,,/ ,, من التاريخ للتاريخ ,, / ,, [الأرشيف]

حمد الدليهي

15-06-2009, 02:35 PM

محمد يعتزل صيد الحباري

مؤلفاتي رقم 1

اعتاد الصقار محمد مع دخول موسم القنص ونقلة الطير ان يستعد استعداداً تامًا للمقناص في طيره ِ الصقر الحر والذهاب إلى مدارج الحباري التي يرتادها كل عام , ولكن حدث مالا يتوقعه عندما وجد ان هناك من يقنص لغيره ويحتجز الحباري حسب توصية مشروطه , وهذا القنّاص عندما يجد حباري يُبلغ عنّها صاحب التوصية والمقابل مبلغ مالي مغري , حاول محمد ان يتقدم في ذهابة للمقناص قبل بزوغ طلوع الشمس إلى الأماكن التي من الممكن ان يجد الحباري فيها ولكن من استمسكوا بالتوصية افضل من محمد للذهاب للمقناص مبكراً وحجز الحباري في اماكن مراتعها .
قرر محمد ان يترك المقناص نهائياً ويطلق سراح صقره ُ وتمثل بهذه ِ الأبيات مخاطباً طيره قائلاً .

ياطير ماعاد لي ياطير بك حاجه=دام الحبارى تباع وعادها تفلي

ناس ٍ من الفجر شرط إيجار دواجه= تسري على النور قبل المسلم يصلي

لحظة تقص الأثاري جوك هراجه= يسترفعونك لو أنك فيهم مهلي

اليوم ياطير مثلي شاف مخراجه= ماعادلي بالصقارة جعلها تولي

بفك سبقك وهاجر والولي ناجه= خلك بروس النوايف دوم متعلي

بقلمي

حمد الدليهي

15-06-2009, 02:40 PM

ساره وخبل الحاره

مؤلفاتي رقم2

سارة فتاة نشأة في ظل رعاية والديها وتبلغ من العمر 19 عاماً ومن بيئة شعرية وأخذت الشعر وراثة , لها الكثير من القصائد وهي اجمل بنات الحي والمتفوقه في جميع مراحلها الدراسية منذُ طفولتها , تقدم لها شاب من ابناء الحي ليس اقل منّها نسباً ورفض والدها لأحتجاج عمّها الذي أحتجزها لتكون زوجة لأبنه الذي لاتكتمل فيه مواصفات الزوج
الذي تتمناة كل فتاة زوج ٍ لها .
سارة كانت ترغب بذالك الشاب الذي تقدم لها على حسب ماسمعت من حسن سيرته وخلقه وكرمه لضيوفه وجيرانه .
ذالك الشاب رحل من المنطقة بأكملها بعدما رفضه ُ والد ساره , وبعد مرور الأيام تزوجت سارة ابن عمها وجاءت موافقة سارة ارضاءً لوالدها وليس برغبتها .
وبعد اسبوع من زواج سارة بدأ الحزن عليها وتضرب اخماساً بأسداساً تحسراً على شبابها مع من لاترغبه .
يزور ساره بعض النساء من الحي لمباركتها بالزواج واطفالهن بصحبتهن واذ بزوجها يلعب في حوش المنزل مع الأطفال ويقوم بطي القراطيس ويرميها عالياً على شكل طائره تطير بالفضاء ... اتى والد ساره بعد ايام وسألها عن حالها فاجابته بهذه ِ الأبيات ..

