وش الحل مع حرامية الصناعية بالخفجي ؟

[سليمان الصقر]

السلام عليكم ورحمة الله وبركاته
صباح - مساء الخيرات لكل الأعضاء والزوار ، اليوم جايبلكم موضوع جديد بس قاهرني من زمان ألا وهو موضوع صناعية الخفجي والحرامية الي فيه الي قاعين يسرقونا عينك عينك .
يا جماعة الخير اللي قاعد يصير بصناعية الخفجي نصب ماهو طبيعي وأنا راح ألخص موضوعي بنقاط محدده ومختصرة وابيكم تساعدوني على شان نقدر نشخص المشكلة ونبحث عن حل لها .
1- تدرون أن أنظمة العمل عندنا ما عندها أي شروط مهنية تنظم العمل بالورش يعني الميكانيكي والكهربائي ما يشترطون عليه شهادة أو مؤهل في الكهرباء والميكانيكا ولا تشترط عليه أي خبر في مجال عمله يعني لو تجيبلك بنقالي كان يشتغل بديرته مربي دجاج وتحطه بورشه ، نظاما ما فيه أي مشكل وعادي جدا
2- تقريباً 90 % من اللي ما سكين الصناعية جنسيتهم وحدة (باكستان) والكل يعلم لأن أغلب السيارات عندهم في باكستان هي الدبابات أم ثلاث كفرات اللي تشتغل على الغاز ، وشلون صار معلم أمريكي ومعلم ياباني ومعلم قيور ... ماأدري
3- 95% من العمال مايصلحلك القطعة يقولك لازم تشتريله قطعة جديدة ويقوم هو بتركيبها وهذا أكبر دليل أنه ما هو فاهم في الكهربا والميكانيكا وممكن يكون فاهم بس يستهبل علشان يوفر على نفسه التعب وينفع الحرامي الثاني اللي قاعد بمحل القطع
4- أكثرهم يقول لك خل السيارة عندي وتعال بعد أربع ساعات أو بكرى وتجيه ولا السيارة شغاله وما تدري وش حط فيها وش خذى منها ويقولك ركبت كذا وكذا وشغل يدي كذا وكذا ويله عليك الحساب
5- ولا حظ إذا حطيت سيارتك عندهم أو ما يحط الهوز بخزان البانزين وشفط اللي فيها من بانزين
6- وصدقوني أن أكثر القطع اللي يبدلونها يمكن تصليحها وهم عارفين الشي هذا والغالب يركبلك قطعة جديدة تجارية أو أصلية وياخذ قطعت سيارتك الخربانه حقت الوكاله ويروح يصلحا ويبيعها على غيرك وكذا ضرب عصفورين بحجر وحصل على أكبر قدر من المال بأقل جهد
7- وبعدين حتى كلماتهم تدل على انهم نصابين مثلاً إذا ما ظبطلك الشغلة قال (هازا صوت أول قوي وأحين صوت خفيف) ولا يقولك (تعال بكري إزا ما فيه روح صوت أنا يصلح )
8- والله وبالله وتالله إنهم ينظرون للسعودي إنه مغفل ومن السهوله النصب عليه فلذلك عندهم مقوله مشهوره دارجه بينهم ( سعودي فلوس واجد مخ مافيه )
9- ياناس ياعالم ترى أكثر اللي تشوفونهم بالورش حراميه وغير متخصصين لابكهربا ولا ميكانيكا ومثل اللي يقول ( يتعلمون الحلاقة بروس اليتامى )
10 - وذا خرب عليك السيارة أو نصب عليك تراه يحاول يستفزك على شان تغلط عليه أو تتهاوش معهاه وبعدها تصير من طالب إلى مطلوب ولو رحت تشتكي للشرطة قالوا هذا مسكين يترزق الله وبعدين الأجانب ما يخطون على أحد وتطلع بالنهاية أنت اللي ما عندك سالفه .
11- ليش كل الورش يملكونها سعوديين وما تشوف ولا سعودي قاعد بالورشة
12 - والله لو أبي أسولف عليكم قصص النصب اللي تعرضت لها بصناعية الخفجي انكم ما تصدقون ومابي أوجع روسكم فيها لأن أدري ان عندنا وعندكم خير

