~|| أطباق رمضانية منوعة ||~

[ريآنة العود]

~|| أطباق رمضانية منوعة ||~




المنيو

~|| شوربة الشوفان باللحم ||~
~|| لفائف التوست ||~
~|| رولات الدجاج ||~
~|| سلطة المكرونة ||~
~|| كفتة التونة بالبطاطس ||~
~|| حلى التويكس والجالكسي ||~


يتبع في الرد التالي ..

[ريآنة العود]

~|| شوربة الشوفان باللحم ||~

| الطريقة والمقادير مع بعض | :

نسلق اللحم ونشيل اللي يطلع على سطح ماي السلق منه

- مثل الزبد تقدرون تقولون .. احنا نسميه زفرة اللحم مدري وش تسمونه :/ -

بعدها نضيف عليه :

بصله مقطعه صغار مع ثوم مفروم وحبتين طماط مقطع لقطع صغيره ومكعبين ماجي وشوي ملح وملعقة صغيره مليانه بهارات مشكله .

ونخليهم ينسلقون مدة ساعه .

الحين نحط في الخلاط :

12 ملعقة كبيره شوفان مع شوي كزبره وطماطتين مقطعات و ربع حبة فلفل بارد وملعقة كبيره صلصة طماط .

احنا لما نخلط الشوفان نخلط أول شي 6 ملاعق مع حبة طماط وكزبره شوي ونضيفها للشوربة .

بعدين نخلط الـ 6 ملاعق الباقيه مع طماطه وربع حبة فلفل بارد ونضيفها للشوربه .

ونحركها لما تتجانس وتطبخ ..

ونقدمها .

* ملاحظات :

- كمية الشوفان هذي لـ 7 أشخاص كل ما زادوا عدد الأشخاص كل مازادت كمية الشوفان والماي والمقادير الباقية .

- كمية الملح حسب الرغبه

[ريآنة العود]

~|| لفائف التوست ||~

سهله وبسيطة ونفع كطبق جانبي برمضان .

أخذت فكرتها من خزامى الله يجزاها خير .. الإختلاف كان بالحشوة بس .

| الطريقه والمقادير مع بعض | :

أول شي نقلي أصابع الدجاج - ماركة أمريكانا -

وبعد مانقليها نحطها في صحن عليه منديل عشان يمتص الزيت .

الحين نجيب التوست ونقطع أطرافه ونفرده .. وممكن نستخدم آله المطازيز اللي تفرد بس بدون مانشغلها طبعاً .

وناخذ حبة التوست وندهن نصها بصوص بيتزا - دهنته بنفس الصوص اللي استخدمته بسمبوسة البيتزا -

* إذا ماتوفر عندك إدهنيه بأي صلصة بيتزا سواء منزليه أو جاهزه .

ونحط فيه حبة دجاج وشوي جبن - استخدمت تشدر وموزريلا -

ونلفها ونسكرها بخلطة الطحين والماي - مثل السمبوسة -

ونحطها بصينية للفرن وندهن التوست من جميع الأطراف بـ :

[ ملعقتين كبيره زيت زيتون | ثلاث ملاعق كبيره كاتشب | ملعقه كبيرة شطة | رشة نعناع مجفف ]

* النعناع المجفف اختياري .

مثل كذا :

* ملا حظة مهمة :

لا تلصقونها ببعض مثل الصورة .. أنا بعدين فرقتهم ,

لأن لو لصقتوها ببتمسك في بعض وصعب تفرقينهم عن بعض بعدين بدون ماتخربين شكلهم .

وندخلها الفرن ربع ساعه تقريباً وبعدين نحمرها شوي من فوق .

ونقطعها بالنص ونقدمها

[ريآنة العود]

[align=center]~|| رولات الدجاج ||~

تنفع تكون من الأطباق الجانبية برمضان أو بالعزايم بشكل عام .

| الطريقه والمقادير مع بعض | :

نسلق صدرين دجاج ونفتتهم ,

أنا فتتهم بفرامة البصل عشان يصير قوامه مفتت مثل التونه .

بعدين نضيف عليه :

بصل أخضر مقطع شرايح .

