[align=center]
**
* 19 *
وسكر عني
وش يبي ,,, ليه يبي يقابلني ,,, اروح والا ماروح ,,, بس ودي اعرف وش يبي فيني وليش ضروري ,,,
رجعت للمجلس وانا محتار وافكر بهالناصر ,,, اخذت مكاني بالمجلس وانا مازلت سارح ,,, اروح والا ماروح
= خالد
رفعت راسي لخالد اللي ينادي
انا = هلا
خالد = اسألك انا
رفعت حواجبي مستغرب
انا = سألتني .؟
خالد مستغرب = خالد عسى ماشر وش فيك
اقوله والا ماقوله ,,, بس اخاف اذا قلتله يعصب ويمكن يعيي عني اروح او يصر انه يروح معي وانا بيذبحني الفضول ابي اعرف وش يبي ناصر
خالد = خاااااااااااااااااااالد
انتبهت لصراخه
انا مستغرب = وشوله تصارخ ,,, اسمعك ترا
خالد مستغرب = من اليوم اناديك ( وقام وجلس ملاصق لي ) خالد اخوانك فيهم شي
انا مستغرب = اخواني .؟ لا ,,, وش جاب طاريهم الحين
رفع خالد حواجبه
خالد مستغرب = مدري عنك ,,, بعد ماكلموك جيتلي مانت على بعضك ,,, خالد عسى ماشر ,, خوفتني ياشيخ ,,, سالم فيه شي ,, سلمى ,, معاذ
صح اثرني قلتله قبل شوي ان الاتصال من الاهل ,,, ياربي اقوله والا ماقوله ,,, اخاف يعصب وانا ابي اعرف وش يبي هالناصر
لف خالد ذراعه على اكتافي وقربني منه
خالد = خالد وشفيهم اخوانك ,,, صار لهم شي .؟
التفتت له
انا = لا مافيهم شي
خالد = اجل وش فيك .؟
انا = مافيني شي
ابعد ذراعه عني وجلس جلسة استرخاء
خالد = على العموم بكرة بنرجع ومصيري اعرف من سالم نفسه
على نياته مصدقني ان الاتصال اللي قبل شوي من اخواني ,,, ياربي اقوله والا ماقوله ,,, بس ناصر يدل بيت خالد ,,, وخالد يقول ماعرفه
التفتت لخالد ولقيته يلعب بجواله ,,, المشكلة خالد عصبي واحتمال يصر يروح معي او يمنعني اروح ,,, وناصر طلبني انا وبس ,,, والفضول بيذبحني ودي اعرف وش يبي ,,,
وبعدين ليش انا خايف ,,, ابروح واشوف وش يبي مني وارجع ,,, صعبة هي صعبة .؟ ,,, مكبر الموضوع وهو صغير
انا = خـ خالد
خالد وهو مازال يلعب بجواله = هلا
انا = تتوقع اللي اسمه ناصر يدل بيتكم .؟
التفت لي متفاجئ من السؤال ,, سكت شوي وبعدها اعتدل بجلسته
خالد = ماعتقد ,,, انا ماعرفه حتى اسمه بالكامل ماعرفه
تفاجأت
انا = ماتعرف اسمه بالكامل .؟
خالد = ايه ,,, ولا عمري شفته
انا = طيب من صوته رجال كبير ,,, يمكن يعرف ابوك
خالد = وانا وش يدريني ,,, وبعدين هو يتدخل في اشياء ماله خص فيها ,,, العيادة عيادتي ولا هو موظف فيها ولاهو صاحبها ,,, ليش يتدخل بيني وبين وينلي ,,
انا = اسأل ابوك تكفى
طير عيونه فيني
خالد مستغرب = اسأل ابوي عن وش .؟
انا = شفه هو يعرف واحد اسمه ناصر والا لا .؟
خالد = وليش اسأله .؟
انا = يمكن صديق ابوك ,,, ويدل بيتكم
خالد = مدري ,,, حتى لو كان صديق ابوي ,,, وش يبي مني انا وليش يتدخل بيني وبين هالخايس وينلي
انا بترجي = طيب اسأل ابوك ,,, تكفى خالد تكفى
طير عيونه فيني
خالد مستغرب = خالد وش فيك ,,, ليش تبيني اسأل ابوي
انا = ابي اعرف وشهو هالناصر هذا ووش يبي مني ,,, آآآ ,,, اقصد منك
يطالعني وساكت
انا = اسأله
خالد = ابوي مسافر
انا = اتصل عليه
رافع حواجبه مستغرب ويطالعني ,,,
انا = يله
رمى خالد جواله بالكنب اللي بجنبه وقام رايح للتلفون وضغط الازرار كم ضغطه وبعدها
خالد = خلص العشا .؟ ,,,, اهاااا طيب
وسكر
رفعت حواجبي ,,, مالت عليه فرحت ظنيت انه اخذ التلفون بيكلم ابوه واخر شي ( خلص العشا )
انا بعصبية = ليه ماتصلت بابوك ,,, اتصل علييييييييييه
خالد = ماني متصل
استغربت
