عايز تبقى عصرى وواثق من نفسك..تعالى وانا اقولك!
النهارده جيبالكم شوية معلومات يخلوكم عصرين بمعنى الكلمة ، طبعا احنا مش محتاجين للكلام ده بس انا عن نفسى استفدت منه كتير وقولت يمكن تستفيدوا زيى ولو بأضافة طفيفة لمعلوماتكم.
كلمة عصرى يعنى متحضر وهى ازاى تعرف اصول(الاتيكيت)وانك تروح اى مكان تقعد وانت واثق من نفسك ويقدروك الناس ويحترموك ، وطبعا كل اطباع السلوك اللى عندنا مكتسبة يعنى احنا مش اتولدنا كده لا ده بحكم البيئة اللى عيشنا فيها بقينا كده..وكلمة عصرى مش تقتصر ع طريقة اكلك او طريقة لبسك ديه كمان ع اسلوبك وطريقة كلامك وديه من العوامل اللى بتوجهك للنجاح واحترام الناس ليك..ودلوقتى هنمسك كل جزء من اجزاء الاسلوب العصرى او الاتيكيت
اولا: الصحة والنظافة
0 نحاول ننام بقدر كافى علشان نريح جسمنا من تعب طول اليوم او نعمل رياضة ولو حتى مشيت الشقة رايح جاى لمدة ربع ساعه ع الاقل..وتكتر من شرب المية لانها مفيدة جدا للجسم كله وبالاخص الكلى بتغسلها من السموم..ولو حسيت بين وجبه و وجبه انك جعان اقتصر ع شرب عصير فاكهة لان ده كمان هيساعدك ع نضارتك وحيويتك
0 لازم نهتم بغسل اسنانا مرتين ف اليوم ونهتم بريحة لبسنا والاستحمااام ضرورى وبالذات اول ماتقوم من النوم تاخد دش بارد وبعد المساء دش دافئ والكسلانين خليكم ف بتاع الصبح كل يوم وسيبكم من المساء وده طبعا علشان الاستحمام بيجدد من نشاطك ويحفز الاوعية الدموية وينهض بيك عقليا وجسمانيا
0 ف ناس كتير بشوفهم ماشين وضهرهم منحنى لقدام وكأن عندهم 90 سنة وهما اصلا لسه شباب..انتوا عارفين حتى لو لابسين اغلى واقيم طقم عندكم ، مع تنية الضهر ديه المظهر كله هيضيع..لكن امشى وانت شادد ضهرك ساعتها هتحس بالثقة ف نفسك وهتبرز مظهرك
* ديه معلومة للشباب: [color="rgb(255, 0, 255)"]اهتموا بحلق دقونكم ولو حبيتوا تربوها يبقى بمظهر حلو مش تشمئز منه النفوس[/color]
* ديه معلومة للبنات: ربنا مش خلق اى حد وحش وخلقنا كلنا اجمل من بعض يبقى ليه ندارى الجمال اللى ربنا خلقه بالكمية الرهيييييبة ديه من الميكب..كل ماخففتى الميكب كل ماجمالك ظهر اكتر
ثانيا: هندامك
0 انا هلخصه ف جملتين..كل ماكان اللبس بسيط ومتناسق ، كل ماظهرت شياكته واناقته
ومع العلم ان طريقة اختيارك للبسك بتحدد شخصيتك قدام الناس..يعنى ف ناس بتميل للالوان الساخنة زى الاحمر والاصفر والاورانج..الخ بينطبع عنهم الشقاوة والتفاؤل والبهرجة
اما الالوان البارده بنى ازرق جراى اسود وهكذا دول شخصيات هادين وغامضين..وف ناس كتير بيحكموا ع الشخص من لبسه لو راجل لابس بدلة هتلاقى الناس بتقوله يا بيه او يافندم ، لكن لو واحد لابس قميص ازرق ع بنطلون اخضر هيتقاله يا اسطى او يا اخينا.
