أبـيــات !!

[محمد الـزعبي]

السلام عليكم ورحمة اللـه وبركاته ..

أسمحوا لي على الغيـاب ولكم مايرضيكـم ,,

[محمد الـزعبي]

لازم العاشق ليا حب يعرف حاجتيـن=بالبدايـه .. والنـهـايـه \ قليل اللي سلم

البدايـه : حب \ بسمات \ وأشواق \ وحنين=والنهايه: هم \ وفراق \ ودموع \ وألـم

[محمد الـزعبي]

ترى صديقي لو يغيـب !! أقـول:=أن غـاب غالي وإن حضـر غالي

[محمد الـزعبي]

من هو اللي يجبـر القلـب الكسـيـر ؟ \\ غيـر شخـص ٍ للمحبـه جـابنـي

صار يعني لي انـا الشيء الكثـير \\ هو ّ العلاج أن صابني ماصابني

مادريتوا فـي غيابه وش يصيـر \\ حالـه امن الضيق بي تـنـتـابـنـي

أشتاق له شوق ٍ ماهو شوق ٍ صغير \\ شوق الكهـل لا قال وقتي شابني

شوي أحبـه حبـه بقلبـي كبيـر \\ أموت في حبـه ولا أحد ٍ عابنـي

[محمد الـزعبي]

كـبار العقول تطيـح في غلطتيـن صغـار \\ وأنـا أقول : ياقلبي تعـدّى على شانـي

غلـط أول \ وثـاني .. صديقي وجاه إنذار \\ لكن ثالـث الغلطـات تثبـت على الجانـي !!

[محمد الـزعبي]

قال مافيه في وجه الجفا دم \\ قلـت ماطعتك وشفت النكاده

ماعلى وجهي الا ضيقه وهم \\ ضـمني ودي أشعر بالسعــاده

شاعرك بيتنفس بس ماشم \\ عقبك إلا هوى ضيــّق فؤاده

لامدح قلبي الدنيا ولا ذم \\ ولا لقى من محبته الاشاده

[محمد الـزعبي]

أذا قلت من هـو تردى نصيبه .. أبسكت نصيبي أنا ليه أسبه

يجاوبك قلب ٍ جروحه عطيبه .. من الوقت صلـف الهبايب تهبه

شقى من جروحه ولاهي غريبه .. فالايام يشقى و يشكي لربه

وصلـت المدينـه بدوّر حبيبه .. لقيت أن حبـك علاجـه و طبـه

خذيته من الصدر أمانـه تجيبه .. ترى قمت أمشي وكني أمسبه

بطيـب المحبه ولا هي غصيبه ..مـ هو غصب من هو يحبك تحبه

شعوري تعرفه قبل لا آحكيبـه .. ابعرف شعورك تجاه المحبه

[محمد الـزعبي]

ما تقصـّر حبـيبـي بالهجـر و البعـاد \\ ماتشوف الجفـا من بيننا مستريح

لو تشوفه بتـسـعـى للغـلا بأجتهـاد \\ مثل من قام يسعى لأجـل دمـع ٍ يسيـح

في حقوق المحبه والغـلا والمـراد \\ تدري أنك مقصـّر بس منت بصريح

مهجة الصبر يكفـّي ماحصل بالفؤاد \\ لا تشحين بالبسمـه لعـيـن الجريح

[محمد الـزعبي]

بروح والخطوه ثقيله يالــهـوى \\ مـع أني اليا ضقت مدري وين اروح ؟؟

[محمد الـزعبي]

قالت لي بنيتي حلوه حلاهــا أصـيل \\ الوجه وجه السعد والملح في دمها

ماشفتها ؟ قلت في قلبي كلام ٍ طويل \\ ما احلى من البندري ياكود زول امها

ان كان بنتك عطاها الله وجه ٍ جميل \\ يضيع كل الحلا بس اوقفي يمهـا

:)

[محمد الـزعبي]

ضايق الخلق لا تشـّره عليـه .. حاول أنك توسـّع خاطره

كل ماضاق نادى اللي يبيـه .. في خياله لحـالـه ناطره

لحظة أشواق بالشوق ونـتيــه .. تحت جو الغيوم الماطره

أيــه أنا بالحزن مالي شبيـه .. صمت فرحي وحزني فاطره

طالبك لا تقول تضيق ليـه .. الليالي بجرحي شاطره

[محمد الـزعبي]

