المساعد الشخصي الرقمي

مشاهدة النسخة كاملة : يامحافظ الخفجي ويااااا مندوب ويا مكتب الاشراف ترى الخفجي من سيئ لاأسوء

عزيزة نفس
09-03-2009, 11:18 PM
السلام عليكم ورحمة الله وبركاته *

انا بتكلم وبكل صراااااااحه عن المأساآآآآآآآه مأساة التعليم بالخفجي....
انابس ابي اعرف مين المسؤؤل عن هالامور وعن هاالاهمــــــــال الفظيع اللي تعاني منه مدارس الخفجي ..
اتكلم عن المشكله الرئيسيه بالمدارس...
اللي هي >>>> مافي معلمات بأغلب المدارس ؟؟
وخاصتن الثانويه ... يامكتب الاشراف يالمندوب اتقـــوو الله حررررام عليكم البنات الخريجات شكثرهم بالبيوت ليه لما نجيب ملفاتنا ماتقبلو تاخذوها مع العلم ان هالنظام مو على الكل ... لاتقولو ان ديوان التوظيف هو المسؤؤؤل لااااااا والله العظيم لاا انتو المسؤلين بالدرجه الاولى لان انا شخصيا رايحه لديوان التوظيف واكثر من وحده من صديقاتي رايحين لديوان التوظيف بالدمام وسألناهم وهم ماعندهم مشكله أي ملف يرنفع لهم من مكتب الاشراف والمندوب بالخفجي يقبلوه على طوول ليه ماترفعو الملفات لييييييه ماتقبلوها؟؟؟؟؟
شوفو الثانويه الر ابعه البنات ماداومو للحين عشان مافي مدرسات ؟؟ شوفو الثانويه الاولى يامندوب الخفجي ويامحاااافظ الخفجي الله يرحم والديك صحصح شوي عشان الخفجي وعشان الناس تدعيلك شوف الثانويه الاولى مبنى مايحتمل اكثر من 400 طالبه كحد اقصى وفيه 950 طالبه !!! حراااام عليكم كيف المدرسات بيقدرو يعطوو كيف الطالبات بيفهمو ؟؟ وبعد حتى طاولات وكراسي ماافي لان الفصل مافيه مجال نهائي .... اتقووو الله وارحمو بنات الناس من طالبات ومعلمات اطلبو مدرسه جديده وبعدين الشماليه مافيها غير ثانويه وحده ؟؟ !!!
اطلبووووو والحكومه ماتقصر ..
وعلى فكره مو بس الثانويه الر ابعه مافيها معلمات كل المدارس بدون استثنااااااااااااء فيها نقص نقص شدييييييييييييييد والمدرسه الوحده ينتدبوها لاأكثر من مدرسه غير مدرستها وربي حراااام عليكم المدارس فاااضيه وخاااليه تمااما من المعلمات والبيوت مليااانه معلمات ومؤهلات للتدريس بس السبب ؟؟؟؟؟؟
ان هالبنات ماعندهم واسطه بمكتب الاشراف...
المندوب الجديد شوووف وضع المدارس تراه مزري وصعب جدا ... ومتأملين فيك خير خلي الناس تدعيلك وتذكرك بالخير.. بس اقبلو ملفاتنا وارفعوها للدمام حرام عليكم ضيعتونا بالكليه الدمار وبعدها بالتوظيف ..
المحافظ انتبه للخفجي تراها ماعاد فيها شي سنع لامدارس ولامستشفيات اجل ؟؟ فيه مستشفى بالعالم يسكر ؟؟؟ يعني لامرضت شسوي طيب ؟؟ والمستشفى مسكر ؟؟
لاا وبعد لما حولوني على المستشفى العام الدكتوره تتكلم بدون نفس ومااتتقبل اي مريض ليه ؟؟؟؟
لأن الكمبيوتر خربان واذا الكمبيوتر خربااان المريض يمووووووووووت لين يتصلح الكمبيوتر .... اذا تصلح ..
محافظنا العزيز .... ترى الخفجي بذمتك وحتى مدارسها انت مسؤؤؤل عنها واكيييد انت قد المسؤؤليه واتمنى تنظر لهالكلام بحكمه ومعرفه والله يجزاكم خير .... وااااسفه عالاطاله ... بس لو لا محبتنا للخفجي ماتكلمنا ...yd.885
عاشق 11
10-03-2009, 12:13 AM
عزيزة نفس جيب واسطه تتوظفين مامعك واسسطه ماتلزمك وظيفه

