//
//
يا ناشدٍ عـن سيرتـي وأنسابـي
وأحبابي .. وعن عادتي وسلومي
أنا الـذي فوقـك يلـوح شهابـي
ما بين شعشاع القمـر ونجومـي
ميـلادي الصحـرا وفيهـا رابـي
يومي على طباع البـدو مفطومـي
مـن يعربـيٍ عـاربٍ وأعرابـي
لا الفِرس تِعرق بالنسب والرومـي
مسلم وسنّي .. حنبلي .. وهّابـي
والمملكه داري .. وشمّـر قومـي
درسـت درس بمدرسـة شيّابـي
مـا درّسـه صُبحـي ولا بيّومـي
وأحبابي السبعه .. فديت أحبابـي
تعـال أعدّدهـم معـك برقـومـي
أوّلهـم اللـي ساكنـه بأهـدابـي
(أمّي) عسى يسبق فناهـا يومـي
ذاقت عناهـا مـن قبـل تشقابـي
وتسهر وأنا اللي مهتني في نومي
لين أستوى عودي وبيّـن نابـي
ولاحت بروق المرجلـه بغيومـي
فايق غلاهـا مـن وطـا بترابـي
والناس في كومٍ وهي فـي كومـي
وثانيهم (الشايب) عسـاه يثابـي
بالجنـه اللـي دربهـا معلـومـي
شيخٍ على طيب السجايـا شابـي
جبر الكسير ومنصـف المظلومـي
علّمنـي الديـن وحفظـت كتابـي
وحفظي صلاتي والصبر في صومي
وسلْمه تمركز في خلايا اعصابـي
لين اختزلـت أطباعـه بمفهومـي
وثالثهم اللي ما هي مـن أجنابـي
اللي بديـن الله غـدت مقسومـي
بنـت الكريـم الوافـي المزهابـي
شيخٍ شبيهـه بالعـرب معدومـي
فـدوة حذاهـا رفـلـةٍ تنعـابـي
ومهبولةٍ بالفـال الأقشـر تومـي
اللي سكنها مثـل عـش غرابـي
واللي عشاها مُنتجـات (أندومـي)
ومن لا تسيّـس بيتهـا بأطنابـي
عـز الله أنـه بالـردا مهدومـي
ورابعهم أطيَب عزوتي وأصحابـي
الغالـي المتفـانـي الزيـزومـي
جـزل العطايـا لا طلبتـه جابـي
وإليـا تنصّيتـه قضـى ملزومـي
ملفاي .. لامنّي فقـدت صوابـي
ومشكاي .. لامنّي شكيت همومـي
وخامسهم اللي لو يطـول غيابـي
قـام ايتنشّـد حالتـي وعلومـي
يسـأل عليّـه لابتـي وأقـرابـي
وإليـا لقانـي يسفهـل بقدومـي
أنشهـد إنّـه للنِـعـم كسّـابـي
وأنشهـد أنـه تفتديـه رخومـي
وسادسهم اللي لا دخل مـع بابـي
حشَم لحايا المجلـس المحشومـي
مـا هـو بنـمّـامٍ ولا يغتـابـي
ولا هو عن دروب السنع منجومي
سوالفـه دايـم تثيـر اعجـابـي
وسرّي معه طول العمـر مكتومـي
وسابعهم اللي مـا بخَـل بعتابـي
ولامنّه أخطا .. ما زعل من لومي
حـرٍ يصيـد بضربـة المخلابـي
مهو كما رخمـةٍ كثيـرة حومـي
وقت الرخا .. لا شافني هـلاّ بـي
وعند الشدايد .. فيه أشد عزومي
وأهل الوشا لو حوّلـوا لحسابـي
مال الوليد ومال إبـن جمجومـي
ما أبيعٍ ربع ٍ لـي علـى طلاّبـي
لـو زادت الغلّـه وزاد السومـي
لا صـار مرقـاب العـلا مرقابـي
ما ألدْ في قـاعٍ تشيـل خصومـي
ودام العلـوم الطيّبـه تزهـابـي
وبيض النوايـا شلتهـا بهدومـي
إن طال عمري جعلهـا تبقـا بـي
وإن مت .. يكفي قولهم مرحومـي
منقووووووووووووووول ..
الشاعر محمد الذرعي ..
[/align]
العرض المتطور
