها بالسواليف بعدها يجلس الشيطان بيننا وتصير سالفه مالها داعي

المهم

نرجع للموقف

وحنا في الطريق
قالت لي الحرمه اللي راكبه في الوسط : صدق أيش هذا طيب انت في حطي

وانا ساكت ما ابي اجاوب على سؤالها

وكررت السؤال مره ثانيه وقالت لي : هيه صديق ايش هذا طيب انت حطي

وانا ساكت ما ودي اعطيها وجه بالسواليف

وبعدها سوت حركه معي وقهرتني
مسكت كتفي وهزتني
وقالت : انت صديق ما اسمع وش انا اقول
وبعدها انفجرت عليها
وقلت لها : يا خاله الله يجزاك خير ما يجوز تتكلمين مع رجال مو محرم لك

وبعدها انحرجت وقالت : يؤه ياخزيااااه سعودي وبعدها سكتت لين وصلنا لمشوارهم

معنا كلامها يعني لو اجنبي عادي تتكلم معه
من جد شي يقهر


ما اقول الا الله يهدي ظال المسلمين



الموقف الثاني

مره من المرات كنت اوصل واحد بشارع الستين بالقرب من عند مستشفى قوى الأمن وكانت الساعه 1 ونصف الظهر وشفت لي شاب واقف على الرصيف ويطالع على جهة الغرب وبعدين مشيت ورحت اخذت لي زبون ثاني ولما مريت من عند نفس الشاب لقيته واقف مثل وقفته الاولى
وبعد نصف ساعه مريت من عنده ولقيته واقف نفس الوقفه ولا تغيرت وبعدها شكيت في الوضع وقلت ليش هذا ما يأشر لاحد وليش واقف كل هذا الوقت ولا ركب سياره
وبعدين وقفت عنده وتفاجأت بأنه شاب عمره في العشرين ولكن سبحان الله عيونه مختفيه من مكانها وكان أعمى الله يشفيه
وبعدين نزلت له وقلت له : يابو الشباب تبي اوصلك مكان
قال لي : لا بس ابيك توقف لي سيارة لليموزين
قلت له : ابشر انا سواق لليموزين
قال لي : لا والله ما توصلني بس ابيك تفزع لي بسيارة لليموزين لان مشواري بعيد
قلت له : والله العظيم انا سواق لليموزين عشان تصدق تعال قرب وامسك المصباح اللي فوق السياره
قال لي : لا مصدقك اجل تكفى قربني عند السياره
ولما ركب
قلت له : وين تبي اوصلك
قال : ابي عند نادي النصر
قلت له : اهم شي تدل ياخالي
قال لي : ايه ماعليك بس ودني مع طريق خريص بأتجاه طريق الحجاز
قلت له : ابشر

المهم

وحنا في الطريق طلعت من الطريق العام ودخلت مع الفرعي عشان اعبي بنزين ولما طلعت من الطريق العام للفرعي
قال لي : شكلك غيرت الطريق
سبحان الله بالرغم انه اعمى لكن حس اني طلعت عن مسار الطريق
قلت له : عن اذنك شوي بعبي بنزين عشان السياره فاضيه
قال لي : خذ راحتك

المهم

لما وصلت عند مخرج عريجاء
قلت له : هذا مخرج عريجاء
قال لي : ايه تكفى اطلع من فوق الكوبري ولف يسار
وبعدين لما لفيت يسار
قال لي : فيه صراف بنك حق بنك البلاد صح على يمينك
قلت له : ايه
قال لي : لف من عنده يمين
ولما دخلت الشارع
قال لي : الحين بتجيك ثلاث مطبات بعد ثالث مطب وقف عند البيت اللي عليه رقم 33

وسبحان الله بعد ثالث مطب شفت البيت بس تعديته شوي تقريباً 3 متر
قال لي : احس انك تعديت البيت شوي صح

والله بعدها حسيت اني سويت جريمه

قلت له : ما شاء الله عليك وشلون عرفت
قال لي : خلاص تعودت على كذا

أسأل الله القدير رب العرش العظيم بأن يشفيه ويفرج همه
إنه سميع مجيب



الموقف الثالث

بصراحه الموقف هذا شوي محزن


مره من المرات طلعت من بيتنا الساعه 12 ونصف في الليل وكنت ابي اروح لمطعم ماما نوره اللي في شارع الضباب وأنا في الطريق قبل ما اطلع لكبوبري الخليج شفت لي ولد لابس ثوب صوف لونه بني وكان واقف تحت كوبري الخليج وكان يأشر لي من بعيد وبعدين انا وقفت عنده وكان الولد عمره تقريباً 18 سنه وشكله ولد نعمه ووسيم وشعره منتفش مثل القصات اللي طايحين فيها الشباب وكان الولد عيونه فيها شوي دموع

المهم

كان يكلمني وهو يرتجف وجالس يحكحك في جسمه ويمسح في خشمه وعيونه وبعدين
قال لي : تكفى ابيك توصلني لمستشفى الامل
قلت له : ابشر
قال لي : بس ما معي فلوس الله يخليك تكفى وصلني
قلت له : يارجال اركب مابي منك شي بس اركب
وبعدها انا شغلت الفلشر ومشيت مع طريق خريص متجه لجهة الغرب وكنت مسرع
وحنّا في الطريق
جلس الولد يبكي
ويقول : الله يلعن عيال الكلب اللي طيحوني فيه الله لا يوفقهم عيال الحرام

وانا ساكت ماقلت شي بس جالس اتسمع عليه وهو جالس يطلع كلام من قلبه المقهور وبصراحه حسيت من كلامه ان الولد طاح في مقلب ابن كلب الله يكرمك
وبعدين جلس يبكي ويصيح ويقول
الحين وش اقول لابوي وش اقول لأمي
وبصراحه انا ودي اسأله بس خفت يصرخ علي وبعدين يجلس يكسر لي القزاز اللي في السياره

المهم
وحنا في الطريق كان يمشي وراي البوليس السري وكان يأشر لي بالانوار ويبيني اوقف له وانا امشي بسرعه وقول في خاطري
والله ما اوقف الا في المستشفى اخاف اوقف وبعدها يصير للولد شي
وبعدها جلست أأشر للعسكري بأن معي حاله طارئه
وبعدها جلس يمشي وراي العسكري لين دخلنا المستشفى الامل اللي في حي عرقه وبعدها نزل الولد ودخل مع باب الطواريء

المهم

قال لي العسكري : وش السالفه
قلت له : ياخي هذا واحد مريض مسكين الظاهر مفعول المخدرات اللي يستخدمها بدت تأثر عليه
قال لي : طيب ليش كل هذي السرعه
قلت له : ياخي حاله طارئه وشفيك انت
قال لي : خير ان شاء الله
وبعدها راح وفكني من شره

المهم بصراحه وضع الولد اللي وصلته كان مررره صعب احس والله اعلم انه طاح بشباب كانو ناوين عليه بنيّة خبيثه

بس ما اقول الا الله يستر على عيالنا ويحفظهم من كل مكروه


قبل ما اخلص الحلقه
انصحكم تجربون حنيني تمور الصالحيه
والله طعمه خالي وينفع مع هذا البرد
خذولكم صحنين وحطوها في الميكرويف عشان تسخن وبعدها كلوها مع كاس لبن اكتيفيا
قسماً بالله في الصميم

واخيراً خلصت


انتظروني في مواقف ثانية في الحلقه رقم 16 من يومياتي في شوارع الرياض


محبكم في الله وسائق الليموزين / عبرود

[طليفيح]

ههههههههههههههههههههههههه

سالفت الحاشي عجيبة

والحريم بعد

هههههههههههههههههههههههه

ولعمى سبحان الله ربك ياخذ ويعطي

متابعين يبناخي ..

شكراً على النصايح

[أبو رائد]

عبروود

الله يسعدك ويعطيك العافية

والله مواقف كلها عـِـبـَـر

الله يستر على الجميع إن شاء الله


ولك التحية ،،

[لأجل اشتياقي]

اسلوب بسيط
لكن فكرته ومضمونه تسري في العروق
وتغير مافي النفوس
دروس وعبر منك انت اخي

دائما باطلاع ماتكتب
فحق لي شكر وثناءك

سلمت اخي

كل الشكر

اختك

[حنين]

http://www.alraidiah.com/vb/uploaded/mals.gif




سالفة الحريم ياكثرها

صجه بالليموزين واذا عرفو انه سعودي انكتمو

اما الاعمى الله يشفيه ويعوضه خير ان شاء الله

واسال الله الشفاء للذي ابتلاء باصحاب خبيثثين



سلمت ياعبروود





http://www.alraidiah.com/vb/uploaded/mals2.gif

[الدووووخي]

عبروود

الله يسعدك ويعطيك العافية

[فهدالقحطاني]

عبروود

الله يسعدك ويعطيك العافية

[عبرود]

أحب أشكر كل عضو وكل قارء تم مروره على موضوعي المتواضع وأن شاء الله وجدتم فيه الشيء المفيد


نبدأ بالحلقة


الحلقة السادسة عشرة


الموقف الأول

طبعاً احداث الموقف هذا صارت في شهر رمضان وفي الساعه 9 صباحاً

مره من المرات كنت امشي في شارع التخصصي وكان مطعم برج أم الحمام على يميني وكنت متجه لجهة الشمال ولما تعديت الاشارة الخاصة بمستشفى التخصصي الا وأشوف لكم هذاك الشايب اللي لابس لبس محترم ومتشخص وماسك عصاة يمشي عليها وكان طالع من المبنى الخاص بالمرضى اللي يقضون فترة النقاها بعد العملية وكان شكله وهو طالع من المبنى تقول طالب مدرسه منحاش من المدرسه
هههههههههههههههه

المهم

لما مريت من عنده اشر لي
وقال لي : رح وقف قدام انتظرني ابجيك
وبعدها جلس يمشي وهو يتلفت يمين ويسار ومثل ماقلت لكم كأنه منحاش من مدرسه أو من سجن

المهم

بعدها ركب معي
وقال لي : ابيك توصلني لمخرج 17 في حي السلي وبعدين ترجعني لنفس المكان في اسرع وقت بكم ؟

قلت له : رايح بـ 20 وراجع بـ 20 يعني المجموع 40

قال لي : انا بعطيك 100 ريال بس اهم شي تسرع عشان ما احد يدري اني طلعت من المستشفى

قلت له : افاااا ليش ياخلي عسى ما شر وش فيك ؟

قال لي : مو شغلك بس اهم شي تحرك بسرعه

هههههههههههههههههههههههه

المهم

وحنا في الطريق

قال لي : ياولدي انا مسوي عملية زراعة كلى والحمد لله تبرع لي واحد من عيالي الله يوفقه والحين انا جالس فترة نقاها في المستشفى لين اتعود على الكليه اللي زارعينها لي وبصراحه انا طلعت عشان اشوف اشغالي وش صار فيها

قلت له : ياخالي الله يهديك ياخي صحتك اهم من اشغالك

قال لي : اقول اص بس مو شغلك امش بس

هههههههههههه
من جد عصبي

المهم

وحنا في الطريق

قال لي : ما شاء الله سعودي وصاحي في هذا الوقت تشتغل
قلت له : ايه تعرف ياخالي هذا الوقت وقت الذروه ويكون الشارع مليان زباين
قال لي : عسى السيارة ملك لك
قلت له : ايه ولله الحمد
قال لي : اهم شي لا تستحي من احد ولا يهمك احد شف انا لما كنت في عمرك كنت من سكان محافظة سدير وكنت أوصل ناس على عربيه يسحبها حمار واشتغل مثلك والحمد لله هذا انا الحين رجال متقاعد ووصلت المرتبه 13 في وزارة الزراعه وعندي بيوت ومزارع وخير كثير بفضل الله ثم بفضل الحمار والعربيه اللي كنت اشتغل عليها

بعدين
قلت له : طيب الحين ياخالي ليش ما تخلي واحد من عيالك يشوف لك اشغالك بدال ما تطلع وتتعب عمرك
قال لي : اقول لك مو شغلك اها بس
قلت له : ابشر ماني مكلمك في الموضوع هذا

وبعدها وصلنا للمشوار اللي كان يبيه ما شاء الله كان يبي يشوف وش صار على سياراته وهي عباره عن ونشات وشيولات وقلابيات عددها ما شاء الله اكثر من 30 سياره وجلس يتناقش مع المهندسين والميكانيكيه ويعلمهم وش يحطون في السيارات ويش يصلحون
وانا نازل من السياره انادي له المهندسين

المهم

وحنا في الطريق للعوده للمستشفى جلس يسولف لي عن اخوياه وعن حياته القديمه وعن الأوضاع في الماضي والحاضر وبعدين فجأه طلع قارورة ماء صحه
وقال لي : عن اذنك انا الدكتور قال لي اشرب ماء لا تصوم عشان الكليه ما تتعب معك
قلت له : خذ راحتك ياخالي
وبعدها رجعته للمكان اللي اخذته منه والحمد لله رجع سالم وغانم

بس تبون الصراحه الشياب هذا وضعه صعب تدرون ليش لأن المفروض الواحد يهتم في صحته وينتبه لصحته أما هذا مهتم بسياراته والمشكله عنده عيال بأمكانهم يشوفون له حلاله بس هذا دقه قديمه ما يحب يرتاح الا اذا شاف شغله بنفسه
أسأل الله القدير رب العرش العظيم بأن يشفيه ويحفظ له عياله ويوفق له ولده اللي تبرع له بالكليه
أنه سميع مجيب


الموقف الثاني

كنت ماشي وسط حواري الملز وبالقرب من اسواق المتنبي وفجأه وأشوف لكم هذاك الهندي اللي لابس بدله سوداء وكانت متقطعه شوي وكان المسكين يأشر لي وهو يبكي ووجه مورم من الضرب وبعدين فتحت الدريشه
وقلت له : عسى ما شر وشفيك
قال لي وهو يبكي : أنا سواق لليموزين هزا نفر حيوان شيل فلوس وشيل سياره حق انا
يقصد بأنه فيه شباب سرقو منه الفلوس وسرقو منه سيارة الليموزين
قلت له : وينهم فيه ؟
قال لي : خلاص روه (راحو) من زمان
وبعدين
قال لي : انا ابغا روه (اروح) للشركه حق انا في شارع خزان
قلت له : اركب اركب
وحنا في الطريق جلس يبكي ويشاهق من الصياح من قوة القهر اللي صار له وبصراحه قال لي كلام يعور القلب
قال لي : ليش هزا نفر سوي كذا حرام والله انا مافي صدق انا في سعوديه ولا في امريكا
قلت له : كيف اشكال اللي سرقو منك السياره
قال لي : هزا نفر سوا سوا (؟؟؟؟؟؟)
للأسف نفس الاشكال اللي صار لي معم الموقف اللي ذكرتهم في الحلقه السابعة

وتبون الصراحه الوضع وكل ماله يزداد
وانا مره من المرات شفت برنامج اسمه شبابx شباب كان يقدمه مذيع خلوق اسمه مهدي بخاري على القناة الأولى وكانت فيه حلقه من ضمن الحلقات يتقابل مع مجموعه من سجناء سجن بريمان في جدة
المهم

من ضمن السجناء كان فيه واحد عمره على ما اعتقد 18 سنه وكان يقول انه طلعت ودخلت للسجن اكثر من 5 أو6 مرات وكلها قضية سرقه

لاحضو اكثر من 5 أو 6 مرات
يعني الولد شاف الوضع عادي ولا فيه قطع يد ولا فيه تطبيق للحد من السرقه وبصراحه ما الومه يسوي كذا
لأن المثل يقول
من أمن العقوبة أساء الأدب

لذا انا انصح الجهات المختصة بالأهتمام بالموضوع هذا لأن المثل يقول
الضغط يولد الأنفجار
لأنه بكره بيجي واحد من قوة القهر بدال ما يمسك الحرامي بيطلق عليه نار عشان يرتاح منه

وانا عندي طريقه لعلاج هذي المشكله واتمنا من الجهات المختصة تطبيقها وهي

بأن يحضر من كل سجن من سجون المملكه اشهر حرامي ويقطع يده أمام باقي السجناء لكي يكون عبره لهم وبعدها يشهر أسمه في الأخبار والله بعدها تقل نسبة السرقات في المملكه

أ خ خ خ خ خ خ خ خ
والله شي يقهر من قلب



عن اذنكم بروح اصلي الفجر في المسجد لأني أسمعه أقام وبصراحه إذا صليت الفجر في المسجد مع الجماعه تصير في ذمة الله حتى وقت صلاة الفجر في اليوم الثاني



واللحديث بقية


محبكم في الله وسائق الليموزين / عبرود

[لأجل اشتياقي]

كالعاده
مستمتعين بعطر فوائد حرفك
ووعظك بطرحك

كل الشكر

[الدووووخي]

الله يعطيك العافيه عبروود ’’’

[طليفيح]

تسلم عبرود والله الشويب رهيب

والهندي يكسر الخاطر

تحياتي وننتظر الحلقه الجاااااااااااايه ياحيي :biggrin:

[حنين]

http://www.alraidiah.com/vb/uploaded/mals.gif





تسلم ياعبروود

سبحان الله من هالشايب مازالت الحياة مشغلته

اما الهندي الله يكوون بعوونه

الله يعيطك العافيه على روووووووووووعة هالمقالات




http://www.alraidiah.com/vb/uploaded/mals2.gif

[نوني الامير]

عبرود قصص رائعه وسرد رائع وطريقه مشوقه ماشاء الله ...


بتجدد حلقاتك تتجدد اشياء كثير لدينا ..


ومسوق ناجح :)


الله يقويك ... :101:

[عبرود]

قبل أن أبدأ أحب أشكر كل عضو وكل قارء تم مروره على موضوعي المتواضع وإن شاءالله وجدتم فيه الشيء المفيد


نبدأ بالحلقة


الحلقة السابعة عشرة



الليموزين وما أدراك ما الليموزين

طبعاً في الحلقه هذي بقول لكم عن إجابيات وسلبيات الليموزين

نبدأ بإجابيات الليموزين

بصراحه احسن شي استفدت منه في سواقة الليموزين انه كل يوم اكتشف مساجد جديده وجميله على حسب وقت الصلاة اللي اكون فيها فمثلاً اكون في حي الشفا وقت المغرب وفي وقت العشاء اكون في حي العقيق وفي وقت الظهر اكون في حي المرسلات اما وقت الفجر والعصر اكثر الاوقات اكون في البيت وبصراحه من اجمل المساجد اللي صليت فيها إلى الأن هو مسجد الامير فيصل بن فهد في حي العقيق مقابل نادي الشباب على طريق القصيم وجامع الشيخ عبدالله اللحيدان رحمه الله خلف شركة الجفالي مرسيدس بصراحه المسجدين هذي لما تدخلها ترتاح نفسياً ويشرح الصدر عشان تصميمها مررره رايق وخفيف ومافيه زخارف كثيره

ومن الإيجابيات ايضاً اكتشاف طرق مختصره من بعض الزبائن لانه بصراحه مره من المرات ركبت لي ثلاث بنغلاديشيه من مخرج 15 بحي السلام إلى حي الشميسي في وقت الزحمه بصراحه علموني على طرق مختصره مررره قويه بس للاسف نسيتها
ههههههههههههههههههههههههههه

ومن الإيجابيات ايضاً توصيلك لبعض الفقراء وبالذات إذا خصمت لهم من قيمت المشوار والله تسمع دعواتهم وهم يدعون لك قسماً بالله ترتاح نفسياً

ومن الإيجابيات أيضاً ممارسة اللغة الأنجليزيه مع بعض الزبائن الأروبيين والأمريكان بصراحه تتعلم معاني كلمات جديده وتتعلم اللغة عن طريق السواليف معهم وتكسب خبره في اللغة وأنا اول كنت اسمع أن راعين الجمال والخيول اللي عند الأهرامات في مصر يعرفون يتكلمون عدة لغات ومن ضمنها الفرنسيه والإيطاليه والأسبانيه والألمانيه بطلاقه والسبب كثرة احتكاكهم بالسياح الأجانب

لذى اقول اللي يبي يتعلم اللغة الانجليزيه بدون ما يدخل معهد للغة يشتغل على الليموزين احسن له
هههههههههههههههههههه
لا احد يصدق تراني امزح


ومن الإجابيات ايضاً تتعلم فن التعامل مع الاخرين وكيف تقدر تبسطهم إذا كانو حزينين وكيف تقدر تمتص الغضب منهم إذا كانو معصبين وكيف تقدر تطفشهم إذا كانو مزعجين هههههههههههه
لانه بصراحه بعض الاوقات يركبون معي زباين الله لا يوريكم عليهم ازعاج بالسواليف قسماً بالله ودي انزلهم واعطيهم قيمة المشوار عشان ينزلون


وبصراحه احسن شي إذا دخلت البيت بعد عناء وتعب دام لمدة 16ساعة من الدوران في شوراع الرياض اجلس ارتب الفلوس حقت شغل اليوم وفرقها عن بعض واحط الخمسات بلحال واحط العشرات بلحال واحط الخمسينات بلحال واحط الميئات بالحال وبصراحه إذا جلست ارتب الفلوس اجلس اتذكر المواقف اصحاب الفلوس واتذكر مواقفهم معي وسواليفهم معي
ومن المضحك في ترتيب الفلوس اقرأ بعض العبارات المكتوبه على الفلوس والله فيه عبارات تموت من الضحك وفيه عبارات تفشل من العبارات اللي تفشل
واحد كاتب على ورقه نقديه فئة خمسة ريالات إلى اللقاء يا احسن خمسه ريال ملكتها في حياتي
ههههههههههههههههه
وواحد ثاني كاتب حاط رقم جواله وكاتب ( من يحصل على هذه العشره فليتصل على هذا الرقم مباشرةً)


أما بنسبة للسلبيات في الليموزين


فحدث ولا حرج والله العظيم اللي إيمانه بالله ضعيف ورايح في خرايطها انه يخسر كل شي بسبب الفتن اللي تصير له من بعض زبائن الليموزين
وبصراحه في اشياء تصير معي في الليموزين ما اقدر اكتبها من وقاحتها والله لو اكتبها يمكن يحذف معرفي من المنتدى بس الحمد لله بسبب خوفي من الله وكثرة الاستغفار ودعاء الوالده لي ربك مصبرني على مبتلاها

ومن السلبيات في الليموزين انك تنقطع عن العالم وتنقطع عن اخوياك وتنقطع عن اهلك ولا تشوفهم الا مره في الاسبوع طبعاً هذا السواق المجتهد والمحافظ على مواعيد شغله اما اللي يجلس كثير في اليبت او عند اخوياه في الاستراحات والله ما يكسب شي بالعكس بيخسر ويطفش وبعدها يبطل شغل في الليموزين

ومن السلبيات ايضاً تتعرض لبعض الذل والأهانه من بعض الناس وبعض الزباين ومع هذا الواحد مجبور انه يسكت عشان يحافظ على رزقه


أسأل الله القدير رب العرش العظيم بأن يحميني من شر الفتن ما ظهر منها وما بطن ويحفظني ويحفظ جميع عباده الصالحين إنه سميع مجيب


معليش بصراحه احس اني نعست بروح اخذ لي شوي غفوه قبل صلاة الفجر وانتظروني في الحلقه القادمه مع قصة الهواش الي صار لي مع عائله في سوق الديره



وللحديث بقيه


محبكم في الله وسائق الليموزين / عبرود

[جليس الرائدية]

أخي الكريم عبرود . .

