كيك ألوان الطيف
السلام عليكم .. هذي الوصفة اهداء للعزيزة نونا من السعودية طلبت مني اساعدها بطريقة عمل هذا الكيك .. فكان انسب حل اني اسويها وانزلها حتى يستفيدوا كل حبايب كيك وبيك وتكون سهلة عليهم اذا بيسوونها .. ان شاء الله تعجكبم ..
قبل ما نبدأ بالمقادير والطريقة هناك بعض التوضيحات والملاحظات.. مع اني ما احب كثرة الكلام حتى ما احد يمل ولكن بهذي الوصفة لابد من التوضيح حتى تحصلي على نتيجة نهائية رائعة باذن الله ..
هذا الكيك ممكن تسوينه باي كيك سهل عليكي المهم ما يكون مخلوط بكاكاو او اي الوان .. لكن انا بفضل استخدم بهذي الوصفة كيك العلب الجاهز .. والسبب:
اولا لان الوصفة تحتاج شغل وتاخد وقت وممكن الكيك العادي يخترب مزيجه من الخلط والانتظار وطول المدة ويضيع تعبك ..
ثانيا لان الكيك الجاهز تقدرين تستخدمي فيه الالوان المائية وما يخترب المزيج اما في انواع كيك خاصة اللي فيها زبدة ما ينفع الا الوان الجل او البودر .. ومو الكل يتوفر عندهم الوان الجل ..
وبعد تجربة عدة مرات .. افضل كيك يستخدم في هذي الوصفة الكيك الابيض اللي بزلال البيض فقط (بياض البيض العلبة يسار الصورة) سواء كان علب او اي وصفة تسوينها .. لان الالوان نتيجتها بتكون احلى واوضح من الكيك اللي بيكون مزيجه على صفار .. ما تكون الالوان صافية .. مثل هذا الكيك ..
هذي الوصفة سويتها بكيك الفانيليا الصورة على العلبة كان لون الكيك ابيض (العلبة يمين الصورة) ومن السرعة ما قرأت المقادير كانوا طالبين بيض كامل .. فكانت نتيجة المزيج على صفار قليلا .. لكن بفضل الله نجح الكيك وما تغيرت الالوان بشكل كبير ..
هذي تقرييا كل الملاحظات .. في توضيح اخر سريع الكريمة المستخدمة اختيارية .. انا استخدمت كريم البودر .. من وجهة نظري هي الذ كريمة مع الكيك الجاهز .. حسب التزيين قد تحتاجي كمية كبيرة منها من 6 - 8 اكياس ، او انك تسوين اي كريمة سهلة ومتعودة عليها وبكمية وافرة وتستخدميها هذا في حال سويتي الكيك طبقات اما اذا كان في صينية واحدة بيكفي 1-2 كيس كريم بودر .. واكيد لمحبي الفوندان وعجينة السكر ممكن يكون التزيين النهائي بالفوندان .. وباخر الموضوع فيه صور من النت باشكال منوعة لتزيين كيك الوان
الطيف اختاري الاسهل لك ..
واعتذر على الاطالة وان شاء الله ما تكونوا مليتوا وتستفيدوا من هذي الملاحظات ..
المقادير:
2 علب كيك جاهز يفضل ابيض (اي يستخدم فيه زلال البيض) لعمل الكيك طبقات .. اما ان كنت يتعملين الكيك ملون بصينية واحدة يكفي علبة كيك واحدة .
2 – 8 اكياس كريم بودر او مقدار وافر من اي كريمة تزيين تناسبك ..
الوان جل او مائية حسب نوع الكيك (موف/بنفسجي – أزرق – أخضر – اصفر – برتقالي – أحمر)
الطريقة:
اعملي الكيك مثل ارشادات العلبة .. شعلي الفرن على الدرجة المطلوبة على العلبة ..