[+بنـــدر+]

موضوووعك حلووووو

بصراحه ماتدري وش تسوي بالشغلات هاذي مادام مافي حسيب ولا رقيب

المشكله اذا تبي تدقق على كل شي ماتلقى واحد تصلح سيارتك عنده كلهم ماحولك احد وعلى راسهم الوكاله


يعني حاول انك تغيبى وخله يصرقك علشان تصلح سيارتك

عيش الواقع

[اليابسي]

ومنهم السؤولين عن الصناعيّه؟........اذا مكتب العمل ..اِغسل اِيدك ماعندك أحد...أصلآ من يوم تمر من عند مكتب العمل وتشم ريحة الطبخ وسراويل العُمال معلّقه ..تدري أن ماعندك أحد من مديرهم اِلى أصغر موظف..

...أخوي...سليمان عندنا (دوائر)حكوميّه يبغالها نفظ وتنظيف من الوساخه اِللي فيها ....لاهنت موضوع رووووعه

[لحن الحزن]

والله يالغالي موضوعك في غاية الاهميه

واتذكر حادثه وقعت في صناعية الخبر قبل سنوات عن ورش يديرها عماله لا تستطيع ان تفرق بين حبة الكرز والبرغي :d

وقام بعض شباب اهل المدينة برفع شكوى ضد الصناعية وطلب توضيح المهن للعماله المتواجده فيها ...

وقام بعض شباب المنطقة بأخذ اسماء الورش المشكوك في عملها ورفعه لوزارت العمل والتأكد

وبعد ايام وليس اشهر او اسابيع

تم ايقاف الكثير من الورش عن العمل

واكتشاف مخالفات بالجمله لمصالح الكثير من المزورين والمرتشين

وانا اضم صوتي لصوتك واقول صناعية الخفجي اشبه بعمال السباك في طريق الرياض 42 في الايام العادية سباكه وفي العيد جزاره وفي رمضان موزعي بطاقات وفي ايام الربيع مقهوجيه وحراس مخيمات وفي الاخير المهنه حرامي سائب ...

المشكله ليست بحاجه الى خبير اجنبي

ولكن بحاجه الى سؤال

مثال : صديق انت شنو شغل

يقولك : كهربائي ممكن اشوف الشهادة التي يجب ان تكون مختومه من قبل وزارة العمل بمزاولة المهنه ...!!!!!!!!!!!!!!!!!!

بالنهاية اذا فهم يعطيك الاقامه او صوره منها او صورة من ترخيص المحل


وهذا حدث معي في صناعية الخفجي قبل اشهر حينما قمت بسؤال العامل الباكستاني عن شهادته المصدقه من وزارة العمل اثبت لي بالدليل انه كان في باكستان بياع للخرده


واليوم صاير كهربائي ومدري ايش ومدري ايش


مثل صبي القهوه في احد مقاهي الخفجي حينما وجده احد موردي المقاهي يعمل في بوفية

ولسوء الحظ انه لم يفلح وعاد من جديد صبي قهوه وتصليح شيش


هذه حالكم يا اهل الخفجي

والغريب كل الغرابه ان هناك مناطق زرتها مثل النعيريه والقرية العليا وغيرها وجدت فيها مكانيكية ورش كهربائي وغيرها في غاية المهاره والخبره

اذا ماذا ينقصكم يا اهالي الخفجي ....!!! قلت السيارات لا والله كل عامل باليوم يجرب ضربت الحظ مع سيارتين او ثلاث باليوم

يعني مع احترامي للجميع لو ( حــمار ) كان فهم اعزكم الله

ولكن غريب تستر ولا مبالات .....!!!