أهنئك من كل قلبي على تواضعك . . وعلى صبرك . . وعلى احترامك . .

العمل ليس عيبا وإنما العيب عدم العمل . .

هذا ما فهمت من موضوعك الرائع . .

مواقف تمر على الإنسان من بين محرجة . . ومحزنة . . ومفرحة . .

قد يتضايق الشخص عندها . .

ولكنه يستفيد منها إن فطن . .

أخي العزيز وفقك ربي في الدنيا والآخرة وأثابك على ما تقوم به . .

غفر الله لك ولوالديك . .


تحياتي لكـ . . أخوك / عابد ، ،

[حنين]

http://www.alraidiah.com/vb/uploaded/mals.gif



ماشاء الله عليك


رائع ياعبرود بكل شي تكتبه

احيك على روحك الطيبه






http://www.alraidiah.com/vb/uploaded/mals2.gif

[نوني الامير]

الله يعطيك العافيه عبرود بإنتظار الجديد دوماً,,

:)

[شوق الغلا]

عزيزي عبرود ..

ربي يعطيك العافيه ..

بأنتظار جديدك ورواائعك ..

نستمتع باجمل الرواائع معااك ..

سلمت لنا يالغلا ..

[الجوووري]

هلا وغلا


عبرود




سلمت على الكتابات الجميلة


والاروع منها اسلوبك..,


الله يوفقك ويسعدك


:101:

[عبرود]

قبل ما ابدأ أحب اشكر كل عضو ونكل قارء تم مروره على موضوعي المتواضع وأن شاءالله وجدتم فيه الشيء المفيد


نبدأ بالحلقه


الحلقة الثامنة عشرة



الموقف الأول

يقول المثل
اللبيب بالأشارتي يفهمو

اقصد في كلامي هذا بأني بذكر لكم الموقف هذا وانت عاد ابيكم تفسرونه على كيفكم

مره من المرات كنت امشي في شارع حي السلام بالقرب من مركز الدفاع المدني وأشر لي هذاك الرجال اللي لابس شماغ بدون عقال وكان الشماغ مقطع شوي وكان لابس ثوب قصير وعليه وسخ شوي كانه ما غسله من زمان

المهم

لما وقفت عنده كان ما يتكلم (ابكم) وبعدين طلع لي ورقه وأشر لي بأصبعه على الكلام المكتوب على الورقه وكان مكتوب
(حي عليشه إدارة ؟؟؟؟ العامه)
قلت له : ابشر
قال لي : بكم طبعاً بالأشارات يكلمني
قلت له : بـ 20 ريال
بعدها اشر لي باصبع الأبهام وقال لي : كويس
وبعدها ركب معي

المهم

وحنّا في الطريق كنت مشغل شريط طارق سويدان وانا دايماً أي زبون يركب معي اشغل له شريط طارق سويدان حق السيره النبويه أو قصص الانبياء عشان اخليه ينسجم مع الطريق
وبعدين قال لي بالأشاره : من هذا ؟
قلت له : هذا طارق سويدان يتكلم عن السيره النبويه
بعدين أشر لي بأصبع الابهام وقال لي : كلامه طيب


المهم

لما وصلت له لأخر المشوار اللي كان يبيه طلع لي عشرين ريال ولما عطاني العشرين
قال لي بصوته : الله يجزاك خير ويوفقك
ونزل على طول وأنا بعدها جلست اطالع فيه عيوني طايره
يعني كان يتكلم بس مسوي نفسه ابكم طول الطريق
وعاد انتم فسرو فسرو شغلة الرجال وش تكون

الله يستر




الموقف الثاني


هذا الموقف يتكلم عن الفرق بين عيالنا حنا يالسعوديين وعيال الاجانب من جنسيه مصريه وسوريه وفلسطينيه ولبنانيه وسودانيه


طبعاً كل يوم أوصل لي طلاب مدارس لبيوتهم ودايماً اذا ركبو معي يجلسون يسولفون مع بعضهم
وسبحان الله اذا ركب معي طلاب سعوديين دايماً سوالفيهم ياعن السيارات أو عن مضاربات أو عن افلام او عن اغاني أو عن مشاكل في الحاره او عن مشاكلهم في البيت
أما
إذا وصلت لي طلاب أجانب من جميع الجنسيات العربيه اللي ذكرت ما شاء الله عليهم سواليفهم دايماً عن الدراسه وعن طريقة حل المسائل الكيميائيه وعن طريقة حل المعادلات الرياضيه والفيزيائيه وعن تحسين مستواهم الدراسي
والله العظيم مره من المرات وصلت لي اخوان سواريا وكان اللي راكب قدام زعلان شوي ووجهه عبوساً قمطريرا وأخوه اللي راكب ورا جلس
يقول له : خلاص ياخي وسع صدرك ما بدهاش
رد عليه وقال له : لوسمحت لا تدخل
وبعدين انا تلقفت شوي
وقلت لهم : عسى ما يشر ياشباب وشفيكم ؟
رد علي اللي راكب ورا
وقال لي : اخي زعلان عشانه ماخذ الترتيب الثالث على الفصل وهو كان متوقع يكون الأول
هههههههههههههههههههههه
وبعدين رد عليه اخوه
وقال له : شو دخلك تعلم الرجال عني ؟
وكان زعلان شوي
قلت له : اعصابك يابو الشباب ترا الدنيا ما صار فيها شي
رد علي الزعلان
وقال لي : هذا بالنسبا لك بس بنسبه لي أنا صارت الدنيا سوداء وحمراء وخضراء وكل شي
وبعدها انا انحرجت منه وسكت وقلت في خاطري والله انك صادق انا اهم شي اني تخرجت بأي شي

لذى اقول سبحان الله شوفو الفرق بين عيالنا وعيال الاجانب وشوفو تفكيرهم وتفكير عيالنا

بس بصراحه انا ما يعجبني الا تفكير عيال القصمان بالذات
تدرون ليش ؟
عشانهم إذا ركبو معي اسمع سوالفيهم كلها عن البر وعن الجيوب وعن التطعيس
هههههههههههههههههههههههههههههههههههههه
وانا بصراحه اذا سمعت سواليف مثل هذي انسجم معها على طول
اخ خ خ خ خ خ
بس ما اقول الا
الله يصلح عيالنا وعيال المسلمين ويهديهم إلى طريق الحق
ويرزقني بمفخرة الارض (لاندكروزر2008)
إنه سميع مجيب الدعاء



الموقف الثالث


بصراحه الموقف هذا قهرني شوي بس ما اقول الا صبراً جميل والله المستعان

مره من المرات كنت امشي بالقرب من عند سوق المعيقليه وبعدين دخلت على سوق الانشاء والتعمير الجديد وكان الشارع دخول فقط لاحضو دخول فقط ولما وصلت إلى منتصف الطريق اشرت لي حرمتين ولما وقفت عندهم جتني سياره بالجهه المعاكسه وكانت السياره من نوع فان صغير وكان راكب فيها رجال ومعها عائله وهم من (؟؟؟؟)
وفجأه
نزل الاخ وقال لي : ياحمار في احد يوقف في وسط الخط ياحمار
طبعاً الاخ كان عاكس الشارع
وبعدها انا طلعت راسي من الدريشه
وقلت له : أولاً الله يسامحك على كلمت حمار وثانياً انصحك تشرب عصير ليمون مع نعناع ترا يخلي الاعصاب هادئه وثالثاً اركب سيارتك وتعوذ من ابليس لاخليك تندم
وبعدها نزل وجاني وهو معصب وانا نزلت له واتجهت له
وحط وجهه بوجهي وبصراحه كانت ريحت فمه مررررره مقززه اف اف اف اف اف والله انا اقول لكم الموقف تذكرت ريحت ثمه قسماً بالله ريحت مخرج طريق الفريان اللي في الدائري الجنوبي الله يكرمكم
المهم
قال لي : وش بتسوي إذا ما ركبت سيارتي :
قلت له : ماني مسوي شي بس انصحك تتعوذ من ابليس وتركب سيارتك لاخليك تندم تراك انت الغلطان
وانا اتناقش معه
نزلت امه الله يصلحها وفسخت النعال (الحذاء) الله يكرمكم ورجمتني فيه
وقالت لي : انا اوريك يام؟؟؟؟ ياكلب يا ق؟؟؟؟
وانا جلس اطالع فيها وانا اضحك ضحكت قهر
ههههههههههههههههههههههههههه

وبعدين قلت للرجال : يلا رح ركب امك واركب معها عشان ما اخليك تندم
وبعدها الغبي جاني ودفني
وقال لي : وش بتسوي ؟
قلت له : لحضه ابوريك وش اسوي

ورحت لسيارتي وسحبت المفتاح من السوتش وجلست اصفر للعسكري اللي كان واقف عند أمارة الرياض وكان معه دراجه ناريه وكان ينظم السير اللي عند سوق المعيقليه وبعدين جاني العسكري
وقال لي : خير وشفيكم ؟
قلت له : انت وش تشوف قدامك
قال لي : اقول لك وشفيكم وخلصني بسرعه
قلت له : الاخ عاكس الخط ومع هذا نزل وقال لي ياحمار وهذي كل المشكله
وبعدها
قال لي : اهااااا خلاص اجل انت اركب سيارتك الله يستر عليك وأنت عطني اثباتك بسرعه
وبعدها جلس الرجال اللي كان عاكس الطريق
يقول له : ياخي الحيوان موقف في وسط الخط
قال له العسكري : مو شغلك عطني اثباتك بسرعه
وبعدها انا ركبت السياره
وقلت له : احمد ربك ان امك معك ولا كان صار تفاهم ثاني
وبعدها ضرب على شنطة السياره
وقال لي : وقف يانذل
وبعدها انا مشيت وكنت مبسوط عشان العسكري بصراحه برد كبدي وخذا حقي منهم حسبي الله عليهم
ما اقول الا الله يفكنا من شر الاشكال هذي


واخيراً خلصت




وللحديث بقيه


محبكم في الله وسائق الليموزين / عبرود

[goree]

ههههههههههههههههه

ربي يسعد قلبك عبرود

اماالموقف الاول

نفسي اعرف وش سالفته

وليش ماحكى؟؟

صراحة شيء عجيب



الموقف الثاني


هههههه عاد عيالنا

والله انك جيت عالجرح

ربي يسعدك

زعلان عشانه ماصارالاول

اقووووول

زين مننا انا ننجح هههههههههه




الموقف الثالث

يووووووه محشش بقوووه

هو اللي عاكس الطريق وبعد بيتكلم وبيسب

لا واللي يبط الكبد

امه واقفه معه هههههه

والله مشكلة



عبرود

ربي يعطيك الف عافيه

لاعدمناك

[حنين]

http://www.alraidiah.com/vb/uploaded/mals.gif




تسلم ياعبروود


الموقف الاول يعتبر الصمت حكمه

<< على كيفها


اما اولاد الاجانب واولادنا فمعروف الفرق من زمان



والموقف الاخير


الله يهدي صاحب الفان كثير من الناس عصبيين


وان شاء الله يرزقك الله بسياره جيب لاندكروزر 2008






http://www.alraidiah.com/vb/uploaded/mals2.gif

[طليفيح]

ان شاء الله يرزقك الله بسياره جيب لاندكروزر 2008

تسلم عبرووووود

[عبرود]

قبل أن أبدأ أحب أن أشكر كل عضو وكل قارء تم مروره على موضوعي المتواضع وإن شاء الله اعجبكم


نبدأ بالحلقة


الحلقة التاسعه عشرة


الموقف الأول

بصراحه هذا موقف رومانسي و محزن مع شوي كوميدي

مره من المرات كنت امشي بالقرب من سوبرماركت بنده العزيزه في شارع التخصصي وبعدها أشرت لي حرمه فلبينيه وكان معها جوزها وكانو لابسين لبس الممرضات حق المستشفيات
على ما اعتقد انهم زملاء في العمل
طبعاً بعد ما سألتهم
وقالو لي إنهم يشتغلون في مستشفى مركز التخصصي الطبي اللي على طريق الملك فهد

المهم

لما ركبو معي
قالو لي : نبي نروح للسكن الخاص بالممرضات حق مستشفى مركز التخصصي الطبي خلف سوبرماركت التميمي اللي على طريق الملك فهد
قلت لهم :اوكيه نو بربلم
قالو لي : بكم ؟
قلت لهم : بعشرة ريال

وبعدها ركبو
وحنا في الطريق كانو يسولفون مع بعضهم وكانو يقولون

الزوج : شنج بنج هنج
الزوجه : ينج يو وي بنش
الزوج : ششي يوبي بنج هونج جنج
الزوجه : هش هشيج فوهو

وفجأه

الزوج : طررررررع ( كف على وجه الزوجه)
الزوجه : إييييييييييييييييييييه ( جالسه تبكي)
وأنا خايف من الزوج لا يضربني كف مع قفاي
هههههههههههههههههههههههه

وبعدها
قلت لزوج : هيه ريلاكس سنيور( اقصد خلك هادي يارجل)

وبعدين قامت الزوجه وهي تبكي تحضن زوجها وجالس تحب حب فيه وتراضيه
وتقول له : أيام سوري ( أنا اسفه)

وأنا جالس اطلع فيهم بالمرايا وخايف يسوون فيني شي من الخلف

المهم

الزوجه وهي تتكلم مع زوجها وتبي يراضيها
كان الزوج يناظر على قدام وعيونه فيها شرار وفيها شوي دموع من القهر وجالس يقول

الزوج: شنج هنج بررر طووووط فشج ( يقصد على ما اعتقد انتم ياالحريم ماتجون الا بالعين الحمراء )
ههههههههههههههههههههه
وبعدها نزلو للمكان اللي وصلتهم له وكانت الزوجه ماسكه بيد زوجها وكأنها تترجاه بأن يعتذر لها
والزوج مطنشها

حسبي الله عليهم قسماً بالله خفت منهم
قلت الحين بيجلسون يتظاربون وبعدين بيقلبون علي ويمكن الزوجه او الزوج يطلع حرة المشكله اللي بينهم علي وينقلبون مثل الننجا وبعدها يقطعون فيني بالسكين او بسيف الننجا

من جد زباين قلقت الله يفكان شرهم


الموقف الثاني

يوم من الايام كنت امشي من عند سوق اليورومارشيه في شارع التخصصي في وقت الصباح
وأشوف هذاك الشايب اللي معه حرمه في نفس العمر وبعدها اشر لي ولما وقفت ركب على طول بدون أي مقدمات
وقال لي : ابي حي الروضه عند شارع الكهرباء
قلت له : ابشر
طبعاً انا أي احد يركب معي اول شي اسويه اشغل العداد

المهم

وحنا في الطريق لما مشينا مع طريق خريص جلس يطالع في العداد

وقال لي : بكم المشوار ؟
قلت له : بعشرين ريال تناسبك ؟
قال لي : لا ما تناسبني اقول مافي الا عشره ريال تبيها ولا خلني انزل هنا
قلت له : مو مشكله اوصلك بعشره بس مره ثانيه ياخالي علمنا بالسعر قبل ما تركب عشان نشوف يستاهل المشوار ولا لا
قال لي : مو شغلك إذا مو عاجبك اسلوبي نزلني هنا
قلت له : الا عاجبني ونص بس اهم شي لا تزعل
أعوذ بالله من الشيطان الرجيم

المهم

وحنا في الطريق
قال لي : احس انك بدون نفس توصلنا ؟
ههههههههههههههههه
وبعدها جلست اطالع فيه وانا مبتسم
وقلت له : افاااا ياخالي الا بنفس ونص ليش عشان عشره ريال ما اوصلك
تبون الصراحه والله اني بدون نفس وصلتهم

المهم

قال لي : ابيك تمشي بسرعه يلاااا
طبعاً يقولها وهو معصب
قلت له : ياخالي الطريق زحمه وشلون امشي بسرعه اركد شوي
قال لي : مو شغلك اركد ولا ما اركد شغلك توصلنا بسرعه وبس
قلت له : ان شاء الله
وانا اقول في خاطري اللهم طولك ياروح
وبعدها جلس يسولف مع زوجته
ويقول لها : سواق الليموزين هذا مو مثل اللي وصلنا الباكستاني
الباكستاني هذاك ونيس وشكله خفيف دم مو مثل الغبي اللي جنبي
وانا اسمعه وضايق صدري
والحرمه ساكته ولا قالت ولا كلمه

وبعدين جلس يتف تف ويقول : اف ف ف ف ف ف ياخي اسرع
قلت له : خير ان شاء الله وانا طبعاً كاتم قهري منه
وقول في خاطري
اوصلك بعشره ريال وتجلس تنفخ بعد
والله من جد شين وقوي عين

الزبده

لما وصلته عند بيتهم كان بيتهم ما شاء الله عباره عن بيت كبير وشكله فخم

المهم

قال لي : هنا وقف ( بصوت واحد معصب)
وبعدها وقفت وكنت ابيى أقول له مابي منك شي بس فارق
بعدها طلع من جيبه 50 ريال وقال لي هذي لك وأعذرني تراني جالس امزح معك طول الطريق وابي انرفزك وابي اشوف ردت فعلك بس ما شاء الله عليك صبور
قلت له : الله يهديك بس قسماً بالله بغيت اقول لك انزل ولا ابي منك شي بصراحه قهرتني
قال لي : وهو يضحك سويتها مع اللي وصلنا قبلك وقال لنا انزلو من سيارتي
قلت له : بصراحه ما الومه بس انا احترمتك عشان عمرك ياخالي ولا الود ودي انزلك في وسط طريق خريص
بعدها جلس يضحك ويدعيلي بالتوفيق

بس تبون الصراحه رفع ضغطي في الطريق
والله يستر عليه


الموقف الثالث

اقوله لكم في الحلقه القادمه لأني بصراحه مستعجل ابي اروح مشوار مهم

قبل ما اختم الحلقه هذي نصيحه للأغنياء ورجال الاعمال فقط اما اللي مثلي فقير لا يسويها
هذا محل عطور اسمه عطور بسام القاسم شعاره عباره عن حرفين BQ موقعه قبال مركز الفيصليه على طريق الملك فهد
قسماً بالله عنده عطور مررررره قويه بس غاليه مررره انصحكم تشترون منه وبعدين عنده حركه حلوه تقدر تكتب أي اسم على زجاجة العطر عن طريق الليزر اقصد إذا تبي تعطي احد هديه تقدر تكتب اسمه على الزجاجه اهداء لفلان
طبعاً انا عرفت المحل عن طريق توصيلي لاحد الموظفين في محل العطور قال لي انزل جرب العطور اللي عندنا يمكن تعجبك وبصراحه انا نقطة ضعفي العطور وبيني وبينكم اشتريت من عندهم عطر هديه لواحد عزيز على قلبي بس بصراحه غالي مررره ولكن يستاهل

أخ خ خ خ خ وأخيراً خلصت

وللحديث بقيه


محبكم في الله وسائق الليموزين / عبرود

[goree]

http://www.alraidiah.org/up/up/20771077820080409.gif


عبرود

ربي يسعد قلبك

ويصبرك على زبائنك

بجد يرفعون الضغط

بس ماشاء الله عليك حليم

:)
http://www.alraidiah.org/up/up/20771077820080409.gif
goree

[عشق الشمال]

ياطوووول بااااالك وياااااوسع صدرك !!