يابوي زوجتني خبل ٍ من الحاره=من شان يابوي دمه قارب ٍ دمي
يابوي لجلك عليه النفس صبّاره=ياليت يابوي ماهو لي ولد عمي
خبل ٍ يمينه تساوي عنده يساره=واهوّن لو أنه من أهل البكم والصمي
بالحوش يلعب مع الأطفال طياره =مجنون يابوي فيه العقل ماتمي
شفي مع اللي لضيفه تشتعل ناره=دايم على واجب الجيران مهتمي
يابوي ياليتني عنده وفي داره=هداج تيما غزير وصافي الجمي
هذاك مافيه غيره مشغل ٍ ساره=ماهوب خبل ٍ فضيخ مسبب ٍ همي

بقلمي

حمد الدليهي

15-06-2009, 11:40 PM

الكهرباء والمواشي

مؤلفاتي رقم3

تزوج عبدالله شوق وهي فتاة احلامة التي يتمنى ان يأخذها على كتاب الله وسنة رسوله , عبدالله عبّْر لمعشوقته شوق مامدى عشقه لها وبأنها هي الفتاة التي يتمناها , من جهتها عبّْرت شوق بِفرحها عن ماابداه لها زوجها وهما في بداية زواجهما , ولكن هناك مالم تعلمه شوق ان زوجها عبدالله من متداولي الأسهم ووضع جميع مالديه من مال في سهمي الكهرباء والمواشي , وحدثت انتكاسة السوق وخسر عبدالله جميع مكاسبه التي جناها , وأخبر زوجته شوق واصبح الوضع النفسي مضطرب عند عبدالله بسبب الخسارة الهائله , افتقدت شوق الكلام العذب والمعسول التي اعتاد عليّه من زوجها عبدالله بعد خسارته بالأسهم .
فقالت له الآن شعرت بأن سهمي الكهرباء والمواشي ارفع من سهمي لديك وعلمت انني طحت من قلبك .

رد / زوجها عبدالله عليها بهذه ِ الأبيات .

ياشوق حبي لك من العام ياشوق=ياشوق ماهو توه اليـوم ناشـي
سهمك بقلبي طالعه نسبته فوق=ماطاح مثل الكهرباء والمواشـي
مؤشراتك وسط قلبي لها سـوق=وسهمك قيادي ماانت سهم ٍ خشاشي
خلف المحاني صادق الود موثوق=ماينقطع لوحاولـه كـل واشـي

بقلمي

حمد الدليهي

15-06-2009, 11:57 PM

رجعته مستحيله

مؤلفاتي رقم4

قدم احد الشباب طالباً للرزق من نجد إلى سواحل الخليج العربي عندما كانت الحاله المعيشيه صعبة قبل سنوات طفرة النفط والنهضه العمرانيه الحاليه والتطوير الملحوظ بصفه عامه على دول الخليج , رست اقدام ذالك الشاب عند احد الأماكن المأهوله بالسكان آنذاك وهي احدى المدن الكبرى التي تطل على شواطيء الخليج العربي حالياً .
اصبح الشاب في ضيافة تاجرمن كِبار تجار المنطقة ممن يمتلكون سلسلة من القوارب البحرية ويسمى النوخذة وله الباع الطويل في استخراج اللؤلؤ .
تم توظيف الشاب من ضمن موظفي ذالك التاجر وبدأ بالعمل وفي احد الرحلات البحرية سقط الشاب في اعماق البحر وتوفي .
والدة الشاب وبعد ان اعياها الأنتظار اتت تبحث عنّه وبعد السؤال توصلت بالأرشاد إلى منزل ذالك التاجر ووجدت ابنتة وسألتها عن ابنها الشاب المفقود ورمزت له بإسم الغالي وقالت أرأيت ِ غالياً رحل منّي قبل سنتين وقيل لي أنه لجأ إليكم لطلب الرزق , ويبدو أن الفتاة ابنة التاجر مغرمة في ذالك الشاب .. فاأجابت والدته بهذه ِ الأبيات

ياناشده عن غال ٍ غاب مده=غاليك غاب ورجعته مستحيله
ماعاد له في يمة الدار رده=حكم القدر لاصار مافيه حيله
حر ٍ كفخ ماعاد .. عاد (ا)لمهده=عليه دمعي كل يوم ٍ وليله
ياليت ماله مع هل الغوص شده=ليته قنص للخبت والا الطويله
لاعادها الله من دواخل مكده=اللي تفرق بين خل وخليله
نفسي على غيره تراها مصده=والعين ترفض في مشاهد بديله
بقلمي

