ماكـل شيهانه سوات الشياهين
وماكل مهرة في حساب الأصايل
ياكـم شــيهانه تـرف الـجـناحين
طيـرٍ يطيــر ومـايســوي فعــايـل
وياكم مْهرة شكلها يغري العين
والساس ماهو من عريب السلايل

عندما يُسئل الشعراء عن مستوى ماقدموه وهل وجد نجاحاً؟
يجب ان لايُجيبُ بأفضلية ورضاء عن ماقدموه او عدم الرضاء ويُترك كل هذا للمستقبل، والتاريخ هو الحكم وماعليهم سوى فعل مايستطيعون مايرونه يلامس ذائقة العدد الأكبر من شرائح المجتمع الراقي والمُفكر في تحديد حقائق الأمور

اجامل الناس غيرك وانت مهتمك
واصد عنك واجنب ماني بْناسي
اسفهك قدام حسادي ولا اذمك
اخشى على سمعتك من هرجة الناسي
احط نفسي مابيك ومالتفت يمك
وانا على يمتك في كامل احساسي

ماهو لزوم ان كل شخصٍ عرفته
يصـير في قلـبي مقــدر وغالي
بعض الاوادم عن وصالي صرفته
اخير من وصله جلوسي لحالي

ياكثر من عايش وياكثر من مات
والوقت يعطينا فرح وانتكاسه
وسعود مات وللقضايا ملفات
مات ومعه ماتت شعوب وسيايه
ليته على الدنيا وذالوقت بالذات
يامر وينهى ويتلفّت بْراسه

موج البحر يقلب كْبارالبواخر
طبع المرض يعطي للانسان قرصه
وفرصه لمسح الذنب عشر الاواخر
الرابح اللي يغتنم كل فرصه

شيخ هذا العام قبل العام هو راعي غنمنا
انتهض من طفرة البترول واسعار الاراضي
شيخ نفسه مانلـد البال في شخصه ونمنا
عــارفينه زيــن بالمليـــان والا صـــار فــاضي

البــارحه عينــي حــريبـه لـلمـنـام
والدمع من فرقاك فوق الخد فاض
سويت في قلبي مواجع وازدحام
فاقت على زحمة ممرات الرياض

الشك ياخذني ترى بعض الاحيان
اني انا اذكى بشر في زماني
لاشفت فكر فلان وفلان وفلان
قلت اني الاول ولا فيه ثاني

تاريخ راس وللمواجيب تاريخ
والرب ماضيعت خمسة فروضه
مطنوخ واتعب للرجال المطانيخ
عايش على الترتيب ماعشت فوضه
واحس بعض احيان كبدي على صيخ
واشكي من القولون والا الحموضه
لاشفت كلٍ بالمحافل غدى شيخ
وصار الترزز باول الصف موضه

منهو اللي يقول انه على الشعر حريف ومعلم
كان يقدر يجاريني على البحر هذا قلت شاطر
كم وكم شاعرٍ حاول صعوده على سلم وُسلم
كل مره ومره مافلح مالقى غير المخاطر

يقل قدر الشاعر ان صار شحاذ
يفقد مكانة هيبته واحترامه
ماعاد له بالوقت فازع ونقاذ
يفقد مواجيبه ويسقط مقامه

تسارع حروف الكتابه بْيمناي
شح النظر والكف ماهي شحيحه
دقق على كيفك وصحح لي أخطاي
إكتب عبارات الخطا لي صحيحه
الود بين اثنين مايفسده راي
والراي قبله والخواطر جريحه

احرص من اللي يمدحك وانت قاعد
لاغبت يمكن يصبح المدح مقلوب
على الرخا يْظهِر لك انه يساعد
والا الشدايد مايغذيك لو روب

لاناموا الناس لك خصصتها اوقاتي
بين انتظارك وبين الجرح والفرقا
اعيشك بْصمت واخفيها مُعاناتي
في غيبتك صحتي تنزل ولاترقا

ياكثر ماتطري على البال كثراه
وليا اسألوني قلت للناس مدري
اعيد زفرات التناهيد والآه
واحط خمس اليد باطراف صدري

ياريم معك العشق قفلت بابه
روحي مراح مُقيط ورشاه ياريم
انا فضاء وانتي مجرد سحابه
عمر الفضاء ماصار يحتاج للغيم

استوى رز المهيدب والشعير
والبهايم فيه يشبها بشر

الكرونا صار ماهو فـالبعير
الكرونا بالاوادم منتشر