قالت حسافة من زمان ودي أتعرف على شاعر ؟؟ [الأرشيف]

مطنوخ شمر

20-03-2008, 05:45 PM

جتني رسالة على جوالي من رقم غريب ما أعرفه مضمونها هالأبيات :

لك وحشتن فاقت تصور خيالي
حتى عيوني دمعها دمع محروق

حط في بالك أنك إنسان غالي
لوغبت يبقى منزلك عندنا فوق

هذي تحية لك دون إتصالي
جتك الرسالة دزهاد دافع الشوق

أنا عاد إسترجعت الذاكرة شوي ما أحد بالبال ولا بالخاطر ولا أستنى من أحد رسالة

فقلت هذي أكيد بنت وغلطانة بالرقم لكن خليني أواسيها شوي وأرد عليها بكم بيت

فقلت انا :

يا مرحبا باللي عزيزن وغالي
جتني الرسالة يا بعد كل معشوق

أفرحتني بالـحـيـل دون إتصالي
وش عاد لوني سامعن منك منطوق

ألا يـالـلـه ياللي تعلم بحالي
تعين قلبي في طواريه للشوق

وأرسلت الرد .. مافي دقيقتين إلا ونفس الرقم يدق علي ودار الحوار التالي :

ألو مرحبا

مرحبتين

كيف حالك

الحمدلله بخير .. منو معاي ؟؟

أفاااا ماعرفت صوتي يا فارس

لحظة لحظة !! منو فارس أنا عبدالله

إيييييييش !!؟؟ بالله ؟؟ وين فارس

يا بنت الحلال والله مو جوال فارس هذا جوالي من أكثر من 3 سنوات
بس الظاهر أنك ملخبطه بالرقم

طيب شلون رديت على رسالتي وش اللي خلاك ترد

والله يا بنت الحلال أنا تهيضت يوم شفت رسالتك وحطيت نفسي مكان فارس

طيب شلون وصفت اللي أبيه أنا بالظبط ؟

شلون يعني ؟؟

أنا والله ما خلاني أدق إلا البيت اللي يقول (وش عاد لوني سامعن منك منطوق)

والله آسف إذا خيبت ظنك وطلعت إنسان غير اللي ببالك لكني ما أقدر
تجيني قصيدة ما أرد عليها

يعني أنت شاعر ؟؟

لا والله مو شاعر لكن أرمس شوي شوي تقدرين تقولين مبتدئ

أنا من زمان ودي أتعرف على شاعر ..

بيني وبين نفسي قلت يا سلاااااااام هذي تلعب لعب ما تحب وقلت لها
والله يابنت الأجواد أنا مرتبط وما أقدر أسوي علاقات خارجية (وش عنده السياسي)
وأنا لا مرتبط ولا شي بس شكلها حقنة بتورطني كل يوم بقصيدة

قالت حسافة ..

قلت عالعموم آسف إذا أزعجتك وأستري على ما واجهتي ومع السلامة

وقعدت أضحك إلين ما دخت وحطيت راسي ونمت وتوته توته خلصت الحتوته ..

مطنوخ شمر

20-03-2008, 06:14 PM

الله يعافيكم ومشكورين عالمرور

بس أنا مثل ما قلت رديت لأن هاضت القريحة الشعرية (( أخس يالشاعر))

وما رديت لأني أبغى شي معين .. وبعدين وشلون أسوي علاقة ولا أبدأ

بقصة حب مع وحده للحين في قلبها إنسان ثاني .. يعني أنا لا بد أن أنظر

إلى الأمر من منظار ديناميكي متحظر يرى الأمور من جميع جوانبها وأبعادها

ولا أنظر إلى الأمور بمنظار حلزوني متقوقع لا يرى إلا النقطة التي أسفل منه

فقط والتي هي أنه أمامك بنت ومعجبه فيك ولا زم تشبك معها وتسولف وخاصة

أنها تحب الشعر والقصيد .. ههههههههههههههههههههههههههههههههههه

لا تخلوني أكمل وأصير فيلسوف زماني كل الحكاية مزوح بمزوح

تقبلو تحياتي .. مــطــنــوووووخ