قسمي المزيج بالتساوي على 6 اطباق او اكواب (الاطباق افضل لتسهيل عملية خلط الالوان)
ضعي نقطة من كل لون في كل طبق .. وقلبي حتى تحصلي على خليط ملون .. يفضل استخدام ملعقة لكل لون لا تخلطي الالوان او اغسلي الملعقة بعد كل لون .. ابدئي بنقطة او اثنين اذا كان اللون فاتح زيدي .. الموف/ البنفسجي والازرق يكون لونهم اجمل لو خليتهم اغمق شوي من الالوان اللي انا سويتها ..
فكرة .. ممكن لو توفر عندك نكهات .. تضيفي لكل لون نكهة تناسبه مثلا الاصفر نكهة الليمون او الاناناس .. الاحمر فراولة او توت .. الموف/البنفسجي عنب .. الاخضر تفاح او ليمون بنفسجي .. البرتقال برتقال .. الازرق ممممم ما عرفت اللي عندها فكرة تقول لنا ..
الألوان السائلة/المائية .. حسب بحثي بالنت هذي طريقة دمج الالوان للحصول على الالوان الغير متوفرة .. يفضل تطبيقها على مقدار صغير لو نجح اللون معك طبيقيه على باقي المقدار ..
اللون الموف/البنفسجي .. اخلطي مقدار من اللون الازرق مع مقدارين من اللون الاحمر
اللون البرتقالي .. اخلطي مقدار من اللون الاحمر مع مقدارين من اللون الاصفر
اللون الأخضر .. اخلطي مقدار من اللون اللون الازرق مع مقدارين من اللون الاصفر
اذا كان اللون فاتح زيدي اللون الاغمق الى ان تحصلي على اللون المطلوب .. والعكس صحيح لو كان اللون غامق زيدي اللون الافتح .. وهذي صورة توضح ماهي الالوان المناسبة لمزجها للحصول على الوان اخرى ..
الرجاء عند نقل الوصفة وضع رابط/لينك ظاهر مباشر لها وذكر المصدر كيك وبيك ..
عمل الكيك طبقات:
جهزي 6 صواني قياس 8 انش .. ادهنيها بزيت او زبدة ورشيها بدقيق او ضعي ورق شمع .. صبي كل لون في صينية .. انتهبي انك ما تكون الطبقات سميكة .. بالتزيين بتغلبك وبيكون ارتفاع الكيك عالي جدا .. لو حسيتي الكمية كبيرة على الصينية ارفعي مقدار من المزيج وسوينه كب كيك (الطريقة بالاسفل)
اذا ما توفر عندك صواني نفس القياس استخدمي صواني الالمنيوم القابلة للرمي ..
اخبزيها من 15-25 دقيقة .. انتبهي ما تاخد وقت طويل لان الكمية قليلة نسبيا بالصينية .. وفي حال لو تحمرت قليلا من اعلى او من الحواف (مثل ما حصل معي لاني نسيتها) مو مشكلة مع التزيين بالكريمة ما بيظهر شي وتختفي كل هالاخطاء ..اتركيها بالصينة 5 دقائق تبرد ثم اخرجيها واتركيها حتى تبرد تماما ..
عمل الكيك بصينية:
ادهني صينة بزيت او زبدة ورشيها بالدقيق او ضعي ورق شمع .. صبي بالوسط وبشكل دائرة اللون الموف/ البنفسجي طبقة اولى .. ثم الازرق .. الاخضر .. الاصفر .. البرتقالي .. الاحمر ، بإمكانك البدء بالاحمر ثم البرتقالي .. وهكذا .. ، اخبزيها حسب ارشادات العلبة .
اخرجيها من الفرن واتركيها تبرد بالقالب قليلا ثم اخرجيها وضعيها على شبك التبريد حتى تبرد تماما ..
عمل الفكرة بالكب كيك: نفس طريقة الكيك بصينية واحدة ..