وارجع واكرر عليكم بالشكوى وكثرت الشكاوي

لن تنقص منك شئ بالعكس سوف تكون موطن صالح يقدم الخير لاهل مدينته وغيرهم من الزوار وتكسب الاجر في المال السائب الذي يسرقه هؤلاء بداعي الهمنه المزوره

هذا مثل اللي يقول ليش كل محلات الزل يديرها افغان وباكستانيون

كان الجواب اسئل الممول هو ابن جلدتهم واخبر في ربعه

يجيبهم من شوارع بشاور وزاقت كابل ومن مدمن مرجوانه ومخدرات الى بائع زل ( يخدم ابن بلده واحنا حتى ابن البلد لا نريد منه الا سلب امواله )

الله يرحم ايام القلوب الحيه التي لا ترضى ان تكون ( خب ) في هذا الزمن

ورحم الله الخليفه الراشد عمر بن الخطاب رضي الله عنه وارضاه حينما قال:
( لستُ بالخِبِّ ، و لا الخِبُّ يخدعُني ).

[مطلق الشمري]

اخوي سليمان

اصلا صناعية الخفجي كلها يبغى لها ازاله

كل مدن المملكة حتى المدن الصغيرة صار فيها مناطق صناعية منظمة وتابعه للبلدية وتتاجر باجار سنوي من نفس البلدية او من المقاول اللي مستلمها ولها شروط ومقاييس وعليها رقابة و تكون خارج المدينة بمسافة معقولة

انتهى زمان شارع واحد والصناعية على طول الطريق كانك على بهجرة على خط دولي

في جيزان حتى محلات تصليح الثلاجات والغسالات والادوات المنزلية موجودة بالصناعية وممنوع اي محل يفتح داخل البلد

عندنا شف شارع 25 كله نجاريين وتصليح مكييفات

والازعاج 24 ساعه ولو ينفجر كمبريسور هدم نص العمارة

وبالنسبة لموضوع والله صديقي خربت عندة طرمبة الموية

قاله الباكستاني عطني 800 ريال ورح وارجع لي بعد ساعتين بركب لك طرمبة جديدة من الوكاله

رجع له وحصل السيارة صالحة وشغاله

بعد اسبوعين رجع نفس الخراب وداها عند مصلح ثاني

حصل الطرمبة القديمة موجودة وما تغيرت اللي صارلها 5 سنوات من وكاله السيارات

طبعا اتصل عالشرطة وبكل بساطة قام الباكستاني رجع الفلوس اللي اخذها ويا دار ما دخلك شر

لا اتقفل المحل ولا انسجن او تسفر احد

تحياتي واعتذر عالاطاله

[عضو محايد]

مع احترامي للجميع تسولفون واجد وتبون كل شي زين في الخفجي
لكن ؟؟؟؟
فلنفرض مثال ,,,,
اذا انا عندي ورشة في الصناعية والعامل فيها شغله مضبوط زين , زين
اذا في يوم غلط في شغله معينه حتى لو مريض أو سكر بدري سفلتوا وشخطوا فيه وخليتوا سمعته في الخفجي كلها ماتسوى ريال لا ويتلزق عليه شغلات كثيرة : حرامي ,,,,,, الخ .
نفس الحال في جميع محلات أو الدوائر الحكومية في الخفجي .
بعدين أمس رحت اشتري شغله من محل الكترونيات ونفس المحل يصلح مسجلات السيارات المهم جالس العامل يركب مسجل في سيارة زبون بالخارج وانا جالس انتظره بعد شوي اتفاجأ بأن الزبون معاه مفتاح عجل ويبي يضرب العامل سألنا ليش قال اتفقت معاه 50 ريال قال ok وبعدين قال مافيه الا 10 ريال ؟
شو رأيكم ؟ وقاحــــــــــة
كل واحد بها الديره يشوف نفسه شيخ
نكمل لاحقـــــــــــــــا ,,,,,,