من هذاك اليوم والحـب انطلق \\ في بساتين الرياض ابلا صفه

شي محزن كان هالباب انغلق \\ الشعور بوقتها من ياصفه

الحزن ماله شبيه الا القلق \\ صاحبه ضاع برياح العاصفه

لو اقول القـلب بأحزانه علق \\ بتشمت فيه والا اتناصـفـه ؟

[محمد الـزعبي]

يصير يعني نعيش ونظلم القلـب ؟ \\ وقــّف مع احساسك وقلي عـلامك

عطني يمينك ويالله نكمل الدرب \\ دام الأمانـي لهــا دار بهيـامك

[محمد الـزعبي]

عشت وياك أيام ٍ قليله \\ وأكتشفت الشعور الأصطناعـي

الصراحه جميلـه يا جميله \\ ايه عقلي على ماقلت واعي

ابعدي وابتعد !! أفضل وسيله \\ لنـّي أشوف ماللوصل داعي

[محمد الـزعبي]

ادري وش اللي من دواعي سرورك \\ أني أجيك وودك محـمد يجيك

لي بيت ياقلبي من أعمق بحورك \\ ودي تـقولـه كان الأحساس يرضيك

[ تذكر يوم أني ضقت وش كان دورك \\ خليتني وشلون أنا ما أخليك ]

[محمد الـزعبي]

الليل لاغاب يظهـر بعده الــنـور \\ مع طلة النـور تحيا بي رسـالــه

هـيّض غصـون الشجر تغريد عصفـور \\ وانا تهيظـت من جرح البطالــه

الحال ما بيـن متـضايق و مسرور \\ و شلون ابسلك دروبي بالسهـالــه

ماني على الصبر يالأحزان مجبـور \\ الصـبر طبع العقول أهل العدالـه

[محمد الـزعبي]

تقولين ودي أنك تجي شاعر ٍ مشهور \\ وانا أقول خليني كذا يابعد راسي

أذا كنت مبدع قولي الشاعر المغمور \\ مع اهل العقول الواعيه فكره ايقاسي

[محمد الـزعبي]

في سمانا بروق وليلنا ما ملاه \\ غيـر ذكرى تهـب وعشرة ٍ راحله

منت الأول على تجريح قلب ٍ خذاه \\ حضرة الهـم في يمـه وفي ساحلـه

[محمد الـزعبي]

علاقتي وياك ابتعدمني \\ الحب فيها شي ٍ ويا قدمه

صدمتني مره ولا تصدمني \\ صدمه جديده والشعور تعدمه

ابهدمك من واقعي واهدمني \\ دامك تجيني كل يوم بصدمه

[ وان كانك معزم تبي تخدمني \\ البعد عني هذي افضل خدمه ]

[محمد الـزعبي]

ماالهجر والجفا مفهوم \\ يامحمد أبكي !! وابفصحلك

في غيبتك خاطري مهموم \\ وشلون بفراقي أسمحلك ؟

[محمد الـزعبي]

أشهداني احاتي واكتم الآه \\ من يبعـّد خفوقـي عن شتـاتـي

لو عطاني زماني ما أتمنــاه \\ كان ماعشت في عمـري آحـاتـي

ينكسـر خاطر اللي عاش دنياه \\ عند كلمة متى ترجع غناتي

الجفــا لو يحن و يبذل أقصاه \\ كان ما قلت كرهـّنـي حياتـي

[محمد الـزعبي]

غلطــان من كـرّم مدينـه لأجل عيـن \\ الجـرح ما جابـه سوى العيـن فينـي

[محمد الـزعبي]

أموت لعيون القصيـد الفكـر ناذر لي نذر \\ أفطـر على جزالتـه والنفـس ماهي صايمـه

وألا زمـاني لو رمانـي صرت له فطـن وحذِر \\ مافيه عبد ٍ ذل شيـخ إلا وشيخـه ضايمـه

[محمد الـزعبي]

ترى العيون اللي أضحكت لك أجزم أنها ماتبيـك \\ وألا العيون اللي بكت لك أجزم أنها لك فدى

[محمد الـزعبي]

الطعنه اللي جات في ظهر الوفـا من يديك \\ وشلون تطعن من وفـا وتحن للي جفا ؟

هذا وانا اللي كنت احبك واعشقك واهتويك \\ حملتنـي هم ٍ ثقيل ٍ فوق متني (افا)!!