سواااالفك رهيبة الله يعطيك العااااااافية ،،

[طليفيح]

عزاااااااااااااااااللله انك طويل بال

تسلم عبرود

[حنين]

http://www.alraidiah.com/vb/uploaded/mals.gif





ماشاء الله عليك وعلى طوله بالك

تسلم ياعبروود





http://www.alraidiah.com/vb/uploaded/mals2.gif

[أبو رائد]

حلقات ممتعة .. وشيقة

وما زلنا متابعين وبقوة .. لما تكتب


سلمت يا عبرود .. و الله يعطيك العافية

على هذه الإبداعات

[الدووووخي]

والله انك صبووور اخوي عبرود ’’’

وعندك طووول بال غير طبيعيه ماشاء الله عليك ’’’

الله يوفقك يارب ’’’

[عيون الشوق]

عبرود

مواقف ممتعه


×?°شكرا ×?°

[عبرود]

قبل أن أبدأ أحب أن اشكر كل عضو وكل قارء تم مروره على موضوعي المتواضع وإن شاء الله اعجبكم



نبدأ بالحلقة

الحلقة العشرين

الموقف الأول

طبعاً هذا الموقف خاص للي يكرهون الجنسية البنغلاديشية


مره من المرات وصلت لي واحد من اخوياي اللي اجتمع معه في الاستراحه للمطار وكانت الساعه 5 الفجر ولما نزلته عند مدخل الصالات أشر لي واحد جندي برتبة وكيل رقيب يشتغل قي قطاع الجوازات وكان يشتغل في المطار وكان مخلص وقت الدوام ولما شافني انزل خويي اشر لي

وقال لي : بكم توصلني لحي الملك فيصل
قلت له : بـ 20 ريال
طبعاً السعر رخيص مرره لانه اصلاً ممنوع اركب احد من المطار لان المطار له ليموزينات خاصه بالمطار والليموزينات اللي في المطار لها تصريح خاص وقيمته بـ 800 ريال على ما اعتقد

المهم

ركب معي ولما جيت امشي قطع من قدامي بنغلاديشي كان يدف العربية حقت العفش

ولما شافه العسكري
قال : اخ خ خ خ خ والله انا اكره الجنس هذا مدري ليش
قلت له : يارجال الله يستر عليهم وعلينا
قال لي : وش اسم الولد
قلت له : إن شاء الله إذا جاء بسميه سعد على اسم جدي
قال لي : والله يابو سعد الاشكال هذي هي اللي دامره الدوله بس مشكلتنا نرحمهم لأنهم ضعوف ولا في الأصل اخبث جنس على وجه الأرض والله ما تدري عنهم
قلت له : يارجال كل واحد وفيه حقه سواء كان بنغلاديشي أو مصري او سعودي أو أي كان
قال لي : انت ما قرأت خبرهم في الجريدة وهم يسرقون أغطية البلاعات الله يكرمك و اسلاك الكهرب وأعمدة بعض ارشادات المرور وبعدين يصهرونها ويبيعونها على اساس انها حديد خرده
قلت له : الا قرأته بس ما تحكم عليهم بهذا الشيء
قال لي : وغير هذي فيه اشياء ما تذكر بس الله يفكنا من شرهم
وبعدين سكت شوي
وقال لي : ياخي يسمونهم في الدول العربيه جراذي أسيآ
ههههههههههههههههه
استغفر الله العظيم

قلت له : يارجال ما عليك الدوله إن شاء الله بعد كم يوم بيصدرون قرار بمنع أستقدامهم من البنغلادش

قال لي : هههههههههههههه معليش ياخي انا كل اسبوع افسح تأشيرة 1500 بنغلاديشي بمعدل ثلاث مرات في الاسبوع
قلت له : اف اف اف الله يستر
قال لي رح حي البطحاء وشف التجمع المخيف هناك والله لو بغو يسوون مظاهره في الدوله قسماً بالله يبيلهم كتيبه عسكريه عشان يفرقونهم

اخ خ خ خ خ خ

عاد تبون الصراحه كلام العسكري صادق
والله لو تشوفون اشكالهم كل يوم جمعه عند كوبري البطحاء قسماً بالله تقول انك في بنغلادش من كثرهم

بس ما نقول الا الله يستر على حكومتنا وشعبنا منهم


الموقف الثاني

الموقف هذا صار لي مع اخبث زبون ركب معي حتى الأن
مره من المرات كنت امشي في شوارع الدرعية وأشر لي واحد شاب شكله محترم ولبسه محترم بس من نفس الفصيلة اللي ذكرتها في الحلقه السابعه اللي انحاشو منّي لما وصلتهم

المهم

قال لي : ابيك توصلني عند مخرج 4
طبعاً مخرج 4 هو تقاطع طريق الملك فهد مع الدائري الشمالي

المهم

قلت له : ابشر
قال لي : بكم ؟
قلت له : 15 ريال
بعدها ركب معي

وحنا في الطريق ولما وصلت للمخرج
قال لي : لف يمين مع المخرج
يقصد اتجه لجهة الجنوب

المهم

لما دخلت المخرج ومشيت فيه لين وصلت لمخرج فندق شيراتون
قلت له : ها وين يابو الشباب
قال لي : امش بعد شوي قدام
وصرت أمشي وأمشي وأمشي
هههههههههههههههههههههههههه
حتى وصلت مركز قزاز للعطور اللي شارع الامير سلطان (الثلاثين) في حي العليا وبعدها قال لي بس هنا خلاص
ولما جا ينزل عطاني 15 ريال
قلت له : يابو الشباب من مخرج 4 إلى هنا بـ 15 ريال ومن الدرعيه إلى هنا 30 ريال بس عشانك باخذ منك 20ريال
قال لي : ياخي انا دايماً اجي بـ 15 ريال
قلت له : صدقت بعد تقدر تجي ببلاش بس انت قلت لي ابي مخرج 4 وانا وصلتك لين شارع الثلاثين العليا
بعدها
قال لي : ياخي هذا عيبكم ياسعوديين تحبون تستغلون الواحد
قلت له : هذا عيبكم يا ؟؟؟؟؟ تحبون تنصبون على الواحد
وأقصد بـ ؟؟؟؟ يعني قبيلته

بعدها عطاني 20 ريال بدون نفس وقفل الباب بقوه
هههههههههههههههههه

بصراحه اخبث زبون ركبته
الاخ يقول لي ابي مخرج 4 وبعدين انزله في العليا
صدق المثل اللي قول
شين وقوي عين




الموقف الثالث

بصراحه هذا موقف كوميدي مع شوي محزن

مره من المرات كنت امشي في شارع الاحساء في حي الملز
وفجأه
أشر لي واحد جنسيته من تركيا وبصراحه كان وجهه مخالف لسنة الرسول
لأن الرسول صلى الله عليه وسلم يقول
حفو الشوارب وأعفو اللحى

وهو حاف اللحية ومعفي الشوارب
قسماً بالله ان شاربه من كبره فيه مفصل ما شاء الله عليه
هههههههههههههههههههههههههه

المهم

وقفت عنده
وقال لي : ابي النقل الجماعي بكم ؟
قلت له : بـ 20 ريال
وبعدها
قال لي : طيب افتح الشنطه ابي اركب معك بعض العفش

المهم
لما جا يركب ركب معنا واحد من اخوياه
وقال لي : ابيك توصلني على طريقكم قدام

المهم

لما جا ينزل خوي التركي اللي معي
نزل هو والراكب اللي كان قدام وجاء يودعه
وجلسو يحضنون في بعض لمدة ثلاث او خمس دقائق على ما اعتقد
بس الشيء المؤثر
هو دموعهم وهم يودعون بعض
قسماً بالله خنقتني العبرا لأني انا بصراحه لو تبكي قدامي 100 حرمه ما اهتم بس لما يبكي قدامي رجال واحد يضيق صدري مررره لانه بصراحه دموع الرجال تحس لها قيمه

المهم

كملنا مشوارنا للنقل الجماعي وحنا في الطريق جلسنا نسولف عن دولة تركيا وعن حياتهم في تركيا وعن النظام وعن المعيشه هناك
قال لي : انا لي خمسة سنوات في السعوديه وما رحت لتركيا
قلت له : افففف والله مده طويله بس اهم شي لا تكون متزوج
قال لي : الا متزوج وعندي ولد ما شفته من يوم ولد
والحين عمره 4سنوات ونص وبصراحه انا متحمس للسفره عشان ابي اشوف ولدي
وهو يسولف معي عن ولده جلس يبكي
وانا بصراحه خنقتني العبره مره ثاني
هههههههههههههههههههههه
والله لو تشوفون شكله قسماً بالله مؤثر مررره
بالرغم ان وجهه كله شنب بس شكله محزن

أسأل الله القدير رب العرش العظيم بأن يوصل هذا الرجل إلى أهله في اسرع وقت سالم غانم


نكمل معكم باقي المواقف في الحلقه القادمه
قبل ما اختم الحلقه بذكركم بأن الحلقه القادمه سوف تكون عن مواقفي مع بعض زبائن مدينة جده والله يستر علي من جده ومن زباينها

وللحديث بقية


محبكم في الله وسائق الليموزين : عبرود

[طليفيح]

ههههههههههههههههههههههههههههه

عبرود الله يسعدك

ننتظر مووووواقف اهل جدة

تحياتي ياحيي . . .

[بنت حايل]

هههههههههههه بعدي والله ياعبرود ..

والله من جد عندك طولت بال والله يوفقك يارب ..

وانا سمعت عنك وكان ودي أقرا يومياتك ..

واشوا قريت اليوميات .. ومتاااااااااابعه أن شاء الله ..

تسلم عبرود ..

[حنين]

http://www.alraidiah.com/vb/uploaded/mals.gif




تسلم ياعبروود على هالمواقف الرائعه


ننتظرك بقووه






http://www.alraidiah.com/vb/uploaded/mals2.gif

[الدووووخي]

الله يعطيك العافيه عبروود وننتظر اهل جده ’’’

[عبرود]

الحلقة الواحد والعشرين

طعباً انا من مواليد مدينة جده وعشت فيها لمدة 28 سنة وانتقلت عام 1426هـ لمدينة الرياض


يقول الشاعر

جدة ياهوى الولهان ..... فيها تجمعو الخلان



طبعاً المقصود بالخلان جمع خليل وهو الحبيب

وحبايبي في جده كثيرين بس ما اقدر اذكرهم بسبب كثرتهم

طبعاً انا غبت عن جدة اكثر من سنتين وخمسة اشهر وبصراحة في خلال هذه المدة تغيرت جدة تغير جذري
وبيني بينكم فيه واحد من أخوياي قال لي جملة قبل سنتين لما نقلت للرياض

قال لي : يابوسعد مصيرك تحنّ لجدة

وبصراحة لما وصلت لجده أول مكان رحت له هو حي الثغر وكانت الساعة الواحده في الليل وكنت أبي أشوف بيت في هذاك الحي عشت فيه أحلى أيام عمري ولما وصلت لموقع البيت تفاجأت بإزالة نصف البيت لأنشاء طريق يمر من منتصف البيت وبعدها جلست اتفرج على البيت ودموعي أربع أربع والسبب كان يعيش في هذا البيت مجموعه من الاشخاص كنت أعزهم مررره
بس لما رحلو إلى الدار الأخرى صرت أتذكر سواليفهم واتذكر مواقفهم معي

أخ خ خ خ خ خ خ خ

أسأل الله القدير رب العرش العظيم بأن يجمعنا معهم في جنات النعيم إنه سميع مجيب الدعاء


نرجع لمواقفنا مع زبائن الليموزين


الموقف الأول

هذا المواقف في شوارع الرياض

مره من المرات كنت مركب معي ثلاث حريم من الجنسية الفرنسية وكنت ماخذهم من طريق الملك عبدالله إلى حي الملز خلف أسواق التميمي
ولما كنت امشي في الطريق كان في واحد بزر وغبي وحمار في نفس الوقت يطاردني وكان معه جيب رنج روفر على ما اعتقد موديل 2006 وكان الغبي يمشي جنبي ويأشر للحريم اللي معي وكان ماسك في يده ورقه فيها رقم جواله وكان كاتب الرقم بخط كبير وبعدها جلست اطالع فيه وأشر له وقول له بالأشارات ياخي عيب عليك
وهو يطالع فيني ويأشر لي ويقول لي مو شغلك انا على كيفي
وبعدها سجلت رقم جواله ولما نزلت الزبائن
دقيت عليه
وقلت له : ياغبي ياحمار ياأغبى رجل على الكرة الأرضية أستح على وجهك ياخي هذولي حريم فرنسيات وعيب عليك تراك تفشلنا بالمسخرة اللي تسويها
قال لي : من انت ؟
قلت له : انا راعي الليموزين
قال لي : والله انك حقير وبجيح لك عين تتصل علي
قلت له : اتصل عليك وعلى عشره من اشكالك ياحمار الله يكرم الحمار عنك
وبعدها
هههههههههههههههههههههههههههههههه

جلس يسب ويلعن فيني ويهددني
ويقول : والله لأجيبك يا ؟؟؟؟
قلت له : والله تبطي عظم انت واللي بيفزع لك يا حقير
وبعدها
قال لي : انت رجال قابلني في أي مكان
قلت له : ياحمار أنا لو متزوج كان جبت واحد في عمرك يا غبي وبعدين انا ما انزل مستواي لناس عقليتهم مثل عقليتك ياطبل
هههههههههههههههههههههه
بعدها قفلت في وجهه
وصار يدق علي وانا ما ارد عليه
وبيني وبينكم كنت ابي اقهره لأن الحركه اللي يسويها هذي اعتبرها حركه حقيره وقذره مع احترامي الشديد لكل الشباب المراهق

بيني وبينكم انا ودي اقابله بس المشكله رقمه مرررره مميز واخاف اقابله وبعدها اصير اكمل باقي الحلقات في سجن الحاير

هههههههههههههههههههههههه


ونصيحه لك حقير أو غبي مثل الحقير اللي معاه الرنج روفر إذا شفت ليموزين رقم التصريح حقه يبدأ بـرقم 700 أو 900 أو 701 أو 901 أو 800
لا تحارشه أو تمشي جنبه تراه سعودي وقسماً بالله لايكرهك اليوم اللي غازلت فيه
أسأل الله القدير رب العرش العظيم بأن يهدي ضال المسلمين

الموقف الثاني

طبعاً هذا الموقف من شوارع مدينة جدة

كنت أمشي في شارع الأربعين في حي الرحاب ولما مريت من قدام اسواق الدانوب أشر لي ولد صغير وعمره على ما أعتقد 6 أو 7 سنوات وكان واقف مع أمه

المهم

وقال لي : بكم توصلنا لحي السامر ؟
قلت له : بـ 15 ريال
وبعدها ركبو معي وحنّا في الطريق جلس الولد يطالع فيني من فوق لتحت وأنا اجالس اطالع فيه بنصف عين وقول في نفسي وش فيه يطالع هذا ؟

المهم

سألني سؤال وبصراحه السؤال هذا ما أحبه أبداً إلا عند الزواج فقط
قال لي : انت من فين ؟
بعدها جلست اطالع فيه وانا مبتسم
وقلت له : قل لي أنت من وين أول ؟
قال لي : أنا من مكة
قلت له : ونعم والله
قال لي : طيب انت من وين ؟
قلت له : أنا من الحبشة
هههههههههههههههههههههههههههههههههههههههه
بصراحه كنت ابي أصرفه عشان ما يزعجني ويقول لي طيب من أي فخذ ومن أي رجل ومن أي يد ومن أي بطن ويطلع كل مشوارنا عن النسب
هههههههههههههههههههههههههههههههه
المهم لما قلت له أنا من الحبشة جلس يضحك ضحك مو طبيعي والله ان دموعه نزلت من الضحك وبيني وبينكم أنا أستغربت تدرون ليش ؟
عشان عمره صغير في السن
يعني لو جاوبت السؤال هذا لواحد عمره في العشرين أو 16سنه ممكن يضحك بس هذا عمره مثل ماقلت لكم 6أو 7 سنوات ومع هذا حس أني استهبل عليه وبعدها جلس يضحك من قلب
بس بيني وبيكم احسن كلمه سمعتها يقولها هذا الولد
هي كلمت
بلكن
بدال ما يقول يمكن شكلك سعودي
صار يقول بلكن أنت سعودي
هههههههههههههههههههههههه

يازين كلام اهل الحجاز بصراحه تحس فيه بعض البساطه والتواضع

أسأل الله القدير رب العرش العظيم بأن يوفق هذا الولد ويحفظه لأهله إنه سميع مجيب الدعاء

أكمل معكم باقي المواقف في الحلقة القادمة لأن أهلي حطو الغداء
تفضلو معنا حياكم الله على قل الكلافه

وللحديث بقية


محبكم في الله وسائق الليموزين / عبرود


ملاحضة : هذه الحلقة كتبت في جدة وفي بيت أحد أصدقائي الأعزاء على قلبي وأسمه رمضان فقيهي أسأل الله القدير بأن يوفقه ويحفظ له ولده زياد
إنه سميع مجيب الدعاء

(أهداء خاص لك انت يا رمضان مع ولدك زياد)

[شوق الغلا]

عزيزي عبرود ..

يعطيك العافيه على هذه اليومياات الرائعه ..

ما شاء الله تبارك ..

طريقة حوارك رائعه ..

سلمت لنا يالغلا ..

[حنين]

http://www.alraidiah.com/vb/uploaded/mals.gif



سلمت ياعبروود على هالمقاله

لك كل الشكر






http://www.alraidiah.com/vb/uploaded/mals2.gif

[من يلومني بحبك]

الله يوفقك ويرزقك خيو عبرود

والله يعينك على لفلفة شوارع الرياض

هههههههههههه قصة شيقة

لبى مواضيعك

تقبل تحياتي العطرة

‏=‏من يلومني بحبك=

[نوني الامير]

الله يقويك عبرووووووووووود

من المتابعين بصمت .. :) ,,

بإنتظار كل ماهو جديد .. :101:

[عبرود]

قبل أن أبدأ أحب أن أشكر كل عضو وكل قارئ تم مروره على موضوعي المتواضع وأن شاء الله وجدتم فيه الشيء المفيد

نبدأ بالحلفة

الحلقة الثانية والعشرين

يقول المثل

من جاور السعيد يسعد
سبحان الله عشان جده قريبة من مكة المكرمة الا أن فيها خير ورزق كثير لا يعلم به الآ الله سبحانه وتعالى

والسبب

الرزق اللي أجنيه في جده في خلال يوم أطلعه في الرياض في خلال يومين والزبائن اللي في جده كاشات أما اللي في الرياض مع احترامي الشديد لهم فيهم شوي بخل والمشاوير في جده قصيره وقريبه من بعض أما في الرياض المشوار الواحد عن عشر مشاوير في جدة
وبصراحه والصراحه راحه
اكبر غلطه سواها أبوي أنه نقل للرياض من بعد ما تقاعد من عمله في جده
بس الشكوه لله كل شي مقدر ومكتوب

نرجع لمواقفنا مع زبائن الليموزين
طبعاً مع زبائن جدة

الموقف الأول

كان ياماكان في حديث الزمان كنت أمشي في شارع حراء في وقت الليل على ما اعتقد الساعه 12 ونص ليلاً

المهم

أشر لي ولد عمره على ما اعتقد 17 سنة وكان واقف عند مطعم فروج الطازج اللي في شارع حراء
وقال لي : بكم توصلني لحي المحمديه في نهاية شارع الامير سلطان
قلت له : بـ 15 ريال
قال لي : طيب لحضه ابنادي أهلي
وبعدها جت أمه ومعها حرمتين وكان أعمارهم ما بين 50 والـ 60 سنة ولما ركبو معي جلسو يسولفون مع بعضهم بصوت شوي عالي وبصراحه سواليف اهل جده فيها شوي فرفشه مع شوي فكاهه

المهم

وأنا اتسمع عليهم جلست اضحك بيني وبين نفسي على سوالفيهم
ومن ضمن سواليفهم
تقول الحرمه لخويتها الثانيه : شفتي يأم أحمد الراجل أيش سوا بالواد ودين محمد أنا عصبت عليه وسويت لو قروشه
هههههههههههههههههههه
وفجأه وانا أضحك
قالت الأم لولدها : ياواد يازيزو أش في الراجل اللي جنبك يضحك
بعدها أنا حمر وجهي وتفشلت منهم
وقال لي الولد : في حاجه تضحك ياأخ ؟
ههههههههههههههههه
قلت له : لا بس جالس اتذكر أشياء صارت لي من زمان مضحكه وعشان كذا جالس اضحك
وانا بصراحه جالس اضحك على كلامهم

المهم

لما وصلنا لليبت حقهم
قلت للولد : وش اسمك يالشيخ ؟
قال لي : معك زياد في حاجه ؟
قلت له : لا بس كنت مشبّه على واحد يصير صديق أخوي الصغير على بالي انت
هههههههههههههههههههههههههه


اسمه زياد وامه تناديه زيزو
عاشت الاسامي يا أخ زيزو
اجل انا اسمي في جده عوعو على وزن عبرود
ههههههههههههههههههههههههههه

الموقف الثاني

دايماً إذا جيت أنزل أي زبون ادعي له على حسب السواليف اللي كنت اسولف معه فيها
مثلاً
إذا كان يسولف عن الشغل اقول له الله يوفقك في شغلك
وإذا كان يسولف عن الأسهم مثلاً أقول له جعل أسهمك كلها خضراء
وإذا كان يسولف عن التجارة أقول له جعل ربي يرزقك من حيث لا تعلم

المهم

مره من المرات رحت أوصل واحد كان عنده مقابلة بخصوص وظيفه في مركز التحلية مول وكنت اسولف معه عن طرق المقابلات وعن كيفية المقابلة مع المسؤولين

المهم

لما جا ينزل
قلت له : الله ييسر أمرك ويفرج همك بالوظيفه هذي
قال لي : تكفى يابو الشباب ابيك تكثر لي من هذي الدعاوي والله مررره ارتاح لها
ههههههههههههههههههه
وبعدها قلت له : اجل رح جعل ربي يرزقك عشره مليون دولار وبعدها تشتري لي جيب لاندكروزر
المشاور كان حسابه عشر ريال ولما قلت له هذا الدعاء
قال لي : ودين محمد تستاهل خمسه ريال على هذي الدعوه وديني انا الحين مرتاح نفسياً
هههههههههههههههههه

