معكم جوري الانجليزيه
وعلاقتي بالمطبخ عاديه
يعني مااعشقه ولا اكرهه
لكن ادخله بكل تأكيد ..
- تحبين الطبخ او لا؟
أحبه .. بس مابعد وصلت لحد الإتقان في كل شيء
- من هو الشيف اللي تحبين تتابعين وصفاته بشكل دائم ؟!
مالي أحد معين
فيه أطايب عالمجد
بس مو شرط ألتزم فيها لا
احيانا يشدك اسم الطبخة وطريقتها
فـ تتابعينها ..
بغض النظر عن الشيف حقها ..
- وجبتكـ المفضله وهنا أقصد ( الفطور _ الغداء _ العشاء ) وأيضاً نوع الوجبه .؟
امممممممم ماافطر غير بالاجازات وباالكليه شيء خفيف
الغداء يمكن هو اللي احرص عليه غالبا
اما العشاء ماعندي مشكله فيه
والعشاء هو الأكثر أكيد لاني اكون مروقه
- طبق تحبين تسوينه كثير ..؟
مالي شيء محدد
بس احب المصقعه كثير
- الطبخات اللي تسوينها معدودة ولا كثير وماتنعد ..؟
معدودة والله
- اول مرة دخلت المطبخ كم كان عمرك لو تذكرين..؟
والله مااذكر
بس المدارس خلونا نحب التدبير المنزلي والمطبخ
يووووه اليوم اللي يكون عندنا طبخ
يكون عيد
يعني برابع ابتدائي
- اول طبخه طبختيها وش كانت ..؟
اول طبخه طبختها
بيض مقلي
وتطورت وصار مقلي و مسلوق
- طبخه طبختيها وفشلتي فيها وش كان شعوركـ وقتها والكل منتظر تخلصين ..؟
كح كح
مااذكر انه احد كان ينتظرني
بس حرقت سينبون كنت عاملتها 
وشعوري انقهررررررت على وقتي اللي ضيعته
- طبخه طبختيها والكل مدحكـ !؟
ههههههههههههه اهلي بخيلين بالمدح
بس اللي اذكر مدحوني
الفطائر 
واذا على غير اهلي فيه الحلا مدحوني البنات
- موقف طريف صار معاكـ في المطبخ ..!؟
امممممممم مايحظرني حالياً..
- يعتمد عليكـ في الطبخ او لا ..!
لا صراحه للحين 
الاعتراف بالحق فضيله
مااتخيل ابدا اني امسك عزيمه لحالي
لكن لو وجبه مقدور عليها
ومااحب احد يستعجلني ابداً
يعني الاكل اللي اسويه بالوقت اللي انا احبه بس
- أكثر شي يعجبك في الطبخ وأكثر شي تكرهينه في المطبخ؟؟
يعجبني اللي عندهم نَّفس بالطبخ
و بعد توفر كل المقادير بوقت ماابي
واكثر شيء اكرهه المقادير لاصارت موموجوده
وغسل المواعين
- هل انتِ ممن يتبع مقوله ( العين تأكل قبل الفم ) وماهو أدني حد لتنفيذك لها ؟!
مقتنعه فيها أكيد ..
بس كثير تغلط هالمقوله
احيانا الشكل مايكون حلو مره
بس الطعم رهيييييييييب
- أكلة من وجهة نظرك ما تضبط ألا بشغل البيت (( يعني مو من مطعم ))
اممممممممم الاكلات الشعبيه
الجريش والقرصان والمرقوق والمراصيع بعد
- أكلة ما تضبط في البيت (( يعني ما تصير حلووة إلا من المطعم )).
مدري بس عن نفسي
احب الاكل من برى أكثر
صح مو دايم بس افضله عالبيت تغيير جو
- قوليلنا وصفه لطبخه حلوه كثير تسوينها عشان نجربها ..!؟
حلا رووووعه
سبق طبقته ..
::
مقاديره
كيك شوكولا (امريكانا أو اي نوع)
12 حبة بسكوت بالسمسم ( اولكر)
( كيس أوريو واحد) أبو 6 حبات منزوع الكريمه ( يعني بيطلع معنا 12 شرحه)
حليب للتغميس
الصوص}
(2)تويكس
(ا)كريم كرامل
(ا)قشطه
(2 )حبه بسكوت اوريو ( منزوع الكريمه يعني 4 شرحات )
للزينه :
شوكولاته مره
الطريقه}
نقطع الكيك قطع عشوائيه ونرصها أسفل كل وعاء
نضغطها بالاصبع ( ضغط خفيف)
نغمس بسكوت السمسم بالحليب ونضعه فوق الكيك ( ؟؟ بسكويت السمسم بسرعه يتفتت بس غمسه وحده ونزليه بسرعه )
ايضاً نغمس بسكوت الأوريو ونرصه فوق بسكوت السمسم
نخلط مقاديرصوص الشوكولاته بالخلاط الى تتجانس.
وأحرصي أن المكونات تكون على درجة حرارة الغرفه عشان لا تتعبين بالخلط ..
نصب الخليط فوق كل اناء حتى نغمره
ببشر شوكولاته مره أو اي نوع شوكولاته ، بس يستحسن تكون مره عشان تعدل النكهه ، وتعطي شكل أحلى
ويقدم
- نصحيه توجهينها لطباخات الرائدية.!
والله انكم فنانات بالطبخ ماشاء الله
استمروا .. ونحن على طريقكم سائرون 
ربي يسعدكم ويحفظكم
وشكراً على الاستضافة
الجميله
المواضيع المتشابهه
العرض الشجري