[محمد الـزعبي]

يقول الشاعر المرحوم سلمان الهويدي ( شاعر السور ) :

سامح الله حمامه فوق الابراج ناحت \\ اشغلتني ولا ادري وشبلاها تنوحي
سامره ليلها في برجها ما استراحت \\ لو هي تندب لها حي لزوم بيوحي

وأنا أقول :

الغـلا مامنحك وما منحنـي \\ غيـر جملة ( أنا أبيـه ويبيـني )

ما يصير الشعور إن جرحنـي \\ حسي فيني منو بـ يحس فينـي

أيه فيك البرود اللي ذبحني \\ كل ما أجيك ضايق تهملينـي

ما خسرت الوصـال ولا ربحنـي \\ رحت أبرتاح ما غمضـت عينـي

فوق هذا خفوقي ممتحنـي \\ ( رحلهــا ) خايف إنك تتركينـي

[محمد الـزعبي]

ما عاد لـي خاطر أقعـد لو عشـقـت المكـان \\ سمحـت منـّه و ابسـري يا نجـوم السمـا

الدرب مظلـم ونورك بالنـظر ما يبـان \\ غشـاوة ٍ وسـط عيني صرت كنـي عمـا

زيدي بريقـك و قولـي للقمـر ويـن كـان \\ انا فقـدتـه بهالليلــه و كنــي كمـــا

رجـل ٍ عزيـز توفـى أخوه شهـر رمضـان \\ ماعاد له بالحياة الا شديـد الظمـا

[محمد الـزعبي]

ماعاد يمديني وهي راحت لشخص ٍ غريب \\ صديت عنها يوم شفت أن القلوب استحت

حتى المكان اللي جمع أغلى حبيب بحبيب \\ أستغرب شلون الهنـوف اللي تحــب اجرحــت ؟؟

[محمد الـزعبي]

ياصاحبي كان الغياب اليوم لك طبع وسمه \\ أستأذنك من بعد أذنك حان وقتي للوداع


رحـّال رح علـّم عدوي و الليال المظلمه \\ إن الخطر مهما كبـر يفـر من وجه الشجاع

[محمد الـزعبي]

مشكله قد يواجهها البعـض :

لا قمت آخر ليل مهموم وجويـع \\ النفس للـوضع الغريب استنكرت !!

اتشوف شي يخلي الواحد يضيع \\ الناس نامت .. والمطاعم سكـرت

:)

[محمد الـزعبي]

أبيـك مثـل اللي أبيـه ويبيـني \\ حاولـت لكن ماطلع في يدي شي !!

بعطيك طبعك .. يمكن تحس فيني \\ شالفايده لا صار قلبك مـ هو لـي !!

[محمد الـزعبي]

:)

حبيبـتي لا شفتهـا ( رحت فيهـا ) \\ خصوصـا ً اليا شفت انا عيونها الروق

مـن كثـر مانـي يا زماني أبيهـا \\ خليت شعري ينبض بقلبهـا شـوق

اتحب تظهر بالأنـاقـه وأجيهــا \\ وألاحظ أنـّهـا بأختياراتهـا ذوق

كل حاجة ٍ تعجب بهـا تشتريهــا \\ دايم تروح السوق .. وتربـّح السوق

الله من عيون الحسود ايحـميهـا \\ وتبقى معي في قمـة إحساسهـا فوق

لا صرت بلحالي ( ياويلي عليهـا ) \\ أحس كني عايش بقلب مسروق

القلب معهـا بين راحت يديهـا \\ إن ضمته بيفوق ويفوق ويفوق

وألا بلياهــا .. غــلا يرتجيهـا \\ بغيابهـا .. تشكي من احركتـه عروق !!

لا تلومنـي لا منـّي رحت فيهـا \\ بمـوت والسبـه من عيونهـا الروق

[محمد الـزعبي]

إن كنت أبوصفهـا .. أنـا بظلمـهـا \\ حتى لو أوصف حسنهـا مـ أوفيهــا

[ جمـالهـا بالمختصـر يا خــالـد \\ يجبـرك تـسكـت وأتـأمـل فيـهــا ]

[محمد الـزعبي]

انكحــل عيوننـا .. بالسـوق وألا السفــر \\ إلى متى يا صديقـي ( نحرق قلوبنـا )

:(

[محمد الـزعبي]

أدق .. وأنت مسكر ٍ تـلفـونك \\ حرقت قلبي في لظى غيبتك حرق

أنـا أحترق عشان خاطر عيونك \\ وأنت أتعمـد غيبتك [ لاحظ الفرق ]

[محمد الـزعبي]