انا = ليه .؟ اتصل خالد اسأله
خالد بعصبية = اسأله عن وش .؟
ياصبر ايوب
انا بملل = عن نااااااصر
خالد = لا ماني متصل
انا بعصبية = ليه يابقرة .؟
خالد = خالد انا ابوي ماكلمته ولا شفته من خمس شهور ,,, وبعد المدة هذي كلها ,,, تبيني اتصل فيه واقوله يبه تعرف واحد اسمه ناصر
انا بتنهيدة = انت اللي سببت هالبعد بينك وبين ابوك
ابتسم خالد ابتسامة جانبية
خالد بسخرية = الكل يحط اللوم علي ,,, خالي وامي و اخواتي والحين انت ,,, ايه انا سبب هالبعد ,,, انا اللي خليت ابوي يهملني عشر سنين ,,, انا اللي خليت ابوي مشغول ,,, انا اللي خليت ابوي يسافر ,,, انـ
قاطعته
انا = انا ماقصدت كذا ,,, انا اقصد كانت الفرصة عندك تتصالح مع ابوك وهو جا لحد عندك ببيت خالك ابو عبد الله
خالد بعصبية = انت بنفسك قلت انه جا ومعه وينلي ,, ابوي جا عشان وينلي موب عشاني
انا بسخرية = ياسلام على تفكيرك ,,, ماشاء الله عليك ذكي ( وكملت بعصبية ) وينلي اكيد هو اللي نشب بابوك وجا معه ,,, ابوك جاي عشانك انت ,,, انت حتى ماعطيت ابوك فرصة ,,, هجيت من بيت خالك واختفيت
خالد بعصبية = عشر سنين ماحسيت بحنان ابوي ,,, عشر سنين وانا احاول الفت نظر ابوي لي ,,,, سويت كلللل شي عشان ابوي يحس فيني ,,, سويت الصح وسويت الغلط بس عشان ابوي ينتبه لي ,,, بس مافيه فايدة لين تبلدت مشاعري ,,, خلاص تأقلمت من دونه ,,, ولا ابي اشوفه ( وقام ) اروح اجيب العشا احسن
وراح ,,,
تنهدت من كثر مشاكل خالد وهمومه ,,, كيف اقوله عن اتصال ناصر كييييييف ,,,
وحنا نتعشى
كنت سرحان وافكر ومتردد اروح والا ماروح ,, اعلم خالد والا ماعلمه ,,, بيعصب والا ماهو معصب اذا عرف
رفعت راسي له ولقيته ياكل
انا = خالد لو كان ناصر يدل بيتكم وش بتسوي .؟
رد علي من دون مايرفع راسه عن الاكل
خالد = خالد خلني اتهنى باكلي ,,, يكفي وينلي مطيّر النوم عني
ابتسمت بحنان له مع انه مايطالعني
انا = خالد جاوبني
رفع راسه بملل
خالد = عن وش اجاوبك .؟
انا = لو كان ناصر يدل بيتكم وش بتسوي.؟
خالد بملل = وش اسوي لو كان يدل بيتنا .؟ ,,, اسويله فورمات لعقله مثلا عشان مايدل ,,, خالد وش هالسؤال
انتبهت لسؤالي ,, أي بالله صدق سؤالي مادري وش يبي
انا تلعثمت = لا ,, آآآآ ,,, انت مافهمتني ,,, اقصد يعني وش بتسوي اذا جا لبيتكم .؟
خالد بملل = بذبحه ( وحط اللقمه بفمه ) ارتحت الحين
رده هذا عشان يسكتني ,,, مل مني ومن اسألتي ,,, ياربي شسوات الحين ,,, اقوله والا ماقوله ,,, وش يبي ناصر وش يبي
بعد ماخلصنا من العشا اقترح خالد علي نطلع نتمشى ,,, بس ماكان لي نفس
خالد = وش رايك نطلع
انا = وين .؟
خالد = أي مكان ,, قم خلنا نطلع
انا بملل = لا خالد مالي نفس ,,, وودي انام الحين
رفع حواجبه مستغرب
خالد = تنام الحين ,,, بدري ,,, وش فيك خالد .؟ اخوانك فيهم شي .؟
انا = غصب اقول فيهم شي ,,, ياخي مافيهم شي مافيهم شي
خالد مستغرب = مدري عنك من يوم ماكلمتهم وانت مانت على بعضك
دخلت رولين علينا المجلس ومعها طفل رضيع ملفوف ,,, استغربت وش هالطفل هذا
تقدمت رولين لين وصلت قدام خالد اللي جالس مقابلني
رولين = سرقتها وامي ماتدري ,,, خذها تراها نايمة
ضم خالد رجليه عشان يسوي حظن للرضيع واخذه من رولين
امممم صالح مرة قال ان خالد ماله اخوان ,,, ماعنده الا اخوات بس نسيت كم قال عددهم
انا بابتسامة = اختك .؟
رفع خالد راسه لي بابتسامة
خالد = ايه ,,, رند عمرها 7 شهور
