تناتيف على الطاير((عشر طاعش)) ونشوف السياحه

[(ملاذ الطير)]

قبل ماتقرا الموضوع ، قل والله ان اردّ<< يجمّع ردود على وزن يجمّع بالخشاش
( )
ملاحظة انقطاعي الساعات اللي طافت لأسباب خاصة واشكر كل من سأل عني والله يقدرني على رد جميل وما قرأته لكم في رسايلكم يالبردقان انتم
دُعاء :
اللهم انك تعلم اني اكره ولد خالتي راشد ومحمد ولد عمتي يومهم يقولون دخّن معنا واعيي اللهم اني اسألُك انك تقلعهم عني وتخلي شقتهم اللي بحي أُم عصيقل تشب ويسلمون منها ويستادبون ، آمين
مثل ماأنتم قارين بالعنوان ، السالفة أكيد تحربش بعلوم السفر والتسافر ، وقبل ارطن عليكم شوي واعطيكم من غدقتي أحب أثني على الوزير القصيبي يومه يقدّم الطلب للزباين واقوله : كل عام وانت بخير وان شالله انك تبي تقدّم الطلب بفوّال ومطبق باقبص اللي بشارع انكاس بالرياض عشان تعرف قدر اللي يشتغل بالمطعم واحب بعد اوجّه لك رسالة بحكم اني مواطن صالح وانام بدري واصحى بدري واعبي بنزين بـ 91 وماقد شلت ولاعة بجيبي أنك ياطويل العمر لازم تشوف لنا حل مع شبابنا اللي يشحنون رصيد للي يعزّ عليهم وتوضّفهم قبل مايجيبون العيد فين تراهم مستوين واسألني أنا لأني دايم اشوفهم بمقهى ابو هيثم وكل من سألته منهم : ليش ماتروح لوزير العمل وتقول له عن عطالتك اللي مالها داعي خاصّه انك خريّج جامعة والاقي الجواب واضح : ان سكرتيرك رادّه ويقول انك مشغول بامورن أهم !

وش رايكم ندحدر شوي واقولكم وش عندي من علم عن قصّة الماخوذ اللي نصحني اسافر لابها !

في كُل بلدان العالم تجد سيــاحة داخليه .. وهذا فضل عضيم تقدمه الدولة لشعبها ..

في كُل بلدان العالم تجد وزارات ( راقية ) تُقدم كل أصناف الراحة الداخلية للمواطن !

في كُل بلدان العالم تجد ( سلتوح ) يؤدب .. وتجد ( داشر ) يوقّف عند حدّه .. وتجد ( مُراهق ) يؤخذ على يده !
في كل بلدان العالم .. تجد ( عايض ومعيض ) يستقبل المواطن ليطرح له كُل سبل الراحة كي ينعم بفضل وطنه عليه ,,

سافرت لأكثر من دولة .. ولاحظت الفرق الداخلي عن الدولي ,,,
لقيت الفــرق الكبير .. وحسيت بطعم " النشوه " .. وتلمّست نقوة " الرخـص " والدلال !
تصدقون ياجماعة اني مرّة سافرت لديرة ويوم جلست احسب التكلفة للسفر للدولة الخارجية لقيتها أرخص بكثير من السفر لديرتن بالداخل .. بل يوم دققت بالهلل بحكم أني ماحب أحد ياكل حقّي عياناً بياناً لاحظت أني يمكن ادفع بالخارج ربع ماأدفعه للداخل !
عندنا هنا الفـــرق " يحبه " قلبك .. قصدي " يحبه " قلب كل حرامي وهامور .. ويكرهه قلب الضعيّف والطفران واللي ماعنده إلا ثلاثة أسهم بشركة المعجل !
بحسبه سريعه .. ومُقارنة بين ماتدفعه هنا في رحلة خفّافية في وحده من ربوع بلادي .. بتلاحظ الفرق شاســع !
مرّتن قال ابوي للوالدة : نبي نصيّف هالسنة بالباحة .. قالت : مالقيت إلا الباحة ! شفّ لنا ديرتن ثانية غدينا نشخّص بها قدّام خلق الله ونقول اننا سافرنا للخارج .. قال ابوي : انطمّي بس والله انتس ماتدرين .. آلحين عندنا صالونن وش زينه .. وذف وتوني منجّدن مراتبه وفيه شاحن جوّال بعد وتبين تروحين برّا وتخلين جندي الجوازات يشوف صورتك بالجواز !
خويي يعترف بكل " بجاحه " أن أطلق و((اسحن)) شي بالدنيا أنك تسحب الجواز وتسافر برّا !
وانا اقول بس بدون بجاحه " أنت احسبها واجلدها زين على آلتك الحاسبه " ثم عوّد علي وشرط ان تدعي لي .
فنادق تمصع محفضتك من جيبك ولو تسأله عن الزين بالغرفة بيقول لك : فيها غلاية ومكيف بارد .
اكيد فيها مكيّف بارد .. اجل بتخلوننا نخيس بالحرّ .. امحق من حال
العام سافرت لديرتـن ( ما ) .. وقلت احجز لي اطرف غرفة .. دوّرت ودوّرت وآخر شي رسيت لي على شقق اسمها ذرب وعليها مدخلن ودك بس تفرّج عليه ..
الوان وزبرقه وعاملن لابسن كرفتّه حمرا جعله يخنق بها .. قلت بروحي وانا داخل .. شكلي ماعادني راجعن للمنطقه الشرقيه .. ياهي وذفه وتشرح الخاطر !
ويوم حاسبته وعطيته إثباتي وسيرتي الذاتيه وجلس يطالع بخشتي نص ساعه يحسبني مطلوب والا شي .. قال : تفضّل !
نعنبوا داره ماعنده من حسن المبسـم شي .. حتى اني بغيت اقترح عليه يركب ذاك التقويم اللي يجي معه مغاط غدي خشته تنفتح بالغلط شوي للزبون ويحبه ..
جا البنقالي وقال لي الموظف اطلع معه ,, زقلبت عمري معه ودخلت انا واياه للمصعـد اللي كلّه مرايات ومافيه إلا دورين ومروحة شفط .. سألته بما أني مختلي معه وماحدن حولنا ( صديق : هذا شقق كويّس ؟ ) .. رد ": ايوه .. كويّس كويّس .. إنتا إبقا شاي ؟ .. شيل نمبر موبايل انا !!!