حمد الدليهي

23-06-2009, 04:59 PM

سجل حضورك بيت شعر وخاطره=والخاطره ماهي لكاتبها رصيـد
ياطيبها كـل البيـوت العاطـره=اللي تجي من راس تاريخ القصيد

التاريخ

حمد الدليهي

23-06-2009, 05:02 PM

بعض الأحيان يراودني الشك بأنني اذكى شخص في العالم

:
:
التــــــــــــــــاريـــــــــــــخ

حمد الدليهي

30-06-2009, 11:28 AM

حبة خشم معها على الخد بوسه=للي بنى قصر المحبه والأشواق
في وسط قلبي ماتغيّر جلوسه=الروح ترخص لجل عينه وتنساق

التاريخ

حمد الدليهي

30-06-2009, 11:37 AM

ياقاسي القلب ليه الهجر ياقاسي=غلاي سهمه نزل والا خضر لونه

التاريخ

حمد الدليهي

30-06-2009, 11:53 AM

الشعر في غير ساره طايح ٍ سوقه=وان جبت فيه اسم ساره تصعد اسعاره
ماهي على الزين بين الغيد مسبوقه=الناس في زينها بالوصف محتاره
من شافها ماسلمْ وان تل معلوقه=من خلته مركب العشاق مازاره
وليّا مشت مشيها ماهيب مطفوقه=ماهي من اللي حكاية شارع الحاره
وانا على غيرها مااحب معشوقه=ضحية العشق كله من سبب ساره

التاريخ

حمد الدليهي

30-06-2009, 05:03 PM

زاوية خصرك

شطبت غيرك على قمة غلا وابني=ابني مساحات قلبي كلها قصرك
عندي قناعه ياغيرك مايناسبني=من شفت عينك وحنيّة زاوية خصرك
مواكب الشوق في حبك تواكبني=مسيرة العشق من طولك إلى قصرك
الملح بالماء يذوب وُيامذوبني=ارفق علي وان رفضت الرفق بي بصرك
كلّي حلالك تفرحني تعذبني=اهم حاجه معي في عالمي حصرك
سافر بلاصد بعدنّْي وقربّني=تبّعدك عنّي مسافاتك وانا اختصرك
النيل في مصْر شرّْبْ وانت شربني =ضامي مواصلك خذني نيّلك وُمصرك
اكتب بكْ الشعر فيك الشعر يكتبنّي=نصري على الشعر وانت اللي علي نصرك

:
:
:

لاتردني واطلب الله لايعاقبني=اجّْمعك توت وُمذاقه حلو واعصرك

التاريخ

حمد الدليهي

30-06-2009, 05:28 PM

مواثيـق الغـلا

اصير لك طفل الحجاره .. واخر .. احداث العـراق=فـدوه لعينـك .. والعـواذل خيّـب الله سـدهـا

والزحمه اللي ماتسبب .. لي .. متاهه .. واختناق=مـالـد بـالـي يمـهـا والشايـفـه مالـدهـا

لعبة مطافيـق الحـواري مالهـا عنـدي سيـاق=الناقصـه فـي دنيتـي مهمـا حصـل ماعدهـا

انتي تعالي .. واسكني .. داخل .. خفوقي بانطلاق=اللـي علـى خبـرك (مواثيـق الغـلا) ماهدهـا

الغيد في خـارج نطاقـي وانتـي اللـي بالنطـاق=النفس في غيرك حشي يابنت محد ٍ .. شدهـا

يايوسفيه في جمالك فاق حسنك .. فـاق .. فـاق=علـى بنـات آدم وحــواء ماتـواجـه نـدهـا