واحنى راسه لها وقعد يقبل يديها ووجهها وهي نايمة,,, ابتسمت شكله يحب اخواته
قمت وجلست عنده
انا بابتسامة = شوي شوي عليها بتقومها ,,, خلها تتهنى بنومها بتسبب لها كوابيس
رفع خالد راسه عن اخته
خالد بابتسامة = حرام عليك من زمان ماشفتها ,,, ياحبي لها يانااااس
انا = هههههه كل هذا حب .؟
رولين = خالد العب فيها شوي وبعدين دوري عطنياها
انا = هههههههههههه وش قالوا لك عنها لعبه
رولين = انا احتريها تقوم وجبتها لخالد عشان اذا قامت اقول خالد هو اللي قومها
انا = هههههههههههههههههه شريرة
التفتت لخالد لقيته سرحان بحزن بوجه الطفلة
انا مستغرب = خالد وش فيك .؟
مرر خالد اصابعه بحنان على خد اخته
خالد بحزن وبهمس = خايف
انصدمت
انا بصدمة = خايف من وش .؟
صحى خالد من سرحانه وكأنه انتبه لكلمته
انا = خالد خايف من وش .؟
خالد = آآآ ,,, انسى انسى
واحنى راسه مرة ثانية لوجه رند وغطى وجهه بوجهها ,, وطوّل وهو على هالحال يقبلها ويضمها
خايف .؟ خايف من وش ,,,
آه صح ,,, تذكرت يوم يسرح خالد بوجه معاذ والحين نفس الشي سرح بوجه رند ,,, هو كذا مع الاطفال يسرح بوجيههم والا وشلون ,,, بس يقول خايف ,,, خايف من وش .؟
التفتت له لقيته الى الحين مغطي وجهه بوجه رند النايمة
وظل على هالحال لين قامت
رولين بفرح = اخيييييييييرا قامت ,,, هات هات خلاص
وجت قدام خالد بتاخذها منه
خالد = لا بتاخذينها مني يوم قامت
رولين = خلاص انت لعبت فيها الحين دوري
خالد مستغرب = لعبت .؟ عروسة هي تلعبين فيها
رولين = هات هات ,,, انا جبتها لك عشان تقومها ,,, عشان اذا قالت امي ليش قومتوها ابقول خالد اللي قومها
خالد = ياسلام ,,, ليش .؟
رولين = امي ماتعصب عليك وماتهاوشك ,,, اذا قلتلها خالد اللي قومها بتسكت
خالد بنص عين = كذاااا يعني ,,, ماجبتيها لي لله
رولين = ايه
ضحكت على رولين قوية عين
انا = ههههههههههههههههههههههه اختك داهية
ابتسم خالد وعطاها رند
وطلعت المزعجة من المجلس ,,, والتفتت مرة ثانية لخالد
انا = قلي من وش خايف
التفت لي
خالد = خلنا نطلع
انا بملل = لاااا خالد مالي نفس ,,, بنام
خالد = وش عندك مع النوم انت من يوم ماجينا للرياض وانت بس تنوم بدري
بعد صلاة الفجر
البارح ماذقت النوم ,, اتقلب بفراشي افكر بهالناصر ووش يبي مني وليه
الله يعين خالد دايم يقول مطيرين النوم عن عيني ,,, توني احس فيه ,,, هذا انا عجزت انام وهو مجرد اتصال واحد بس من ناصر ,,, كيف خالد اللي يصبح ويمسي بتهديدات وينلي وغرابة ناصر ,,, الله يعينه ويحفظه لخواته
بعد الصلاة حولت جوالي للصامت اخاف يتصل ناصر علي وخالد عندي ,,, دخلت الحجرة اللي انام فيها احط نفسي ابرجع انام ,,, اخذت نص ساعة وانا بفراشي عشان اذا مرني خالد اتظاهر قدامه بالنوم لكن خالد مامر شكله ماقام ,,,
انتبهت على نور جوالي دليل على وجود اتصال ,,, القيت نظرة عليه ( ناصر يتصل بك )
انا = الووو
ناصر = السلام عليكم ,,, هاه انا عند نهاية الشارع على اليمين ,,, سيارتي جراند ماركيز سودا ,, انتظرك
انا بخوف = وش تبي مني بالضبط ,,, انا ماعرفك ياخي
ناصر = تعال وتعرف ,, ماراح اخذ من وقتك الثمين ,,, وللمعلومية الموضوع اللي ابيك فيه لمصلحتك ,,, انتظرك مع السلامة
وسكر
لمصلحتي ,,, وش اللي بمصلحتي ,,, سترك يارب
قمت عن فراشي وطلعت من بيت خالد بعد ماتأكدت انه ماراح يمرني واكيد هو نايم الحين
وصلت عند سيارة ماركيز سودا وفيها شخص ,, قربت من السيارة واخيرا انتبه لي ونزل من السيارة يسلم علي
