حصريا للرائديه00(فلم الرعب)0000000

بوح المشاعر · 24-07-2011, 10:05 PM

السلام عليكم ورحمة الله وبركاته

لاتنسون الاذكار والتسميه

مره كنت انا وبنات خالتي وبنات خالي مجتمعين ببيت جدتي

وطبعا سهرانين الى الفجر ومجتمعين في غرفه وفارشين الفرش

الي منسدح يسولف والي جالس حوالين بنت خالتي الي كانت تقص قصة فلم رعب وطبعا تخيلوا الاجواء معي
ظلام الفجر مع دفايه متحركه (هذيك الي تلف يمين يسار )

واحنا ملتمين على بعض وبنت خالتي تسولف واحنا نخفي الخوف ونسمي

ولما وصلت فقرات الرعب ونغطي وجيهنا بيدنا كلنا من الخوف ونضحك خوف (ياحبي لنا )

واثناء السوالف سمعنا صوت الباب الخارجي يتسكر بقوه

طبعا الناس نايمين

تخيلوا شكلنا

الكل رفع راسه وفتح عيونه

والي يسولفون على الفرش سكتوا

واحنا نبرد اعصابنا بانه اخوي الصغير لانه كان يبينا نجي للبيت (طبعا بيتنا جنب بيت الجده على طول)
بس انا تذكرت ان اخوي نايم

وهم يتسائلون بصمت من ذا؟

واحنا مع النظرات لبعض في اثناء ذلك سمعنا على حديد الشباك من برى الغرفه احد يلعب بحديد الشباك بطريقه موسيقيه(فهمتوا (طررررط طرررط طررررط طرررررط)

واحنا يمه وش ذا بسم الله ويكمل علينا يقوم بفتح الشباك واغلاقه بشكل سريييع (طراااخ طراااخ طراااخ طراااخ)

واحنا متجمده الدماء في عروقنا

والبنات الواااااان وجيههم

وانا ينقال لي مااخاف (صرنا اصفر اخضر ازرق من الخوف

والي بالفرش نطوا علينا وقفزوا قفزة بااحضاننا

والي ماتبي تشوف (تقول غطوني غطووني وطبت عند رجولنا من الخووووف(كنها تبوس رجولنا خخخخخخخخ)

والي تبكي خوووووف

والي تسمي علينا وتقرا من غير شعور(طبعا انا وصاحبة القصه المرعبه هههه لاننا الكبار لكن مافاد كبر العمر

والله خفنا مووووووووووت
مووووووووووووووووووووووووووووت

واحنا نقرا الكرسي والفلق (وحده قالت ختمنا القران هههههه

وكل عيوننا على الشباك المرعب

مستحيل يكون انسان

مستحيل يكون حرامي

ياناس هذا ماهمه الناس نايمين

وكل وحده تتوقع شي

واحنا الدمووع تصب

وبعدها راعي الشباك دخل الحديده الي معه بالشباك الي فتحهه طبعا كانت الستاره مغطيه علينا

تخيلوا يدخل الحديده ويطلعها يدخلها ويطلعها واحنا نشوف الستاره ترتفع وتنزل ترتفع وتنزل

متنا صياااااح وبكي

وبعدها هدا الصوت واحنا ننتفض مووت ووحده من الخوف والله اشجعنا قامت وهي تنتفض تقول وش اسوي اسكر الباب اقفله ولا كان فيه مفتااااااااااااح ياسلام

واااااااااو وش نسوي قلنا اجلسي اجلسي وحنا نصيح نصيييح

ونتمسك ببعض وفي حضني كم وحده ههههههه

متعنقطين فيني ومتشابكين مع بعض وقسم منظر مؤلم مؤلم موووووووت

جلسنا دقيقه واحنا مغمضين عيوننا ماندري وش بيصير

وفجاه

انفتح الباب

انفتح علينا بقووووووووووه

وانا حاطه يدي بوجهي مابي اشووووووووووف شكل الجني مابي

وهم الله يعلم بحااااااااااااااالهم المساكين

واختي فاحطه صياح
كانت نايمه وماحضرت الا اول سالفة الفلم المرعب حق بنت خالتي وحطت راسها على رجلها ونامت وقامت مرتاعه على الصوت والصياح