دخلت الغرفة ودخلتني السكنيّه !
وينها عن مدخل الشقق ! مايدخل هالغرفة والا واحدن مقطوعن من شجره !
قلت بنفسي : الدعوه عبْر .. وخلنا هالليلة نمشّيها !
بتوالي الليل هنّق علي المكيف البارد وصار حاااار كنّه اديتر كابرس !
ويوم اتصلت في الرسبشن ماردّ إلا بعد عشر دقايق وقال : حرّك المكيف بايدك الشمال .. شلون بايدي الشمال !
تلفزيونهم مافيه إلا سبع قنوات .. ست موشوشه ووحده نظامها ابيض واسود وعلى الدقّه القديمة
المشكلة أن الشقق ماخذين علي عربون يخافون اني اخرّب عليهم شي .. مدري من اللي قايلهم ان كل اللي عندك جديد وجايّن بقراطيسه !
طبعاً طلعت من عندهم وبنفس ذاك اليوم قابلت لي أكثر من شخص من نفس الديرة ومشّوني بديرتهم ..

أخيراً رجعت لشرقيه وانا أدوّر جوازي واقول : ياااازين الجُمرك ومساييره وياحبني لزحمة المنفذ وغرابيله .. وياملحك يالموظّف اللي بالجُمرك وانت مادّن لي جوازي وتقول : تفضّل الله يسهّل امرك ؟
الوالدة هالسنة تقول : لازم نسافر ونشمّ هوا ..
وانا اقول : هاتي فلوسك وانا اودّيك لاطلق ديرتن برّا وشرط ان تحطّين الباقي بطقم مواعين صيني تشخصّين فيه قدّام جيرانك .
شباب . ماتلاحظون أني قاعدن أخرّب الشعب ؟
طيب تخاوني ونروح لماليزيا وناخذ معنا ناصر يدلّنا الطريق ؟
عالعموم ..
انا ماجا هالموضوع براسي إلا لأني شفتكم طارفين على هالإجازة .. وكلّن يبي يهجّ ويخلّي ديرته ويحسّ بالوناسة ويشمّ الهوا بعيد عن غثا البيت وسواته .. ومن خلال هالمكتوب أخاطب كل من في يده حلّ وربط وسمكره وله علم وتعلوم في السياحة والسفر والتبطّح بالديار الونيسه واقول : ياأنكم تشوفون لنا حل مع هالخساير اللي ندفعها بالداخل أكثر من الخارج والا بلاش وفكونا . !
فكّونا من شرّ الفنادق وطمعها .. أمس الليلة بـ 120 واليوم بـ 630 ريال .. ماعليش أرفع السعر بس لاتنهب !
فكّونا من شرّ المنتزهات ولحطهم لنا باسعار خيالية ..
فكّونا من كل شي يستغل مُسمّى " السياحة " عشان ينهب ويكبّر كرشته جعلها للفتق !
بعدين .. سؤالي اليتيم العقيم : وش عندنا من زين إلا هالمنتزهات ؟
ليش مانشوف غيرنا ونشوف كيف تطوروار وسووا أشياء ماهي عندنا وتكلفتها جدّاً بسيطة ؟
قولوا آمين . الله يوخذكم !
قبل يومين ..
كنت بوزارة وجلست أسولف مع الموظف ... مهوب حبّـ(ن) له .. بس عشان تمشي معاملتي عنده ومايدقق فيه .. وقعدت اقوله اننا ودنا نسافر وننحاش من هالحرّ ونفتكّ .. واني محتار وين نروح .. هو اننا نسافر للصلالة والا ننهج عمارنا لاندنوسيا .. عاد ردّ هو وقال : إلا ورى ماتسافرون لابها عشانها ارخص وابرد وازين وفيها دعم للسياحة الداخلية !
مارديت عليه إلا يوم وقّع لي وريقتي اللي بين يديه .. ثم قلت له : ياخوي انت صاحي ؟ .. ياخوي والله لو تحسب حسبتك ودراهمك ان توفّرها برّا .. بس ماش واضح انك شارب لبن معتّق ! انت وعقالك اللي تقول كفر كامري