يالله رجال شكله بنهاية الثلاثين او ببداية الاربعين ,,, ياترا وش يبي بشاب ماجا عمره العشرين
ركبنا سيارته وبدينا بموضوعه
انا = وش بغيت .؟
ناصر بابتسامة مارتحت لها
ناصر = وش فيك خايف .؟
انا بعصبية = ماني خايف بس اخلص علي وش تبي .؟
ناصر بابتسامة جانبية = امممم وشلون وظيفتك .؟ ان شاء الله مرتاح فيها
حقير سؤاله مو لله ,,, سؤاله كنه يقول تذكر ان وظيفتك بواسطتنا ,,, سكت عنه ولا رديت
ناصر = اممم طيب يأخ خالد شكلك مستعجل ,,, بغيت منك خدمة واكيد تقدر عليها
استغربت خدمة
انا مستغرب = تبي مني انا خدمة ,,, وش تبي
ناصر = لك 100 ألف ريال اذا اقنعت صديقك خالد يحول العيادة باسمي
انصدمت 100 ألف لي انا .؟ ,,, لحظة مو كأنه يرشيني
انا بصدمة = 100 ألف
ناصر بابتسامة = لا تفوت الفرصة منك
طيرت عيوني فيه ,,, وش هالحقارة
انا بعصبية = رشوة يعني
رفع حاجب واحد بسخرية
ناصر = وليه تسميها رشوة ليه ماتسميها سعي
انا بعصبية = سعي بمية الف .؟
ناصر = المهم عقّل صديقك وخله يبيعلي العيادة
انا = وليه ماتطلب منه انت ,,, ليه تتعامل معه من تحت لتحت كأنك حية من تحت تبن
ناصر بسخرية = حسن الفاظك ,,, انا طلبت منه لكنه رفض
انصدمت خالد يقول مدري وش يبي مني
انا بصدمة = طلبت منه .؟
ناصر = ايه طلبت منه مرتين لكنه رافض ,,, وانا اولى من العيادة منه ,,, انا دكتور وهو خله يتفرغ لدراسته الثانوية
انا بعصبية = كذاااااب ماطلبت منه ,,, انت تكذب علي
ناصر بابتسامة = اقولك حسن الفاظك ,,, اسأله اذا كنت مانت مصدقني
انا = خالد يقول مايعرفك ولا يدري وش تبي منه
ناصر = صح مايعرفني ,,, لاني ماعرفته على نفسي يوم شفته بالعيادة
انا بصدمة = خالد شافك .؟
ناصر = نعم شافني وش فيك مستغرب ,,, المهم خلاص اتفقنا اتمنى تعقله وتقنعه يبيع العيادة لي
انا بعصبية = طيب هو رافض ,,, غصب يبيع ,,, اعوووووووذ بالله ماشفت نشبة زيك
ناصر = 100 ألف لك لحالك ( ورفع سبابته لي ) واذا ماقنعته خلال اسبوعين راح اتصرف معه تصرف ثاني ,,, لعب البزارين انتهينا منه يابابا ,,, ذكره بهالشي ,,, مشكور على وقتك
انا بعصبية = تهدد انت ووجهك
ناصر = 100 الف يأخ خالد لا تفوتها من بين يديك ,,, 100 الف
انا بعصبية = صدق انك شايب مخرف
ونزلت من سيارته ,, وسمعته يكلمني
ناصر = اسمع ,,, لا تنسى انك راح تخسر وظيفتك اذا ماقنعته ياشاطر
التفتت له بعصبية ,,, هذا زودها حتى انا يهددني ,,, لوح لي بيده بسخرية وحرك السيارة
شايب مخرف ,,, حقييييييييير
رجعت لبيت خالد وانسدحت بفراشي وانا افكر بكلامه ,,, 100 الف لي انا ,,, هذا اقدر اشتري فيها بيت صغير على قدي يستر علي وعلى اخواني ,,, 100 الف
بس رشوة ,,, طيب خالد ليش رافض يبيع ,,,
مرت ربع ساعة وانا افكر واهوجس لين غلبني النوم ونمت
= خاااااااااااااالد
افففففففف هذا صوت خالد يناديني ,,, متى انام براحة متىىىى افتكيت من خلود جاني خالد
خالد = خاااااااااااالد قم قم ياخي قم فاتك صلاة الجمعة
قمت مفزوووع ,,
انا = هاااه صلاة الجمعة
واخذت الجوال اشوف الساعة ,,, رفعت راسي لخالد اللي جالس على ركبه قدامي
انا = اففففففففف ليه ماقومتني
خالد = احلف بس ,,, من اليوم وانا اقومك ,,, ثقيل نومك ياشيخ
انا = وخر وخر ( ودفعته عن طريقي ) امس مانمت
صليت ورحت للمجلس ,, ولقيت خالد جالس وعنده رولا الهادية ,,, وجلست بجنبه
انا = متى تبينا نمشي .؟
خالد = متى مابغيت انت
