كلية الخفجي،،،،مهزلة [الأرشيف]

مشاهدة النسخة كاملة : كلية الخفجي،،،،مهزلة

حلا الخفجي

25-09-2010, 03:33 PM

السلام عليكم ورحمة الله وبركاته

اولا انا طالبة بالكلية و حبيت اكون من اسرتكم لأني حسيت

انها متكاتفة ...

اخواني (( اعضاء/عضوات )) المنتدى ابي اناقش موضوع يمكن احد

منكم عندهـ حل...!!!

كليتنا المصونه شيبت روسنا من كثر مشاكلها...و لا شفنا تقدم فيها

بس صارو يحاسبون على الغياب بتشديد...المشكلة الكبيرة لما تجيكـ

وحدة من المسؤولات الكبار فيها و لا هي عارفة تتصرف بموضوع ينحل

بتوقيع ورقة...ما اعتقد انها مشكلة معقدة مثل ما هم مصورينها...

كليتنا تنقصها خبرة و معرفة بالانظمة الاكاديمية...شلون يغيرون نظام الدراسة

اذا الهيكل التدريسي مو عارف يتصرف...؟؟؟

هيئتنا التدريسية و الارشادية فآآآآآآآآآآآآآآآشلةو مو قد المسؤؤلية...

المشكلة اللي اتكلم عنها اني السنة اللي فاتت درست مادة نجحت فيها و البانر حاسبها مع

ان لها متطلب دراسي ما درسته طبعا لأني ما ادري و الادارة ما قالولي ما يصير ادرسها..

و بالسنة هذي يبون يسحبون مني مادة تكملها لأني ما درست المادة المتطلب..

شلووووون...؟؟؟ شلووووون ما انتبهوا من البداية...؟؟؟ الحين راح يأخروني سنة زيادة

على الظلم اللي كنت ماكلته بالمواد اللي مسقطيني فيها...

حسبي الله و نعم الوكيل

اتمنى ما ينحذف هالموضوع لأن فيه مصير الاف الطالبات المظلومات بالكلية

نطالب بحقوقنا الطلابية...

انتظر ردودكم لا تخيبوني تكفوووووون انا بنتكم

بــ الخفجي ـنت

25-09-2010, 05:55 PM

هلا اختي

الموضوع ماراح ينحذف لا تحاتين ..بس مشكلتك هذي اللي انتي مريتي فيها

ما يعني ابدا ان الكلية فاشله وفيها ظلم على قولتك

المفروض اتابعين من البداية موادك وتعرفين وش اللي يمشي مع السنة اللي انتي فيها واللي ما يمشي

وغير كذا مع تغير العمادة .. والهية الإدارية

الحمد الله الكلية في تقدم واضح جدا

واذا على توقيع ورقع زي ما انتي قلتي في قوانين وانظمة هم اخبر فيها

انتي وغيرك من الطالبات ماعندكم اي خلفية عنها

بس اللي تعرفينة ان في ظلم وفي تسيب وفششل

ليه ...؟

لا تتسرعين بحكمك يالغلاا

وبعدين تسجيل موادك ونظام البنر وغيره هذا من الدمام

مو من هنا

هنا مجرد دكتورات ومعيدات يشرحون لك المادة ويحطون لك الاختبار ويتابعون معك النتايج

ولا تنسين اختي ان حتى اسم الجامعة ( جامعة الدمام )

لا تجين تكتبين اي شي اختي وانتي معصبة

هدي اعصابك .. :101::101: وحطي في بالك يالغلا ان مواضيع الشخص واسلوبة في الكتابة ينعكس على شخصيتة :101::101:

تحياتي لك

بـ الخفجي ـنت

MaGnOoOnK

25-09-2010, 07:12 PM

شكرا ع الطرح الجميل
لكن انا ابسط من مشكلتك في احد كليات القصيم وقبل تخرجي يعني في مستوى الاخير لي في الكليه اظافو علي 3 مواد جديده ولما سئلت قالو خطة جديده من المؤسسه
يعني المشكله مافي نظام موحد يمشو عليه الجميع
وتقبلي مروري ......