مسلوبة العاتق نحرها .. كنّه .. الصبـح انفـلاق=ممسوحة السرجوف .. ناحل .. خصرها .. ماضدها

ماهي معاقه وان مشت تمشي مثل مشـي المعـاق=لادبرت .. مـوج البحـر .. كنّـه يبـاري قدهـا

طرقا .. ليان ٍ .. عودها .. طارف ملامسها رّْقاق=كن البروق اللي تكاشـف فـي جوانـب خدهـا

ريميـة ٍ .. ماتلتفـت (لاهـل) التلفـق والنفـاق=هي حدي اللي ماتعداها .. وانـا اللـي .. حدهـا

أخفي غلاها عن حسود ٍ .. لاسمع طرياي ضاق=يمـوت ماحقـق مُنـاه ورغبـتـي .. مـاردهـا

لعيونها طفل الحجاره .. صرت .. واحداث العراق=بعض الوشاه .. اللي تحـاول خيّـب الله سدهـا

التاريخ

حمد الدليهي

02-07-2009, 01:45 AM

القلب حن وحـام قرنـاس ذكـراك=بالذاكره .. مامر .. مخلوق غيـرك
ملواح حبـك كـل ماحـل طريـاك=خلف المحاني مادعى غير طيـرك
بدعت فيك الشعر والصوت غنـاك=عزفت لحن وفيه جيت استجيـرك
وين انت ياللي عدّني من ضحاياك=وينك قبل موتي تحاسب ضميـرك
جيتك غلا .. ولاحريب الغلا .. جاك=سترة نجاتي بين شـرك وخيـرك
سجات فكري فيك وُيبلّـه اهـواك=واحس نسناس الطبيعـه عبيـرك
مشاعري يمـك وُترفـض تعـداك=تحمل وطن بسمك وشعبك واميرك
والقلب موتـه كـل ماحـل ذكـراك=يرفض يطاوع في هوى شخص غيرك

التاريخ

حمد الدليهي

08-07-2009, 01:22 PM

صاحب الموضوع جنبْنّا نقاشه=المباني من بناها ماهدمّها
الذكي يفهم لها من خِلّف شاشه=الغبي من خِلّفْ شاشه مافهمّها
داخل البستان طيرتْ الفراشه=الفراشه ماقواها من هجمّها
قبل شوف العين للقلب انتعاشه=بانت الرايه ورفرف ليّ علمّها
المطر هتان يامحلا رشاشه=لاح برق ٍ وسّْمْ ودهوُريْ وُسمّها
ناش قلبي من ورى الاضلاع ناشه=الجسور اللي على القلب أقتحمها
بحر جده مالها في حد طاشه=الخليج اخر محطات ألّقلمّها
الحذر مطلوب مافيني دباشه=ماحلا الفرصه على اللي يغْتنمّها
النجاشي لودرابي مع نجاشه=لودرابي ساق ذيبه في غنمها
والذكي ماطافته من خلف شاشه=والغبي يقعد وعمّره مافهمها

التاريخ

حمد الدليهي

08-07-2009, 01:24 PM

ياشبيه الريـم ياساكـن سكاكـا=يابعد منهو عدو ٍ لـي سكنّهـا
ابتسم وعيـون عذالـي تباكـا=نيّتي لك صافيـه محـد ٍ دكنّهـا
أخذ كره الغيـر فينـي ماخذاكـا=شخصك اللي ماخذ الروح وُمكنّها
مرحبا واقلط على قلبـي تراكـا=دلتك بالصدر ماغيـرك ركنّهـا
جل من بالحسن والهيبه عطاكـا=لو ماخاف الله وصوفك قلت كنّها
شاعرّْك مادق في اصله شراكـا=الحـروف اليعربيـه مالكنّـهـا