هذا نظام الخفجي بتوظيف

(( الله يعيننا ويصبرنا على هالمعانه))
المنصف
10-03-2009, 02:05 AM
للمعلوميه في العام الماضي في ثانوية الشماليه للبن ت قلصوا الحصص بسبب نقص معلمات الدين .
والله وش كثر مدرسات الدين متسدحات ببيوتنهن ينتظرن التعيين والله دنيا عجب .
azoozsweet
11-03-2009, 12:53 AM
أختي عزيزه نفس اتمنى صوتك وكلامك يوصل للجهات المختصه فيه حل بسيط وجميل جدا كل الي ابيه عشرين رجال من اهالي الخفجي اللي عندهم بنات عاطلات عن العمل يرفعون برقيه للمك عبدالله بتفصيل ممل وحرف حرف وبيان عن الموجود وتكون برقيه عاجله وسريه وراح يجي الرد والخبر في اقل من 48 ساعه اما بالنسبه لمندوب الخفجي فحدثوووووو فلا حرج في لقاء قبل سنه ونص معه في المنطقه الشرقيه اشار في كلمه له ضحكت منها لمده اسبوع قدام ان نسبة المعلمات كثيره جدا ولا توجد اي معوقات في التقديم على الوظائف بالنسبه لمحافظه الخفجي يعني برر الموقف الاخ وان المعلمات كل سنه يتقدمون لوظائف ويحصلون عليها بالراحه كلها للمقربين والحبايب لكن شنو مؤهلك العلمي والتخصص اختي عزيزه نفس وباذن الله راح اسعى لك في الموضوع والله يوفقكم جميعا انتم درستم وسهرتم وتعبتم واخرتهافي البيت والله حرام بجد لكن اتمنى لكم التوفيق في كل خطوه ويعوضكم بالتعب اللي راح ومنها للاحسن ان شاء الله
عزيزة نفس
11-03-2009, 05:53 AM
اشــــــــــكر كل من رد على موضوعي وحس بمعاااناااتي وترى هذي مو معااناتي وبس معاااااانااااااااااااة كثيـــــــــر من البنات .... يعني انااا تخصصي رياااضيات والتربيه الميدانيه 100 بالميه واخذتها بجداره ايش يبون اكثر من كذاا.....؟؟؟؟
بس ماااقول الا حسبي الله ونعم الوكيل بكل مسؤؤؤل جالس بمكانه عالفاضي بدون مااينفع النااس ويشوووف متطلباتهم .... وربي مدارس الخفجي بحااله يرثى لهاااا
عزيزة نفس
11-03-2009, 05:56 AM
اخوي عزوزسويت اشكرك على ردك على موضوعي .....واحساااسك بألمنا .... والوظايف موجوده صحيح بس على قولتك معروووفه لمين هالوظايف ؟؟؟

واذا على اننا نرفع للملك الملك مو مقصر بس صدقني ماااتوصل البرقيه ابد.. اشكرك على اهتمامك..
سلطان الدغيلبي
11-03-2009, 06:04 AM
اتوقع مشكلة التوظيف ونقص المعلمات في المدارس مو بس بالخفجي على مستوى المملكه ككل والمشكله هاذي تحملها وزارة التربيه وديوان الخدمه فالوظايف والتعين تجي
من عند الخدمه المدنيه والمدارس مالها علاقه بالتوظيف
والمحافظ ماله علاقه بعد في التوظيف
والله يرزقك اشالله بالوظيفه
لكي مني ارقا التحايا
عزيزة نفس
11-03-2009, 10:30 AM
اشكرك ياخوي سلطان على ردك عالموضوع ........
.....بس حبيـت اوضحلك نقطه انت ماتدري عنها ...
التوظيف يبدأمن التوجيه ومكتب الاشراف والمندوبيه الموجوده بالخفجي هي عملها تقبل الملفات وترسلها للديوان التوظيف بالدمام بس ..المشكله انهم ماتقبلوو أي ملف يقولو مانقبل وفجأه تلاقي كم معلمه توظفت فجأه ...يعني اللي عندهم واسطه بالمندوبيه ,,

ويااخوي هالكلام مو من عندي هذا الكلام من الديوان بالدمام هم نفسهم قايلين اي ملف يجينا من مندوبية الخفجي نقبله لان هم ادرى بحاجة المدارس عندنا والله على مااقول شهيد ...