شفت رولا تقوم وجت قدام خالد وطالعته وهي ساكته
استغربت وشفيها هذي ,,, التفت خالد لي مستغرب وبعدها التفت لها
خالد = تبين شي رولا .؟
اول ماخلص من كلمته وهي ترتمي بحظنه وتعلقت برقبته عانقته شوي وبعدها ناظرت وجهه
رولا بترجي = خالد لا تسافر
تفاجئ خالد منها ,,, بعد ماستوعب مسح على شعرها بحنان وبعدها لف ذراعه حوليها وضمها
خالد = لازم اسافر ,,, وان شاء الله كل اربعاء وخميس وجمعه اجي عندكم
رولا = لا خالد لا تروح
شفت ملامح خالد متأثر منها
خالد = رولا انا ادرس مثلك تبيني اخلي دراستي
رولا = ادرس عندنا ,,, لا تسافر مثل ابوي
ابعدها عنه بعصبية
خالد = لا رولا ,,, لا تقارنيني بابوك ( تنهد وكمل بحنان ) رولا انا كل خميس وجمعه ابجي ,,, وبعدين انا رحت هناك عشان امي ,,, امي هي اللي قالت لي رح هناك ,,, وانـ
رولا = امي تبكي اذا رحت عنا وانا بعد ,,, امي تقول اخاف يتهاوش مع صالح ( وعانقته ) لا تروح لا تروح
حسيت فيه انصدم من كلمتها ,,, والدليل عيونه اللي توسعت ويديه اللي ثبتت مالفها حولين اخته بعد ماعانقته وسرحانه بعد كلمتها
هو على صالح بس يارولا ,,, اخوك الكل يهدده الكل يبي ينهش فيه ,,, قربت منه ولفيت ذراعي على اكتافه وحطيت يدي الثانية على شعر اخته
انا = ان شاء الله تجي العطلة وتبقى معهم اطول وقت ,,, لا تتأثر منها بزر ماتدري وش تقول
التفت خالد لي بحزن وبعدها التفت لاخته ولف ذراعيه حوليها وضمها بقوة
خالد = رولا لا صالح ولا غيره يمنعوني عنكم وبعدين هانت العطلة قربت ,,, وان شـ
دخلت رولين علينا
رولين = يله خالد امي تقول الغدا خلص صار جاهز تعال خذه والا ترا اباكله عنكم
ابعدت رولا عن اخوها والتفتت لي وبعدها التفتت لخوها
رولا = ابتغدا معك
ابتسم خالد لها ومسح على شعرها
خالد بابتسامة = اكيد ,,, اصلا مايحلو الاكل الا معك
رولين بعصبية = وانا .؟
خالد = وانتي بعد
بعد صلاة العشا
مسكنا الخط راجعين ,,, طوال الطريق وحنا ساكتين انا سارح بافكاري وخالد سارح بافكاره
اقنعه يبيع عيادته وهو كان رافض ,,, طيب ليه رافض ,,, طيب انا ماعمري اقترحت عليه قبل يكلمني ناصر يبيع العيادة وش معنى الحين ,,, والا عشان الـ 100 الف ,, لا هذي رشوة رشوة
التفتت لخالد ولقيته يسوق وهو سرحان
انا = آآآ ,,, خالد
انتبه من سرحانه والتفت لي شوي وبعدها طالع قدام
خالد = هلا
انا = ليه ماتبيع العيادة وتفتك منها وترتاح من وينلي ومشاكله
رفع حواجبه
خالد = العيادة ماصار لها سنة من انتقلت باسمي وتبيني ابيعها ,,, وبعدين مافكر ببيعها ,,, العيادة ممتازة وموقعها ممتاز واصبحت شبه مشهورة ,,, وانا ابي اتخلص من وينلي مو من العيادة ,,, العيادة الحين صارت رزقي اصرف على نفسي من دون ما ألجأ لبوي ,,, وان شاء الله اذا تخلصت من وينلي اطورها
انا = بس بيعها عشان تفتك من وينلي وترتاح
وانتبهت لنفسي ,,, وش فيني ,,, ليه احاول اقنعه الحين ,,, معقول اخون صديقي اللي وقف معي وابيع ديني عشان كم الف
خالد = مافكر ابيعها ,,, وعلى فكرة واحد مرة وانا بالعيادة قعد يمدح العيادة وبعدها طلب مني ابيعها عليه ,,, بس وقتها كانت توها منتقلة باسمي وفرحان فيها
انصدمت هذا ناصر بس وشلون اقوله
انا = آآآ ,,, ووو ,,, وماتعرف اسم اللي يبي يشتريها منك
خالد = لا ماهتميت فيه لأني اصلا مافكر ابيعها
انا = وووو ,, ومارجع لك مرة ثانية يطلبها منك
خالد = اممم الا شفته اظن ثلاث مرات بالعيادة وطلبني ابيعها بس اقولك مافكر ببيعها