لو عشت عمري فقــر يازين ليل الفقـر \\ كن الأماني بعيني صرت مسئولهــا

صحيح ماني موظـف بس قلبي صخــر \\ الحاجه اللي يبيهـا القلب بيـطولها

[محمد الـزعبي]

بين حرمان النفوس ولعبـة ٍ مكشوفـه \\ كنت واقف والوقوف احيان يعني ضايع

لين بان اللي عن عيوني ماكنت اشوفه \\ الجزا بالمثـل لاسامع ولاني طايع

مابـقى غير الحنين وكلمة ٍ ملقوفــه \\ الجفا أجزل هديه من خفوق ٍ بايــع

مثـل قطرات الندى لا فارقت نفنوفه \\ خل فرقا عاشقه تبقى بقلب ٍ مايع

[محمد الـزعبي]

ما كل الأبيات نقراها : قصيد ،، شعــر \\ بعض البيوت استحي أني أنـا أقولها

[محمد الـزعبي]

أرجـف .. وتحسب رجفتي من سبب خـوف \\ ماتدري إن المسألـه كلهـا ( برد )

حتى أنت مثـل البرد ,, دقق وبـ تشوف \\ إن الخفوق يفـز لك ماهـو بـ عرد

[محمد الـزعبي]

على الأقـل لاشفتني بس سلـّم \\ السالفه ماتوصل الكره الحقد

باكر يعلمــّك الزمن وأتعلــّم \\ إني أفيدك يوم وجهّـّت لك نقـد

[محمد الـزعبي]

عادي لو أنك جيت أو رحت عني \\ منت بـ مثل أول ليا رحت أو جيـت
لا عاد تطلب شي مني لأني \\ عطيتك أكبر شي .. ( قلبـي ) .. وصديت

[محمد الـزعبي]

لا

لا تصير بعزلتـك مطوي طوي \\ أجتهد ياخوي واللي راح راح

الفشـل يعطيك دافع معنوي \\ لا فشلت اتحط في راسك نجاح

[محمد الـزعبي]

مدري من التفكـيـر وألا من التتـن \\ أنسـل حالي ماحدن لد صـوبـي

آكـل .. أبي أمتـن ولابان بي متـن \\ متى يتحقق حلـم تكبـر جنوبـي ؟

: )

[محمد الـزعبي]

قد قلت لك .. أنا معي قلب وإحساس \\ صعبه أعاشر فاقد إحساس وأعطيـه

حاولت بك مافاد والحيـن هـ النـاس \\ واجد وشوفي من تبينـه وحـبيـه

[محمد الـزعبي]

متى أشوفك بس وألمس كفوفك \\ مدلعه بالحكي .. تتصنع الغنج

ماهو عشاني يوم قالت بشوفك \\ ملعونة المترس تبي تركب الرنج

[محمد الـزعبي]

8 \ 10 \ 2008 م

الساعه : 3 صباحا ً

تاريـخ لم ينســى .. ولـن يـنسـى

الخسـاره كانت ثقيلـه جدا ً..

والله إن أعظم هموم الناس في يوم الوفـاه \\ لا توفـّى شخص له وزنه وله بالطيـب صـيـت

إنكسرت وماكسرني غيـر جدي آه آه \\ كم شخص ٍ هزه فراق الرويبـخ بـ الكويـت ؟

..
..

وإلى الآن طاريه لم يفارقنـي ..

13 \ 2 \ 2009 م

الساعه : 6 صباحا ً

الرياض

ميــّت ياجدي ولي شهرين من موتـك \\ مـ استوعـب القلب ليل فراقك الجـارح

لاصرت بـ لحالي أذكر وجهك وصوتك \\ ماكنك إلا يا جدي ميـّت البــارح

[محمد الـزعبي]

أتحبنـي وأجاملـك .. وتقـول لـي ( زيـن ليـه ؟ ) \\ لأنـي أنا مثلك أحب إنسـان مايحبنــي

[محمد الـزعبي]

طارت عيونـي من اللي شفت قدامـي \\ يـوم الهوى هـب بيـّن لي ملامحـهـا

تقـول لي ( أف ) طار من الهوى لثامـي \\ وراحت وانا واقـف الله لا يسامحهــا

[محمد الـزعبي]

تدري شـ اللي يقهـرك لاجيت في وسط الرياض \\ ساقتـك رجلـك على البرجـيـن ثـم قالوا عوايـل

[محمد الـزعبي]