والعجز صحيح بكل مدارس المملكه بس ماتوقع نفس الخفجي ..
ولو لاحظت حتى بالتقديم اللي من الانترنت كل المدن والمحافظات شووف المقبولات عندهم بالمئات ..الا الخفجي ... اكبر عدد خمس معلماتامقبولات وبعد معلمات معينات واصول معينه..


اشكرك على ردك على موضوعي .... بس انا ماتكلمت عالفاضي انا تكلمت وانا متأكده من كل شي يصير ...




يسلمووو خيوو
كحله
11-03-2009, 10:46 AM
الاخوان استفسار هل المندوووووووووب الشمري تغير
عزيزة نفس
11-03-2009, 11:02 AM
هلا كحله اي نعم اتغير المندوب الجديد ...

والله يستر من المندوب الجديد ..

لكن نرتجي فيه خير ان شاء الله ....
رمح الشمال
11-03-2009, 11:21 AM
ومن هو المندوب الجديد ؟؟؟
azoozsweet
11-03-2009, 04:42 PM
اختي عزيزه انتي ارفعي وصدقيني توصل لاتخافين ياما برقيات مالها اساس في الحياه ووصلت فما بالك لما تجي برقيه معاناة بنات الوطن


الاخ سلطان لالالالالالالالا غلطان مناطق المملكه كلها تنزل وظائف فيها بسرعه الا المنطقة الشرقيه بالذات وبالاخص الخفجي ليه لان فيها مندوب الله بالخير موظف السنه الماضية 25 معلمة محو أمية وصار فيها تحقيق وخطابات شديدة اللهجة لكن راح ارفق لكم يوم من الايام باذن الله صورة من التحقيق من قبل الجهات المختصة
sweety
11-03-2009, 08:19 PM
مرحبا اختي الغاليه...

والله انك صادقه في كل كلمه قلتيها...

الوظايف وسطات ...وكل شي من سيء الى اسوء...

والبيوت مليانه خريجات بالهبل...والنقص كبير..

واثر على طريقة التدريس ...

مانقول الا حسبي الله ونعم الوكيل على كل من كان له دور بهالتسيب...

وكل خفجاوي يبي يرتقي بمدينته...ولكن لاحياة لمن..تنادي


:mad::mad::mad:
azoozsweet
12-03-2009, 01:15 AM
مقولة بسيطه مافيه مدير دائرة في الخفجي وازين من اللي قبله سعيد اخو مبارك ومبارك اخو سعيد لكن عسى الله يلطف بحالكم واحسن الله عزاكم ياهل الخفجي وفوق هذا كله مستوى التدريس متدني جدا الواسطه فوق القانون تجي وحده نسبتها في الجامعه او في الكلية سئ جدا وتتوظف بالواسطه وغصب عن الجميع وتجي وحده تعبت وسهرت وعانت الكثير وممكن كانت تدرس في غربة بعد مو في نفس المنطقة واخر شي تطق صوره مع الشهاده حقتها ليه الظلم وليه الاحتكار

نقطة مهمه لو فيه وعي كان تقدم الملفات وترقم بالتسلسل وكل ذي حق ياخذ حقة مثلا السنه هذي عندنا 150 وظيفة عندي 350 ملف نمشي بالسرى مافيه عمي خالي جاري لين يجي الدور على الجميع والله تمشي الوظائف بسرعه والكل يرتاح من حرف وفتامين وااااااااااااااااااااو
آنـا
12-03-2009, 03:50 AM
وبعد معلمات معينات واصول معينه..


آآآي هذا وانا اشهد انآ طالبه بمدرسه من هالمدارس وكل اللي يجونـآ

مدرسات من اصل واحد ومعروف !!