أسأل الله القدير رب العرش العظيم بأن يوفقه في عمله الجديد ويسخر له مدير يحبه ويوافق عليه
إنه سميع مجيب



الموقف الثالث

كنت أمشي بالقرب من سوق المحمل وأشر لي هذاك الشاب اللي عمره على ما اعتقد 25 سنه
وقال لي : ابيك توصلني لحي النسيم
قلت له : وين هوبو حي النسيم ؟
قال لي : قصمنجي وتشتغل سواق لليموزين في جده اجل بركب معك وبعلمك عن حي النسيم وبعطيك اللي تبي مدام انت قصمنجي
هههههههههههههههههههه
وبعدها ركب على طول
قلت له : يابعد حيي ترا انا شمري بس بسبب جلستي مع القصمان بكثره صارت لهجتي فيها شوي قصيمي لذى لا تعتقد اني قصيمي وبعدين تسألني شي عن القصيم ولا اقدر اجاوب عليه وبعدين تعرف اني ماني قصيمي وبعدها تندم
قال لي : ما يخالف برضو تستاهل

المهم

وحنا في الطريق
قال لي : وين ساكن فيه ؟
قلت له : بصراحه انا كنت من سكان جده في حي الصفا بس بعد تقاعد أبوي من الشغل نقلنا للرياض عام 2006 ولي عن جده سنتين وخمسة أشهر
قال لي : اهاااا عشان كذا ما تعرف حي النسيم
قلت له : بصراحه أول مره اسمع فيه اخبر حي النسيم عندنا في الرياض بس
قال لي : اجل فقدت مطعم البيك
هههههههههههههههههههههههههه
قلت له : والله انك صادق انا أول كنت ما اهتم فيه ولا افكر فيه بس لما نقلت للرياض قسماً بالله ان اشتقت له وبيني وبينك اول ما وصلت لجدة اول غدا تغديته من مطعم البيك خذيت لي دجاج حراق مع الثوم قسماً بالله له طعم خااااص
وبعدها قال لي : اجل محرومين من البيك
ههههههههههههههههههههههه
قلت له : تقدر تقول
بعدها نزلته وراح في حال سبيله

بخصوص مطعم البيك
بصراحه أنا ودي اعرف ليش ما يفتح فرع في الرياض
هل هو حسد من المسؤولين في الرياض ولا فيه شي حنّا ما ندري عنه
تكفى إللي عنده خبر يعلمنا لأن الوضع بصراحه ماله داعي


بيني وبينكم احسن شي بعد ما تخلص من أكل دسم سواء غداء أو عشاء انصح كل واحد عايش في جده يروح للكورنيش ويشتري له شاهي بالحبق من بوفية المالكي طبعاً له عدة فروع على الكورنيش
والله العظيم عنده شاهي بالحبق له طعم خنفشاري والشاهي هذا كنت اشربه من أولى ثانوي وإلى يومنا هذا تقريباً لي14 سنة وأنا اشرب منه ولا تغير طعمه

اخ خ خ خ خ خ خ خ

بصراحه
جدة غير
مع احترامي الشديد للرياض ولأهلها


وللحديث بقية

محبكم في الله وسائق الليموزين : عبرود


كتبت هذه الحلقة وأنا واقف افطر على كورنيش جده أمام فندق جدة هيلتون

[حنين]

http://www.alraidiah.com/vb/uploaded/mals.gif




يا هلا بعبروود

بصراحه مواقفك بجده احسن من الرياض

الرياض يكوون بعضها استفزازي

ياحلو لهجة اهل جده دحين وهيا وابويا ..... الخ



اما بالنسبه لمطعم البيك انا بجاوبك

وتقدر تقوول انها حسد مثل ماقلت

كان مطعم البيك بيفتح في (( العزيزيه موول)) هابير بنده

حتى لوحته كانت موجوووده

بس على حسب الكلام ان المطاعم اللي كانت بالسوق هذا اشتكت وقالت بيطيح سوقنا لو فتح البيك هنا وبنسكر

قامو وكنسلو البيك




http://www.alraidiah.com/vb/uploaded/mals2.gif

[من يلومني بحبك]

وفقك الله خيو عبرود

خلاص أنا أبشتغل مثلك ههههههه

الله يوفقك ويوفق اخواننا المسلمين

تقبل تحياتي العطرة

=من يلومني بحبك=

[طليفيح]

عااااااااااشت الاسامي عوعو ههههههههههههههههههههه

ونعم بك يبناخي

وينك بوه هههههههههههههههههههههههههههههههه

مواقف رهيبه

ياروحي يازيزو:D

[قصائد]

يااااااااااااااااااااااه توني انتهي من قراءة يومياتك... من يومين بس اكتشفتها وقعدت اقراها

بصراحة روووووووووووعه .. وصدقني لو تسوي منها كتاب راح يكسر الدنيا وتصير مثل البيك لا يقاوم ..

بس عندي نقطة ابي اوضحها .. وهي (( خوف المرأة من الركوب مع سائق اللموزين السعودي ))

بصراحه يا خوي مو كل السواقين السعوديين مثلك .. انت ماشاء الله عليك تخاف ربك لكن ترا فيه مجموعة الله يهديهم مايخاف على رزقة وما يتقي ربه تلقاه يناظر على الحريم من المرايه او تشوفه يتميلح ويرمي كلام غزل يحاسب عليه يوم القيامه .. وهذا فعلا شي واقع وصار مع الكثير من النساء لذلك صار عندهم عقدة من السائق السعودي ..

مع ان لو الكل مثلك كانت الدنيا بخير ..

وما قول غير الله يوفقك ويرزقك من حيث لا تعلم ..

[شوق الغلا]

عزيزي عبرود ..

انتظر يوميااتك بلهفه ..

احسها رواايه تتجسد بشخص بطوات ..

فنحن ننتظر ذالك البطولات لنستفيد من خبرتك مع جميع مرااحل العمر ..

دمت لنا يالغلا ..

[الدووووخي]

الله يوفقك عوعو ’’’

[أحمـــد]

واصـــل يــاعبــروووووووود ولاتبطـــي علينـــــا






:101:

[عبرود]

قبل أن أبدأ أحب أن أشكر كل عضو وكل قارء تم مروره على موضوعي المتواضع وإن شاءالله وجدتم فيه الشيء المفيد


الاخ العزيز أحمد / معليش على التأخير لا تلومني والله بسبب كثرة الدوران ادخل غرفتي وأنا دايخ


نبدأ بالحلقة

الحلقة الثالثة والعشرون


ومازلنا مع زباين أهل جدة


الموقف الأول

طبعاً هذا الموقف عبارة عن تحذير لبعض شركات المواد الغذائية

مره من المرات كنت ادور في حي الصفا وابي أشوف حواري حي الصفا لأن هذا الحي عشت فيه كل عمري وفيه بيت الوالد الله يحفظه لي وهو عباره عن عماره على شارع الأربعين
وسبحان الله في هذا البيت عشت فيه لمدة 26سنة حتى انتقلنا للرياض عام 1426هـ ولي في هذا البيت ذكريات جميلة لا تنسى

المهم

وأنا أدور في وسط الحاره شفت ولد جيرننا وهو أصغر مني في العمر ويصير أخو زميلي في المدرسه ولما مريت من عنده أشر لي
وقال لي : بكم توصلني لشركة (؟؟؟؟؟؟؟) في حي الصناعية
قلت له : بـ 25ريال
وبعدها ركب معي
وحنّا في الطريق
قال لي : ياخي وجهك مو غريب علي
قلت له : وشلون ؟
قال لي : مافي ناس يقربون لك ساكنين عندنا في الحاره
قلت له : مدري ممكن ليش لا
قال لي : والله تشبه لواحد كان سكان عندنا بس نقل للرياض
هههههههههههههههههههههههههههههههههههههههههههه

قلت له : ممكن ليش لا
وبعدها سكت وحس أني استهبل عليه
ههههههههههههههههههههههههههههههههه

المهم

وحنّا في الطريق جلسنا نسولف عن مجال عمله
وقلت له : انت وين تشتغل فيه
قال لي : انا أشتغل في شركة (؟؟؟؟؟؟؟؟؟)
قلت له : حقت الحلويات والعصيرات
قال لي : أيه
قلت له : اجل بتسوي لي تخفيض إذا شريت حلاوه أو عصير من منتجاتكم
قال لي : انصحك لا تستخدمها مره ثانيه ولا تاكل منها ولا تشرب منها
قلت له : أفااااا ليش ؟
قال لي : ياخي هذي شركه قذره ومافيها نظافه وحتى الأداره حقتهم فاشلة
قلت له : غريبة بس ياخي شغلها ماشي في السوق
قال لي : يارجال انا الحين رايح لهم عشان اقدم على أستقالتي
قلت له : ليش ؟
قال لي : ياخي يتأخرون في الرواتب ويذلونا في تسليم الرواتب ومع هذا شغلهم وسخ
قلت له : طيب ليش وسخ ؟
قال لي : لحضه بوريك مقطع فيديو وبعض الصور انا مصورها بالجوال عشان بنزلها في الانترنت وبسوي لهم فضيحه

بصراحه وراني صور مقززه ومقرفه قسماً بالله حرمت ما اكل شي من منتجات هذي الشركة
الله يعينهم لو نزلت هذي الصور في الانترنت او انتشر خبرها عز الله بيروحون فيها

وبعدين قلت له : اجل انت تطبق المثل اللي يقول
(إذا جيت رايح كثر الفضايح)

قال لي : والله العظيم انت لو تشتغل معنا كان ما تلومني بالحركه هذي اللي بسويها

بعدها

قلت له : الرسول صلى الله عليه وسلم يقول ( إذا بليتم فأستتيرو) بصراحه حركتك هذي يمكن تقطع رزق ناس كثيره لذى خذها نصيحه مني
وسو اللي اقول لك عليه
قال لي : وش هي ؟
قلت له : نزل الصور والمقطع حق الفيديو في سي دي وارسله للأدارة حقت الشركة عن طريق البريد أو عن طريق مندوب في الشركه وأكتب لهم رساله بس بشرط ما يدرون انه انت عشان ما يسون لك مشكله وبعدين اكتب رساله مرفقه مع السي دي واكتب والله العظيم خلال اسبوع اذا ما شفت تحسين في المصنع قسماً بالله لأفضحكم في الجرائد والمنتديات وبعدها بتشوف المصنع بيتعدل غصباً عنهم ألا إذا كانت الأداره ما تهتم بالشيء هذا فهذا مصيبه

بعدها انحرج مني
وقال لي : يصير خير

لذا نصيحه لاصحاب شركات المواد الغذائية يسوون جولات تفتيشيه على مصانعهم وينتبهون لها والله بصراحه شي مقرف اللي يصير خلف الكواليس

وكذلك المراقبين من البلديه اتمنا بأن يكثرون الجولات التفتيشيه على مثل هذي المصانع

والله بصراحه اذا المصانع مثل هذي الصور اللي شفتها اجل الجهات المسؤله عن هذي الاشياء رايحه فيها

اخ خ خ خ خ خ

الله يستر عليهم بس


الموقف الثاني

الموقف هذا كوميدي شوي ويقهر في نفس الوقت

بصراحه قبل ما اقول الموقف في بعض الحريم هداهم الله تحس انهم رجاجيل في حركاتهم وهذا الشي حرام بس للاسف الناس هذي تستهتر بالشيء هذا

المهم

مره من المرات كنت امشي بالقرب من سوق الهرم اللي في شارع الامير سلطان بحي المحمدية وسبحان الله هذا السوق فيه زحمه غير طبيعيه بالرغم أنه يبيع ملابس مستواها منخفض شوي
بس سبحان موزع الارزاق

المهم

وانا امشي من عند السوق أشرت لي حرمتين طبعاً من اهل جدة

وقالت لي وحده فيهم : نبغاك توصلنا للرويس وبعدين لحي الكندرا
قلت لها : اوكيه بـ 25 ريال
قالت الثانيه : ياواد خفض لنا شوي شكلك راجل محترم وبين عليك على خلق
هههههههههههههههههههههههههههههههه
قلت لها : معليش ياخاله بصراحه المشوار بعيد مرره واتحدى أي احد يوصلكم بالسعر هذا
قالت خويتها لها : يا اختي اركبي والله انه رخيص اركبي بس

وبعدها ركبو معي

المهم

وحنّا في الطريق مرت من على يميني سياره نقل متوسط (دينّه) ولف علي بقوه وبغت تصدمني من قدام أنا بعدها لفيت عنه بسرعه وبعدين أشرت له من بعيد وكنت ابي اقول له انتبه

المهم

لما مريت من جنب السياره اللي بغت تصدمنا
فتحت الحرمه اللي كانت راكبه معي الدريشه
وقالت لراعي الدينّه : انتبه الله يلعن شكلك بغيت تذبحنا
وأنا بعدها انقهرت وانفجرت عليها
وقلت لها : لوسمحتي ياخاله مره ثانيه لا تكلمين احد وأنا أسوق الله يرضى عليك
قالت لي : اقول لك خليك في شغلك انت التاني (الثاني) وبعدين لو سمحت لا تقول لي ياخاله قل لي يا أنسة قال إيش قال خاله قال
هههههههههههههههههههههههههههه
بعدها انا انحرجت وحسيت نفسي خروف
ههههههههههههههههههههرههههههههههههههههههههههههههههه
قسماً بالله حرمه بس مواصفات عربجي
الله يستر عليها ويفكنا من شرها

وبعدها وصلتهم لمشوارهم وانا ساكت وافتكيت من شرهم الله يصلحهم


طبعاً هذي بعض مواقفي مع زباين أهل جده الله يذكرهم الخير

وأنا الحين في الرياض
وبصراحه بتوحشني جده وبفقد مطعم البيك
هههههههههههههههه
وبفقد شاهي الحبق حق بوفيه المالكي اللي في الكورنيش وبفقد حواري جده القديمه
بصراحه انا دايماً اذا كنت فاضي احب اتمشى في حي جده القديمه وهي حارة المظلوم وشارع باب مكه وباب شريف
والله العظيم اذا تمشيت في هذي الاحياء احس براحه نفسيه مدري ليش وبفقد بعد وقت الغروب على كورنيش جده بصراحه له طعم خااااااص وبفقد بعض الناس اللي يعزون عليه هناك
بس أن شاء الله أي موسم سواء كانت اجازه او مناسبه مثل شهر رمضان او الاعياد بشتغل في جده لانه بصراحه فيه خير كثير

آآآآه ياجده آآآآه ياجده آآآآه ياجده

قبل ما اختم الحلقه بقول لكم موقف شفته على طريق الرياض وأنا مسافر من جده ومن بعد ما طلعت من الطائف بصراحه هذا الموقف لو شفتوه والله العظيم عيونكم تدمع من القهر

لما تعديت الطائف بـ 200 كيلو وقفت عند محطة ساسكو وكنت ابي اعبي بنزين وكانت الساعه 4 فجراً وانا واقف في المحطه جت سيارتين من نوع جي ام سي فان كبير ووقف أمام سوبرماركت ساسكو ونزل من كل سياره عشر حريم على ما اعتقد انهم مدرسات بصراحه منظرهم وهم ينزلون يشترون لهم بساكيت وعصيرات وكيك عشان الطريق كان محزن وتخليت ان اختي او زوجتي او بنتي راكبه معهم قسماً بالله كان منظرهم مررره مؤثر

كنت اتمنا من المسؤول عن نقل المعلمات يشوف المنظر هذا ويتخل احد محارمه راكبه معهم وش يكون ردت فعله

أسأل الله القدير رب العرش العظيم بأن يفرج همّهم وييسر أمرهم إنه سميع مجيب الدعاء

ا خ خ خ خ خ خ خ

وللحديث بقية

محبكم في الله وسائق الليموزين : عبرود

كتبت هذه الحلقة في غرفتي اللي اعيش فيها في الرياض

[شوق الغلا]

عزيزي عبرود ..

يعطيك العافيه ننتظر حلقااتك على احر من الجمر ..

لا تبطي علينااا ..

يا ليت تقول لنا اسم الشركه حتى ناخذ احتياطنا ..

الله يكفيك شر الحواادث ..

سلمت لنا يالغلا ..

[طليفيح]

ههههههههههههههههههههههههههههههه

تسلم ياعبرود الله يسعدك يابعدي على المواقف الزينه

والله يرزقك بجيب ان شاءلله

ننتظر الحلقة الجايه يبناخي

[حنين]

http://www.alraidiah.com/vb/uploaded/mals.gif




ياليت ياعبروود تقوول عن هالشركه

والموقف الثاني


ههههههههههههههههههههههههههههههههههه

هذي الحريم السنعه

مو تجلس تنتفض بمكانها من الخووف وهي ساكته





http://www.alraidiah.com/vb/uploaded/mals2.gif

[قصائد]

الله يحفظك من كل شر ويرزقك من حيث لا تحتسب ..


ملاحظة ::

أرجو تثبيت الموضوع

[عبرود]

قبل أن أبدأ أحب ان أشكر كل عضو وكل قارء تم مروره على موضوعي المتواضع وإن شاء الله وجدتم فيه الشيء المفيد

الاخت شوق الغلا والاخت حنين : أولاً تشرفت بمروركم وثانياً بخصوص أسم الشركة بصراحة اعتذر بذكر أسمها لانه بصراحه احس فيها قطع ارزاق

الأخ أو الأخت قصائد :أولاً تشرفت بمرورك وثانياً بخصوص التثبيت أرى من وجهة نظري لا يحتاج التثبيت لان الموضوع يرتفع كل ما انزلت حلقة جديدة


نبدأ بالحلقة


الحلقة الرابعة والعشرون

طبعاً مع زبائن أهل الرياض




الموقف الأول

مره من المرات كنت امشي في حي عرقة وأنا ماشي شفت لي حرمه واقفه على الشارع ولما مريت من عندها أشرت لي
وقالت لي : بكم توصلنا لسوق الديرة ؟
قلت لها : بـ 25 ريال
وبعدها ركبت معي
وقالت لي : أنتظر شوي عشان اختي بتجي مع ولدها

المهم

وانا انتظر جت اختها مع ولدها الله يحفظه لأمه

وحنّا في الطريق
الحرمه أم الولد قالت لأختها جمله بسببها بغيت انزلها من القهر
قالت لها بصوت منخفض : الحين انتي ما لقيتي الا ليموزين سعودي معقوله مافيه غيره

بعدها انا من القهر كنت أمشي من عند كوبري حي السفارات وجلست اطالع في المخرج حق حي السفارات وبغيت ادخل مع مخرج وأشوف لي اقرب سفاره وإغير عندهم جنسيتي السعوديه اللي قاهر زبائن الليموزين

أنا ودي أعرف ليش يتضايقون من السعودي الحين هم بيركبون معهه عشان يوصلهم ولا عشان يناسبونه

اخ خ خ خ خ بس أنا ودي من المسؤول عن سعودة الليموزينات يسعود الليموزينات بأسرع وقت عشان يفكنا من شر الاشكال هذي
والله قهر الحين انا ماني مستفيد من الزيادة حقت الدوله ولا عندي اجازات سنويه ولا عندي بدلات ومع هذا الزباين رافع ضغطهم السواق السعودي

يالله فرج همنا يالله


الموقف الثاني

مره من المرات كنت امشي من عند الأحوال المدنية اللي عند كوبري الوشم وبعدها أشر لي رجال عجوز من أهل جازان كان فيه شبه من بابا سنفور اللي يطلع في افلام كرتون بس كان لونه مثل لون حلاوة التوفي وكانت لحيته بيضاء مرره وجسمه قصير بس والله العظيم وجه كان بشوش مررره
بيني وبينكم انا احب شي عندي اذا جلست مع الشيّاب والله الجلسه معهم توسع الصدر وتنشرا بالذهب

المهم

لما وقفت عنده
قال لي : بكم توصلني لشارع جرير بحي الملز
قلت له : بـ 15
قال لي : ما معي الا 10 ريال تبغاها ولا خلني اشوف غيرك
قلت لك : ابيها ونص بس اهم شي تركب معي
ههههههههههههههه
وبعدها ركب معي

المهم

وحنّا في الطريق سألته سؤال من باب الفضول
وقلت له : طلعت بطاقة جديده ياخالي
قال لي : لا والله ياولدي انا كنت جاي من جازان قبل امس وكنت راكب مع كداده

طبعاً يقصد بالكداده هم أصحاب التكاسي اللي يوصلون ما بين مدينه ومدينة وأكثر تواجدهم في حي البطحاء

المهم

قال لي : لما جيت اركب مع راعي التاكسي قال لي ياجماعة عطوني أثباتاتكم عشان إذا وصلت نقطة تفتيش تكون جهازه معي عشان اعطيها للعسكري
ولما صلنا للرياض نسيت بطاقتي مع سواق التاكسي وأنا الحين جالس اطلع بدل فاقد من الأحوال
قلت له : الله يعينك بس عساك خلصت منهم ؟
قال لي : لسع بعد ثلاث اسابيع يطلعونها لي

المهم

وحنّا في الطريق ولما وصلنا عند شارع الستين حق الملز دخل الشايب يده في جيبه وجلس يدور على الجوال وبعدها

قال لي : يالله ياخي ضيعت الجوال شكله ضاع مني أو نسيته في محل
قلت له : متى اخر مره استخدمت فيها الجوال
قال لي : قبل ما اركب معك بربع ساعة
وبعدها جلس يبكي من القهر ويقول لي : خلاص ياولدي انا كبرت في السن وبدأ عقلي يخرّف
قلت له : ما عليك ياخالي وسع صدرك إن شاء الله بتلقاه بس انت وسع صدرك

