|
*
* سالفة ببي تجي أو آي فون ، و التشابه مشكلة في كوريا ...........!! لو تضايقنا من ( علوم العفون ) ، وش تركنا لأجل ( نكبة سوريا ) ....؟! * * |
*
* لا تحزن أن تحدّث بك أحدهم ذات يوم ، فالملكان عن اليمين و عن الشمال ، لم يضعهم الله ( عبثاً ) ، فتوكّل على الله و أبتسم ..!! * * |
*
* من كثر صدمات الليالي أنا بخص ، ولا تغرّك نظرة العين هادي ، المشكلة كل ماتفارقت مع شخص ، تفضحني الدمعة وأنا أقول عادي ..!! * * |
*
* ذخرت إحساسي وأنا كلي إحساس ، عشان أقاوم نبض الإحساس لا شحّ ، تدري وش أكثر مشكلاتي مع الناس ، إن الخطأ لايمكن أقول له صحّ ..!! * * |
نهاني أبوي ياما .. ( لاتخيّب رجل )
خلك و أنا أبوك دايم للصداقة مثال ..!! ودي تردّ الليالي ياليالي لأجل ، أقول أبشر و لكن .. وين ألاقي الرجال ؟! |
|
الشعر أنا أحبه لو أبياتي جروح ،
ماهو مكانك يا أبو خدّ / صاعر ، الشعر لو ماهو يساعد على البوح ، لا صرت لا كاتب ولا صرت شاعر .. #نواف_الفهاد |
قال لي وش أصعب أنواع النزول ،
قلت حاول تفهم الدمع إن نزل ، و أدري إنك منت فاهم لو أقول ، لأن طبعك ماخذ الدنيا هزل .. #نواف_الفهاد |
شريت صمتي و أشتريت الرجاجيل ،
محفوظ قدري لا جلسنا ولو قمت ، و عندي قناعة ثابته جيل عن جيل ، أبو السوالف ماعرف قيمة الصمت .. #نواف_الفهاد |
سابع سنة لآ تسألن شالذي صار ,
سابع سنة والصبر ياما عقدته , صابر صبر في أوسط القلب جبّار , ولآ شفت لي مخلوق يبكي نقدته .. أقنعت نفسي رغم فقده والأمرار , و كم ليل طوّل خافقي مارقدته , بس رمضان إليا وصل وقت الأفطار , يهلّ دمعي لا ألتفت وفقدته ..!! |
* * كــ أيّة إنسان حبّ وعاش متفاني , و دفع ثمن ذكريات سنينه وعانى , إذا نسونا الحبايب والعمر فاني , حنا لنا اللي خلقنا ماهو ينسانا ...!! * * |
ياللي جروحك كوم ومفارقك كوم , ماقلت لك حبّ(ن) ولا قلت عفني , علّمت عيني لو خذلني الفرح يوم , تحفظ لي هيبة دمعتي وسط جفني .. |
أبتركك واللي مضى منك يكفي ،
اليوم جت مني قبل لاتجي منك ، و رجعت لي ليتك على الصدّ مقفي ، ماعادني لو تحلف اليوم ضامنك ..!! |
الغدر حرّمه الولي عالم الغيب ، والحمدلله عقب الأوجاع زانت ، إليابكى أهل الكويت الغزو .. عيب ، نضحك على أوجاعهم يوم كانت ..!! |
يقول تتعب لأجله و ترتضي الآه ، و يخذلك منهو كنت بوفاه تآثق ، أنا تعوّدت أفعل الطيب وأنساه ، والله يجزيني وأنا فيه واثق ..!! |
اليوم ماني لو طغى الحزن مبهوت ، لاضاق صدري قلت لله بادر ، لامن طرالي يونس و وحشة الحوت ، أيقنت بأن الله على الحزن قادر ..!! |
مارضيت أتركك تهجرني و تروح ، لين صرت أغلي من جروحك غلي ، و يشهد الله مابعد خفت الجروح ، بس خايف وقتك يردّك عليّ ..!! |
http://www.alraidiah.org/up/up/34340927220120727.jpg
من منطلق ماشفته بنظرة العين , يوم النظر لمعذّب القلب قرّة , مكان يجمع ذكرياتك من سنين ؟! حاول إذا راحوا هله ماتمرّه ..!! |
شفني على نفس القناعات لازال ،
قلبي عن أكثر خوّة الناس حالف ، خوّة ( هلا ، يامرحبا ، كيف الأحوال ) ، ماجابت إلا القلقسة و السوالف ماني على عدّ المهابيل نزّال ، أموت ظآمي أرحم و مايخالف ، الرجل مايطمع سوى خوّة رجال ، من دونهم عقله من الرشد تالف .. فإن شفتني بعزلة على بعض الأزوال ، أهل السلف راحوا على كل سالف ، قالوا محب القيل يتبع هل القال ، وأخلاق كل إنسان باللي يوالف |
