ظاهره التسول بالخفجي

[ابو ناصر99]

أسعد الله مسائكم بكل خير .. هذا الموضوع جدا خطير ونأمل تدخل كل من يهمه الامر لان الخفجي اصبحت في الفتره الاخيره بؤره للتسول لافراد ومنظمات اخذت هذه المهنة وسيلة تجارية ..
والله الموضوع خطير جدا . حتى اخذت بعض المتسولات طرق جيدة واستخدام السحر والشعوذه لهذا الغرض .
بالامس القريب اثناء وجودي لاخذ طلب من مطعم البخاري لاحظت امرأتين كل وحده ماخذه زاوية خارج المحل . وعند خروجي من المطعم قدمت وجبة لاحد المتسولات فرجعت كيس الطعام علي تقول ما ابغاه ابغى فلوس فقط وعرفتها من لهجتها بانها ماهي سعودية .!!!!
-----------------------------------------------
وتذكرت هذا الموقف في شهر رمضان الماضي قبل الافطار نفس الشئ جميع المتسولين مايأخذون طعام وقصدهم جمع المال لو تعطيهم طعام تلقاه عند درام الزباله اجلكم الله .
المهم عند خروجي من صلاة التراويح مسجد الملك عبدالعزيز لاحظت تجمع العشرات من النساء قادمات من احياء الغربية والتملك والمثلث وجاء باص ابو 25 راكب وحملهم .. السؤال من يقوم بتشغيل هذه النساء ومصلحة من ؟؟!!
-------------------------------------------------
95% من المتسولين ماهم سعوديين وجميعهم مخلفات العمره والحج لكن يستخدمون الزي السعودي للتظليل على المجتمع ...
في محطات البنزين عند منفذ الخفجي ومحطة الخنيني يقومون بالتحايل على المسافرين بأنهم عوائل متعطله ويريدون ثمن البنزين .. ويطلبون 100 ريال . ولو تعطيهم اقل يزعجونك لازم 100 .
موضوعي هذا ليس حسد لهم لكن قاموا بتشويه صورة البلد خصوصا بأن الخفجي منفذ لدول الخليج للقاصدين الكويت
الدولة ماقصرت كل اسره محتاجه يصرف لها ضمان اجتماعي شهري- وبالاضافه الى صرف جميعة البر الخيرية بالخفجي والمستودع الخيري .
وجمعية البر لها دعم سخي لجميع الاسر نظرا لتبرع ارامكو لاعمال الخليج السنوي ..

وفي الختام نأمل تدخل جميع المسؤليين او ايجاد مكاتب مكافحة تسول التابعه لوزارة الشؤون الاجتماعية للقضاء على هذه الظاهره.

[ابو فهد 77]

ابو ناصر

ليه الحسد يااخي ارجو ان لاتتخذ الحسد والازعاج منهجا لك في هذه

الحياة الورديه.

انت في موضوعك تطلب من الجهات المختصه التدخل .

طيب باعتقادك من هى الجهه المختصه.

الشرطه

المحافظه

البلديه

مكتب العمل

مستشفى الخفجي

الجوازات

المرور

الهلال الاحمر

جمرك الخفجي

حرس الحدود

لازم تحدد الجهه المسئوله لسبب بسيط جدا .حتى نقول لهم صح

النوم ياعرب منظرنا صار زي الزفت في كل صرافه وعند كل مطعم وفي

المحلات الكبرى شبه حصار وبطريقه منظمه ومدروسه عصابات

متخصصه ومدربه يتنقلون بسيارات ضخمه وبنظام الشفتات . والجماعه

اصحاب الاختصاص ولاهم هنا والمشكله يقولك مكافحه الارهاب ومكافحه

التسول ونحن نقول مكافحه النوم والكسل لجهات الا ختصاص النائمه.

[عبدالله بركه]

الله يعطيك العافية يابو فهد على الطرح الجميل والموضوع المميز


نعم كثرت ظاهرة التسول عند جميع المحطات والمطاعم

وأكتشفت أنا شخصيا أنهم متخلفين لنظام الأقامة والعمل عندما حدث

لي موقف بمحطة مدخل الخفجي عند الجمارك . عندما أتت إمراة

وتقول أن سيارتهم لايتوفر بها الوقود . وبعد أكثر من ساعة مررت

على المحطة ووجدتها تطلب من جميع السيارات المتواجدة بالمحطة

وراقبتها لفترة . ووجدت أن بالمواقف شخصين ينتظرونها على سيارة

من نوع فورد . وقمت بإبلاغ الشرطة عن القصة . وأتوا وأقتادوا سيارتهم

ومن فيها الى مركز الشرطة .


لذا نرجوا التنبيه وخاصة لهذه الفئة الغير معروفة .

والمعروف أيضا أن الفقراء بالخفجي معروفين لدى الجمعيات الخيرية

ويصرف لهم من قبل الدولة إعانات .