وحتى الطالبات من هالاصل ينعاملون معامله خااصه !! :(

وبعدين اذا انتي رياضيات احنا بمدرستنا نقص بالرياضيات بقووه !

وحتى الدين والعربي !

تخيلوا للحين مابدينـآ ..
ياليتك عندي
12-03-2009, 04:22 AM
الللللللللللللله يكون في عونكم من جد شي يحزن وش ذنب الي يتعلمون ويجتهدون واخرتها ما عندك واسطه وتجي وحده عندها واسطه وتتعين والمشكله العظمي او الطمه الكبيره ما تعرف من الف والا الباء ودرس ها المسكين عموم اتمني من اختي عزيزة نفس تهتم في التدريس وتترك المستشفيات عنها لانه لا غبار علي الصحه في الخفجي وهي تبذل ما بوسعها كيفية الحرص علي مراجيعنها ونشكر الشئون الصحيه في الدمام طرحها الثق في سعادة مدير المستشفي وتمديد ادارته الفذه والراقيه مع الطاقم الطبي الذين يساندونه
عزيزوغالي
12-03-2009, 04:14 PM
عزيزة نفس و اي شخص عزيز نفس لابد له ان يعاني في هذا الزمن لكن اجرك علي الله. اختي عزيزه لبد لها ان تفرج انت سويتي اللي عليك الدور باقي علي المجتمع اللي انت فيه لازم يقول كلمته والمحافظ النعسان المفروض ان يصحصح ويشوف الامر بعينه لان هناك من سوف يحاسبه يوم القيامه الله يمهل ولا يهمل
بدرانو
12-03-2009, 05:47 PM
وانتي الصادقه عزيزة نفس
والله لي الى الان عشر سنوات بالخفجي كل سنه اروح للمندوبيه ثلاث مرات واقدم ملف زوجتي والله كل كلامهم مافيه شي ماعندنا توظيف روحو للدمام ملينا وتعبنا رغم النقص في المدرسات
ماقول الاحسبي الله ونعم الوكيل في اللي يتسبب في هالشي
أبوســـــاره
12-03-2009, 07:47 PM
الله يكون بعون كل الطالبات واللي جالسات بالبيت
ينتظرن الوظيفه بس صدقوني مامعك واسطه ماتمشي أمورك

شكرا لك ياعزيزة نفس على طرح مثل هالمشاكل ونتمنى يصل صداها
الى نايم(محافظ) الخفجي
فتى التحفيظ
12-03-2009, 09:24 PM
اتوقع مشكلة التوظيف ونقص المعلمات في المدارس مو بس بالخفجي على مستوى المملكه ككل والمشكله هاذي تحملها وزارة التربيه وديوان الخدمه فالوظايف والتعين تجي
من عند الخدمه المدنيه والمدارس مالها علاقه بالتوظيف
والمحافظ ماله علاقه بعد في التوظيف
والله يرزقك اشالله بالوظيفه
لكي مني ارقا التحايا
azoozsweet
13-03-2009, 05:01 AM
انا احبكم ياهل الخفجي وللامانه اني اي شي في صالح اهل الخفجي انا اسعي فيه ولكن اصبرو علي ايام وراح اجيب لكم فاكس ترفعون عليه اسماء وبيان كل العاطلات عن الوظيفه وتقدم فيه شكوى بصيغه حلوه تبين معاناه كل خريجه كليه او جامعه فيها ومالكم الا من يتابع الفاكس لكم من يوصل ولين اخر شي ان شاء الله

انا بالخبر وبابي مفتوح لكم جميعا واللي ينقص عليه شي ولا معامله في الشرقيه لايرده الا لسانه باذن الله اني اسعى له لين تخلص وانتظرو الفاكس عن قريب وابشروووووو ياهل الخفجي يشهد علي الله اني احبكم وانا ماعرفكم الا معرفه نت ومن خلف الشاشات لكن انا مسقط راسي الخفجي وسري منقطع عندكم
دخــــٌيل
13-03-2009, 01:25 PM
عزوز