وخلاص مابقى شي (انا بنفسي اقرا الكرسي اقول ان شاء الله مايسوي لنا شي ان شاء الله مايقدر

حاله يرثى لها موووووت

انا عاد اول وحده على الطرف (ياسلااااااااااااااااااااام كملت كملت

وطبعا بعد ان انفتح الباب قالت هههههه (خفتووووا؟)

طلعت خالتي جايه تقول خفتوا

احنا تبلدنا

سكتنا

مدري وش صرنا

وحده منا قالت لها (انتي ماتستحقرين نفسك)

قالت اكيد تسولفون بشي يخوف

قلنا حرام عليك شوفي البنات وش صار لهم

تعالي عاد شوفي اشكالنا اثار الخوف والصياح والعيون الحمر والله ننرحم

طبعا انتشرت السالفه بالعايله وميتين ضحك علينا

وكان من ضمن البنات ناس ماحضروا السالفه كانوا نايمين فوق واحنا بس الي جلسنا تحت قالوا اشوى ان حنا محنا معكم ههههههههه

واحنا كل مانتخيل اشكالنا نضحك ونرجع نخاف هههههههههههههه

وحده منا مرضت والله جتها حراره غرييبه وحالها قضى وطبعا خالتي لامت نفسها اكثر من مره بس وش عقبه

الحمدلله الان مضى على السالفه يمكن ثلاث اربع سنوات او سنتين مدري ههههههه

بس لازال صداها بالعائله واحنا البنات عاد غييير دايم نطريها ونتذكر احوالنا

الله لا يعيد الشر وبس

بسم الله علينا وعليكم

لاتسولفون بشي يخوف ولاتنسوا الاذكاااااااار

وش رايكم ههههههههه

اعتذر على الاطاااله المرعبببببببببببببببه

سـَمآ ♪ · 24-07-2011, 10:14 PM

هههههههههههههههه

مثل بنت خالتي.كل ما نكون بالمزرعه ومتجمعات
تسولف لنا عن الجن...وبالليل بعد..

تسلمين ع الطرح..

ناصر الزعبي · 24-07-2011, 10:22 PM

هههههههههههههههههههههههههههههههههههههه

والله انكم خوافين لدرجة مدري شلون

انا قلت الحين بيدخل عليكم قطوة ولا جني ههههههههههههه

عشت معكم لحظات الخوف هههههههههههه

الله يعطيك الف عافية اختي بوح المشاعر

فاصله · 24-07-2011, 10:24 PM

تخافون من سوالف الرعب
<< طالعه منها ..
هههههههههههههههههههههه

موقف لاتحسدون عليه صراحه

شمس الرائدية · 25-07-2011, 05:03 AM

.
<< تحب سوالف الجن (( بسم الله علينا))
ههههههههههههههههههههههه
أهم شي من الخرعه ما سكن فيكن جني

تسلميييييين يالغلآ

عاشق القمم · 31-07-2011, 01:29 AM

ههههههههههههههههههه
سلمت ،،

دانة الكون · 31-07-2011, 10:22 AM

عشت الاحداث معكم

طالعين من الشر

لو انا منكم ذبحت خالتي
لا وتسأل خفتوا
والناس ميته صياح

ولد الشرقية · 31-07-2011, 10:28 AM

بارك الله فيك

الدووووخي · 31-07-2011, 02:07 PM

والله احداث حلووة ..

ههههههههههههههههههه

الله يعطيك العافية

على هالموقف

صانع الإبداع · 31-07-2011, 11:21 PM

ههههه
الله يعطيك العافية على الموقف

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
حصريا للرائديه00(مغامره مررررعبه)000000	بوح المشاعر	منتدى القصص والروايات	26	28-07-2012 11:12 AM
حصريا(ام الفجائع)رثاء في الشيخ عبدالعزيز الوهيبي رحمه الله 0000000	بوح المشاعر	منتدى الصوتيات والمرئيات الإسلامية	22	13-07-2009 05:21 AM