مجنونة .com

26-09-2010, 01:52 AM

الف شكر لك

رد الأخت والمشرفة الفاضلة الحبوبة المبدعة المتألقة

بنت الخفجي

فيه الكفاية كفت ووفت

مابعد كلامها كلام

نبصم لها بالعشرة 100 على 100

والكلية في تحسن ملحوظ

ولكنه تحسن بطيء جدا جدا

دمت بحفظ الله

نور الإسلام

26-09-2010, 06:11 AM

في اليابان أكثر مرتبات شهرية للمعلمين

ويشدد ع تدريسهم في الجامعة

لأنهم هم من سيربي أبناء الأجيال

فلذلك يعتنى بهم إعتناء شديد

ونحن حدث ولا حرج

والله أنا ما أعرف شي عن كليتكم

أسمع أهلي كل يوم يتشكون ومنغثبن

الله يكتب اللي فيه خير

بس حبيت أشارككم وما أكسر بخاطركم

مطلق زحام

29-09-2010, 02:23 AM

حوار بنات ... ولكن ايش دخلني ,,,

لكن حبيت اني اضيف نقطة مهمة

اذا انتوا مختلفين ان الكلية متقدمة ولا متخلفة

اعملوا استفتاء يوزع على بنات الكلية يدوي من طالبة وليس من معيدة

ويسلم للطالبة ثم يفرز ويقدم للجهات العليا

واذا تبون أنا بجيبلكم الاذن من الجهات العليا .

......

بس ما يمنع أني ابدي رايي من خلال بعض القريبات

ارى واسمع كلام لا يشجع ابدا على الكلية وبصراحة الدراسة فيها شقا .

والاخت اللي تدافع عن الكلية اظن انها من الهيئة التدريسية للكلية .

اعذروني على الاطالة

عا111شق شام

29-09-2010, 02:48 AM

رغم الكلام هذا كلة

كلية فاشلة

ومافيها دكاترة كويسين
وادرتها مو سعودية
يعني مايهمها البنات ومصلحتهن

لـيدي

29-09-2010, 03:00 AM

الكليه ما عليهاء كلام طيب بي تطور بطئ اوكي ما قلناء شي بس لأداره الفاشله ولأدريات النفس خايسه وفوق هذاء كله قله ادب وعدم مبالاه طيب ليش؟؟؟؟؟ موظلم البنت تعيد سنه كامله :mad: لاحول ولاقوه لابالله

دروبي

30-09-2010, 06:50 PM

اصلا الحين التسجيل فيه مشكله

الله يهديهم

عندي اخت ماقدرت تسجل للحين تحاول

بــ الخفجي ـنت

30-09-2010, 11:41 PM

للتوضيح بس

الادارة سعودية للي قال الادارة مو سعودية

واللي قال انتي من الموظفات هناك فانا وربي ماني موظفه بالكلية

ولا انا طالبة فيها انا تخرجت من سنتين والحمد الله

واللي تقول في مشكله بالتسجيل وما سجلوا

فالتسجيل عن طريق الانترنت مو من عندهم

بس نصيحه للكل

اللي بيناقش او يجادل او يرمي اتهامات او نقد

اتمنى بس يتحرى الحقيقة

يعني يا يكون نقد بناء مبني على اسس صحيحه

او اتمنى ما يكون في رد ابداً

تحياتي

بـ الخفجي ـنت

كلي خفجاويه

01-10-2010, 03:08 AM

شاكره لك طرحك اختي حلا الخفجي :)

وبالنـسبه للكـلية يااااما بكـينا دم منها .. yd.885

ومـشكلتك انك ما تدرين عن النظام وانك لازم تدرسين المتطلب

لان فيه بعض البنات يسوونها متعمدين

وانا معـاك .. فيه تقــصير من الكلية :confused:

وانا صديقتـي نـفسك بالضبط .. طلعوا لها ماده من غـير
ما تدري وقالوا انها حاملتها

هي انهبلت :eek: وقالت كييييف ما كنت ادري اني حملت المادة .. :frown:

بس اللي رحمها انها نظااام قديييم يعني مو على نظام البانر :cool:

والحمدلله راح تختبرها هالاسبوع وتعديها ان شاءالله

واذا على الاداريات مدري ليش اذا بغينا منهم شي يسوون انفسهم مشغولات :mad:

انا مره رحت ابي اكلم الاداريات للأسف :frown: قاعده تقرأ جريدة :cool: وساحبه على ام ديني :mad:

يعني فيييييييه تقصييييير وااااضح ..

لكن ..