التاريخ

حمد الدليهي

10-07-2009, 02:27 PM

الغشمشم : هو الرجل المغوار الذي لايردعه شيئ عما يريد

حمد الدليهي

11-07-2009, 04:28 PM

اكتب الأبيات في قسم الصخب=والصخب قسمه لعب فيني لعب
لعب هزازي وهو بالمنتخب=كم حارس داخله منّه رعب

التاريخ

حمد الدليهي

14-07-2009, 01:33 PM

سقوط شعراء في بحر الخليج

قرر احد رجال الأعمال ان يفتتح قناة فضائية شعبيه وهو لايجيد ولايدرك متطلباتها , استنجد بثلاثة شعراء ممن شاركوا في مسابقة شعريه كبيره وثلاثة إعلاميين شعراء ايضاً ولديهم إلمام ثقافي وأدبي , وألتقى بِهم على مأدبه مختصره للنقاش في شاليه له في دوله خليجيه ويطل الشاليه على شواطيء الخليج العربي , تم وضع العشاء على جلسه مركبه وقواعدها تنغمس في ماء البحر منذُ
عشرات السنين مما جعلها تتواكل من ملوحة البحر , ولحظه اثناء قدوم المدعوين للعشاء سقطت الجلسه في اعماق البحر وسقط ومن يأكل العشاء ولم يبقى إلا من تأخر يغسل يداه وشاهد المنظر وهو متألماً وضاحكاً .

بقلمي

حمد الدليهي

19-07-2009, 03:25 AM

والله انّي كل مارحت عن حضرت جنابك=جابني لك سايق الود مع صدق المشاعر
انت قصر ٍ للمحبه وانا للقصر بابك= من ورى نبض المعاليق لك مشتاق شاعر

التاريخ

حمد الدليهي

24-07-2009, 01:06 PM

http://www.alsayra.com/newsm/605.jpg (http://www.alsayra.com/newsm/605.jpg)

ياقاف كانك صعب والله لاروضّك=تمشي على كيفي معي ماتعوصي
شاعرك ماغيري وذهني يلاحظك=يدراك والمعنى يجيبه خصوصي
ماني غشيم ٍ لاتولاك يمرضك=لابله الا فيك حاشم نصوصي

التاريخ

حمد الدليهي

24-07-2009, 01:08 PM

http://www.albdoo.info/uploaded2008/2/61224455201.jpg

مرهي عليها وعيني ماتفارقها =متعلي ٍ فوقها والجو قدامي
كم طير كبده عليها زاد حارقها =وقع على جنب والا دبر وحامي

التاريخ

حمد الدليهي

24-07-2009, 01:24 PM

نويت اجيـب .. اسمـك بدايـة قصيـده=مع كل شطـر اول حروفـه مـن أسمـك
وافتـح لـك الصفحـات عنـدي جديـده=العقـل قسمـك وايضـاً القلـب قسمـك
رفضـت غيـرك يالعـنـود الفـريـده=فـي عالمـي رسمـك ولاغيـر رسمـك
هذا هو أخـر حـرف واسمـك يصيـده=اللـي عـرف برقْـكّ وهتـان وسـمّـك
قدامـك اسمـك صـار جملـه مفـيـده=أيمن ومـن خلـف المحاديـب عسْمّـك
الأسـم الاخـر .. والثـريـاء بعـيـده=عليـك ياللـي كـل همـك .. بجسمـك
معنـاه (لافــي) والفعـايـل مجـيـده=وان ماحسمّـتـه مايخلـيّـه حسّـمّْـك
يمكن .. يسوُّي .. خير .. وإلا .. مكيده=يضوي .. نسيم .. ونود .. ماهوب نسّمْك
ويامشغلتنـي فيـك جـبـت القصـيـده=يبطـون .. مايلقـون ماجابـوا اسمْـك