معذرة ما صورتها بعد الخبز .. اكلوها مباشرة .. لكن هذي صورة من النت وباذن الله بتحصلين على نفس النتيجة .. لاحظي بالصورة الالوان اغمق من اللي انا سويتها لو بتحبي تسوينها بالوان اغمق ..
وهذي صور من النت لاشكال متنوعة لتزيين كب كيك الوان
الطيف ..
تزيين الكيك طبقات:
التزيين ممكن ياخد معك يومين خاصة لو استعملتي الكريم البودر لأن ياخد وقت حتى يشتد على الكيك بالثلاجة .. جهزي 4-5 اكياس كريم بودرة حسب ارشادات العلبة .. او جهزي كريمة التزيين الخاصة بك .. جهزي الكيك في حال كانت الكيكة منتفخة من الوسط اقطعي الطبقة المرتفعة حتى يتساوى سطحها .. راعي ما تكون طبقة الكيك سميكة حتى لا يزيد ارتفاع الكيكة بشكل كبير ..
نضع الطبقة الاولى اللون الموف/البنفسجي بحيث يكون وجه الكيكة من اعلى إدهنيها بطبقة من الكريمة ثم طبقة اللون الازرق بحيث يكون وجه الكيكة مقابل وجه الطبقة الموف/البنفسجي وقاعدة الكيك من اعلى .. وهكذا اكملي باقي الطبقات .. الآخضر الوجه من على ، الاصفر القاعدة من اعلى ، البرتقالي الوجه من اعلى واخيرا الاحمر القاعدة من اعلى .. بمعنى طبقتين تضعينهم مقابل بعض بحيث يكون سطح الجهتين مستويتن .. سبب عمل خطوات الوجه من اعلى او القاعدة حتى تعطي ثبات اكبر للكيكة لانها نوعا ما مرتفعة نسبة لباقي الكيك .. وما تنسي ندهنين الكريمة بين كل طبقة وطبقة ..
الرجاء عند نقل الوصفة وضع رابط/لينك ظاهر مباشر لها وذكر المصدر كيك وبيك ..
ندهن الكيكة بطبقة خفيفة من الكريمة ثم نضعها بالثلاجة اقل شي 6-8 ساعات حتى تشتد ..
جهزي 2-3 اكياس كريم خفق وقللي مقدار الحليب المكتوب على العلبة حتى تحصلي على كريمة ثخينة نسبيا .. فرضا المطلوب كوب حليب قللي لثلاثة ارباع الكوب او ثلثين .. اخرجيها من الثلاجة .. وادهني طبقة سميكة من الكريمة وحاولي تملسي سطحها .. او اعملي خطوط طولية بالسباتيولا او السكين على داير ووجه الكيك .. ضعيها بالثلاجة لثاني يوم حتى تشتد الكريمة ويسهل تزيينها ..
التزيين النهائي حسب الرغبة .. لكن ان احببت تزيينها بنفس الوان
الطيف .. جهزي 1-2 كيس كريم خفق .. قسميه على 6 اطباق .. لوني كل طبق بالوان
الطيف مثل الكيك .. وزيني فيه .. او زينيه حسب المتوفر عندك او ذوقك ..
هذي صور من النت لاشكال متنوعة من تزيين كيك الوان
الطيف ..
تزيين الكيك بصينية واحدة:
حسب الرغبة .. انا دهنتها بطبقة من كريم البودر المخفوق .. وبظهر المعلقة عملت دوائر على الكريمة .. لونت قليل من الكريمة بلونين اصفر واحمر ووضعتهم في كيس نايلون فوق بعض .. وعملت نقط متفرقة على وجه الكريمة ..
ضعيها بطبق التقديم وقدميها وصحتين ..
وهذي الكيكة سويتها من كيك بزلال/بياض البيض وكانت الطبقات رقيقة جدا .. وضعت الطبقات فوق بعض من غير كريمة وقطعتها بالقطاعة على شكل قلوب ..
منقول
المواضيع المتشابهه
العرض المتطور