شوفي مالك الا ان تنتبهين لموادك وكل يوم تراجعينهم

حتى لو طفشوا منك غثييييهم ما عليك اهم شي مستقبلك :wink:

صح راح تتهـزأين :mad: لكن ما عليك تحملي وانا اختك :frown:

وفي هالكلية يبيلك تشدين حيلك وتتخـرجين وما عليك كل الامووووور محلوووله بأذن الله :)

والله يوفقك اختي ومالك الا الصبر :rolleyes:

واعذروووووووني ع الاطاله

بس دام الكلام عن كليتنا الحبيبه ما عندي مشكله أألف كتـاب بعد :biggrin:

حلا الخفجي

05-10-2010, 02:55 PM

مشكورين اخواني على الردود...

بس حبيت اوضح لبنت الخفجي...ان الكلية تقدمت شوي و لاحظنا كلنا هذا التقدم...

بس ردت انتكست للورآ ...

إذا ما دريتي فأنا بخبركـ و هذا مبني على واقع اليم انا الحين اعيشه...

الكلام المكتوب ببداية الموضوع هذا عن اختي و تخصصها دراسات

اما انا تخصصي رياضيات لما وصلت سنه ثالث و انا راسبة بمادة وحدة بس من ثاني ..وركزي على وحدة بس...

ردوني لأول بدون سبب مقنع و حولوني علوم مو تربية وحذفوا سجلي الاكاديمي للسمستر

هذا ... يعني ادرس من اول وجديد ما عدا كذا مادة .. اتوقع ما في افشل من كذا...

و أنا معدلي مرتفع مو شين و المادة مو اهمال مني رسبت فيها ...

يعني لو يقفلون الكلية اشرف لهم من انهم فاتحينها وجايبين المرض للبنات..

حسبي الله و نعم الوكيل

اللهم اجرني في مصيبتي و اخلف لي خيرا منها...

حلوة الإحساس

06-10-2010, 03:11 AM

واااااااااااااااااااااااي
حطيتي يدك على الجرح
شوفو حبيباتي انا راح اكتب وربي اني
صادقه في كل حرف اكتبه

كليتنا كل سنه لها قرارات جدييييدة
وكل سنه واحنا في حاله جديدة

في وحده من الطالبات وصلت لسنه رابعه وعليها مادة
من سنه اولى تخيلو يا جماعه انهم رجعوها سنه اولى بس علشان هالمادة
وربي يابنات البنت تركت الكليه تقول تعب 4سنين واخرتها
يرجعوني اول
وفي بنااااات كثييييير من سنه ثالث رجعوهم ثاني وهكذا
وطبعا" غير سالفة التسحيل في البنر
كل الجامعات الثانية تسجيل المواد يكون من نفس الكليه واحنا
نركظ وراء هالبنر نشتغل مخابرات بس نكتشف ان البنر فتح
على طول انتفاظه وغير ان البنر يعلق من كثر الزحمه
ومانقدر نسجل واذا فاتنا التسجيل نحمل المواد الي ما سجلناها
والعام قالو لبنات سنه ثالث ان الي ماتنجح في طرق تدريس ما تطبق
في المدارس سنه رابع
ولما نجحنا فيها قالولنا لا لازم تنجحون في طرق تدريس ووسائل التعليم
وهالمادة كثير من البنات احذفوها بسبب التظارب
وهذا غير بنات سنه اولى اللي جننوهم مسجلين في كلية الخفجي وراحو ارسلو
ملفاتهم لكليات الدمام والجبيل
ورئيسات القسم الي ما يدرون وش السالفه انا
رحت عند رئيسة قسمي كل ما اقولها في جامعة الملك فيصل مكتوب كذا
تقولي:
صحيح مكتوب كذا والله ما ادري!!!

يا ناس ما تدري وشسالفه هذي رئيسة قسم وربي حرااااام

وهذا غير موظفات القبول والتسجيل
الي كلهم ما عندهم غير شهاذد ثانوي
وما يدرون عن الكليه غير اسمها
ما فيهم سنع غير منال السبهان لأنها ماشاء الله عليها خريجه
((قل هل يستوي اللذين يعلمون واللذين لا يعلمون))

حلا الخفجي
ما خطته اناملك نزف دم قلمي قبل حبرة

مع كل الحبــ:101:

الياسمين

06-10-2010, 06:29 AM

انا رحت اطلب من وحده سعوديه قالت مستحيل اعطيكي اياها اليوم
لازم السبت قلت ورقه عاديه قالت اعرفها بس لازم السبت مستحيل اعطيكي اياها صعب
قسم بالله رحت لوحده مصريه اعطتني الورقه بغيت اروح اقوم على السعوديه
بس خفت اني احتاجها بعدين
الكليه مشكلتها بشوفة نفس موظفاتها مو الدكتورات لا الاداريات.