:عن أبي هريرة رضي الله عنه : عن النبي صلى الله عليه وسلم قال
( من نفـّـس عن مسلم كربة من كرب الدنيا نفــّس الله عنه كربة من كرب يوم القيامة و من يسّر على معسر يسّر الله عليه في الدنيا و الآخرة و من ستر على مسلم في الدنيا ستر الله عليه في الدنيا و الآخرة و الله في عون العبد ما كان العبد في عون أخيه ) رواه مسلم

جزاك الله خير
الدووووخي
13-03-2009, 02:56 PM
والله مشكله الله يكون في عونكم ,,,

عزووز الله يجزاك خير ماتقصر ,,,
كحله
14-03-2009, 10:58 AM
وين راح البرجس منه اللي جاء بداله ومن وين هو جاي
الشامخ
16-03-2009, 10:35 AM
عزيزة نفس مشكوره كلام في الصميم وهل يعقل وزارة التربيه بالكويت تحن على بناتنا أكثر من مسؤولين الخفجي ياللعجايب ؟؟؟ أوخيتي خلينا نسكت أزين .. لأنه لاحياة لمن تنادي ...
راعي المدينه
16-03-2009, 01:25 PM
الله يعينكن ويساعدكن ..الحل ارسلي ايميل لنائبة الوزير ..اشرحي المشكله ..تجدين ايميلها بموقع الوزاره ...على فكرة سمعت انها رايحه تعين 41 مديرة تعليم ..والمندوبين عندئذ سيرحلون..
خالد الرمالى
17-03-2009, 03:45 PM
الاخت العزيزه
عزيزه نفس
ترى المشكله مو بالمندوب ولا الحكومه بالعكس الحكومه ما قصرت عينات اكثر من 5000 معلمه ولكن المشكله بالواااااسطه
الحين لم تتعين المعلمه بمحافظه الخفجى تدوم اول شهر وبعدين تجيب واسطه وتنقل الى منطقتها واكيييييد بيصير نقص معلمات
والمندوب شنو بيده اذا جاء خطاب من فوق بنقل فلانه من الناس يقدر المندوب يقول لا ؟؟؟؟
يا اخت عزيزه نفس المشكله مو المندوب ولا المحافظ
الموضوع اقوى من المندوب وغيررررره
واخيرآ اتمنى التوفيق لاختنا وجميع الاخوات بالتوفيق والتعين

سوال لتمنى من اختى عزيزه الاجابه عليه
لو نزل تعينها بوزاره التربيه والتعليم وتم تعينها بنجران تدوام او لا
تدور على واسطه علشان تنقل للخفجى او لا ؟؟؟؟؟؟؟؟؟؟؟؟؟؟
عزيزة نفس
20-03-2009, 01:22 PM
مرحبا اختي الغاليه...

والله انك صادقه في كل كلمه قلتيها...

الوظايف وسطات ...وكل شي من سيء الى اسوء...

والبيوت مليانه خريجات بالهبل...والنقص كبير..

واثر على طريقة التدريس ...

مانقول الا حسبي الله ونعم الوكيل على كل من كان له دور بهالتسيب...

وكل خفجاوي يبي يرتقي بمدينته...ولكن لاحياة لمن..تنادي


:mad::mad::mad:




اي والله انك صادقه وكلامك مليووون بالميه وحسبي الله ونعم الوكيل
عزيزة نفس
20-03-2009, 01:33 PM
آآآي هذا وانا اشهد انآ طالبه بمدرسه من هالمدارس وكل اللي يجونـآ

مدرسات من اصل واحد ومعروف !!

وحتى الطالبات من هالاصل ينعاملون معامله خااصه !! :(

وبعدين اذا انتي رياضيات احنا بمدرستنا نقص بالرياضيات بقووه !

وحتى الدين والعربي !

تخيلوا للحين مابدينـآ ..