ثانيا: اداب السلوك ف الضيافة والحديث وتناول الطعام:
0 علشان تكون ضيف خفيف او ظريف او مضيف ظريف .. اسمع كلامى
- لو انت عامل حفلة يبقى لازم تختار ضيوفك اللى ممكن ينسجموا كلهم مع بعض ، لكن مش تعزم اتنين عليهم تار من بعض مثلا وتقلب الحفلة جنازة ، ولازم اللى هتعزمهم تأكد انهم بيستلطفوك وبيحبوك لكن مش تجيب ناس اول مايشفوك يبقوا عايزين يحدفوك بحاجة..وخلى بالك ف تعاملك مع الضيوف يعنى مش تهتم بحد وتسيب حد..مأنت مش جايبهم علشان تحرق دمهم وتقل قيمتهم..خد بالك من كلامك يعنى مش يكون كلنا مبسوطين وفرحانين وبنهزر ونضحك ويدخل واحد ف النص يقولك قريت صفحة الوافيات النهارده!!
وحاول ع قد ماتقدر ان ضيوفك يمشوا وهما مبسوطين وفرحانين من المناسبة ديه.
-الكلام ده كل لو انت مضيف..تعالى بقى نشوف لو انت الضيف هتعمل ايه؟
-احنا من طريقة اكلنا بيتحكم علينا ع طول اطباعنا وسلوكنا وبيئتنا و ممكن بغلطة بسيطة تخسر احترام اللى حواليك..تعالوا نشوف ازاى
0 واحنا معزومين عند حد وبناكل مش لازم نجيب ف سيرة الامراض والحشرات والحيوانات والعمليات الجراحية لان كل ده بيتقزز منه النفس
0 لما تيجى تمسح بؤك بعد الاكل بالفوطة اللى قدامك او بالكلانكس..يبقى مجرد لمس خفيف ع بؤك مش نمسح وكأننا بنلمع ازاز
0 لما تيجى تتكلم اثناء الاكل خد بالك دايما ان تكون معلقتك وشوكتك ف الطبق مش معلقها ف ايدك وهى مليانة اكل وعمال تشاور بيها وانت بتتكلم وتوقع منها شمال ويمين
0 وانت بتاكل خد بالك دايما و ركز ف طبقك وبس ومش تكسف الناس وهما بياكلوا ببصاتك عليهم..وعود نفسك مش تاكل غير ثلاث ارباع وجبتك العاديه..ومش حد يسألنى ازاى!
0 لما تيجى تشرب الشربة اشربها براحة وبدوووون الموسيقى التصورية اللى كلنا عارفنها..واتعمد تشرب الشربة من جنب المعلقة "ع فكرة انا جربتها ووقعت ع نفسى الشربة كلها..تجربة فاشلة..بس يمكن تكونوا اشطر منى
وخلى بالكم بؤكم يبقى قريب من الطبق بلاش فضايح..ولما تخلص شربتك خلى معلقتك جوه الطبق زى ماهى
0 لو اتحط قدامك اكل اول مرة تشوفه خليك طبيعى واوعى تشمه وتشك ف امره او تستغربه ، كل وخلاص هنعمل ايه..ولم رجليك من تحت الترابيزة مش تبقى اخد كرسيك وكرسى اللى قدامك كمان
ولو لاقيت كله خلص الاكل وانت لسه بتاكل يبقى تسيب الاكل فورا حتى لو هتموت من الجوع..لان كده اسمها فجااعه..ومش تتكلم وبؤك ف اكل..ومعلقتك او شوكتك امليها بالاكل المناسب مش تعمل هرم ع المعلقة..ولو الاكل سخن جدا يبقى قدامك حل من الاتنين" ياتستحمل وتاكله وهو سخن ، ياتصبر وتستنى لما يبرد ، لكن ايااااااك والنفخ..هنتفضح.
المواضيع المتشابهه
..
العرض المتطور