بقدونس مفروم

خس مقطع لقطع صغيرة .

ونقلبهم على بعض ونضيف عليهم عصير نص ليمونه وفلفل أسود وملح و ملعقتين كبار مايونيز .

ونقلبهم مع بعض .

ونجيب توست ونقطع أطرافه ونفرده ونحط جزء من الحشوة على الطرف ونلفه .

وبعدها نسكر الطرف بخلطة " الطحين والماي " اللي نسكر فيها السمبوسه .

ونقدمه .

.


[/align]

[ريآنة العود]

~|| سلطة المكرونة ||~

| الطريقة والمقادير مع بعض | :

نسلق المكرونه مع شوي ملح .

بعدين نصفيها ونخليها تبرد ,

على ماتبرد نجهز الباقي

نقطع فلفل بارد ملون لشرايح طويله .

ونضيف عليهم شرايح فطر - بالسلطات أحط معلب -

وذره - الحب المعلب -

ونضيف المكرونه عليهم ونضيف عليها الصوص :

الصوص بحط المكونات بس .. الكميات أنتي تتحكمين فيها .

تبين تزيدين من شي أو تنقصين من شي لين توصلين للطعم اللي تبينه .

عباره عن :

[ مايونيز | عصير ليمونتين | خردل | متبل إيطالي | زيت زيتون | ملح | فلفل أسود ]

* هذي صورة المتبل الإيطالي جبتها من النت

نخلطهم مع بعض ونضيفهم على المكرونة والخضار ونقدمها

* ملاحظه :

لما نخلط المكرونة والخضار نخليها بالثلاجه .. وقبل التقديم بربع ساعه نضيف عليها الصوص ونقدمها .

.

.

[ريآنة العود]

~|| كفتة التونة بالبطاطس ||~

من الأشياء اللازمة عندنا برمضان من كنا صغار .

سهله ولذيذة .

| الطريقة والمقادير مع بعض | :

حبتين بطاطس مسلوقه ومهروسه - نهرسها بالملعقة أو شوكة مو بالخلاط -

وتحطين عليهم علبة تونه - نكون مصفينها من الزيت اللي فيها - مخلوطة مع :

[ عصير ليمونه | فلفل اسود | ملعقة صغيره نشا | كمون | كزبره مفرومه | بابريكا فلفل حار | بصله متوسط مفرومه ]

ونشكلهم مثل اللي بالصوره ,

وبعدين نغمسهم بطحين ثم بيض وبعدها بالبقسماط ونخليهم بالفريز عشان يتماسكون
بعدها نطلعهم ونقليهم ونقدمهم .

[ريآنة العود]

~|| حلى التويكس والجالكسي ||~

من الحلويات اللازمة برمضان عندنا ..

فوق الـ 10 سنين واحنا نسويه كل رمضان ,

سهل وما ياخذ وقت .

| الطريقة والمقادير مع بعض | :

أول شي نجيب كيك شوكولاته ونقطعه لشرايح متوسطة العرض .

ونصفها في الصينية اللي بندخلها الثلاجة ..

وبعد ما نصف الكيك نضغط عليه عشان يتماسك مع بعض .

وبعدها نسوي الطبقة الثانية :

بالخلاط نخلط :

- علبتين قشطة - مثل التاج وغيره , بس لا تستخدمون قيمر لأنها ثقيلة وبيصعب الخلط -

- ظرف كريم كراميل

- ظرف دريم ويب

- 4 أصابع تويكس

- جالكسي واحد

وبعد ما نخلطها نصبها شوي شوي على الكيك وندخله الثلاجة أقل شي 5 ساعات .

والأفضل نخليه ليلة كاملة عشان يتماسك أكثر .

وعند التقديم نبشر جالكسي ونقدمه .

[ريآنة العود]

حفظاً للحقوق وأمانة في النقل
جميع الأطباق منقولة من مدونة كأنه مو عاجبك على بلوجر
جزاها الله عنا كل خير

[تميز]

يعطيك العافيه ..

[ريآنة العود]

اقتباس المشاركة الأصلية كتبت بواسطة تميز يعطيك العافيه ..

جزاك الله خيراً ولا حرمك الأجر