التاريخ

حمد الدليهي

24-07-2009, 01:30 PM

ياقـوم يالـلـي خيلّـكـمْ ماتـسـرّج=هي خيـل والا تشبـه الخيـل وذّهيـب
فرسانكـم يـاقـوم قـامـت تـمـرّج=فرسان عرض ٍ .. ماتـودي ولاتجيـب
انـا مشـاهـد عرضـكـم واتـفـرّج=وضيوفكم .. حلّـو .. محـل المعازيـب
االعاذل اللي مـن حيّـاه .. (ا)متبـرّج=من شبته قاصـر إلـى طلعـة الشيـب
همـاز .. لمـاز ٍ .. سـوات المهـرّج=مايستحي والعيـب فـي ساقـة العيـب
في كل مجلس ... كل يـوم (ا)يتهـرّج=منـدوب ماقبلـه وبـعـده منـاديـب
مـن مدرسـة راس النميمـه تـخـرّج=يحمل شهادة .. صنف .. شذب العراقيب
بظهـور خلـق الله مْسـوُي مُــدرّج=طيـارة لسانـه ماتقلـع علـى الطيـب
وحاولـت أدرجهـا .. وعيّـتْ تـدرّج=مـع الــذي مايفتـهـم للمواجـيـب
فـراج مـن شانـه تركـتـه مـفـرّج=وانا عرفت الذيب واللـي ماهـو ذيـب
مانيـب يمـك يالطـريـق المـعـرّج=مادام .. حد .. (ا)نهايتك قفلت(صليـب)

التاريخ

حمد الدليهي

24-07-2009, 01:37 PM

لوضاق جوف البحر لوضاقت الحره=الراي في طرقتي ماصـار رايّينـي
ان قالـه الله ماعـوُّد واتبـع الجـره=لوكان ربـع المسافـه بينـك وُبينـي
هذا زمـان ٍ تسـاوى خيـره وُشـره=الكلمـه الطيّْبـه ماعـاد ترضينـي
باح العـزاء مابقـى مايـزن الـذره=خلاص صبري قضى والموت حاديني
لاصار جرحي علاج الطب ماسـرّْه=ولالقيـت الطبيـب اللـي يداويّنـي
والله لاسولـف وابيّـح مـره وُمـره=اشرح وَبيّْن عن اللي صايـر ٍ فينـي
امشي وُنفسي على طول الزمن حره=وانساك ياللـي مـع الايـام ناسينـي
واعيش واميّز الحلـوه مـن المـره=اقول يادمع عيني كـف عـن عينـي

التاريخ

حمد الدليهي

28-07-2009, 01:38 PM

انا سعودي وقلبي قلب ٍ كويتي=جنسيتي لحالها والقلب جنسيه
التاريخ

حمد الدليهي

28-07-2009, 06:05 PM

http://www.al-wlf.com/2up/uploads/5089300586.jpg (http://www.al-wlf.com/2up/uploads/5089300586.jpg)

هاكم وصوف الزين ياناس هاكم=ياخذ من الصوره وصوف وملامح
العين عين اللي على كف حاكم=لاشاف برق الريش ماقال سامح

التاريخ

حمد الدليهي

28-07-2009, 06:08 PM

http://www.asharqalawsat.com/2009/01/02/images/economy1.501254.jpg

سمعت في سوق الاسهم جني الارباحي=عبارة ٍ من يحلل صار قايلّها
والا انت يازين عندك جني الارواحي=مؤشراتي تحت نسبه منزلّها

التاريخ

حمد الدليهي

29-07-2009, 10:43 AM

تمر الايام وانت الغايب الحاضر=هذا حضوري غيابك فيه سجلته
تعال واقرب محاجر عيني وناظر=النوم في حزته من شانك اجلته

التاريخ

حمد الدليهي

02-08-2009, 12:55 AM

نقلت المستحيل اللي عجز غيري على نقله=تعديت الفضاء ومعانقاته ماطمن راسي
خفيف الوزن في حجمه وفي معناه ياثقله=يطيح اكبر جبل والا خفيف ٍ ناقله راسي