لمّا شعرت أن صاحبي باع تلك الصداقة و هانت في نظره ، أبتعت لي قلباً جديداً ، وأخترت الرحيل بصمت ، وبلا تجريح وبلا شيء .. لم يكن صاحبي سيئاً فيمامضى ، لكنه تغيّر كثيراً ، و لربما وجد من يغنيه عنا ، فلم الغضب منه ؟! و لم الحزن عليه ؟! .. الحزن الذي نشكوه حزن الوداع ، فالموتى حين يرحلون لا يعودون أبداً للحياة ، لكن رحيلهم يبكينا ، و يبكينا كثيراً .. |
أنا رجل تعوّد أن لا يطلّ من نافذة الذكريات كثيراً ، فالنظر من خلالها موجع .. |
لاتقيس العمر كله عند حاجة ، السنين تمر و الحال يتجدد ، ناج منهو تعشقه بالود ناجه ، والله أن الحزن له يوم يتبدد .. كم خفوقن شوفتي تبسط حجاجه ، عقب ماهو كان لاجيت يتصدد ، والرجل لا وصّلت حدّ المواجه ، أنصحه يقدم بلاش من التردد ..!! |
ثلاثة من الناس شينين الأجناس ، ( زعول ، متكبّر ، ومزحه برزحه ) ، اللي بيمزح يتحمّل من الناس ، لا جته من بعض المخاليق مزحه ..!! |
ما أبيك و ما أبي لك أي طاري ، أنت منته كفو و جروحك وفيّه ، يابعدهم جيت لك والشوق ضاري ، و الكلام الأولي ( الكاميرا الخفيّه ) |
ماطحت من قلّ التجاريب و الشان ، والوقت لا صحّى له إنسان صحّى ، اللي كسر بي صدق ضحّيت لإنسان ، و مع الأسف فيني للأيام ضحّى .. |
لاباس سوّ اللي بدالك ولا باس ، حتى أنا نفسي من الحال ملّت ، أصلاً لو أن بك نبض و بقلبك إحساس ، ماتستهين بدمعتي يوم هلّت .. |
عطيت من حقي وجاملت لي ناس ، من منطلق كسب الرجاجيل والطيب ، وتدري وش اللي صار ياطيب الساس ؟! ( أستذيبت عندي الحصاني وأنا ذيب ) |
قبل أن تسلكوا طريقاً تجاه أحدهم ، تأكدوا من وجود المخارج الآمنة في حالات الطواريء .. |
أمرّ ذيك الدار وأقول يادار ، بعض الجماد أكثر من الناس وافي ، ياصبرها ذيك الشوارع والأنوار ، تعطي ضياها و أكثر البيت طافي .. |
يوم الحكي ماحقق أحلام مخلوق ، رهنت فعلي للسنين و تقدّمت ، م أخفيك كانت بي بعض وقتي تضوق ، لكن ولا لحظة عليها تندّمت ..!! |
العمر فاني و أكثر الناس فاني ، و زيف الظلام يعلّمك قيمة الضيّ ، تعرف مكاني يوم تعطيه ثاني ، و يخذلك مايعطيك عقبي ولا شيء ..!! |
هي ضيقة البال وإلا ضيقة سنيني ، ماعدت أميّز جروحي ليه ياسلمى ، ماراح أعاتب سنيني لو تبكّيني ، علّمني النور ما أشره على الظلما ..!! |
كان يردد لي وأنا أسمع أنا ، عقبك الدنيا عساها في حريق ، ولو فنا وكل الخلايق للفنا ، كيف ألقالي لنسيانه طريق ؟ كان يقول إني أنا ساكن هنا ، ويأشّر لقلبه وأنا بحبه غريق ، ذوّقتني دنيتي كل العنا ، من توفّى جعل مايمسّه حريق ..!! |
اليوم شفت الحقيقة وأنطلق قيدي ، يابوي ياعلّ روحي فدوة لروحك ، أبوي ياما نصحني قال ياوليدي ، أترك صداقات زيفك و أفطن لروحك ..!! |
الحب سوق و داخل السوق به ناس ، و قلوبنا بالسوق مثل البضايع ، وأنا على كثر المشاعر والإحساس ، أشعر بإني داخل السوق ضايع ..!! |
وأقفيت عني يوم أنا كنت محتاج ، تارك بقايا شخص طاح متعثّر ، قصة ألم لو دبلجوها بالإنتاج ، تصبح قسم بالله ( مقطع مؤثر ) ..!! |
مات الوفا مسموح يادمعي تبين ، البارحة منهو خذلني عذرته ، على شرف دمعن نثرته من سنين ، سوّيت لي حفلن كبير و شكرته ..!! |
مابقالي من شتات العمر غير ، دمعتن بأقصى المحاجر ضايعه ، يارفيقي خلّ نتفارق بخير ، بعض لحظات المفارق رائعه ..!! |
تعاون بيني و بين المنشد علي القريني ..! ( العشر الأواخر من رمضان ) ! http://soundcloud.com/alqurini/10-1 |
تقاسيمكم للبشر منها الفكر مبهوت .. و يعلم بها اللي كل الأعمال ترفع له أنا رجل لا أؤمن بمطوّع ولا سربوت .. أنا أقول بأن أخلاق الإنسان تشفع له ..!! |
| الساعة الآن 06:12 AM. |
Powered by vBulletin® Version 3.8.12 by vBS
Copyright ©2000 - 2024, Jelsoft Enterprises Ltd.