مايستفاد من الهرج اللي فوق :
1
ان وزير العمل شكله شيّ وهو طاقّن الطربوش حق المطبخ فوق راسه ، صايرن وش ملحه الله يجزاه خير
2
لاتغرّك الوان الشقق اللي برّا إلا لين تشوف وش نوع مكيفهم وتتأكد أن دشهم مهوب خربان وان المخده حقت السرير مهيب صفرا .
3
إذا شفت العامل حق الشقق لابس كرفتّه حمرا وفيها لمعه فاعرف انها مقلب وتمويه !
4
إذا صارت عندك دراهمن واجد ، فوفرها بجيبك ولاتسافر أو شف لك ديرتن برّا طارفة وحطّ المقسوم فيها .
5
إذا طلّعت لامك والا لاختك جواز سفر فلا تحط على صورتها شطرطون اسود لأنهم شايفينها شايفينها الله لايعوق بشرّ ، وترى الرجاجيل يحبون الشي المخفي ويصير له طعم مهوب طبيعي ، بس احسن حلّ قل للي تبي تطلّع لها جواز أنها تصوّر بأقبح وجه عشان الرقيب اللي بالمطار ماينفتن فيها وتاخذ اثمه !
6
الكلام اللي تحته خطّ أحمر اعتبروني ماقلته عشان ماتضيق صدوركم !
نشوفكم على خير ،، ورحلة سعيدة في " أرجاء الوطن " ، وافرح ياعم الحقّ ، هُمّا الزباين قووووك
الله من قل البركه وطقة التسبد !!!!!
سلام يالبردقان!

[goree]

والله ياهالسياحة الداخليه انها غدت تضيق الصدر :(
ومصاريفها واجده ..
كيف نشجع السياحة الداخلية وهي بهالغلاء اللهم ياكافي
<< اللي يشوفك بيقول ذي ماتقضي صيفها الا بالدول الفلانيه :d
بس هالغلاء والله ماخلانا نسافر
ونعمه ان كتبت لنا روحة لمكه
وراضين بها بعد
ربي يسعدك يااخوي

تحايا الورد
/
\
ܓܨ[mark=000000]جوري[/mark] ܓܨ

[هتلر الشمري]

ملاااذ الطير

حاولت اركز معك وافهم (عشر طعش ) وش سالفته لكن الاول ضيع التالي

المهم يعطيك العاااااااااااافيه

[(ملاذ الطير)]

اقتباس المشاركة الأصلية كتبت بواسطة هتلر الشمري ملاااذ الطير حاولت اركز معك وافهم (عشر طعش ) وش سالفته لكن الاول ضيع التالي المهم يعطيك العاااااااااااافيه

انت اسحن واحد بالعالم خل عشر طاعش في صندوق العراوي بوديها للسوق قبل العيد بس الزبده يابعد طوايفي في صلب العلم المدرج (كل عام وانت بخير)

[(ملاذ الطير)]

اقتباس المشاركة الأصلية كتبت بواسطة goree والله ياهالسياحة الداخليه انها غدت تضيق الصدر :( ومصاريفها واجده .. كيف نشجع السياحة الداخلية وهي بهالغلاء اللهم ياكافي << اللي يشوفك بيقول ذي ماتقضي صيفها الا بالدول الفلانيه :d بس هالغلاء والله ماخلانا نسافر ونعمه ان كتبت لنا روحة لمكه وراضين بها بعد ربي يسعدك يااخوي تحايا الورد / \ ܓܨ[mark=000000]جوري[/mark] ܓܨ

انا معكــ اذا ظللنا حاطين شطنطور من ابو 4 ريال عريضه

[يكفي الواايلي]

ملاذ الطير


يعطيك العافيه طرح كمدي لي مشكله نعاني منها واسلوب سرد راقي يدل على رقي قلمك

تقبل اعجابي في هذا الطرح

[(ملاذ الطير)]

اقتباس المشاركة الأصلية كتبت بواسطة يكفي الواايلي ملاذ الطير يعطيك العافيه طرح كمدي لي مشكله نعاني منها واسلوب سرد راقي يدل على رقي قلمك تقبل اعجابي في هذا الطرح

[align=center]هلاوغلا بكـ ياصديزي [/align]

[منتهى الذوق]

مشكوووووووووووووووور

[أبو رائد]

ملاذ الطير ..

انت مبدع بحضروك .. وبكتاباتك ..

الله يعطيك العافية

[HamoOoOoDi_2008]

مشكوووووووووور ياملاذ الطير على النصايح يالغلا,,,

طرح حلووو ,,,,

تقبل مروري,,,

تحياتي لك