[سليمان الصقر]

يا جماعة الخير الورش والصناعيات سوق عمل كبير ودخل عظيم والخير اللي فيه كله رايح لمجموعة حراميه والله أعرف شاب سعودي سوى له ورشة بالصناعية هنا بالخفجي يقول يوميا أشوف بعيوني أنواع النصب والكذب على الزباين السعوديين طبعا لكن يقول ما اقدر أسوي شي والشي العجيب إنهم عرضوا عليه مبلغ شهري بس يترك لهم الورشة ويقعد بالبيت.
المهم وش رايكم بالحل وش السوات يقول المثل الصيني ( لأن تضيء شمعة واحدة خير لك من أن تلعن الظلام ألف لعنة ) . والله يالربع أبي أكتب بعض الحلول والأفكار ولعلكم تساعدوني .
1- تشجيع الشباب السعودي ودعمهم من خلال الذهب إليهم وترك الاجانب للضرورة علما أن هناك فيما أعلم ثلاث ورش اللي يشتغلون فيها اسعوديين
2- فضح حيلهم وأساليبهم وتوعية المجتمع من خلال الكتابة في النتديات وغيرها
3- نشر ثقافة الاعتماد على النفس قبل الذهاب للصناعية .
4- ياليت لوأحد المعاهد بالخفجي يعطي دورات بالكهربا والميكانيكا كان والله لأخل أخواني وعيال الجيران على حسابي

وشدوا حيلكم يالربع ولا تبخلون علينا بالأفكار الحلوة

[حمزه مصطفى]

والله من ناحيه الورش وسع صدرك ماحولك احد
ماعندحم الا بدل القطعه روح الكويت او الدمام
مافيه تبديل يصلح القطعه اخر شي يقول بدل
ولكن بالخفجي ورش فيها حرااااااميه والله
ينصبون عينك عينك حسبنا الله ونعم الوكيل عليهم

[ابن الشمال]

اخي الكريم

نشكرك على الموضوع المهم الذي يعاني منه اغلب سكان الخفجي

الصناعيه الان صارت داخل الأحياء السكنيه ويجب ازالتها وذلك
بأن شاء مدينه صناعيه متكامله وازالة الحاليه واستغلالها بمشروع حيوي

السعوديه خاصتا والخليج عامتا ً اصبح معهد يدرب الوافدين

بمعنى اصح يأتون لا يفقهون شيئ وبعد فتره تجده يجيد عدة

شغلات كهرباء سباك مكانيكي كله ماشي اهم شي يطلع منك
فلوس

وبعض الورش بالصناعية اصبحت ورش سلب للمواطن وسجلت لهم عدت قضايا بشرطة الخفجي وبالنهايه تجده مازال على رأس العمل.

خذ عندك ورشة الشباب سجل لصاحبها ثلاث قضايا بشرطه ولكنه مازال بورشته معزز مكرم وعنده الاسعار ثلاث اضعاف السوق وبأمكانك التحقق من صحت كلامي بزيارة ورشته ؟

وغيرهم كثيرون

ولكن يجب ان نبحث عن الحل ......؟

الحل كما يحدث بدولة الكويت هيئه اسمها حماية المستهلك

موظفون متمرسون يتابعون الورش ومهنهم بشكل دوري والقيام بزيارات تفتيشيه مفاجئه لجميع الورش ومتابعة الاسعار


للاسف عندنا الشرطه شامله لكل شيئ بينما بدول الغرب الشرطه مختصه بالأمور الجنائية فقط ...

وسبقونا لانهم منظمون بكل شيئ

على كل حال فيه ورشه بالخفجي كهربائي سيارات ولكن مهنته التي قدم بها من بلده الام عامل زراعه ....!!!!!!!!

تناقض غريب في هذه البلد واذا اردت ان ترا الفرق اذهب الى صناعية الكويت الفحيحيل او الشويخ مستحيل يقولون لك اترك السياره وتعال بكره عملهم وشغلهم يبرد القلب وبأسعار تحس انها موحده ...