srab

10-10-2010, 10:49 PM

زهرة اللوتس

10-10-2010, 11:39 PM

اللي يقول الكليه قاعده تتطور

للاسف يضحك على نفسه

الاداره فشلت فشل ذريع بالتقدم بالكليه انمله واحده

هي هي

من اول زياره لها

حتى اليوم

اقسم بالله ماكأنها كليه

المعهد الاهلي ارقى منها

تعامل - مبنى - اداره - اجراءات

حتى البنات مساكين فقدو الامل فيها

اختي باول ثانوي من الحين تبكي تقول ماابي كليه الخفجي

لانها قاعده تشوف معاناه البنات قدامها

وملاحظه / المبنى هو اللي درست فيه 3 متوسط و 3 سنوات ثانوي

ودرست برى ورجعت والمبنى هو هو

ماتحرك شبر

انتظروني اخلص الماستر والدكتوراه واستلم العماده فيه

اقلبه جنه

انتظرو بس

... طبعا الكلام موجه لبنات اولى متوسط

لان الباقي خلاص مايمديهم

يسسلم بؤؤؤكـ..
معك حق والله انا درست به متوسطه..
إلى الآن هي هي ماتغيرت..
خيتي بنت الخفجي انتي قلتيها تخررررررجتي قبل سنتين يعني ماجربتي اللي جربنآه وان شاءالله ماتجربينه..

صرآحتن ودي آشكي وآطلع اللي بدآخلي من قههههررررر من هالكليه بس مآبي أضييييق خلقيyd.885<<وآنا وربي اللي شفته كفآآني..yx.008
آخآآآف آن تكلمت آنفجـــرyx.016
بس بقووولـ ه الجملهـ..

"مآيحس بـ آلجمرهـ الا وآطيهـآ"

دمتم بلا ألم...

طيوفه

11-10-2010, 02:39 AM

بنات صج الخبر الي سمعناه ان بنات ثالث ورابع يبون يرجعونهم يدرسون من اول والا بس الي عليهم مواد

sweety

11-10-2010, 07:08 AM

وعليكم السلاام ...اختي..!!!

والله الكليه مشاكلها ماتخلص ابد ..ولا فيه يوم بيجيها تطور ..!!

درست فيه اربع سنوات كرهت سيرة التعليم من بعدها ..

لانظام ولا خلق زي الله وتعامل سيء ..تقول اشحذ عندهم مو ادرس ..!!

والسنه هاذي يقولون تطورت ويوم دخلت اختي تقول انواع المهزلة ..مثلا .!!!

من واقع الحدث..!!

1- يوقفون العالم سرى لازم رقم جامعي وبعد الزحمه يقولون ماجاء من الدمام كان من اول..!
2- يعطون اوراق لفتح حسابات في البنك لهن والبنك يقول وين الرقم ..
3- المحاضرات من ربي خلقهم ماينتظمون يعطون اختي جدول ومسوين زحمه والمشكله انها ماتطلع بالوقت المطلوب تتاخر وله كل هذا تقول الدكتور جاء بيبدأ محاضره شاف مافيه مراقبه ..
جلس يستنى الاخت متى تشرف ..يحسبون كل العالم فاضين يسنترون على الباب
4-فوق هذا كله تبي تسأل ماتلقى احد معطيك وجه الغرفه اللي فوق مايدرون عن اللي تحت والعكس صحيح..

بالله عليكم وين تتطور هالكليه ...والله ولا حولها التطور ..
عذرا على الاطاله ..

Al -T a m i m i

11-10-2010, 05:07 PM

شئ مؤسف للكلام اللي نسمعه عن الكليه

حتى سمعت ان النظام المطبق داخل الكليه ليس اكاديمي !
أقرب مالها مَدرسه
بمعنى اللي تحمل 3 مواد ترجع تعيد من السنه الاولى
معقوله ... ! :biggrin:

.
.