بيني وبينكم انا اذا شفت الرجال يبكي يضيق صدري مرره

المهم

قلت له : ياخالي كم رقم جوالك خلنا ندق عليه يمكن يكون طايح تحت الكرسي أو في جيب الكوت اللي انت لابسة
بعدها طلع لي رقم الجوال واتصلت عليه ولا فيه أي صوت داخل السيارة وبعدين انقطع الاتصال وبعدين كررة الأتصال ثلاث مرات وفجأة
رد علي واحد
وقال لي : وينك ياعم عبده
قلت له : معليش يالشيخ انا ماني عبده عبده جالس جنبي من انت الله يخليك
قال لي : انا الكاتب اللي يجلس عند مدخل الأحوال المدنية الظاهر عم عبده نسى جواله عندي لما جا يكتب خطاب لأدارة الاحوال المدنية
قلت له : طيب حنّا بنجيك في الطريق انتظرنا شوي
وبعدها الشايب انبسط مررره
وجلس يقول : ياخي معقوله في ناس عندهم أمانه إلى الأن والله هذا يستاهل بوسه على راسه
وبعدها وصلنا عند الكاتب حق المعاريض ونزل له وراح عنده وجلس يتشكر منه ويحاول يحب رأس الرجال بس الكاتب رفض الشيء هذا من باب فارق السن بين الكاتب والشايب وبعدها انبسط الشياب ولما وصلته للمشوار اللي كان يبيه
قال لي : والله ياولدي لو كنت هندي أو باكستاني كان ما خدمني هذي الخدمه الله يكثر من امثالك وبعدها بدال ما يعطيني عشره ريال عطاني عشرين ريال

أسأل الله أن يطول في عمر هذا الشياب ويوصله لأهله سالم غنم


الموقف الثالث

طبعاً هذا الموقف خاص للي يحبون تعدد الزوجات

مره من المرات كانت الساعة 2 بعد الظهر وكنت امشي من عند مخرج 17 وبالقرب من مركز إيكيا وفجأة أشر لي واحد خال ما شاء الله تبارك الله عليه جسم ضخم مرره وكان متشخص ولابس شماغ وعقال وشكله برستيج وكان معلق على رقبته بطاقة تصريح دخول خاصة بالعمل اللي يشتغل فيه

المهم

لما وقفت عنده
قال لي : بكم توصلني حي العزيزة
قلت له : بـ 20 ريال
قال لي : توصلني بـ 15 ريال
قلت له : ما أردك أركب
وبعدها ركب معي

المهم

وحنّا في الطريق
قال لي : ها كيف شغل الليموزين معك
قلت له : والله ما عليه شغل طيب بس لو الله يفكنا من بعض العقليات الجاهله شوي فحنّا بخير
قال لي : مثل مين العقليات الجاهله
قلت له : مثل بعض الزباين اللي إذا شاف له سواق لليموزين سعودي كأنه شايف ملك الموت
هههههههههههههههه
بعده جلس يضحك
وقال لي : طيب كيف نظامك في الشغل متى تبدأ ومتى ترجع للبيت ؟
قلت له : أبدأ من بعد صلاة الفجر حتى الساعة العاشرة صباحاً ومن بعد صلاة الظهر حتى الساعة الثالثة عصراً ومن بعد الساعة 5 مساءً إلى الساعة 11 أو 12 في الليل
قال لي : طيب ليش كل هذا الوقت ما عندك عيال في البيت تجلس معهم وتتعشاء معهم
ههههههههههههههههههههههههه(ضحكت قهر)
قلت له : لا انا رجال عزوبي ولله الحمد
قال لي : افا ليش كم عمرك ؟
قلت له : 31 وبدخل بـ 32
قال لي : معقولة إلى الأن ما اعرست

قلت له : أيه إلى الأن ما اعرست وفيه ناس أكبر مني في العمر ما اعرسو إلى الأن وش المشكله
قال لي : طيب ليش ما اعرست إلى الأن وش اللي نقاصك ؟
قلت له : بصراحه ناقصني جيب لاندكروزر
هههههههههههههههه
طبعاً كنت امزح معه
قلت له : بصراحه ماعندي وظيفه رسميه
قال لي : طيب الليموزين ما يطلع لك دخل زين ؟
قلت له : الحمد لله فيه خير بس مافيه مستقبل اخاف بكرا تنكسر رجلي أو ينصدم الموتر وبعدها اجلس احط يدي على خدي قدام الحرمه
ههههههههههههه
بعدها
قال لي : شف ياأبن الناس ترا التوفيق من الله انا كنت سواق لليموزين مثلك وجلست اشتغل على الليموزين لمدة ثلاث سنوات وتزوجت لي حرمتين الأولى تزوجتها وانا اشتغل على لليموزين مثلك وتصير بنت عمي أما الثانية فكانة زبونه من زباين الليموزين إللي دايماً أوصلهم والله وفقني فيها وتزوجتها والحين معي من الثنتين 9عيال ولله الحمد وربك زرقني بوظيفه في شركة إيكيا وراتبهم مرره طيب لذا نصيحه انت توكل على الله وربك يفتحها لك بإذن الله
قلت له : ربك كريم أن شاء الله بعرس في المستقبل
وانا اقول في خاطري (هذا وجهي إذا أعرست)
وبعدين قلت له : طيب وشلون اعرست على الزبونه اللي توصلها دايماً
قال لي : هذي حرمه كنت كل يوم أوصلها لمدرسه في حي البديعة وجلست واصلها لمدة سنه ونص وبعدين كنت اسولف مع واحد من اخوياي عنها وكنت اقول له اني اوصل لي وحده من حي اليمامه إلى حي البديعة كل يوم ولي سنه وأنا اوصلها
وبعدين
قال لي خويي : طيب ليش ما تعرس عليها وتقرب المشوار عندك بدال ما تظرب مشوار من حي العزيزه لحي اليمامه ومن ثم لحي البديعه
بعدها جلست افكر في الموضوع وبعدين جلست استهبل ومزح على زوجتي الأولى وعلى أمي
وجلست أقول لهم : تراني بعرس على ثانيه
في البداية زوجتي تضايقت وبعدين جلست على هذا الحال لمدة أربع شهور وانا امزح مع أمي وزوجتي
وقول لهم : تراني بعرس على ثانيه لين جاء اليوم الموعود وفتحت الموضوع على الحرمه اللي أوصلها
وقلت لها : ابي اقابل احد من اقربائك ودي اكلمه في موضوع وبعدها تناقشت مع أهلها والحمد لله ربك وفقني معها وبعدين علمت حرمتي الأولى طبعاً في البداية زعلت بس بعدها تفاهمت أنا وياها والحمد لله الحين كل وحده ساكنه في دور وصارو يمونون على بعض لذا انت توكل على الله وربك يحلها أن شاء الله
قلت له : ان شاء الله

بصراحه حركه حلوه لما جا يتزوج الحرمة الثانية
لذا نصيحه لكل رجال يبي يعرس على ثانيه امزح مع زوجتك في البداية
وقل لها : تراني بتزوج على ثانيه وشف ردت فعلها وش بتكون وبعدين توكل على الله واعرس
ههههههههههههههههههههههههههههههههههههههه

أحس الحين الحريم اللي يقرأون الموقف الثالث حاقدين علي
ههههههههههههههههههههههههههه
ترا الشرع حلل أربع للرجال ومافيها شي إذا الرجال كان مقتدر وتزوج على أربع حريم
أنا ودي بس حرمه عاقلة وفاهمه من اللي يعترضون على الشيء هذا تعطيني دليل من القرأن أو من السنه على عيوب تعدد الزوجات

ههههههههههههههههههههههههههههههههههههههه

وأخيراً خلصت

أسأل الله القدير رب العرش العظيم بأن يفرج همّ كل مسلم ومسلمه وأن يهدي ضال المسلمين إلى طريق الحق
إنه سميع مجيب

وللحديث بقية


محبكم في الله وسائق الليموزين : عبرود

[حنين]

http://www.alraidiah.com/vb/uploaded/mals.gif



الموقف الاول شي طبيعي لكثرة ما نشوفه من سواقين الليموزين السعوديين


اما الموقف الثاني ماشاء الله عليك اخذت اجر هالشايب


اما الموقف الثالث

مو حركه حلوه ولا شي


وبعدين احنا مانقول بالتعدد شي

لكن بالغالب والواقع ان مايكوون فيه عدل بين الزوجات

الحين الشاب بالمووت يحصل على وحده يجيب ثانيه

والشباب بهالفتره يشتكون من المصاريف والطلبات يروح يتزوج ثانيه....... هنا يختفي كل المصاريف!!!!!

هو متضايق من مصاريف بيت يصرف على بيتين!!!!

والشباب ماخذو من الشرع الا تطويل الشعر وتعدد الزوجات هذا اللي خذوه قدوه من الرسول ( عليه الصلاة والسلام)


اما باقي الاشياء مغمضين عنها












http://www.alraidiah.com/vb/uploaded/mals2.gif

[طليفيح]

مواقف رائعه

وتشبيهك لشويب اروع بابا سنفور وحلاوة التوفي ههههههههههههههههههههههه

تسلم ياعبرود على المواقف الرائعه

[شوق الغلا]

عزيزي عبرود ..

ما شاء الله لك موااقف رائعه ..

وحسن تصرفك معها اروع ..

الموقف الاول ..

بالنسبه لسوااق اليموزين السعودي له هيبه ..

هو يفرض احترامه عليك .. لان كثير يقولون اللى تعطينا ..!!

الموقف الثااني ..

الرجل الكبير بــ العمر .. جزااك الله كُل خير على خدمتك له ..

وجعله فى ميزان حسنااتك ..

الموقف الثالث ..

تعدد الزوجاات .. ما اقول الا اذا فيه خيره لى انه يتزوج ربي يسهل امره ..

لانى اعرف وحده متزوجه من 18 سنه ولا انجبت ..

فتزوج زوجها من ثاانيه والآن لها خمسة اطفال ما شاء الله ..

(( عسى ان تكرهو شياً وهو خيراً لكم ))


يعطيك العافيه يالغلا ..

[طيب في زمن مخيب]

مشكوووووووووووووووووور


على هذه المواقف

والله يعطيك العافية

[قصائد]

في انتظارك <<<<<<<<<<<<<<<<<

[goree]

هههههههههه


ربي يسعد قلبك عبرود


اما التعدد

مانقول فيه شيء

بس اول انتوا اعدلوا بعدين فكروا تعددوا

[عبرود]

قبل أن أبدأ أحب أن أشكر كل عضو وكل قارئ تم مروره على موضوعي المتواضع وإن شاء الله وجدتم فيه الشيء المفيد


بندأ بالحلقة



الحلقة الخامسة والعشرون



طبعاً الحلقة هذي والحلقة القادمة مخصصه عن الأجابة لجميع الرسائل التي أرسلت على إيميلي الخاص من قبل بعض القراء وبعض الأعضاء وفقهم الله وطلبو مني بذكر قصة فكرة الليموزين وقصة شراءه ومحاسن اليموزين ومضار الليموزين وبيني وبينكم في هذه الحلقة يوجد فوائد عظيمه تذكرتها يمكن تستفيدون منها انتم بإذن الله في حياتكم اليومية والمستقبلية

وسوف تكون الاجابه على الرسائل عن طريق جزئين وكل جزء في حلقة

الجزء الأول

أولاً فكرة العمل في الليموزين

طبعاً لا يخفى عليكم بأني جلست عاطل لمدة سنتين من بعد مافصلت من عملي السابق وإن شاء سوف اكتب موضوع عن قصة فصلي من العمل السابق

المهم

جلسنا أنا وأعز أخوياي حمد وهذا حمد ينطبق عليه المثل اللي يقول رب أخٍٍ لم تلده أمك لأني بصراحه اعتبره مثل أخوي أو أكثر برغم أنه اصغر مني بأربع سنوات بس عقله أكبر مني بأربع سنوات ما شاء الله عليه وهو من اهل القصيم من عنيزه وبصراحه عشان اتكلم عنه يبيله موضوع كامل بس ان شاء الله بكتبه في يوم من الأيام

المهم

مثل ماقلت لكم جلسنا انا وخويي حمد في أستراحتنا اللي في الدرعيه بعد الفصله من العمل السابق كنّا كل يوم نجلس نفكر وين نشتغل فيه وبصراحه مافي مكان الا وقدمنا عليه بس الله ما كتب الرزق في الاماكن اللي قدمنا عليها يمكن خيره لنا
المهم
ومره من المرات جلسنا جنب بعض ومتركين على مركه واحده وروسنا متلاصقه ببعض وكل واحد يقول اللي في خاطره وبعد وقت طويل من التفكير وكثرت الخواطر
قال لي حمد: وش رايك ياعبرود نطلع انا وانت لليموزينات ونشتغل عليها
قلت له : والله فكره طيبه بس من وين لنا قيمة الليموزين
قال لي : انت بس اجزم وربك يحلها إن شاء الله
وبعدها بصراحه مسكت معي فكرة الليموزين لين طلعته ولله الحمد وأول شي سويته رحت ادرس في مدرسة دلة لأستخراج رخصة عموميه الخاصة بسواقة الليموزين وبعد ماطلعت الرخصه بدأت أفكر وشلون أشتري الليموزين


ثانياً فكرة شراء الليموزين

طبعاً في البداية جلست افكر من وين اجيب قيمة شراء الليموزين بعدها جتني فكرة تقديم عدت خطابات عن طريق البريد وعن طريق المنتدى الساحات العربية لكل من الملك عبدالله بن عبدالعزيز والأمير عبدالعزيز بن فهد ورسالة للشيخ محمد بن زايد آل انهنيان بطلب شراء سيارة لليموزين وسبحان الله مع هذا ربك ماكتب لي الرزق منهم

لكن تدرون وشلون جتني قيمة فلوس الليموزن ؟

بصراحه عن طريق أشياء لو اقولها لكم يمكن الجاهل فيكم بيقول والله انك من جنبها أو بيقول بدا عبرود يخرّف ويتفلسف وعلى باله انه ناصح او بيسوي نفسه داعيه

المهم

العوامل اللي ساعدتني على شراء الليموزين كما يلي

أولاً : تعرفون الأذكار اللي تتوزع عند ابواب المساجد تنحط في الجيب وفيها مكتوب مثلاً من اراد ان يدخل الجنه يعمل كذا ومن اراد ان يشفع له الرسول يعمل كذا ومن اراد كذا يعمل كذا
بصراحه انا قرأت من ضمن الأذكار نقطه من النقاط المكتوبه في الاذكار وهي
من أراد أن أن يوفق في عمله ويفتح له ابواب الرزق في الدنيا والأخرى فل يصل رحمه

قسماً بالله العظيم ثم قسماً بالله العظيم ثم قسماً بالله العظيم إن زيارة الأقارب وصلة الرحم فيها خير عظيم بس حنًا ماندري عنه وبصراحه هو السبب الرئيسي في الحصول على قيمة الليموزين ً

ونصحيه خذوها من واحد مجرب زورو أقاربكم ولا تقطعونهم وبعدها الله يوفقكم في دنياكم واخرتكم ويقول الرسول صلى الله عليه وسلم ( لا يدخل الجنة قاطع رحم ) والعياذ بالله يعني مهما سويت ومهما فعلت الجنه هذي ما تشوفها إذا انت قاطع صلة رحمك إلا من رحم الله سبحانه وتعالى واللي زعلان من احد أو شايل في خاطره شي فل يبادر بتسامح والمصالحه فوالله ما احد يدري متى بيموت
أسأل الله القدير رب العرش العظيم بأن يلمّ الشمل ويصلح مابين الاقارب والمسلمين إنه سميع مجيب

وثانياً : قيام الليل وكثرة الدعاء في السجود والله العظيم ثم والله العظيم ثم والله العظيم أن رب العباد يفرج هم كل واحد محتاج والدليل عندكم أنا ربك فرجها لي من حيث لا أعلم وبتشوفون القصه وشلون ربك يسر لي فلوس الليموزين

وثالثاً : كثرة الأستغفار وأنا بصراحه كنت ومازلت دايماً أستغفر الله وفي اليوم الواحد استغفر ولله الحمد أكثر من 100 مرة وشوفو ربك كيف فرجها لي ولله الحمد ودايماً إذا جلست بينك وبين نفسك اكثر من الاستغفار 100 مره والله مره سهله وبسيطه بس مشكلتنا حنًا نحب نسولف ونذب على الناس ونتكلم عن فلان وعن علان ونفكر في أشياء تافهه وسبحان الله يقول الله تعالى في سورة نوح (( فقلت أستغفروا ربكم إنه كان غفارا (10) يرسل السماء عليكم مدرارا (11) ويمددكم بأموالٍ وبنين ويجعل لكم جنّتٍ ويجعل لكم أنهارا )) لذا نصيحه اكثرو من الاستغفار وبعدها بتقولون كلام عبرود صحيح


ورابعاً وأخيراً : دعاء والدتي لي ودعوات بعض الناس لي بعدها رب العباد رزقني بالحصول على قيمة الليموزين لذا دايماً خل الناس تدعيلك وخل والدينكم يدعون لكم والله بعدها ربك يفرجها لكم من حيث لا تعلمون


قصة شراء الليموزين

بصراحه جلست أفكر كيف أشتري لليموزين وأنا ماعندي ولا ريال واحد
المهم

وبعد أستخاره وبعد العوامل اللي قلتها لكم في السابق
جتني فكرة برنامج عبداللطيف جميل لشراء الليموزين وبصراحه البرنامج هذا كان معقد بالمررره وقبل ما اروح لعبداللطيف جميل عشان اشوف نظام شراء الليموزين من عندهم كنت أصلي في مسجد الاميرة الجوهره اللي في شارع الخزان صلاة الظهر وأنا في الصلاة جلست أدعي في السجود وأقول يارب فرجها لي ويسر لي أمري وأفتح لي أبواب رزقك
وبعدها قسماً بالله وأنا في الطريق لعبداللطيف جميل كانت خطتي أن ادفع 30 ألف ريال مقدم للشركة عشان يخف علي قيمة القسط وبعدها دقيت على أبوي وقالت له ابيك تسلفني 15 ألف ريال عشان اطلع لي لليموزين بالاقساط وبعدها قال لي أبشر وبعدها دقيت على الانسان اللي بصراحه له الفضل الكبير بعد الله في شراء الليموزين وأبي كل واحد منكم سواءً قراء أو عضو بالدعاء له بالتوفيق وأن يكثر من امثاله

المهم
قلت له يافلان أبيك تسلفني 15 ألف ريال عشان ابي اشتري ليموزين
قال لي : ليش كم قيمته الليموزين
قلت له : والله غالي شوي انا أبي منك تساعدني على 15 ألف وأنا عندي 15 ألف عشان بكملها على بعض ويصير 30 ألف ريال وأدفعها مقدم ويطلع علي القسط رخيص
قال لي : طيب كم قيمته كااش
قلت له : يسوى 73 ألف ريال
قال لي : طيب أنا بطلب منك طلب بس تكفى ما تردني
قلت له : سم أمرني وش بغيت ؟
قال لي : أنا بكمل قيمته الباقيه وأبيك تشتريه كاااش وبعدين انت سددلي على راحتك وإذا ماقدرت فإنت بحلْ يعني مسامحك بالمبلغ

وبعدها قسماً بالله العظيم دمعت عيني من الفرح وحسيت أن كل اللي سويته من دعاء وقيام لليل وزيارة الأقارب وكثرة أستغفار ودعوات والدتي ودعوات الناس لي جابت نتجيه ولله الحمد وبعدها الله فرجها لي ورحت أشتريت الليموزين بسعر الكااش

وأسأل الله القدير بأن ييسر أمري ويعينني على سداد قيمته إنه عزيزٌ قدير

معليش اكمل معكم بعدين باقي الاجابه على جميع الرسائل التي ارسلت لي عن طريق الإيميل



في الحلقة القادمة والجزء الثاني

بتكلم عن رأيي في الليموزين وعن محاسنه ومضاره وفوائده


وللحديث بقية



محبكم في الله وسائق الليموزين / عبرود

[شوق الغلا]

عزيزي عبرود ..

ننتظر ابداعك فى كل مره ..

اياام تكون الصحبه اكثر من الاخ ..

الاذكار الورد اليومي ياله من منفعه وفتح لابواب الخير ..

الله يجزاه كل خير ويفتح له كل باب مقفل بالخير ..

ربي يسعدك بكل لحظات اسعدتنا فيها بحروفك ..

وبكل موعظه اخذناها منك ..

سلمت لنا يالغلا ..