انا = وبكم سامها منك
خالد = خالد وش فيك اقولك مافكر ابيعها بلا سوم بلا هم
اعوذ بالله استغفر الله العظيم ,,, بتقنعه بالبيع عشان المية الف ياخالد ,, بترضى لنفسك تاكل مال حرام ,,, التفتت لخالد وهو يسوق ,,, خالد مايستاهل اللي يخونه وقف معي بمحنتي اقوم اخر شي اخونه
خالد = وش فيك تطالعني .؟
انتبهت وانحرجت
انا = لا ابد بس بالي مشغول
خالد = ايه اشوفك من البارح مانت على بعضك ,,, خالد عسى ماشر وش اللي شاغل بالك
تلعثمت مدري وش اقوله ,,, ايه صح انا علي بحث
انا = آآآ ,,, علي بحث ولا سويته الى الحين
خالد = بحث .؟ ومتى اخر يوم وتسلمه
انا = يوم الاربعاء الجاي
خالد = تقدر تجمع البحث من النت وبسهولة ,,, وعلى فكرة شقتك فيها خدمة الانترنت
انا = ادري بس ماعندنا كمبيوتر ,,, يحلها الله
التفت خالد لي وابتسم ابتسامة واسعة
خالد بابتسامة = والله ماعندك سالفة هذا اللي شاغل تفكيرك من امس ,,, لاب توبي تحت امرك خذه ولا ترجعه الا يوم تخلص منه
آلمني اكثر ماريحني ,,, انا افكر اخونك ياخالد وانت توقف معي حتى باتفه المشاكل اللي تمرني ,,, ماستاهلك ,,,
انا بألم = شكرا مايحتاج
خالد بابتسامة = الا يحتاج ,,, وعلى فكرة هو معي الحين ماعرف اسافر من دونه هههههه
انا = يعني انت ماتصبر عنه ,,, خلاص خله معك
خالد بابتسامة = ماشاورتك
يوم قربنا من الديرة جا لخالد اتصال
خالد بضيق= اففففف مالت عليه ,,, نويصر
شهقت من الخوف ,,, ناصر ,,, لا يكون بيعلم خالد اني قابلته اليوم ,,, سترك يارب
خالد = الووو ,,, وش تبي ,,,,,,,,, صدق انك قليل ادب ومسختها صراحة ,,, كل ماصار شي بيني وبين وينلي اتصلت علي ,,, ياخي فااارق ( وسكر الجوال بعصبية ) اقرفني ,,, كرهني بعيشتي
انا بخوف = وووو ,,, وش يبي
خالد بعصبية = يبيني استقدم ممرضين ,,, كل مارفضت شي لوينلي الكلب جا يركض فازع ,,, متى يطيح بيدي كرهني ياخالد كرهني بعيشتي
اخذت نفس عميق ,,, الحمد الله ,,, خفت يعلمه
بعد شوي سمعت جت رسالة لجوالي
فتحت الرسالة وانصدمت كانت من ناصر ,,, وكان نصها
(( كلمت خالد قبل شوي
وفهمت من اسلوبه معي انك مافتحت معه موضوعنا
وسعت صدري لصديقك خالد بما فيه الكفاية
وماني مستعد اوسع صدري معك
اما تقنعه باللي قلت لك عليه والا ورطته بتهمة تنتهي عقوبتها
بالقصاص ))
شهقت ,,, قصاااااااااص
التفت لي خالد يوم سمع شهقتي
خالد مستغرب = وش فيك .؟
مسكت راسي ,,, اخ بديت اصدع ,,, قصاص ليه وش مسوي خالد
خالد مستغرب = خالد وش فيك عسى ماشر
انا تلعثمت = آآآ ,,, لا لا ماشر ماشر ان شاء الله
تهمة تنتهي بالقصاص ,,, لا يكون خالد ذابح احد ,, لا قدر الله
التفتت لخالد وسألته بخوف وبدون مقدمات
انا بخوف = خـ خالد انت عمرك ذبحت احد
التفت خالد لي وطير عيونه فيني
خالد = هاااه ,,, ذبحت احد .؟ ,,, شارب شي انت .؟
سكتت ولا رديت ,,, طالع خالد قدام
خالد = لو اني ذابح احد ماشفتني اسافر وامشي بالشارع بسلام
صح معه حق بس ,,, بس وش يقصد ناصر ,,, اخ راسي
وصلنا شقتي ونزلت واصر خالد اخذ الاب توب حقه معي ,,, اتعبتني بطيبك ياخالد اتعبتني
يوم السبت
خلود ضربت الصدر وقالت خل بحثك علي
رحت للدوام ورجعت وانا اطرد كلام ناصر من راسي ويرجعلي مرة ثانية وافكر فيه
احاول اشغل تفكيري بشي غيره وارجع افكر بكلام ناصر,,, 100 الف معقول
واذا ماقبلت بالمية الف ,,, خالد بيضيع بتهمة الله اعلم وش
يوم الاحد
طلعت من الدوام في الليل ومكسل ,,, مرني خالد كالعادة وركبت معه