التاريخ

حمد الدليهي

03-08-2009, 02:04 AM

http://pms.panet.co.il/online/images/articles/2007/10/11-10-07/1_8.jpg (http://pms.panet.co.il/online/images/articles/2007/10/11-10-07/1_8.jpg)

قالوا .. حمد ماشفت باب الحاره=تعجبك حلقاته وله تشتاقي
اكبار نصف المجتمع واصغاره=يتابعونه والمسلسل راقي
انا متابع حارة الغداره=ضد الفلسطيني وضد عراقي
اشن غاره واتصدى غاره=مااحسب حساب الاولي والباقي
والزند يقدح من لهايب ناره=ماهي سوالف ملتوين الساقي

التاريخ

حمد الدليهي

03-08-2009, 02:32 AM

الطير عانق بالفضاء خمسة طيـور=ياصعب تجويده ليّـا ادبـر وحامـي
لو كنت صقاره على الطير مقـدور=وان ضاع ماتلقـاه كـف الحرامـي
بيني وبينه حالت جسـور وجسـور=وعبورها دونـه يحـول الجهامـي
همست لك والهمس ياطير بسطور=وموثقه في بعـض مثـل اللحامـي
لك بيت شعر وبيت بالقلب معمـور=واللي في صدري مايجيّـه الهدامـي
وابو وعد عرقوب منّهـي ومامـور=بدايـتـه ماتختـلـف بالختـامـي
قمت أتغيبا .. في ذرى العمي والعور=حتى سلامي قمـت أغيّـر سلامـي
والذود ذودي كلهـا ورّد وصـدور=والعد تسقـي جمتـه كـل ضامـي
غيم السماء قاطب وهتانـه حـدور=برقه يلوح وشـق روس العدامـي
والوافي اللي لـه مكانـه وجمهـور=مالـد بالـه فـي صغـار المقامـي
اهل الوفاء والجود طابـور طابـور=الكل منّهم صايـر ٍ .. لـه حزامـي
وذياب بن غانم على الصيد مشهور=شلفاه من بيـن اللحـم والعظامـي
ماهو على بعض المخاليق مجبـور=شذابة العرقـوب والقـذف حامـي
ماهمتـه شلـة منّصـر ومنصـور=ماهمتـه والمـوج زاجـر وطامـي
والطير لو قفى مـع جملـة طيـور=ماطار طيـر إلا وقـع يـوم حامـي

التاريخ

حمد الدليهي

06-08-2009, 05:41 AM

لا واحليلك يابو ورده وابوزهره=في تالي الوقت شفتك صرت طماعي
تصعد على متن غيرك راغب الشهره=شهرة غبا .. ماتسمى شهرة الواعي
لاتحسبّنْ الأوادم منّك منبهره=الناس ماتجهل انّك مالك ابداعي
انا عرفت الجمل والذيب والمهره=والراس والساق قبل الشيخ والراعي
والاانت ماتستحي ياوجه بن فهره=اذلف ذلوف القطا اللي بالفضاء ضاعي
منبوذ خلك تسامر عالم السهره=تندم على ماجرى وتعض الاصباعي
والنيل ماعاد تشرب من صفا .. نهره=اقرب من النيل عندك حب الاكواعي
هالك ربيّعك وحالك مزمن ٍ دهره=في حفرة الذل لك ملفى ومنقاعي
نفسك على طول مدحوره ومنقهره=مسيرتك وصفها مع هبس ملتاعي
كل ٍ يشوتك وقلبك غايب ٍ طهْرّهْ=الحقد تمتاز به في كل الانواعي

‏
التاريخ

حمد الدليهي

10-08-2009, 12:06 AM

رابي خلا خلك على ماانت رابي=القلب عنّك صد والعين صدت
لاعاد تسألني وهذا جوابي=ركايبي شدت وقفّت ومدّت