N2010

11-10-2010, 06:50 PM

نشكر أختنا حلا على هالموضوع المهم جدا

وأنا صراحة احس فيها اجحاف لطالبات الخفجي لأن ما في بالخفجي الا كلية واحده والمفروظ طالبات الخفجي لهن الاولولية بالقبول

أنا اذكر معاناة اختي خريجة السنه الماضيه وقدمت على الكلية السنه هذي ولم يتم قبولها وهي نسبتها الثانوي 89 والتراكمي 67 و تضف الى ذلك ان فيه بنات واجد من اهل الخفجي لم يتم قبولهن
واختي راحت للكلية الأسبوع الأول من الدراسة وكلمت شؤؤن الطالبات وقالت ان العدد الذي تم قبوله قلييييل جدا واضافه الى ذلك انه الى حد الان 30 منسحبه

راح عمي (عنده بنته لم يتم قبولها)بعد الى الجامعة بالدمام في الاربعاء الأول من الدراسة وكلم مدير الجامعة وقاله اكتب معروض ويجيك الرد

طبعا ماجاء الرد

وانا والله العظيم اني اليوم عندسكرتير المدير ما رضوا يدخلوني على المدير وقالي نفس الكلام اكتب معروض وراح يجي الرد بكرا او يوم الأربعاء

تكفوووووون ادعوا لأختي وبنات الخفجي بالقبول لأن ما عندنا كليات

الحايلي

12-10-2010, 11:48 AM

مع احترامي وتقديري لكل الموظفات بالكليه

الا أن

زوج العميدة يدرس بنفس الكليه وهو من جنسية عربية ودائم متأخر

فهل تخصم عليه العميده !!!!

كما أن

نائبة العميده كويتيه..مجتهدة فى ادائها

وهذا لا يعيب اي منهما اذا وجد الاخلاص

واحسن التعامل مع الطالبات

المهم ان الاداره ماهي سعودية 100 %

منتهى الذوق

13-10-2010, 06:36 AM

moon light

16-10-2010, 05:57 AM

الحمد لله والشكر ع التخرج
صحيح واجهتنا صعوبات وقت الدراسه واشوف صديقاتي يشتكون من النظام .
لكن الحق ينقال الكليه ومن جت العميده الجديده وهي في تطور صحيح انه مو قفزه لابالمبنى ولا بالانظمه لان هالشي يجي من فوق لكن العميده قاعدة تجتهد باللي تقدر عليه وماازكيها على الله لكن هذا اللي اشوفه ,, وبالنسبه للأخ اللي يقول ان زوجها يتأخر فالشهادة لله الدكتور درسني وهو دكتور راقي جدا بااسلوبه وطريقة شرحه ومواعيده مضبوطه .

مناحي زحام

20-10-2010, 02:47 PM

والله كلية الخفجي مهزلة ...مشكورة اختي حلا على الموضوع..

يعني اسمع منها اللي يشيب الراس..

سمعت ان فيها جرس نفس جرس المدرسة ...جد جد جد مادري وش تحس

به الكلية معاملين الطالبات على انهم بالمدرسة ..وين التطور

حلا الخفجي

20-10-2010, 03:02 PM

:101:مشكورين اخواني وخواتي العضوات.. على الردود

صحيح ان الكلية تتقدم..بس ان شاء الله تتقدم اكثر لأن

تقدمها بطيء حيل وفي أخطاء بالهبل وما تتصلح بمدة زينه

...والدكتور عبدالصمد اللي هو زوج العميدة اسلوبة راقي و احسن

دكتور بالكلية ودامنا دخلنا بالمدح الدكتور عماد بالرياضيات و الدكتور عارف بالدراسات

بعد اسلوبهم راقي ومحترم وشرحهم وافي ...الظليمة شينة يعني فيه

دكاترة درسوني اسلوبهم خايس

وللحينهم ما غيروهـ و ان غلطنا بحل مسألة برقم والا اشارة تمسخروا علينا

بالقاعة قدام كل الطالبات... وانوآع طيحة الوجة...في دكتور قال لطالبة العام

انتي طالبة ابتدائي عشانها قلبت كسر...!!!

المفروض ان الناس تتعلم من اخطاءها ...من يومها كل البنات ومن بينهم انا ما نقوم نشاركـ

عشان ما يفشلوننا ...

و اخوي مناحي زحام...

والله كلية الخفجي مهزلة ...مشكورة اختي حلا على الموضوع..

يعني اسمع منها اللي يشيب الراس..

سمعت ان فيها جرس نفس جرس المدرسة ...جد جد جد مادري وش تحس

به الكلية معاملين الطالبات على انهم بالمدرسة ..وين التطور

جد الجرس رافع لي ضغطي ...حطيت ايدكـ عالــ ج ــرح

:101::101::101::101:

almoce8ar

21-10-2010, 07:11 AM

عادي ادرسي سنه جديده وش وراك ...!

احسن لك من قعدة البيت ,,, صدقيني جت من صالحك ..!!:biggrin:

.

.