اول الحلول

يجب ان شاء هيئه حماية المستهلك حتى تعتني بكل شؤون المواطن


اسف على الاطاله

ويعطيك العافيه

[من حقي اغير]

لاااااتعليق

[ابو فهد 77]

سؤال فقط :

هل بالامكان لاي من المنظرين اعلاه ان يعمل بورشه ميكانيكي او

كهربائي او سمكري .

اسف اسف

انا قررت اكون مهذب واستغفر الله على هذه الصيغه الفجه واغير في

صيغة السؤال.

هل من الممكن ان يأتي احد المنظرين اعلاه الى ميكانيكي سعودي

او حلاق سعودي او حتى بائع خضره سعودي والتعامل معه ومكاسرته

بالسعر او محاوله الضحك عليه وبكره اجيبلك الباقي وخلص شغل ولا

يهمك ؟

شكرا ومع السلامه مع التذكير بان الكلمه وان صغرت امانه!

[ابن الشمال]

سؤال فقط :

هل بالامكان لاي من المنظرين اعلاه ان يعمل بورشه ميكانيكي او

كهربائي او سمكري .

اسف اسف

انا قررت اكون مهذب واستغفر الله على هذه الصيغه الفجه واغير في

صيغة السؤال.

هل من الممكن ان يأتي احد المنظرين اعلاه الى ميكانيكي سعودي

او حلاق سعودي او حتى بائع خضره سعودي والتعامل معه ومكاسرته

بالسعر او محاوله الضحك عليه وبكره اجيبلك الباقي وخلص شغل ولا

يهمك ؟

شكرا ومع السلامه مع التذكير بان الكلمه وان صغرت امانه!



حياك الله

المنظرين رعاك الله لم نعيب العمل كا مكانيكي او حلاق

على فكره المكانيكيه السعوديين مالين الورش بالدمام

وجده واظن الرياض ما تخلى

على فكره هناك وظائف طباخين وسفرجيه سعوديين الان

نحن لم نعيب المهنه ولكن حديثنا وموضوعنا عن الوافدين

وطريقة استغلالهم للمواطن علما انهم غير محترفين بالمهنه

وبعدين اي وظيفه شريفه مهما كانت صغرت او كبيرت فهي شرف

وبعدين بالنسبه للأسعار سعودي او غير سعودي من حقك ان تجادل بهوطلب تخفيض وخلافه كما هو معروف بأي بيع او شراء....

وبعدين مكانيكية الدوائر الحكوميه مثل الشرطه والمرور هم سعوديون

احترامي وتقديري لشخصك الكريم

[سليمان الصقر]

عزيزي أبو فهد 77 حياك الله ومرحبا بك ويعطيك العافية على تفاعلك مع الموضوع
المقصد من طرح الموضوع هو تسليط الضوء على جرح نازف ينزف بالمجتمع من الناحية الاقتصادية ومن الناحية الثقافية وش المانع من إننا نعلم عيالنا ثقافة الاعتماد على النفس وش المانع من أن نعلم عيالنا يكونون شطار أما قال عمر بن الخطاب ( لست بالخب ولا الخب يخدعني ) والخب طبعا هو المخادع أو النصاب مثل مانقول حنا ، وبعدين تخيل لو عندك ثلاث أو أربع سيارات بالبيت وكل سيارة لما تخرب ما يصلحا لك إلا بسبع مية أو ثمن مية ريال والسالفة ماتسوالها 100 ريال كم راح ياكلون منك بالشهر وكم راح يحول خارج البلد وكم وكم وكم ..........إلح
وبعدين موضوع انك تروح لسعودي ولا أجنبي أنا أتكلم عن نفسي أنا حاط ورشة بالبيت ولا أروح للصناعية إلا نادراً وان رحت أدور السعودي باللي هو به والله لويتعلم بسيارتي ماعندي مانع هو ولا غيره
والله إني فريت الصناعية فر أي مكان ورشة مالقيت لأن الأهل تأذوا من مرشتي اللي بالبيت وبإذن الله راح أفتح ورشة واشتغل فيها أنا وأخوي ويعلم الله أني ماني بحاجتها ماديا