التاريخ

حمد الدليهي

21-08-2009, 12:36 AM

الشدايد تكشف اللي معادنهـم ذهـب=من خليج العرّب والا تهامه والحجاز
راعي المعروف يبقى وطيبه ماذهب=يوم بعض الناس طيبه على قيد وُحجاز

التاريخ

حمد الدليهي

24-08-2009, 02:07 PM

ياعريف الأمسيه هداهدا=ماتروح حكايتك ويصير خير
انت ماذمك ولا فعلك ردا=والخطا من رشحك فينا تدير
ياولد ماهمني منهو بدا=صرت الاول صرت والا بالأخير
استلم علمي واخذ علمي قدا=وين ماوجهت تلقاني سفير
بالأصل والشعر ماتلحق مدى=وانت خلك من تحت خف البعير
رح تعلم لين يصبح لك صدا=مع وجيه الخير واشهر ياشهير
هذي الليله بمشيها فدا=لجل بعض الناس والشعر الأمير
التاريخ

حمد الدليهي

27-08-2009, 01:57 PM

ياللي تلد العين من يوم مريت=اكشف لغة عينك بدون الكلامي
لاتلتفت خلك على ماانت لاقفيت =لاتجرح صيامي على اول صيامي

التاريخ

حمد الدليهي

29-08-2009, 09:45 PM

كل ماسجيت ذكراي للماضـي تعيـد=في زمان ٍ فيه قلبي مع الغالـي سـلا
الغلا في كل لحظه مع المـده يزيـد=الغلا يامتعـب القلـب ماغيّـره غـلا
اشهد إنك أجمل الخلق في عيني أكيـد=والملا بانظارها تختلـف كـل المـلا
القصيد انواع عندي وجامع لي رصيد=صرت انا وبحور الأشعار خوّه وزملا
كل مادونت الاشعـار بانتـاج ٍٍ جديـد=سيرتك مرت على البال ياريـم الفـلا
ماطرالي غير وصفك مع بدع القصيد=القصيده دون طريـاك مافيهـا حـلا
لكن الطرقي على الدرب مطراشه بعيد=البشر قدام عينـه وكنّـه فـي خـلا
رحلته صارت عنيده مع الوقت العنيد=وزلته ماهي بغلطه وصارت لـه بـلا
له ثلاث سنين والجرح طبـه مايفيـد=علته خلف المحاني وجرحـه ماشـلا
ان توفى سبة العشق ماقالـوا شهيـد=حِط في قبره وسيـرة حياتـه ترحـلا

التاريخ

حمد الدليهي

05-08-2010, 08:59 PM

مريت من شانه ولا غيره دواعي مرتي=شخص ٍ يبيه القلب والنيه عليّه مْبيّتـه
وانتم ياعذالي ليّا مريت طقوا .. جرتـي=والا .. لاشفتو ذاك زولي ماردعتوا جيّته
قدامكم لو الهواء حرك طوارف غترتـي=رحتوا مراح مقيط واشجعكم ينتّف لحيّته

حمد الدليهي

27-12-2010, 08:57 PM

تاريخ بالأفعال والشعر تاريخ=من وين ماوجهت قمه وقمه
ماهمني راعي ولاهمني شيخ=مااشره على اللي جاه وجهه ماتمه
مطنوخ راسي يلتفت للمطانيخ =البال مااشغلته على شان خمه
خمه من سلوم القبايل مصاليخ=اصواتهم بالهيلمـه والمـذمـه
حياتهم تطبيل تزمير تنفيخ=ماعندهم مذهب ومله وذمه
كمختهم ياسيّد العرف تكميخ=ماعاد فيهم من فتح ربع فمه
اطيبهم اللي يافهد يشبه الذيخ=ضاع ومعه ضيّع يدين ٍ مهمه
والدار ماهي دار دبكه وبطيخ=اللي تشابه دار خاله وعمه
على كفالة نصف شعبك طبابيخ=الكل منّهم شامته تحت كمه