الللللللللللللله يكون في عونكم من جد شي يحزن وش ذنب الي يتعلمون ويجتهدون واخرتها ما عندك واسطه وتجي وحده عندها واسطه وتتعين والمشكله العظمي او الطمه الكبيره ما تعرف من الف والا الباء ودرس ها المسكين عموم اتمني من اختي عزيزة نفس تهتم في التدريس وتترك المستشفيات عنها لانه لا غبار علي الصحه في الخفجي وهي تبذل ما بوسعها كيفية الحرص علي مراجيعنها ونشكر الشئون الصحيه في الدمام طرحها الثق في سعادة مدير المستشفي وتمديد ادارته الفذه والراقيه مع الطاقم الطبي الذين يساندونه


اختي اللي عندكم نقص دامنا بالخفجي وهذا المندوب وكل شي بالواسطات ابيك ترددي بس يالليـــــــــــل مطولك

ومشكوووره خيتووو






اشكرك ياخوي على ردك على موضوعي....

وبالنسبه للمستشفيات بالخفجي والصحه مو افضل حال من التعليم..

واكبر دليل ان المستشفى الحكومي يسكر واذا مو متأكد روح الخميس وبتشوف بنفسك لاني مااتكلم من فراغ انا اتكلم على اساس وتجربه بنفسي مو ناقلتها عن طريق اشخاص....
وعندك المستشفى العام بالمحدود شوف حالات الوفاه اللي صارت فيه بسبب اخطاء طبيه واهمال...
عزيزة نفس
20-03-2009, 01:38 PM
اتوقع مشكلة التوظيف ونقص المعلمات في المدارس مو بس بالخفجي على مستوى المملكه ككل والمشكله هاذي تحملها وزارة التربيه وديوان الخدمه فالوظايف والتعين تجي
من عند الخدمه المدنيه والمدارس مالها علاقه بالتوظيف
والمحافظ ماله علاقه بعد في التوظيف
والله يرزقك اشالله بالوظيفه
لكي مني ارقا التحايا


اشكرك ياخوي على ردك عالموضوع ..

بس ردي عليك نفس ردي على الاخ سلطان ياااليت تشوفه..

وابيك تعرف اني مااكتب شي انا ماادري عنه ..
ولا اتبلى على الناس...
عزيزة نفس
20-03-2009, 02:04 PM
انا احبكم ياهل الخفجي وللامانه اني اي شي في صالح اهل الخفجي انا اسعي فيه ولكن اصبرو علي ايام وراح اجيب لكم فاكس ترفعون عليه اسماء وبيان كل العاطلات عن الوظيفه وتقدم فيه شكوى بصيغه حلوه تبين معاناه كل خريجه كليه او جامعه فيها ومالكم الا من يتابع الفاكس لكم من يوصل ولين اخر شي ان شاء الله

انا بالخبر وبابي مفتوح لكم جميعا واللي ينقص عليه شي ولا معامله في الشرقيه لايرده الا لسانه باذن الله اني اسعى له لين تخلص وانتظرو الفاكس عن قريب وابشروووووو ياهل الخفجي يشهد علي الله اني احبكم وانا ماعرفكم الا معرفه نت ومن خلف الشاشات لكن انا مسقط راسي الخفجي وسري منقطع عندكم

اشكرك يااخوي على احساسك بمعاناتي وبمعاناة الكثير من خواتي

ومشكور والله معروفين اهل الخفجي اهل الفزعات ..

ماقــــــصرت ابد ..كفيت ووفيت
عزيزة نفس
20-03-2009, 02:07 PM
وأشكـــــر الجميع على المرور والردود ماقصرتوا ..

حيآكم دووووم ..



...
يحب الخفجي
20-03-2009, 03:30 PM
الله يفرج همك اختي عزيزة نفس وتتعينين بإذن الله انتي وغيرك من بناتنا

بس مادام العطيشان محافظ الخفجي انسي العدل اختي

انصحك لاتعبين نفسك دوري لك واسطه وريحي نفسك
عزيزة نفس
23-03-2009, 03:04 PM
اشكرك ياخوي على ردك واملي برب العباد كبير ....

واعذروني على ردودي المتأخره بس تعرفون مشكلة ال دي اس ال ...

الخفجي المنطقه المنكوبه...اعتقد في احد داعي عليها ..


مشكووووووووووووووووورين كل اللي تفاعلو معاي بالموضوع والله كريم ان شاء الله وحبيت انكم تشاركوني معاناتي ولا المندوب والمحافظ والتوجيه ماحولك احد..

بس واسطتي اكبر منهم مليوووون مره واسطتي اللي اقوى منهم اللي خلقهم رب العالمين..