[حنين]

http://www.alraidiah.com/vb/uploaded/mals.gif




ماشاء الله عليك ياعبروود


والله ويفقك دنيا واخره

والله يوفق خويك اللي ساعدك ويجزاه كل خير


ويجعل له من كل امر يسرا ومن كل ضيق مخرجا ومن كل بلاء عافيه وجميع المسلمين امين يارب العالمين



ننتظرك ياعبرود





http://www.alraidiah.com/vb/uploaded/mals2.gif

[goree]

الله يوفقك ويجزاك بالخير يارب


ويعينك يااخوي

ويعافيك عالنصائح :)

[طليفيح]

الله يعطيك العافيه

عبروووووود

تحياتي

[عبرود]

قبل أن أبدأ أحب أشكر كل عضو وكل قارئ تم مروره على موضوعي المتواضع وإن شاء وجدتم فيه الشيء المفيد

نبدأ بالحلقة

الحلقة السادسه والعشرون


الجزء الثاني والأخير للإجابة على الأسألة المرسلة على الإيميل بخصوص العمل على الليموزين



رأي عبرود في العمل على الليموزين



طبعاً العمل على الليموزين يبيله واحد وسيع صدر ويحب الشغله من قلب يكون كلامه لبق مع الزبائن ويعرف الأماكن ويدل الطرق السهله ويعرف كيف يتصرف في المشوار إذا كانه بعيد وكيف يختصرها
وبعدين يبيله شوي خبره كيف انك تمشي في شارع مافيه ليموزين غيرك ولازم تعرف الأماكن اللي فيها ناس تحس انهم ماعندهم سيارات وكيف تتعامل معهم في تقييّم قيمة المشوار
وسبحان الله الرزق اللي كاتبه لك الله بيجيك حتى لو قدامك في الشارع عشرين ليموزين الله بيسخر لك زبون يختارك انت من بين العشرين ليموزين اللي تمشي قدامك

وبصراحه أنا جلست اسولف مع رجال كبير في السنّ يعمل سائق ليموزين وهو من اهل القصيم قال لي نصائح وبيني وبينكم كلام عجبني

قال لي : ياولدي اول شي خاف الله ترا الليموزين فتنه عظيمه
وقال لي : أنت تعتبر واجهة الدوله للأجانب اللي تجي للدولة لازم تكون خلوق معهم ولازم تحببهم في دولتك ولازم تتعامل معهم بطريقه تخليهم يطلبون منك رقم جوالك أو يقولون لك نبيك تجينا بعدين
وبصراحه كلامه هذا صدق انه متعب شوي بس والله العظيم فيه فوائد عظيمه
وبصراحه أنا الحين جالس اطبق كلامه بالحرف الواحد
والله العظيم جالس اسوي أشياء في الليموزين تخلي الزبون إذا ركب معي ينبسط ويستانس وبعدين أول شي لازم تكون بشوش ومبتسم دايماً في وجه الزبون حتى لو انه ثقيل دم أو انه مغرور سو اللي أقوله وبعدها والله إذا وصل أخر المشوار وجا يحاسبك يدفع لك زياده وهذا الشي سبحان الله صار معي أكثر من عدت مرات
وللأسف في بعض سواقين الليموزينات وبالذات السعوديين صارو يشوهون سمعة السائق السعودي بحركاتهم اللي مالها داعي ومن ضمن الأشياء اللي مالها داعي هو الطمع وسوء التعامل مع الزبائن
ومن ضمن الأشياء اللي يسوونها

أولاً : يطلب مبلغ مبالغ فيه للمشوار
مثلاً المشوار قيمته 20 ريال ولكن السعودي الله يصلحه يطلب 30أو40وهذا الشيء يخلي الناس اذا شافتنا حنّا يالسعوديين تتهرب مننا

ثانياً : وقوفهم أمام الأسواق والمراكز التجاريه وهذا الشيء بصراحه يقهرني مرررره لدرجة ان فيه باكستاني سائق لليموزين قال لي انتم ياسعوديين ما تحبون الشغل بس تحبون توقفون عند الاسواق وتركبون الحريم فقط وللأسف هذا الشيء يسيء لسمعتنا أيضاً

ثالثاً : تعاملهم مع الزبون اذا كانه اجنبي جلس ينفخ عليه ويهزء فيه لين يطفش الزبون وبعدها في المستقبل اذا شاف سعودي ما يأشر له ابداً
وبصراحه انا ودي من الدوله تصدر قوانين وتحط رقم في كل لليموزين سواء كان سعودي أو اجنبي يكون خاص للشكاوي وهو اذا سائق الليموزين صدر منه شي ماله داعي يصير من حق الزبون يشتكي على السواق وبعدها الدوله تصدر عقوبه على السائق اما أن تسحب منه التصريح أو تقوم بحجز الليموزين لمدة يوم أو يومين


نظامي انا في العمل على الليموزين

ههههههههههههههههههههههه

والله بقول لكم اشياء يمكن تضحكون منها بس والله العظيم لها فائده عظيمه ويمكن هي اللي موفقتني في الليموزين ولله الحمد


طبعاً أنا مضبط لي وقت أشتغل عليه ونظام إن شاء الله ما أغيره طالما حييت
يقول الرسول صلى الله عليه وسلم
(بورك لأمتي في بوكورها)
وهو يبدأ شغلي من بعد صلاة الفجر مباشرةً إلى الساعه 10 صباحاً وهذي الفتره اكثر الناس تروح فيها للمدرسه او للشغل ومن بعد الساعه عشرة صباحاً إلى قبل صلاة الظهر تكون فترة راحه لي أما ان افطر فيها أو اروح لليبت واخذ لي غفوه لين قبل صلاة الظهر
وبعدها اكمل شغلي من قبل صلاة الظهر إلى الساعه 3 عصراً وبعدها اروح للبيت واجلس مع اهلي شوي وبعدين اصلي العصر وبعدها اخذ لي غفوه إلى الساعه الخامسه والنصف وبعدها أشتغل من بعد الخامسه والنصف إلى أن احصل على المبلغ المطلوب واكثر الأوقات ينتهي شغلي في الساعه 11 مساء ً أو 12 ليلاً

والله العظيم بعدها أطلع بربح ومكسب طيب ولله الحمد

وتبون الصراحه أنا لو ادري أن الليموزين شغلته كذا كان أشتريت لليموزين من زمان من أيام عملي السابق بس الشكوه لله

ومن ظمن نظامي بعد

أحب أنظف السيارة وأغسلها كل يوم جمعه واطيبها وأعطرها وبعض الأوقات احط فيها بخور وسبحان الله كل ما ركب معي زبون قال لي شكلك تشتغل عن محل قزّاز للعطور هههههههههه
واخلي الزبون يركب ويشم ريحه طيبه
وشي طبيعي لازم أنا أكون بعد متطيب ومتعطر عشان الزبون إذا ركب معي وشم ريحتي يستانس وينبسط
وأهم شي تفريش الأسنان ولا تاكل ثوم وبصل عشان الزبون ما يتضايق منك وخل ريحت فمك دايماً نظيفه عشانك دايماً تجلس تسولف مع الزبون

مره من المرات دخلت على عيال عمي وكنت ابي اخذ شي من مجلسهم ولما شمو ريحتي قالو لي ياعبرود والله اللي يشوفك يقول رايح لمناسبه أو لعرس بصراحه ما شاء الله ريحتك تهبل
هههههههههههههه
قلت لهم لا والله رايح اتكْس بعدها قالو لي والله انك مهبول وفسقان

المساكين مايدرون أني أخلي الزبون اللي يركب معي ينبسط ويستانس وبعدها يدفع لي اللي أبي

ومن ضمن نظامي بعد

إذا ركب معي الزبون سواءً كان غني او فقير أو سعودي أو أجنبي مهما كانت جنسيته احب ادلعه في الكلام

فمثلاً السعودي اقول له سم طال عمرك أيه الله يحييك أبشر طال عمرك مهما كان مستواه

والمصري اقول له ايوه ياباشا حاضر ياباشا اوكيه ياباشا أنت تأمر ياباشا

واللبناني اقول له أي بتكرم أنت تامر أمر أي على راسي على عيني

والله بعدها الزبون يرتاح لك ويمكن يزود في قيمة المشوار وفعلاً صارت لي اكثر من مره مثل ماقلت لكم في السابق

ومن ضمن نظامي بعد

مخزن على قنوات الرادو قناة خاصة باللغه العربيه وهي إذاعة القرأن الكريم
وإذاعة باللغة الانجليزيه خاصة بالزباين الأرويين
وإذاعه باللغة الهنديه والباكسانيه عشان الزباين من امثال ابو هنود والباكستانيه

وبصراحه في أشياء أقولها لما اخذ زبون ولما انزله وهي بصراحه هي اللي موفقتني وفاتحت لي باب الرزق تدرون وش هي ؟

لما يركب الزبون وقبل ما أمشي اقول بسم الله الرحمن الرحيم اللهم يسر لي أمري وأعني على مشواري هذا

وإذا نزلته وحاسبني وصك الباب أقول اللهم زد وبارك أللهم زد وبارك اللهم زد وبارك

وبعدها والله ما تمر اكثر من خمس دقايق الا وربك فرجها لي ورزقني بزبون ثاني

وبصراحه هذا النظام لو يطبقه كل سائق لليموزين والله بعدها يتطور الليموزين عندنا يصير مشهور مثل تكاسي لندن السوداء ومثل تكاسي أمريكا الصفراء بس مشكلة ربعنا هنا يحب يكسب فلوس بدون ما يدلع شغله وتشوف الزبون يفكر متى بس يوصل المشوار يفتك من السواق اللي راكب معه ومن أخلاقه وسيارته الخايسه

ومثل ماقلت لكم في بداية الموضوع إن الليموزين هذا اعتبره مثل المعهد أو التأهيل أو جامعه تكسب منها معلومات ثقافيه ودينيه وأجتماعيه وبعض ألامور اللي انت ماعندك خبره فيها من كثر ما تركب الزبائن معك

وتصدقون أنا لي في الليموزين تقريباً 8 شهور فقط والله في خلال هذي الفترة شفت العجب العجاب وشفت الفتن وشفت أشياء لو أقولها لكم يمكن إدارة المنتدى تشطب أسمي من المنتدى بس ما اقول الا الله يبعد عني المعاصي مثل ما باعد بين المشرق والمغرب اللهم آمين

ومن الطرائف في العمل على الليموزين سبحان الله من بعد الساعة العاشرة مساءً تبدأ الوس وسه اللي مالها داعي وهي اني بعض الاوقات اشوف عامود كهرب أو لوحة ارشادية خاصة بالمرور وأتخيلها زبون يأشر لي وبعدها أوقف عنده وبعدين انصدم نفسياً وامشي


وأخيراً

أقول لكم يمكن يوم من الأيام تركبون معي وإذا ركب معي قارء أو عضو من المنتدى والله العظيم ثم والله العظيم المشوار بخليه مجاناً

وبتكون كلمة السر اللي بيننا كلمت عبرود
يعني إذا ركبت مع سواق لليموزين سعودي قل بس كلمت عبرود وإذا سمعتها والله ماني ماخذ منكم ولا ريال وبيكون المشوار ببلاش

هذا أسأل الله القدير رب العرش العظيم بأن يعينني على سداد ديني ويفرج همي ويفتح لي أبواب رزقه من حيث لا أعلم وأن يبعد عني المعاصي مثل ماباعد بين المشرق والغرب إنه سميع مجيب


أخ خ خ خ خ خ وأخيراً خلصت


وللحديث بقية



محبكم في الله وسائق الليموزين / عبرود

[!!" الـ غ ـلآ "!!]

ان شاء الله بركب بـ سيارتـك :D


هذا أسأل الله القدير رب العرش العظيم بأن يعينك على سداد دينك ويفرج همك ويفتح لك أبواب رزقه من حيث لا تعلم وأن يبعد عنك المعاصي مثل ماباعد بين المشرق والغرب إنه سميع مجيب..



بإنتظــارك :101:

[طليفيح]

هههههههههههههههههههههههههههههه

ماشاءلله عليك ياعبرود مشكله ماعندنا ليموزينات بالخفجي

ولا بجيك لرياض واول ماركب بقول عبرود عبرود هههههههههههههه

الله يسعدك يابعد حيي

تحياتي لك

وننتظر الحلقه الجايه

[غـ الكون ـلآ]

هذا أسأل الله القدير رب العرش العظيم بأن يعينك على سداد دينك ويفرج همك ويفتح لك أبواب رزقه من حيث لا تعلم وأن يبعد عنك المعاصي مثل ماباعد بين المشرق والغرب إنه سميع مجيب..





الله الله عليك يا عبرود




قلمك ممتع وقصصك رائعة



بإنتـ’ـظآآآرك يا اخوي
:101:

[عبرود]

الحلقة السابعة والعشرون


قبل ما أبدأ بالمواقفي مع زبائن الليموزين ودي بطلبين بسيطين ومهمين من الدولة وهو
أولاً سعودت الليموزينات لمدة شهر أو شهرين فقط وبعدين يرجعون الوضع طبيعي مثل ما كان عشان يتعود الزبون على سائق الليموزين السعودي
وثانياً تطبيق قوانين صارمه وشديده على سائقين الليموزينات السعوديين اللي يوقفون عند الاسواق ويخلونهم يدورون في الشوراع عشان ما تصير حجه علينا وبعدها يقولون الاجانب بأننا ما نشتغل لانه بصراحه حركت السعوديين ووقوفهم عند الاسواق يسيء لسمعت السائق السعودي


وارجو من أي واحد له علاقة بالدوله بتوصيل طلباتي هذي لهم وان شاء الله بتصير سمعة السائق السعودي في تحسن


نبدأ بالمواقف


الموقف الأول

بصراحه الموقف هذا قهرني

في يوم من الأيام وكانت الساعة الواحدة ليلاً وكنت نازل من فوق كوبري عرقه ومتجه لجهة الشرق على طريق الملك عبدالله وفجأه أشر لي راعي جي أم سي صالون لونه أسود مركب جنوط بالون ومضلل السياره بالكامل طبعاً شكل السياره سيارة مراهقين
هههههههههههههههههه
الله المستعان

المهم

وقف قدامي ونزل الراكب اللي على اليمين وكان شكله من الشباب راعين البدل والبنطلونات وكان شعره ما شاء الله تقول غابة الامازون والله كشّته لو تطيح فيها شراره كان ولعت نار في خلال جزء من الثانيه بسبب كثرة الجلّ الكريمات اللي حاطها في شعره

المهم

قال لي : بكم توصل لحي الشفا ؟
قلت له : بـ 25 ريال
قال لي : طيب لحضه
وبعدها راح للسيارة وفتح الباب اللي في الخلف ونزل منه ثلاث حريم وهم بنتين ومعهم أمهم والظاهر كانو طالعين من عرس أو عزيمة كبيرة

المهم

لما ركبو معي دفع لي الولد قيمة المشوار وقال لي تكفى وصلهم عند شارع المعارض اللي في الشفا وبعدها راح
وهو رايح نادته امه
وقالت له : تعال ياولدي وين رايح ؟
قال لها : بروح وأنا وأخوي مستعجلين مررره
قالت له : وين بتروحون طيب واحد فيكم يركب معنا يجسرنا مع راعي الليموزين
قال لها : ما عليك راعي الليموزين شكله رجال محترم
وهو يتكلم معها قعدت الام تترجاه بأنه يروح معهم وهو الغبي يتعذر منها
ويقول لها : معليش يا يمّه بصراحه حنّا ورانا مخيم بعيد في أخر الثمامه ما يمدينا نوصلكم
وبعدها راح وركب مع اخوه اللي في الجي أم سي
وحنّا في الطريق الام جالسة تقول حسبي الله عليكم عيال مافيكم خير الله لا يحدنا عليكم
وبيني وبينكم انا بغيت من القهر اجر الولد مع شعره وأركبه جنبي عشان يصير محرم لأهله بس أخ خ خ خ خ خ مشكلته غبي مهما اقول له موهب موافق عشانه يفضل المخيم والمسخره عن أهله
أسأل الله له الهدايه وان يغفر له ذنبه



الموقف الثاني

بصراحه الموقف هذا يحزن شوي ويضيق الصدر

مره من المرات من بعد صلاة العصر كنت امشي في شارع الأحساء بحي الملز وأشر لي هذاك الولد الوسيم اللي عمره على ما اعتقد 25سنه وكان من نفس الفصيله اللي تكلمت عنها في الموقف الأول وهي بأنه شعره كشّه ومنتفش بس هذا كان لابس ثوب ونظارات شمسية وكان معه سجادة صلاة مصفطها وماسكها بيده

المهم

لما وقفت عنده ركب على طول بدون أي مقدمات
وقال لي : أبيك توصلني لمقبرة النسيم وتنتظرني خمس دقايق أو عشر دقايق وترجعني للبيت
قلت له : ابشر
طبعاً في الحاله هذي اذا ما اتفقت معه على الحساب لذا يصير الحساب على العداد

المهم

وحنا في الطريق كان الولد ساكت ولا قال ولا كلمه وكان شكله مكتأب ووده يبكي بس النظارات الشمسيه ما خلتني اشوف عيونه زين

المهم

لما وصلنا للمقبره
قال لي : رح أخر المقبره وبعدين لف يسار
ولما لفيت يسار وبعد 50 متر تقريباً
قال لي : خلاص وقف هنا وانتظرني شوي

وبعدها نزل وراح يمشي من بين القبور وكان يعد القبور لين وصل للقبر اللي يبيه وبعدها فرش السجاده قدام القبر وجلس على ركبته والظاهر كان يدعي وبعدها جلس يبكي بصوت مسموع شوي وفيه نياح وانا واقف من بعدين قسماً بالله قلت شكله الحين بيغما عليه
وبيني وبينكم انا ضاق صدري وبغيت ابكي معه بصراحه لو شفتو المنظر كان ما تلوموني لما بغيت اصيح معه

المهم

بعدها قام وصفط السجاده وجا ركب معي
وقال لي : عندك مناديل
قلت له : ايه لحضه
ورحت ونزلت وجبت المناديل من الخلف وبعدين جلس يمسح في دموعه وهو يشاهق على خفيف
وانا خلاص مدري وش اسوي وبعدين طلعنا من المقبره وشغلت اذاعة القرأن ابي اغير الجو اللي حنّا فيه
وبعدها قصر على صوت الرادو
وقال لي : معليش ياشيخ لا يكون اخرتك
قلت له : لا عادي انا تحت أمرك
بعدين قلت له : تسمح لي بسؤال خاص شوي ؟
قال لي : تفضل
قلت له : من اللي في القبر
قال لي : هذا أبوي
قلت له : أسأل الله بأن يرحمه وأن يجمعك معه في جنات النعيم
بعدها سكت لمده خمس دقايق
وقال لي : ابوك عايش
قلت له : ايه ولله الحمد
قال لي : كيف علاقتك مع ابوك ؟
قلت له : والله طيبه وعلاقتي معه كأننا اخوان بس يقهرني في حركه ودي انه يبطلها
قال لي : وش هي ؟
قلت له : دايم يدخل علي الغرفه ويطفي المكيف وأنا في عز نومي
بعدها جلس يضحك على خفيف وعيونه فيها شوي دموع
قال لي : طيب تجلسون مع بعض وتسولفون
قلت له : بصراحه من بعد ماطلعت الليموزين صرت ما شوفه الا وقت المغرب قبل ما اطلع من البيت لمدة عشر دقايق اما بوم الجمعه نجتمع على الغدا ونجلس نسولف نمزح مع بعض مع اخواني
قال لي : ياحضك
وبعدها سكت شوي
وبعدين
قال لي : بصراحه انا أبوي من بعد ما دخلت الثانويه صرت ما اشوفه ولا احب اجلس معه وكنت اتهرب من الجلسه معه
قلت له : ليش ؟
قال لي : بصراحه مدري احس اني خايف منه
قلت له : ليش ابوك كان شديد
قال لي : لا والله بس ما كان يهتم فيني ولا انا اهتم فيه
قلت له : شف بخصوص يهتم فيك أو ما يهتم فيك هذا بينه وبين نفسه بس انت لازم تهتم فيه وتجلس معه اذا شفته جالس حتى لو ماتبيه بموضوع بس اهم شي خله يشوفك وتشوفه ولو لمدة خمس دقايق
وانا اكلمه بعدها جلس يبكي ويشاهق
وانا بعدها ضاق صدري
وهو يبكي
قال : ودي انه يطلع من قبره واجلس معه واسولف معه واخليه يضربني ويسوي فيني اللي يبي بس اهم شي يكون راضي عني

وانا بيني وبينكم بعدها قسماً بغيت انزل السياره من ضيقة الصدر لما قال لي الكلام هذا وبغت عيني تدمع
وبعدين
قلت له : شف زيارتك لقبر أبوك تراه يدري عنك انك تزوره ويدري عنك انك تحبه واهم شي دايماً ادع له وتصدق عنه وشف وش كان يحب سوي وسو مثله بس شرط يكون اللي يسويه شي فيه خير للناس
وبعدها ربك يفرج همك في ابوك وان شاء الله يجمعكم مع بعض في جنات النعيم
وبعدها وصلنا لبيته ما شاء الله تبارك الله البيت موقعه خلف اسواق التميمي وكان عباره عن فله فخمه مررره ولما جا يحاسبني كان العداد مكتوب فيه 75 ريال قام هو وطلع لي 100 ريال وانا رجعت له 50 ريال
قال لي : ليش ما خذيت حسابك كامل
قتل له : خلاص تكفي 50 ريال
بعدها قال لي : الله يجزاك خير عطني رقمك يمكن ابيك في مشاوير ثانيه

المهم

عطيته رقمي ومشيت من عنده وبصراحه حسيت انه من جد فاقد ابوه
لذى نصيحه يا أخوان اللي ابوه عايش إلى الأن حاول انك ما تزعله في شي ولا تضيق صدر وحط لك وقت خاص بالجلسه معه ولو عشر دقايق بس اهم شي لا يمر يوم الا وانت معه وشف وش عنده من علوم وخله يشوف وش عندك من علوم يمكن ربك يحل امورك معه

أسأل الله القدير رب العرش العظيم بأن يحفظ أبنائنا وان يجمعنا معهم في جنات النعيم
إنه سميع مجيب


وأخيراً خلصت
في الحلقه القادمه بقولكم عن موقفي مع الزبون الملكي وهو من آل سعود


وللحديث بقية



محبكم في الله وسائق الليموزين / عبرود

[شوق الغلا]

عزيزي عبرود ..

الله يكفينا شر الشباب والتهرب من العائلة لغرض سعة صدرهم على حساب الاهل ..