ومن المستحيل أن يقف أحد منهم للتسول عند المجمعات التجارية

[هوجاس]

ذكرني هالموضوع بأيام زمان الله الله الله :eek:
كان الواحد منّا على نيته من يوم يشوف وحده بعباتها وماسكه وليدها او بنتها وتشحذ كنا نتسابق على من يعطيها اللي يقدر الله لين اكتشفنا بعد فتره ان فيه راعي سوبر يجي الساعه 6 صباح وينزل 13 ورع و7بنات وكم حرمه وينشرهم تقول حطب كيرم ( الكيرم لغير الناطقين باللغة الهوجاسيه لعبه دوليه :biggrin:) وعند الساعه6 مغرب تحصله مصفط ويعد الورعان والبنات والحريم وهو يركبهم السوبر

هذا المنظر لن يغيب عن اعيننا إلاّ بالتشديد على هؤلاء من الجميع والتكاتف للقضاء ع هذه الظاهره والسؤال الذي يسدح نفسه
كيف ياهوجاس ؟؟

المعروف ان مكافحة التسول هي المعنيه بذلك ولعدم وجود فرع لها بالخفجي فأن بلدية محافظة الخفجي هي المعنيه بذلك ولكن اقتصار هذا الامر ع البلديه فقط دون اسهام من الجميع لن تستطيع ذلك لهذا اجد اننا جميعا معنيين بالامر متى ما اردنا القضاء على ذلك حيث نبادر كمبادرة اخونا عبدالله بركه وكذلك ع اصحاب المحطات والمطاعم والمحلات وغيرها من المواقع التي يتواجدن به المبادره

[شرشر]

يعطيك العافية اخوي ... وكلامك عين الصواب ...

لاحظنا انتشار المتسولين بالاونه الاخيرة ...

لاهنت اخوي ..

تقبل مروري

[خفجاوي زمان]

جزاك الله خير

على التنبية , وفي خطبة الجمعة الماضية بجامع الملك عبدالعزيز حذر الشيخ الخطيب من هذة الظاهرة 0

[كدوش]

الله يعطيك العافيه على الموضوع
بس انا اقول خل العالم ترتزق:cool:

[ابو ناصر99]

كدوش لا يكون انت عضو من الاعضاء

[Roqi220]

ابو ناصر حتى هالمساكين ماخليتوهم بحالهم .!!!!

[أزف الرحيل]

ظاهر التسول ظاهره سيئه ... والله سبحانه وتعالى رزقنا بنعمة العقل


اي شخص محتاج لا بد ان يعمل ...ولا يوجد اي عيب في العمل



المرأه تجد مجالات كثيره للعمل ليس شرطا ان يكون في قطاع حكومي


او قطاع اهلي ...ربما تملك الشهاده او لا تملكها ليس شرطا ..


كثير من النساء المحتاجات اتجهن للعمل في مثلا مجال فن الطبخ وعمل


البوفيهات في بيوتهن وبيعه ....ومنهن نقش الحناء ..ومنهن مجال


التجميل... والخياطه ..صناعة الاكسسوارات اليدويه .....


وغيرها الكثير والكثيييييييير من المجالات لجمع المال وتحسين



الدخل...وافضل من التسول




بارك الله فيك ..ابــو نــاصر

[وين الوفا]

ظاهرة التسول بالخفجي وصلت حتى داخل البيوت
مره حصل لي موقف ( دق جرس الشقه وفلت مين قالت وحده انا اختكم من .............. ( دوله انا ماحبها ولا احب اهلها يمشون على الارض ) قدر الله علينا ومرض زوجي _ طيب ليش ماانتي بديرتك وش جايبك عندنا -المهم كملت ومحتاجين فلوس طبعا انا قلت لها الباب مقفول والمفتاح مع زوجي ما اقدر افتحلك _ بس ابي اصرفها _ قالت ما عليش يا اوختي ادحشي اللي بدك تديني من تحت الباب _( نشبه غصب ) والله خفت انها تكسر الباب _ اصلا ماخش مزاجي انها محتاجه قلت لها توكلي على الله والله يرزقك ما لقيت بوكي قطييييييييعه انا اصلا ما احب هالجنسية (اهل التسول )

[ابوفيـصل]

التسول في تزايد ولا فيه احد ولاكن في تعميم من الشرقيه بعدم التعاطف معهم وعدم منحهم اي شي

وبلاغ الجهات الامنيه

ولاكن الجهات الامنيه يمرون عليهم ولا يسئلون من اين ياتون وشنهي جنسياتهم مع العلم

إن هاذي الظاهره مسؤليتنا كلنا لو نتكاتف ونشدد عليهم ولا نمنحهم اي شي كان ذهبو الي اماكن اخرى معا

العلم انهم يستغلون الدين ويشوهون منظر محافظه الخفجي لئن من راح ينظر اليهم سوف يفتكر انهم من

محافظه الخفجي معا العلم ان كرم اهل الخفجي هو من سمح لهم بالتسول في المحافظه وهم ليس من اهل

المحافظه

فرنجو التعاون وعدم منحهم اي شي ونشدد في ما بيننا لنتساعد على ابعادهم من محافظتنا الجميله

[اليابسي]

كل أعضاء المنتدى مافيهم واحد شغّال بالشرطه واِلا قريب له بالشرطه وينقل له وش اللي يدور أو يوصل الرساله لاِداره الشرطه.........

[aoh500]

وجاء باص ابو 25 راكب وحملهم


باص و ايضا كابرس قديم طويل ( كابرس بقس ) :wink:

[ابوفيـصل]

يجماعه نبي تفاعل ضد المتسولين يجماعه هذولا موراهم غير البلاوي ماشفتو اشكالهم صراحه يخوفون