[ابو فهد 77]

الاخ ابن الشمال

الاخ سليمان الصقر

حفظهم الله

اولا اشكر لكم ردودكم وتفاعلكم مع ماكتبنا وهذا هو المطلوب بمثل هذه

الاطروحات:

انا اتفق معكم ان مناطق المملكه الاخرى هناك حرفيين مواطنين يزاولون

المهنه .. وذلك عائد لصعوبه العيش التي لم تصل بعد لابناء الخفجي

وهى كثيره وعلى راسها غلاء الايجارات السكنيه ....الخ

ثانيا انا بردي لم اعيب اي مهنه ويكفي بي تأدبا ان اعرف ان خير من وطأة

اقدامهم الارض وهم الانبياء عليهم السلام امتهنوا كل المهن اليدويه اضافه

الى رعي الغنم.

اذا نأتي عند قصد الاخ سليمان وهو تسليط الضوء على النزيف الاقتصادي

المهول والذي تثبته التحاويل البنكيه يوميا للخارج ويكفي ان نعرف بان

المملكه تحتل المركز الثاني على مستوى العالم.

لو راجعتم ماكتبت بعد تجاوز كلمه اعلاه لرأيتم انني معكم بنفس الخط

فانا لااعرف ان اقلد احد او اكتفي بردودي بجمله شكرا ويعطيك العافيه

وهو اساسا لم يكلف نفسه عناء قراءه الموضوع

ووجه نظري ان من باب الاحترام ان يلقى

اي موضوع يطرح من الزملاء الرد المناسب والذي يثري الموضوع .

وانا لازلت عند رأيي بان الشاب السعودي لم ولن يضع العمل الحرفي في

تخطيطه الحياتي الى اذا حدته الظروف ومن هؤلاء المحدودين الان من

يعملون بسبع مائه ريال عند بعض المقاولين .

اذا الفكره كلها اختصرها بعدم الوعي هناك تغييب للعقل السعودي

سببه جهل مفرط بالمفاهيم الحياتيه واسلوب المعيشه ناتجه عن غياب

التخطيط فانا اتحدى ان تجدون بالخفجي خمسه شباب بالمرحله

المتوسطه يفكرون ويخططون لوظيفه المستقبل.

وينسحب هذا الجهل على المستهلك والذي غالبا مايتفادا اي مكان يعمل

به سعودي مقنعا نفسه بتفادي الاحراج غير عابه بان هذا المكان الذي

يعمل المواطن به هو مسئوليه الجميع لان هذه النقود لن تذهب

بعيدا فهيه في فلك الوطن وللوطن.

شاكرا لكم ردودكم الراقيه ومعتذرا ان فسرت كلماتي على غير ماتحتمل.

[أوتـاد]