الحمد لله انك سعودى بتخاف عليهم اكثر من الاجنبي ..

الموقف الثااني من جد يحزن ..

فقدان احد الوالدين ليس بالسهل ابد ..

لانى فاقده الوالد حسيت بمرارة الالم ..

سلمت لنا يالغلا ..

[طليفيح]

الله يجزاك خير ياعبرود

والله الولد فاقد شي كبير وماحس فيه الا يوم راح

اما الاول ابو كشه ودك تولع فيهاااااااااا ههههههههههه

تسلم ياعبرود وننتظر الحلقه الجايه

[حنين]

http://www.alraidiah.com/vb/uploaded/mals.gif




عسى الله ان يفرج همك ويفك دينك ياعبروود

وان يسهل اموورك ويرزقك بالذريه الصالحه




الموقف الاول والثاني كلها محزنه بصراحه


يترك اهله ويروح ولاهمه هالشي






http://www.alraidiah.com/vb/uploaded/mals2.gif

[ابو البراء]

شكرا لك القصة حلوه مرة


شكرا ................. اخي عبرود

[عبرود]

قبل أن أبدأ أحب أن اشكر كل عضو وكل قارء تم مروره على موضوعي المتواضع وإن شاء الله وجدتم فيه الشيء المفيد




الحلقة الثامنة والعشرون


الموقف الأول

أسأل الله بأن يشفي صاحب هذا الموقف

يوم من الأيام وكان يوم الأثنين وكنت أمشي من عند مسجد الراجحي اللي في حي الربوه واللي بالقرب من نفق الربوه وكان باقي على صلاة الظهر خمس دقائق

المهم

ولما مريت من عند المسجد شفت لي هذاك الرجال اللي عمره على ما اعتقد 50 سنة وكان لابس جلابية لونها أسود وكان جالس على الرصيف ولما مريت من عنده أشر لي
وقال لي : مساء الخير
قلت له : مساء النور
قال لي : ابيك توصلني عند مخرج 18 هناك في كازينو أبي أروح له تكفى
قلت له : ابشر
قال لي : بكم ؟
قلت له : بـ 15 ريال
بعدها ركب وكان معه كيس فصفص وجالس يقشّم (ياكل) في السياره ويتفل الله يكرمكم على الارض
وأنا اطالع فيه وفيني الصيّحه وودي أبكي من القهر لاني بصراحه ما احب اشوف سيارتي وسخ ودايماً انظفها في الاسبوع مرتين

المهم

وحنّا في الطريق
قلت له : وش عندك ياخالي في الكازينو
قال لي : بروح اشرب لي شيشه
قلت له : طيب الشيشه هذي ما تتعبك
قال لي : وش اسوي ما عندي شي اشغل نفسي فيه ألا هي
قلت له : كم راس تشرب في اليوم ؟
قال لي : 7 أو 6 روس
قلت له : اف ف ف ف ف الله يعينك بصراحه كثير طيب ما فكرت تتركه
قال لي : ما فكرت ولاني مفكر
وبعدها سكت وجلست ادعي ليه في قلبي
وحنّا فالطريق وفجأه

قال لي : ياخي عندي رقم خادم الحرمين المباشر وأدق عليه لي ساعتين ولا رد علي

وبعدها أنا جلست اطالع فيه وفيني شوي ضحكه وشوي خوف
هههههههههههههههههههههههه
وقلت في خاطري : اف ف ف ف ف هذا نظامك تتصل على خادم الحرمين

وبعدين
قلت له : وش تبي تقول له ؟
قال لي : ياخي ابي اقول له عن أشياء ابيه ينزلها في قراراة مجلس الوزراء حق اليوم
قلت له : طيب ليش ما ترسل له خطاب أحسن
قال لي : يارجال الخطابات ما توصل له لانه عنده ناس فيهم حسد ولا يوصلون له شيء
قلت له : طيب الرقم حقه من وين جبته
قال لي : انا ماخذه منه من زمان وقال لي إي شي تبيه دق علي ولا يردك ألا لسانك
وبعدين سكت شوي
ولما مريت من عند جماع الراجحي اللي عند مخرج 15
قال لي : شفت المسجد هذا تراه حق اخوي الكبير
قلت له : ما شاء الله تبارك الله وانت من وين ياخالي
قال لي : أنا من البكيريه
قلت له : والنعم والله
وبعدها سكت وكنت خايف شوي منه
وبعدين كرر كلامه لي
وقال لي : ياخي ليش ما يرد علي خادم الحرمين ؟
قلت له : يمكن ماخذ له غفوه اتصل عليه بعد العصر أو بعد المغرب تلقاه صاحي
قال لي : مابيه بعد المغرب أبيه الحين عشان الاجتماع حق مجلس الوزراء بعد الظهر
وبعدها اطالع فيه وفيني شوي ضحكه وشوي خوف وقلت في خاطري شكله اليوم مو معدي على خير
ولما وصلت عند الكازينو
قال لي : كم حقك ؟
قلت له : 15 ريال
بعدها عطاني 50 ريال ونزل وصك الباب وانا نزلت ولحقته
وقلت له : خذ ياخالي هذا الباقي حقك انا قلت لك ابي 15 ريال بس
بعدها خذ الباقي ومشى وبدون ما يقول لي شكراً او مع السلامه
وبعدها عرفت انه الرجال مسكين عنده خلل في مخه أو انفصام في الشخصيه

أسأل الله بأن يشفيه ويبعد عنه كل مكروه إنه سميع مجيب


الموقف الثاني

طبعاً هذا الموقف اعتبره موقف ملكي ولن يتكرر

يوم من الأيام أتصل علي ولد عمي
وقال لي : عبرود وينك فيه ؟
قلت له : جالس ادور في الشوارع وأترزّق
قال لي : طيب متى تخلص ؟
قلت له : إذا حصلت يوميتي خلصت وش عندك وش تبي ؟
قال لي : لا خلاص بعدين اكلمك
وبعدها دق علي بعد خمس دقائق من المكالمه الأولى
قال لي : انت قريب ولا بعيد
قتل له : يعني مو بعيد مرره
قال لي : تعال في زبون يبيك توصله
قلت له : من جدك انت ولا تستهبل
قال لي : والله اتكلم جد تعال
وبعدها رحت لبيتهم ووقفت عند الباب حق بيتهم وفجأه
طلع لي من باب البيت صاحب سمو ملكي ما اقدر اقول اسمه لان اسم جده لوقلته في موضوعي هذا بيسبب الغاء لمعرفي ويمكن يسبب حذف للموضوع لانه بصراحه جده مرعب بالمررره

المهم

طبعاً ولد عمي يشتغل مرافق مع الامير هذا ويعز عليه بالمررره وكان الامير معزوم عند ولد عمي في بيته وهم جالسين مع بعض سأل عني الأمير
وقال: وين عبرود من زمان ماشفناه ؟
قال له : والله عبرود اشترا له لليموزين وجالس يشتغل عليه الحين ولا نشوفه غير يوم الجمعه
قال الامير: طيب اتصل عليه وخلنا نتمشا معه شوي

المهم

لما وصلت عندهم وطلع لي الامير تفاجأت ونزلت وسلمت عليه وبصراحه اخر مره شفت فيها هذا الامير كان صغير في السن وكان طوله على ما اعتقد متر و30سم بس الحين ما شاء الله تبارك الله صار اطول مني بكثير بصراحه مدري وش ياكلون هذولي الامراء
الله يعطيهم الصحه والعافيه

المهم

قال لي الامير : هذا الليموزين لك ما شاءالله ؟
قلت له : ايه طال عمرك
قال لي : طيب واللي يبي يروح مشوار بكم توصله
قلت له : طال عمرك على حسب مسافة المشوار
قال لي : طيب نبيك تمشينا في شوارع الرياض ونبي نتعشا في مطعم على ذوقك
بعدها انا انحرجت
وقلت له : ابشر طال عمرك بس يبيلي اغير ملابسي
طبعاً انا اذا اشتغلت على الليموزين البس ثياب إمارتيه أو جلابيه مغربي وبدون شماغ او طاقيه

بعدها قال لي الامير : وش فيها ملابسك ؟
قلت له : بصراحه أحس انها تفشل وبعدين لازم البس شماغ
وبعدها فسخ الامير شماغه وحطه في سيارته
وقال لي : اقول اركب بس وهذا الشماغ وفسخناه عشانك يلا اربك لا تأخرنا

طبعاً الامير هذا من سكان مدينة جده بس كان عنده زياره لمدينة الرياض

المهم

وحنّا في الطريق
قال لي : ها وش بتعشينا ياعبرود
قلت له : طال عمرك اللي تبي بس انت حدد لي المطعم اللي تبيه وابشر بعزك
قال لي : انت وش رأيك
قلت له : طيب انت وش تبي رز ولا سندوشتات ولا تبي مشاوي
قال لي : بصراحه انا اليوم ما تغديت وميت من الجوع وشف لنا شي فيه دسم
قلت له : وش رايك في مطعم هندي عندهم رز وإيدامات حلوه
قال لي : خلاص رح له
بعدها رحنا لمطعم هندي في شارع التحليه بالقرب من مطعم الريف اللبناني وتعشينا فيه وطلعنا منه وبعدها رحنا لكوفي شوب وخذينا لنا شاهي اخضر عشان نهضم وبعدين
قلت له : ها طال عمرك وين تبي نروح ؟
قال لي : ابيك تمشينا في الرياض وتورينا معالم الرياض
بعدها جلسنا ندور في حي الديره وفي بعض حواري الرياض
وبعدين رجعنا للبيت عشان واصله عند سيارته ولما نزل
عطاني قيمة المشواره وهو اجر حق يومين
بعدها جلست اتشكر منه
وقال لي : انا بروح لجده بكرا وبعدين برجع بعد كم اسبوع ولازم ناخذ لنا جوله ثانيه بالليموزين
قلت له : الليموزين وراعي الليموزين تحت أمرك متى ما بغيتني دق علي طال عمرك
وبعدها رحت للبيت وأنا في الطريق جلست اهوجس بيني وبين نفسي واقول
معقوله فيه أمراء عندهم تواضع لدرجه هذي

أسأل الله القدير رب العرش العظيم بأن يحفظ لنا ولاة أمورنا وأن يرزقهم البطانه الصالحه إنه سميع مجيب

الموقف الثالث أقوله لكم في الحلقة القادمه لاني بصراحه دخت

قبل الختام

اليوم جمعة لا تفوتكم قرائة سورة الكهف وهي من بعد شروق شمس يوم الجمعه إلى قبل غروبها


وللحديث بقية


محبكم في الله وسائق الليموزين / عبرود

[طليفيح]

أما سالفت الاول هههههههههههههههههههه

عطاكياها

الله يشفيه

والله ماشاءلله عليه متواضع الامير

تسلم ياعبرود وننتظر الحلقة الجايه

[شوق الغلا]

عزيزي ..

يعطيك العافية ع الموااقف الرئعه ..

الموقف الاول ..

ربي يشفيه بالعافيه ..

ويعطيه حريمة الشيشه ..


الموقف الثااني ..

حلو التوااضع ..

من تواضع لله رفعه ..

حلو التوااضع في كل شئ ..

الموقف الثالث ..

ننتظره بكل شوق ..


سلمت لنا يالغلا ..

[لأجل اشتياقي]

تسلم والله
استمتعنا بالقراءه

يعني كل راعي ليموزين تصير له مواقف مثل كذا

احسه خطيره
بس يمكن ا تصير بحياتنا ونشوفها عاديه
بس اسلوبك حلى الموقف وزينه :)


كل الشكر خيو

[حنين]

http://www.alraidiah.com/vb/uploaded/mals.gif



ماشاء الله عليك ياعبرود


لو واحد ثاني كان اخذ الفلوس ومشى



ياكثر الامراء المتواضعين بس الناس تحكم بالشكل



ننتظر مواقفك







http://www.alraidiah.com/vb/uploaded/mals2.gif

[مجرمـ الخفجي]

عبروود نيته طيبه,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,


.........

[أبو دبيان]

والله انك رجال وكفو يالشمري لو واحد غيرك الله يعلم وش يسوي بس لا تطول انتظر الباقي

[بنت حايل]

ماشاء الله عليك ياعبرود ..

<<متابعه بصمت

[عبرود]

قبل أن أبدأ أحب أشكر كل عضو وكل قارئ تم مروره على موضوعي المتواضع وإن شاء الله وجدتم فيه الشيء المفيد

وأيضاً أحب أرد على بعض الرسائل اللي ارسلت لي عن طريق الإيميل بخصوص الحلقه رقم 28
الرسالة الأولى : واحد يقول لي مافي أمير على وجه الارض يركب ليموزين الا إذا كانه مجنون
الأخ صاحب الرساله الأولى : احب اعطيك معلومه يمكن انت تجهلها وهي ان الأمراء والملوك في الكرة الأرضية عباره عن بشر وياكلون مثل ما ناكل ويتكاثرون مثل ما نتكاثر ويتنفسون بنفس الهواء اللي نتنفسه وفيهم الفقير وفيهم الغني وفيهم الطيب وفيهم الخبيث وفيهم المتواضع وفيهم المغرور وجميع الصفات التي ذكرت موجوده في جميع سكان الكرة الأرضية لذى لا تستغرب بأن الأمير يركب لليموزين وإذا منت مصدق فأجل انت رجل انطوائي عن العالم وأسأل الله بأن يفتح قلبك ويفتح عقلك للعالم

الرسالة الثانية : واحد يقول لي لو معك سياره لكزس لونها ابيض هل تحولها إلى لليموزين ؟
الاخ صاحب الرسالة الثانية : بصراحه إذا ماعندي سياره ثانيه مجبور ان احولها إلى لليموزين حتى ان يفرجها الله بوظيفه رسمية


نبدأ بالحلقة


الحلقة التاسعة والعشرون

الموقف الأول

كنت ماشي في طريق الملك عبدالله وبالقرب من بنك الراجحي فرع حي الحمراء وأشر لي شاب عمره على ما اعتقد في العشرين وبعدها
قال لي : ابيك توصلني مكتب خاص بشركة الاتصالات وبعدين توصلني لبيتنا في حي النسيم
قلت له : ابشر
قال لي : بكم ؟
قلت له : كل المشوارين بـ 30ريال
بعدها
قال لي : لحضه بجيب جدي يركب معنا شفه جالس على الرصيف
وبعدها جاء جده وكان عمره على ما اعتقد 90 سنه وكانت الشيخوخه مأثره على عقله وصحته وبعدها ركب الشايب جنبي قدام ولا قال ولا كلمه فقط ركب بدون ما يسلم او يتكلم كلمه واحده وركب الولد في الخلف
وحنّا في الطريق
قال لي الولد : بصراحه انا ماخذ جدي معي عشان بحوّل الجوال حقه بأسمي

المهم

لما وصلنا عند مكتب الاشتراكات الخاص بشركة الاتصالات نزل الولد
وقال لي : تكفى انتبه لجدي لا يروح منك
ههههههههههههههههههههههههههههههههههههههه
بعدها انا جلست اطالع في الشايب
وقول في خاطري : تخيل ينحاش مني وش بتسوي ياعبرود
هههههههههههههههههه
والله مشكلة

المهم

وحنّا ننتظر الولد في السياره فجأة جلس الشايب يناظر فيني
وقال لي : من انت ؟
ههههههههههههههههههههههههههههه
قلت له : انا ياخالي سواق لليموزين ابوصلك انت وولد ولدك
قال لي : هااااااااااااااا
قلت له بصوت عالي : ياخـــــــــالــــــــــي انــــــا ســــــــــــواق ليمــــــــــــــمــــــــزين بوصلك انـــــت وولد ولدك

وفجأه مر من جنبنا جي ام سي كان صوته مرررره عالي ومزعج وبعدها انفجع الشايب
وقال لي : طارد ومطرود
كان يقصد على جي ام سي اللي كان مسرع
وبعدين كررها مره ثانيه
وقال لي : طارد ومطرود ، طارد ومطرود ، طارد ومطرود
وانا اطالع فيه
وقول له : صدقت ياعم من جد طارد ومطرود
وبعدها
قال لي : من انت ؟
قلت في خاطري : لا حووووول والله البلشه
قلت له : انا ســــــواق لليموزين بوصلكم بيتكم بعد شوي
طبعاً اقولها له بصوت عالي واللي يشوفني وانا اكلمه يرحمني لاني بصراحه تعبت معه
وبعدين رفع علي العصاة وجلس يخبط فيني بالعصاة
ههههههههههههههههههههههههههه
وانا امسكها منه
وقول له : خلاص ياعم اركد الله يصلحك
وهو يبي يضربني بدون سبب
بصراحه ما ألولهم عقله موهب معه بيني وبينكم والله انه ينرّحم

المهم

شافنا الولد من بعيد وجا يركض وهو يضحك
وقال لي : معليش يالشيخ ترا الشايب مخرف شوي
قلت له : ما يخالف انا عادي بس خذ منه العصا تراه ذبحني فيها
هههههههههههههههههههههههههههههههه
بعدها جاء موظف الاتصالات ومعه ملف وفيه اوراق لازم يوقعها الشايب بخصوص التنازل عن رقم الجوال وهنا بدأت المشكله
الموظف يبي من الشايب أن يوقع أو يختم والشايب
جالس يقول له : طارد ومطرود
المسكين علق على الكلمه هذي
وراح يومنا كله في طارد ومطرود
بعدها
قلت للموظف : ياخي انا ابصم بداله الرجال مخرف
قال لي الموظف : لا ممنوع لازم هو اللي يبصم
قلت له : وشلون يبصم وهو مخرف شف لنا طريقه ثانيه

المهم


المشكله والقهر بعد ما ختم الشياب جلس يبصم على الطبلون حق السياره وأنا اناظر فيه ودموعي تبي تطلع من عيوني
وقول في خاطري : بس ياخالي بس بس تكفى بس
وهو جالس يبصم
اخ خ خ خ خ بس
بعد ما وصلته وقفت عند برادة مسجد وجلست اغسل الطبلون من الحبر حق البصمه

بس تصدقون لما كنّا ننتظر ولد الشايب عند شركة الاتصالات جلست اطالع في يد الشايب وشوف التشققات اللي في يده وشوف التجعدات اللي في وجهه وتخيلته قبل 60 سنه كيف كان شكله حسيت انه كان وسيم وبصحه طيبه وجلست اتخيل يده كم مره سلم بيده وصافح الناس وش مسك في السنين اللي مضت وبصراحه حسيت انه كان عايش في نعيم وسعت صدر ووناسه ما مرت على اجيالنا

أسأل الله بأن يحسن خاتمته وأن يجمعنا معه في جنات النعيم



الموقف الثاني

يوم من الأيام كانت الساعة 11 ونصف قبل منتصف الليل وكنت بالقرب من سوق الخضار والفواكه بحي الربوه وفجأه شفت لي ولد طوله على ما اعتقد متر او اقل وكان لابس طاقيه ومعاه اخوه اكبر منه وكان اخوه جالس على الرصيف وماسك جوال وجلس يبحث في الجوال

المهم

أشر لي الولد الصغير
وقال لي : ابك انا طفشااان وأبي اتمشا ودور شوي في الشوارع تكفى مشني بعشرة ريال
قلت له : ابشر بس وين تبي نروح ؟
قال لي : أي مكان بس لايكون بعيد عن الحاره هذي
قلت له : اركب وابشر بسعدك
بعدها ركب
وقال ميد أخوه : ها بتروح معنا ولا لا ؟
قال اخوه : لا بنتظرك هنا
بعدها جلست ادور فيه بحي الربوه وحي الريان وحي الروابي إلى أن وصلنا لمقبرة النسيم وجلست اعلمه بأسماء الاحياء وأسماء الشوراع
بس تدرون وش المشكله ؟
ههههههههههههههههههههههههههههههه
انه جالس على الكرسي ولا يقدر يشوف شي الا إذا رفع نفسه عشانه مرره قصير
هههههههههههههههههههههههههههههههه
وبعدين
قلت له : من وين انت ؟
قال لي : انا من الحويه في الطايف
قلت له : ونعم والله اجل انت عتيبي صح ؟
قال لي : انا عصيمي
قلت له : ونعم فيك انا اعز واحد من اخوياي يصير عصيمي ومن الحويه بعد
بعدها جلس يطالع فيني
وقال لي : تدري لو انت عندنا في الحويه وش نسوي فيك ؟
قلت له : وش تسوون ؟
قال لي : بصراحه نرجمك بالحجاره
قلت له : ليش ؟
قال لي : بصراحه أي ليموزين أو دورية شرطه لازم نرجمها بالحجاره
هههههههههههههههههههههه
قلت له : طيب ليش كل هذا مو حرام عليكم
قال لي : ياخي وش نسوي بصراحه نكون طفشانين وزهقانين ونبي شي يونسنا ولا نلقا غير الليموزينات والدوريات نرميها من بعيد
هههههههههههههههههههههههههههه
بعدها
قال لي : ياخي الرياض طفش وزهق بذمتك وشلون عايشين هنا ؟
قلت له : فيه اماكن حلوه في الرياض بس المشكله يبيلها جيب وبعدين انت طالع لي في اخر الليل لو انت وقت العصر كان مشيتك اماكن حلوه بس وقتك غبي شوي
قال لي : ياخي وانا في الحويه في الطايف اتمشا عند بيتنا اما هنا كل المكان عمارات وبيوت شوارع وسيارات زحمه قسماً بالله مدري وشلون عايشين
قلت له : اهااااا عشان كذا انت متضايق ما ألومك الحويه كلها بر وسعة صدر وانت جالس عند بيتكم والظاهر بيتكم في خلاء صح
قال لي : ايه والله واحسن شي اذا جانا مطر قسماً بالله تحس بوناسه غير طبيعيه
بعدها
قال لي : ابك ابك ابك رجعنا خلاص شكلي تأخرت على الاهل
بعدها وصلته وعطاني عشره ريال
وقبل ما ينزل
قلت له : انت صف كم ؟
قال لي : انا صف أولى متوسط ليش السؤال ؟
قلت له : لا بس كذا ودي اعرف مستواك الدراسي وش هو
بعدها نزل عند اخوه
وهو نازل جلس يسولف لاخوه
ويقول له : ابك راعي الليموزين هذا رهيب بصراحه مشاني وونسني
هههههههههههههههههههه

بيني وبينكم مع ان الولد عمره صغير في السن الا ان اسلوبه في السواليف تقول رجال كبير ما شا ءالله عليه مو مثل عيالنا اذا جلس يسولف معك يرفع الضغط

بصراحه التربيه تلعب دور

أسأل الله بأن يوفقه ويهديه إلى طريق الخير إنه سميع مجيب


بس قبل ما ختم الحلقه

بصراحه في إمرأه ارسلت لي رساله عن طريق الإيميل وأسمها أم نواف وتطلب من كل عضو وكل قارئ بأن يدعون لها بأن يفرج همّها ويصلح ما بينها وبين زوجها

لذا

أسأل الله بأن يفرج هم كل مسلم ومسلهم وأن يصلح ما بين كل زوج وزوجه إنه سميع مجيب


وللحديث بقية


محبكم في الله وسائق الليموزين / عبرود

[عشق الشمال]

الله يفرج هم أم نوااااف

ويصلح بينها وبين زوجها عاااجلآ غير آجل ..