جامل على كيفك بـ كل المواضيـع \\ إلا الشعـر ممنوع فيـه المجامـل

[محمد الـزعبي]

من تناهيد والا من جراح \\ ضيقة النفـس فيني عادهـا

وأنت طاريك مع هذا الصبـاح \\ قلت ايخفف عليها وزادهـا

[محمد الـزعبي]

بوقت واحد تحب اثنين
وشلون قلبك تحملهم


(القلب ماياسع لشخصيـن)
رح للمحبيـن وأسألهـم


هذا طريق الشقى والبيـن
ماظني الشخص يجهـلـهم


الشوق من لايعرفه زيـن
لاشاف خلانـه اهملـهم


لو كنت تلعب على الحبلين
ضاع الغـلا يا مجاملهم


هذاك شاف الحـلا والزين
وهذاك شاف انك اعقلهم


تبيني الثالث المسكيــن
وتقطع رجاوي مواصلهـم


وقـّف هنـا واسمع الشطرين
شطرين من قلب قايلهم


أن كان تبغى حنان وليـن
ارجع لهم لأنـي أبخلهـم

[محمد الـزعبي]

ما تحسفـّت يوم أنك زعلـت ورحلـت \\ آتحسف على نفسي لا ساد الظلام

تحتفـل كـل خلـق اللـه وأنـا مـ أحتفلت \\ حـابس القلب في دنيـا الشقى والملام

[محمد الـزعبي]

أنا مشتاق لـ عيونك .. شسوي دامني أشتاق ؟؟ \\ تحظنـّت الهبوب البارده وأشتقت لأنفاسك

طرت لي أمنيـه خليتهـا في داخل الخفـّـاق \\ تمنيتك معاي الليل كلـه [ راسي وراسك ]

[محمد الـزعبي]

قالت: ابياتك سرقها شخص منـّك \\ قلت : عادي يمكن أبياتي عشقها

دام تدرين أن الابيات [ ايعننـّك ] \\ ( جعل فيه العافيه للي سرقها )

[محمد الـزعبي]

أشوفك تفرك ايدينك تغني منقهــر ( ويلاه )

عشان البنت صدت ,, تنقهر .. يا صاحبي وش فيك ؟

أنا قبلك , ولكن : قلت .. يا قلبي بلاش الآه

ليا من صد من تغليه راح يجيك من يغليــك

[محمد الـزعبي]

ان كنت بـتخونـّي .. أرجوك علمنـي \\ قبـل أنصدم في سماك , وبرقك , ورعدك


عشان ما أظلمك .. ولا أنت تظـلمني \\ ( أبذبحك يا الغلا وأموت من بعدك )

[محمد الـزعبي]

هذا الكلام أستنـّكـره منك بـ الذات \\ تكفى عشاني قول ماهو كلامك

قول أي شي .. أو .. ألتزم صمت واسكات \\ عشان يبقـى بالخفوق ( احترامك )

[محمد الـزعبي]

[أبيـك وتبينـي] هذا هو ّ اللي يجعلنـي \\ .. أحبـك بقلب .. ( وكل قلب ٍ ومايهوى )

ومادامك تبيني [ لا تصد ، وتزعـلـْـني] \\ ماودي .. أنخسـر بعض على شي مايسوى !!

[محمد الـزعبي]

أتحبنـّي وتقول أنا أكرهـْك كرْه \\ ضيعتني مابين هذي وهذي

[محمد الـزعبي]

.
.

امفارق ، وبرحل بقلب ٍ يحترق حرقــا \\ وعذري ليا منـّي كتمت الحب والدمعه :

أحيانا ً الجمعـه تصير أحسن من الفرقا \\ وأحيانا ً الفرقا تصير أحسن من الجمعه

.
.

[محمد الـزعبي]

أبتسـم .. والله لـه الحمـد والخيــر الكثـيـر \\ لو ّ ليلـي من عنـى الوقـت قمت آسامـره

عادنـا في خيـر ، والناس والدنيا بخيــر \\ دامي أشوف المسـاجد بأهلــهـا عامــره

[محمد الـزعبي]

صار حالي كئيب ، وصار حالك كئيب \\ ألزم الصمت ، لا تكثر علـي الكـلام


(من يدينك) ولاهي من رداة النصيب \\ (كل طعنه) لها بين الضلوع أحتـرام


ليتني قبل أعرفك .. ماعرفتك حبيـب \\ ليتني بس أعرفك وجه ، ولّا سـلام