خالد = وش رايك نمر المكتبة احتاجها شوي
انا = مكتبة الحين .؟
خالد = اجل متى .؟
انا = اعذرني خالد مالي نفس انزل للمكتبات الحين مصدع مشتهي قهوة تعدل مزاجي
خالد بابتسامة = اوكي خلاص نمر المقهى وبالمرة عشان تغير جو انت ,,, لك يومين مدري وش فيك
فيني انت ,,, انت سبب اللي انا فيه بمشاكلك وبلاويك
دخلنا المقهى وبعد ماخذنا مكاننا وقبل يجي الجرسون
= هلا هلا والله من زمان عنك خلودي
رفعت راسي للشباب الاربعة اللي واقفين فوق روسنا ويكلمون خالد ,,, كلهم عليهم ثياب الا واحد لابس بنطلون ,,, التفتت لخالد ولقيته مطير عيونه فيهم وقام من المفاجأة
خالد = ررر,,, راكان
راكان .؟ كأني سمعت هالاسم هذا ,,, وين وين وين
= وش هالصدفة الحلوة هذي خلودي
التفت خالد له بخوف
خالد = بدر فكني من شرك
شهقت بدر هذا بدر ,,, صح توني اذكر هذا راكان اللي ارسل لخالد مرة
بدر وراكان ,,, لا لا ,,, سترك يارب
مسك واحد منهم ذراعي وقومني
خالد = وش تبون ,,, اتركوه مالكم دخل فيه
بدر = امش معنا حبيبي وانت ساكت
وشفت بدر يدخل يده داخل فنيلة خالد ويحط يده على ظهر خالد مباشرة ,,,
لاحظت على خالد انه نصب ظهره بعد مادخل بدر يده
بدر = امش معي ياخالد بالطيب والا ترا قرشت جرحك باظافري
النذل عرفت انه حاط يده على جرح خالد القديم
جا الجرسون وصرفوه
سمعت اللي ماسكني يقولي
= وانت الثاني امش بدون أي كلمة والا مايحصلك طيب انت وخويك
سحبت يدي منه بعصبية
انا = وش تبون ,,, انا ماعرفكم ,,, ماني رايح معكم وانا ماعرفكم ( والتفتت لخالد وسألته وانا عارف الجواب ) من هذولي ياخالد .؟
خالد منزل راسه ولا يرد
راكان = بس كذا حبيبي ,,, نعرفك علينا وخلودي يعرفنا عليك ( واشر على اللي بجنبي ) هذا علي ( وأشر على واحد وراي ) وهذا عبد العزيز ( وأشر على بدر ) وهذا بدر ( واشر على نفسه ) وانا راكان ( وأشر على خالد ) وهذا خالد ههههههههه حتى خلودي عرفناك عليه ,,, يله امش وانت ساكت
انا بعصبية = امشي وين .؟
مسكني علي مرة ثاني
علي = امش وتعرف ,,, امش يله وبدون فضايح
انا بعصبية = وانت تعرف الفضايح
التفت بدر لخالد اللي منزل راسه
بدر = قل لخويك يمشي بالطيب
رفع خالد راسه لبدر
خالد = انا بروح معكم ,,, بس هو خلوه
عبد العزيز = لا يابدر لا تطيعه ,,, هذا انا شفته كان مع خالد بالسيارة ذيك المرة
ضغط بدر على جرح خالد ونصب خالد ظهره اكثر
بدر = ماحنا خبول نخليه ,,, هذا ثاني مرة نشوفه معك ,,, مرة يوم تهج منا بالسيارة كان هو بجنبك ,,, وهذي المرة الثانية ( والتفت لي ) امش ياذا
طلعوني انا وخالد من المقهى غصب
طلعوني انا وخالد من المقهى غصب
وصلنا عند سيارة كامري وركب عبد العزيز لمكان السواق
بدر = يله اركبوا
وعلي الى الحين ناشب فيني عيا يترك ذراعي
خالد = خلاص بروح معكم بس وش تبون بخالد خلوووه
راكان مستغرب = خالد من خالد .؟
انا بعصبية = انا خالد وش تبون فينا ياخي ,, لا نعرفكم ولا تعرفونا
علي = لا لا زييييين اجل كلكم خوالد ,,, اركب اركب بس وانت ساكت
خالد بترجي = اتركه ياعلي الله يخليك ,,, هذا انا معكم وش تبون فيه
فجأة شفت راكان يرفع يده ويصفع خالد صفعة قوية ,, سمعت صوتها من قوتها
فتح بدر الباب الوراني ودفع خالد يبيه يركب ,,, بس خالد تمسك بالباب وعيا
خالد بعصبية = ماني راكب وخالد معي ماني راكب
بدر بعصبية = تركب وانت ماتشوف دربك
وعطى خالد بكس على بطنه ,,, ركع خالد يمسك بطنه بألم ,,, استغل بدر ركوعه ودفعه داخل السيارة