قال لي : ياخي وانا في الحويه في الطايف اتمشا عند بيتنا اما هنا كل المكان عمارات وبيوت شوارع وسيارات زحمه قسماً بالله مدري وشلون عايشين

والله مااااينلااااام ياااعبروووود

ياااااشيخ الرياااااض تضيق الصدر وتدبل التسبد !!

يعطيك ألف عاااافية ياااابعدي ،،

[حنين]

http://www.alraidiah.com/vb/uploaded/mals.gif





هههههههههههههههههههههههههههههههههههههههههه



ودي اني شايفه شكلك وهو يضربك

احسك منقهر ولا تقدر تسوي شي


الله يقوي الشايب ويحسن خاتمته



اما الموقف الثاني رهيب

بالنسبه للرياض ما يطفش فيها الا زحمتها



الله يفرج هم ام نواف


ويصلح بينها وبين زوجها






http://www.alraidiah.com/vb/uploaded/mals2.gif

[لأجل اشتياقي]

الله يفرج هم أم نوااااف

ويصلح بينها وبين زوجها عاااجلآ غير آجل ..


بصراحه يوم تقول متعوب ع تربيته
عموما
كل عيال القبايل منها عتيبه و شمر عنزه وووووووو...وماعلى الباقيين قصوور
كل اولادهم كذا
الولد برابع ابتدائي واسلوبه وتصرفاته اكبر منه
ماشاء الله يتكل عليه
بس من عيبهم
المره مايسلمون عليهاهههههه<<<تعاني احيانا

كل الشكر اخوي

اختكـ

[شوق الغلا]

عزيزي عبرود ..

الموقف الاول ..

ايام نشوف الاشخاص الكبار بالعمر نتخيل نفسنا اذا وصلنا لذي المرحله ..

الله يمتعه بالصحه والعافيه ..

ويختم له بالرحمه والمغفره..

الموقف الثااني ..

الرياض حلوه للى عايش فيها كثير ..

لكن من زحمتها تكره تتمشى فيها ..


أم نواف ..

أسأل الله بأن يفرج هم كل مسلم ومسلهم وأن يصلح ما بين كل زوج وزوجه إنه سميع مجيب


دمت لنا يالغلا ..

[برق السحاب]

الله يعطيك العافية

[عبرود]

قبل أن ابدأ أحب أن أشكر كل عضو وكل قارء تم مروره على موضوعي المتواضع وإن شاء الله وجدتم فيه الشيء المفيد

نبدأ بالحلقة




الحلقة الثلاثون والأخيرة


الموقف الأول

يقول الرسول صلى الله عليه وسلم
(لعن الله الراشي والمرتشي والرائش الذي يمشي بينهما)

مره من المرات كنت امشي في حي السلام وبالقرب من مركز الدفاع المدني وفجأة أشوف رجال سعودي باين من لبسه أنه رجل برستيج وشبعان

المهم

كان يتناقش مع راعي لليموزين بخصوص سعر المشوار
وبعدين رفض ان يركب معه وبعدها جيت انا ووقفت قدامه
وقال لي : بكم توصلني لمستشفى العسكري ؟
قلت له : بـ 20 ريال
قال لي : والله ابرك من اللي قبلك
قلت له : ليش كم طلب منك ؟
قال لي : طلب مني 25 ريال ومع هذا سيارته ريحتها شينه أما انت لو تطلب 25 بوافق على طول عشان ريحت سيارتك تجذب ما شاء الله عليك


وبعدها ركب وبدأ النقاش بيننا في الطريق وكان بداية نقاشنا عن زحمة الرياض وعن شغل الليموزين وعن النظام سير المرور في المملكه العربيه السعودية
وقال لي : والله لو كل واحد فينا طبق أنظمة المرور بحذافيرها كان ما شفت الزحمه هذي
قلت له : والله انك صادق لانه بصراحه في دبي والبحرين تشوف الزحمه اكثر من عندنا بس تمشي تنتهي بسرعه لانهم يطبقون النظام على أصوله

المهم

وحنا في الزحمه جلسنا نسولف عن بعض الفساد الأداري اللي يصير في بعض الوزاراة وطعباً بقول لكم سالفه وحده ومختصره من ضمن السواليف اللي قالها لي

قال لي : يارجال عندك بعض الجهات الحكومية رايحه فيها من فوق لتحت
قلت له : وشلون ؟
قال لي : انا قبل اربع سنوات اجريت عملية زراعة كلية في الفلبين وعلى حسابي الخاص وانا في المستشفى جاني موظف من السفارة السعودية
وقال لي : كم خسرت على نفسك من أول ما وصلت للفلبين إلى اليوم
قلت له : بصراحه كلفتني الرحله من إلى بـ 280 ألف ريال
قال لي : طيب اكتب خطاب للدولة بتعوض المصاريف اللي دفعتها يمكن يكتب الله رزق منهم لانه المفروض الدولة تعالجك على حسابها الخاص
قلت له : طيب وش الإجراءات
قال لي : اكتب خطاب وأرفق معه صور من التقارير الطبية وصور من الفواتير المستشفى والسكن اللي انت ساكن فيه وصورة أثباتك أو صورة جواز السفر حقك وعطنيها وحنا من عندنا بنرسلها لوزارة الصحة
وأنت بعدها راجع الوزارة في السعودية وشف وش يصير معك
بعدها
لما رجعت للرياض جلست ثلاث شهور وبعدين راجعت الوزارة اللي فرعها بالقرب من سوق السمك اللي في حي المربع

وقلت لهم : ودي اشوف وش صار على معاملتي الخاصة بالتعويض
قال لي الموظف : يبي لها ثلاث شهور عشان تخلص
قلت له : يصير خير
وبعد ثلاث شهور راجعتهم وسألت عنها وبعدها
قال لي الموظف : بصراحه المعاملة ضاعت
قلت له : وشلون تضيع ياخي مايصير وش الأهمال هذا
بعدها
قال لي : عطني جوالك وإن شاء الله بحاول احصلها لك
ولما طلعت من عنده أتصل علي نفس الموظف اللي أخذ جوالي
وقال لي : بصراحة يالشيخ المعاملة موجودة عند بعض الموظفين وهي واقفه عليهم وعشان تمشي المعاملة لازم يبيلها شوي دعم
قلت له : وش تقصد بالدعم ؟
قال لي : بصراحه وعلى بلاطه يبيلها اقل شي 10ألاف دولار عشان نوزعها على بعضنا وبعدها تتحول للماليه عشان تاخذ فلوسك وأعتقد 10الاف دولار بنسبه لك مبلغ بسيط وانت بتاخذ شيك بـ 280 ألف ريال

بعدها فكرة الموضوع

وقلت له : خلاص مو مشكله بس متى تبي اعطيك الفلوس
قال لي : انا اتصل عليك ونتفق على الموعد

وبعدها اتصل علي

وقال لي : بجي لبيتك عشان ناخذ منك المبلغ
قلت له : خلاص أوكيه
بعدها جاني ومعه ورقه مكتوب أني انا تسلفت من المذكور مبلغ وقدره عشرة الاف دولار وها أنا اسدد الملبغ المستحق
وبعدين وقعت على الورقه وعطيته الملبغ وبعد اسبوع صدر الشيك من وزارة الماليه
بعدين انا
قلت له : طيب ما رحت تشتكي للمباحث الأدارية
قال لي : بصراحه كلمت واحد من أخوياي وهو نقيب في المباحث
وقال لي : يارجال احمد ربك ان المعاملة خلصت وهذا النظام عشان يمشي شغلك لازم تدهن السير

سبحان الله حاميها حراميها

بعدها
قلت له : طيب ياخالي هذي رشوه وشلون تقبلها على نفسك
قال لي : وش اسوي لازم أسوي كذا عشان امشي أموري

أخ خ خ خ خ خ بصراحه شي يقهر
وما ضيعنا غير الأشكال هذي
أسأل الله القدير بأن يغفر ذنب صاحب هذا الموقف
إنه غفور رحيم



الموقف الثاني

مره من المرات كنت أمشي في حي السليمانية وبالقرب من ملاهي الخيمة وفجأة أشر لي شاب لابس لبس محترم وملامح وجهه تحس انه ملامح واحد أمير بس سبحان الله الشكل من جهه وهو من جهه ثانية

المهم

قال لي : تكفى ابيك توصلني لسوق الفيصلية بكم ؟
قلت له : بـ 15 ريال
قال لي : والله العظيم ما معي غير 3 ريال
قلت له : معقوله كل هذا اللبس وهالشخصية ومعك 3 ريال طيب مو مشكله تفضل أركب
وبعدها وانا في الطريق جلست اطالع فيه بنص عين وأقول في خاطري وش اللي حدك تروح للفيصلية وأنت ما معك غير 3ريال

المهم

لما جاء ينزل للسوق عطاني 3ريال
قلت له : خلها لك يمكن تحتاج تشتري شي من الفيصلية بس أبيك تدعيلي
قال لي : بذمتك ما تبي تاخذها ؟
هههههههههههههههههههههه

قلت له : ايه
قال لي : الله يخليك ويوفقك يارب مشكور
بعدها انا جلست اطالع فيه وانا فيني شوي ضحكه ومستغرب من شكله لانه بصراحه ما صدق لما قلت له خل الفلوس لك
أسأل الله له الهدايه وان يصلح من شأنه إنه سميع مجيب



الموقف الثالث والأخير


مره من المرات وصلت لي عائل من سوق الأندلس اللي في شارع العليا إلى حي البديعه بالقرب من نادي الهلال
ولما نزلتهم رحت لسوق البديعه مول وركبت عائله من نفس السوق ولما ركبو معي
قالت لي واحده فيهم : يا أخ فيه جوال طيح تحت الكرسي الظاهر حق زبون كان معك
طبعاً انا أخذت الجوال وكان نوعه نوكيا (الدمعه)

المهم

بعد ما نزلت العائله اللي كانت معي اتصل من نفس الجوال على أخر رقم تم الاتصال عليه وردت علي حرمه

قلت لها : يا أختي أنا سائق لليموزين ولقيت الجوال هذا معي والظاهر انه طاح من أحد الزبائن إذا كان تعرفين صاحب الجوال أو أحد أقربائ صاحب الجوال عشان اتصل عليه واكلمه

قالت لي : ايه هذا جوال خويتي وسجل رقم أختها عشان تقدر توصلهم

بعدها أتصلت على أخت صاحبت الجوال

وقلت لها : معك سائق ليموزين انا اليوم لقيت جوال الظاهر انه لوحده من خواتك كان طايح تحت الكرسي الخلفي

قالت لي : أيه تكفا تفكا هذا جوال أختي الله يخليك جبه لنا تكفا لا يضيع الله يرحم والديك

وهي تكلمني حسيت اني لقيت لهم ولد ضايع وليس جوال

وبعدها رحت لبيتهم بعد ما وصفته لي ولما عطيتهم الجوال عطتني 100ريال
وقالت لي : والله ما تردني
قلت له : يابنت الناس هذا حقكم وما يحتاج تدفعون فلوس عشانه
حلفت لي بالله
وقالت لي : والله العظيم ما تردني تكفا خذ الـ 100 ريال
بعدها أخذت الـ 100 ريال وكنت مستغرب ليش كل هذا الخوف وهذا الرعب عشان جوال مفقود

بصراحه حسيت ان فيه صور خاصه لهم

لذا نصيحه لوجه الله لبعض النساء والعوائل

لا تصورون نسائكم بالجوال يمكن إاذا ضاع الجوال أو أنسرق بعدها تنتشر صوركم عن طريق الوسائط أو عن طريق الأنترنت

أسأل الله القدير رب العرش العظيم بأن يهدي ظال المسلمين إلى طريق الحق

إنه سميع مجيب الدعاء



ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــــ

وفي الختام

ما يدوم الا وجه الله سبحانه وتعالى
بدأت اكتب فيه هذا الموضوع في نهاية شهر رمضان عام 1428هـ وأنتيهت منه في شهر ربيع الثاني عام 1429هـ
ياما وياما جتني رسائل مكتوب فيها متى الحلقة الأخيرة ياعبرود وها أنا أرد على أصحاب الرسائل هذي وأقول لهم هذي الحلقة الأخيرة يلا أنبسطو
هههههههههههههههههههههههه

وبصراحه أنا من أول حلقه كتبتها ومن أول ما فكرت في كتابة الموضوع كنت متفق مع نفسي بأني اكتب ثلاثين حلقة فقط
لان المواقف كثيره جداً وأنا كتبت بعض منها واللي فيها فائده بإذن الله لانه بصراحه في بعض المواقف ما اقدر اذكرها لأن المثل يقول
(وما خفي كان أعظم)
وبصراحه لو الكراسي اللي في الليموزين تتكلم وتكتب كان قالت أشياء وكتبت أشياء يشيب لها الجبين بس نسأل الله الستر والعافية

بيني وبينكم الموضوع هذا استفدت منه أشياء كثيره وإن شاء الله أنتم أيضاً وجدتم فيه الفائده

أما بنسبة لي من أهم الفوائد اللي استفدت منها أني تعرفت على ناس كثير ومن مدن ودول كثيره وبألأخص أهل الأمارات وعلى رأسهم أبوعلي من أمارة دبي وراشد(ظبياني) من أمارة ابوظبي
وكذلك تعرفت على ناس من دولة الكويت وعلى رأسهم الكاتب حلم من منتدى بناء وأبوخالد من عاصمة الكويت وأبوناصر من منطقة الأحمدي
وكذلك تعرفت على بعض الطلاب اللي مبتعثين في كندا وعلى رأسهم عبدالله من منتدى الزعيم
وكذلك بعض المبتعثين في أستراليا وعلى رأسهم عبدالرحمن (صقار) وعبدالله ابوسامي
أسأل الله بأن ينجحهم في دراستهم ويرجعهم لأرض الوطن في أسرع وقت وهم سالمين وغانمين

وأما في السعودية فحدث ولا حرج بصراحه تشرفت بمعرفت ناس كثير ومن مدن كثيره لا استطيع ذكر أسمائهم بسبب كثرتهم وأتمنا من أي واحد وجد مني كلام جارح سواء عن طريق رسائل ألإيميل أو عن طريق الماسنجر بأن يسامحني وبالأخص الأخ اللي ساكن في حي الواحه

وقبل ما أنهي الحلقة ودي اقول نصائح للزبائن ونصائح لسائقين الليموزين

أولاً نصائح خاصة بزبائن الليموزين

1/ نصيحه لبعض النساء والعوائل لا تسولفون مع سائق الليموزين بكثره سواء كان اجنبي أو سعودي فقط تكلمي معه بخصوص العنوان اللي تبون توصلون له لانه بصراحه كثرة الكلام مع رجل غير محرم لك قد يصل إلى الحرام وقد يدخل الشيطان بينكم ويصل الحديث بينكم إلى تبادل بأرقام الجوالات

2/ لاتستحقرون سائق الليموزين ولا تتكبرون عليه لانه عنده أحساس وهذا الشيء يخليه ينقهر لذى نصيحه احسنو التعامل معهم لانه بصراحه فيه بعض الناس أخلاقهم قذره مع احترامي الشديد لزبائن الليموزين وينظرون لسائق الليموزين بنظرت كائن غريب

3/ لاتركبون مع الليموزينات اللي توقف أمام الاسواق الا إذا كانه رجل كبير في السن فما يمنع لانهم بصراحه سواقين الليموزينات اللي يقفون أمام الاسواق يطلبون مبالغ كبيره ومبالغ فيها وفي بعض منهم نواياهم سيئه والعياذ بالله



ثانياً نصائح خاصة بسائق الليموزين

1/ دايماً حط أعصابك في ثلاجة وخلها بارده ولا تهتم من كلام الناس اللي تصرخ عليك في الشارع أو يستحقرونك وانت واقف عند الاشارات

2/ دايماً خلك مبتسم مع الزبون وخلك بشوش عشان يرتاح لك وكمل جميل في المشوار وأحسن تعاملك معه سواء كان الزبون سعودي أو اجنبي ولا تستحقر الأجانب وبالأخص الهنود والفلبينيين والبنغلاديشيين

3/ وإذا ركب معك زبون اتبع الحكمه اللي تقول
لا أرى لا اسمع لا اتكلم وأكتم اسرار زبونك ولا تنشرها بين الناس لان الدنيا دواره يمكن يجي يوم وبتقابل الزبون ويوصل له الكلام اللي قاله لك عن طريق ناس ثانيه

4/ خل سيارتك دايم نظيفه وعطرها وانت بعد خلك دايم نظيف ومرتب عشان الزباين ترتاح لك وتطلب رقمك وتخليك توصلهم دايماً

5/ راعي ضروف بعض الزبائن في قيمة المشوار وبالأخص طلاب المدارس العوائل الفقيره والرجل الطاعن في السن


آ ه ه ه ه ه ه ه ه أخيراً خلصت

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ
من أهم الحلقات التي كتبتها هي كما يلي

الحلقة الثانية
الحلقة السادسة
الحلقة التاسعة
الحلقة الثانية عشرة
الحلقة الخامسة عشرة
الحلقة السابعة عشرة
الحلقة الثالثة والعشرون
الحلقة الرابعة والعشرون
الحلقة الخامسة والعشرون
الحلقة السادسة والعشرون
الحلقة السابعة والعشرون
الحلقة الأخيرة


وإن شاء الله انتظروني في موضوع جديد وشيق بإذن الله

أسأل الله بأن يفرج هم كل من قرأ هذا الموضوع وأن لا يدع له ذنباً إلا وغفر له ولا ديّناً إلا وقضاه له ولا مريضاً إلا وشفاه له
إنه سميع مجيب

هذا والصلاة والسلام على اشرف الأنبياء والمرسلين سيدنا ونبينا محمد صلى الله عليه وسلم وعلى آله وصحبه أجمعين


والسلام عليكم ورحمة الله وبركاته


محبكم في الله وسائق الليموزين / عبرود

[عشق الشمال]

عبروووود

ما شاااء الله عليك تبااارك الله

بصراااااحة ثلااااثين حلقة ممتعة جدآ

لااا هنت يالغاااااالي .. عسى الله يعطيك على قد نيتك !!



ترى موضووعاااات رهيبة لااااا تطوووول بالموضوووع الجديد ياااااابعدي :biggrin:


الله يوفقك ،،

[لأجل اشتياقي]

ولله الحمد والمنه

وتمت النهايه

بالفعل لانخفي عليك استمتعنا ونحن نقرأ بحلقاتها الجميله
وفوائدها القيمه


كلمه شكر لاتفي بحقك

لكن مالحيله.......؟؟


اختك،،

[الدووووخي]

الله يعطيك العافيه عبرود وماقصرت ومواقفك فيها الفائده الشيء الكثير لاهنت ياخيــو ’’’

وننتظر موضوع بفارغ الصبر ’’’

[حنين]

http://www.alraidiah.com/vb/uploaded/mals.gif





ماشاء الله تبارك الله عليك


ابدعت يا عبروود


واسفدنا الكثير الكثير


بس مانبي الحلقات تنقطع

كل ماصار موقف حلوو او مفيد ياليت تكتبه لنا


لا تبخل علينا فيه


الله يوفقك ياعبرود ويرزقك على قد نيتك يارب




http://www.alraidiah.com/vb/uploaded/mals2.gif

[أحمـــد]

اللـــه يـــوفقـــك يــاعبـــرود





لاتبطـــي علينـــا بمـــوضــوعــك الجـــديـــد







:101:

[شوق الغلا]

عزيزي عبرود ..

يعطيك العافيه ..

كتبت لنا اروع ما لديك ..

ثلاثون حلقة كانت ممتعه ..

لم نحس بطول يوميااتك الرائعه ..

بــ انتظار موضوعك الجديد ..

دمت لنا يالغلا ..

[بحور البحور]

ما شاااء الله عليك تبااارك الله

بصراااااحة ثلااااثين حلقة ممتعة جدآ

واسفدنا الكثير الكثير مواقفك فيها الفائده الشيء الكثير

اللـــه يـــوفقـــك يــاعبـــرود