, , ,
عموما الورش أغلبها فك وتركيب فقط
ويغير لك أكثر من شغله
حتى يوفقها الله ويصيب العله
وهذا بسبب ما ذكرت
وعلينا ايضا مسؤوليه
لاننا لا نهتم كثيرا
, , ,
والان ما رايكم بان نكتب اسماء الورش والفنيين الذين
يعتمد عليهم وأصحاب ذمه وضمير
وأهم شي الذمه والضمير
فأحد الاصدقاء ذات يوم قيل له اذهب لورشة ,,,,,,
فيها ميكنيكي عبقري
وذهبت معه ومن كلام ذلك العبقري أدركت أنه فعلا عبقري
ولكن للأسف لا ذمه ولا ضمير فمثلا العطل الذي إصلاحه
لا يتجاوز 50 ريال ولكن لا يعرفه إلا المكنيكي الحقيقي
يطلب عليه 250 ريال ويحاول ان يهول لك الأمر
وكي لا يأتي أحدهم يوقول لا تظلم نفسك
أقول له كان بسيارتي عطل
وحدد لي مكانيكي صاحب ذمه وضمير الأسباب
وهي ثلاث مسببات لهذا العطل
فجرب أحدهم بوضع قطعه من عنده
ولم يفلح الأمر فقال السببين الثانيين
تستطيع ان تجربهن بتغيير القطع لانها الكترونيه
ولكن للاسف الان ليس عندي منهن شيء
فجربت قطعه عند محل أخر ولم يفلح الأمر
ولكن شككنا هل القطعه سليمه ام لا
وذهبت لذلك العبقري
وبينت له الحال فقال دع السياره عندي
وغدا إن شاء الله تجدها جاهزه
وطلبت ان يشيك على المسببات
بعد أن ذكرتها له وبينت له انني لم أجد القطعتين
التي تثبت الخلل فإذا به يذكر لي سبب رابع
ليهول الأمر وذلك السبب يكلف أقل شيء 300 ريال فقط فك وتركيب
ومع الجدال قلت اريد القطعه ,,,,, فقال سعرها 300 ريال
ولا اتحمل أي شيء اذا لم يكن منها لانها الكترونيه
والحقيقه انها مجرد سلك !!
فتركته واخيرا وجدتها عند ورشه ثانيه
وكلفت علي مع التركيب 80 ريال !!
60 ريال قيمة السلك الذي يقول عنه صاحبنا قطعة اللكترونيه وسعرها 300 ريال
و20 ريال تركيب
فاتيت له اليوم الثاني وقلت له بكم القطعه
اريد أن اشتريها وانا اتحمل المسؤوليه
فابتسم لانه ادرك أنني عرفت أنها هي السبب
ولكن لم يعلم أنني اصلحت السياره
فقال سعرها 300 ريال بدون تركيب
فقلت انظر هذه هي السياره
والقطعه اخذتها بـ 60 ريال والتركيب 20 ريال
ولن اتق الله في نفسك وأهلك
, , ,
وهذا هو حال الكثير

أوتـاد

[الغلا2007]

تصدقون عاد انا لاصدع راسي اخذ فره في الصناعيه وارجع البيت عشان يروح الصداع تدرون ليش

لاني كل شهر او شهر ونصف اروح للصناعيه اصلح سيارتي

وكني ماصلح المشكلة اركب قطعه جديدة اصليه بعدين

اتخرب والسبب اللي ركبها ايا يحط زيت مدري منين جايبه

والا يلصمق لك شغله الله يعين بس انا بالنسبة لي ماعاد

اصلح فيها اروح الكويت اصرف

[دمعه فرحه]

السلام عليكم ورحمه الله وبركاته
اذا كان المتواجدين من الخفجي فارجو المساعده اتصلت على جوال يقول ان عنده خادمه للايجار في الخفجي وصدقته واعطاني رقم حساب احوله فلوس على اساس ان الشغاله بتوصلني اليوم الثاني وبعد ماحولت الفلوس سحب علي وسالت عن جواله طلع بدون اسم وراجعت رقم الحساب اللي عطاني طلع باسم حرمه من الخفجي اللي هي منيره حمود منير السحيم الخفجي اللي يقدر يساعدني تكفون يحاول

[سليمان الصقر]

صحيح إن ردك شاطح ما هو يم الموضوع لكن لو تنزل كلامك هذا في موضوع جديد وتعرضة في قسم أخبار الخفجي يكون أفضل لتعم الفائدة ، أما بخصوص الحل الله يعينك ورجعلك دراهمك ، أخوي مالك إلا الشرطة صحيح إنهم بيتفلسفون عليك شوي ويمكن يلومونك بعض الشي لكن في نهاية الأمر الموضوع بيهمهم وإن شاء الله بيلقون لك حل