ودخلوني غصب وعلي بجنبي من اليمين من عند الباب وخالد بجنبي الثاني وبدر بجنبه من عند الباب الثاني ,,, كل هذا خايفين منا نهج
وراكان قدام وملتفت لنا وعبد العزيز يسوق
راكان = اخيرا حصلناك خلودي ,,, اقول حبيبي تذكر تبليغك علينا
بدر = شكله نسى ان ابوي لواء
علي = لواء ياخالد لواء يلويك ويلوي اقاربك كلهم ,, كل مابلغت علينا نطلع منها بسهولة
خالد بصراخ = على تراب والله على تراااااب
شهقت قوية الكلمة ياخالد ,,, قوية وين رحت ,,, ليتني قاص لسانك بيجني على نفسه بسبب عصبيته وطولة لسانه
سكتوا كلهم وبعد ماستوعبوا كلمته
بدر بعصبية = تقول لبوي على تراب ,,,, انا ابوي تقوله على تراب
راكان = والله لو اني منك يابدر وريته كيف يعيدها ( والتفت لخالد ) عمي انا على تراب
فجأة هجم بدر على خالد ,,, مال خالد علي وهو يدافع عن نفسه ,,, بس راكان وعلي من وراي مسكوا يدين خالد يمنعونه ,,, وانا ماقدرت ادافع عنه اربعة وحنا اثنين
بدر بعصبية = انا اربيك ياخويلد
ومسك رجل خالد اليسار ومدها على المرتبة وجلس عليها ,,, وقعد يضرب بقوة فخذ خالد بمكان واحد ,,,
خالد بألم = أأأأأه ,, رجلي ياكلب رجلي ,,, أأأأه
مال خالد علي اكثر لين صار راسه ونص جسمه بحظني ,,, وانا اشوف ملامح وجهه يتألم من تركيز ضرب بدر على فخذه
خالد بألم واضح = أأأه خلاص خلاص
التفتت لبدر ,,, ولقيته مازال مركز بمكان واحد ويضربه بقوة
مابي اشوف خالد اللي بحظني وهو يتألم ولاني قادر اسويله شي ,, يارب فكنا منهم
رفع خالد رجله الثانية بيبعد بدر عنه ,,, وركل بدر بقوة على الباب عشان يقوم عن رجله
لكن وين يدافع عن نفسه وهم اربعة عليه
شفت راكان يرفع قبضة يده ويهوي فيها على وجه خالد وسوى علي مثله
احنيت صدري وراسي بسرعة على وجه خالد احاول ادافع عنه لا تصيبه لكماتهم
انا بصراخ = بس خلاص حرام عليكم ماصارت كلمة
سمعت خالد يكلمني وانا مازلت منحني عليه ومغطي وجهه بصدري
خالد بألم = خالد رجلي رجلي ,,, بيكسرها آآآه رجلي
رفعت راسي لبدر ,, والكلب الى الحين مركز بالضرب بمكان واحد
والحقير الثاني راكان ماسك رجل خالد الثانية ومبعدها عن بدر عشان مايستخدمها خالد للدفاع عن نفسه
صار خالد متمدد ,,, ظهره وراسه بحضني ورجله اليسار تحت بدر ومازال يضرب بفخذه ,,, ورجله الثانية ماسكها راكان
انا بألم = خلاص بدر خلاص تكفى ,,, كسرت رجله
علي مسك ذراعي وقربني له
علي = دورك جاي ,,, لا تستعجل
شهقت من الخوف ,,, دوري
خالد بتعب وألم واضح = آآآآآآآآآآآه بدر ,,, رجلي رجلي
وبدر مابقلبه رحمة وقفنا للاشارة ومشينا وهو الى الحين مركز بمكان واحد بفخذ خالد ,,, لين اخيرا تعب من الضرب
بدر وانفاسه سريعة = عشان تعرف تثمن كلامك ( وقام شوي عشان خالد يبعد رجله ) ابعد رجلك لاكسرها لك
كسرتها وش بعد غير
مسك خالد فخذه اليسار وسحب رجله بألم ,,, وبصعوبة اعتدل بجلسته
التفتت لخالد اللي يتألم بجنبي ,,, ماسك فخذه بقوة ويتألم والتفتت لراكان
انا = ووو ,,, وين رايحين .؟
راكان = الحين تعرف ليه مستعجل
مال خالد علي وقرب فمه من اذني وانفاسه سريعه من ألم رجله
خالد بهمس = خالد سامحني اذا صارلك شي
التفتت له مفجوع وصار وجه قريب من وجهي مرة ,,, واثر صفعة راكان واضحة على خده ,,, خالد بدل ماتطمني تخوفني
انا بصدمة = وش
خالد بحزن = انا بحـ
ولا كمل ,, مسك بدر شعره وسحبه بقوة يقربه منه
بدر بعصبية = وش تقوله انت
**
[/align]
العرض الشجري