زول زين وعقلٍ شين

[شهوده]

[align=center]
مسيتم بالخير والسرور
سلامتكم
ما عندي إلا اللي يجوز للطيبين والطيبات


هذي يقولون ثنتين خويات دايم يروحن للغدير يوم الناس قديماً ياردون على الغدران يجيبون الماء

وكان في الفريق(هي الجماعة من البدو اذا سكنوا قرب بعض سموهم فريق)
رجال اجنبي توه جايهم وزابن عندهم

المهم يشوف هالثنتين وصار يعسكر قبال الغدير ورا الرمث عشان يشوفهن
وفيهن وحده هو عرفها من كثر ما يسمع العالم يقولون مها سوت وفعلت ومها راحت وجت.ومها فيها وما فيها
ويقولون دايم يا زينها زيناه لولا منبتها العفن (أي أهلها)
لأنه كان اسمها : مها
وخويتها اسمها : رثعا


ونادى رفيق له وخلاه يشوفهن معه وتظاهر انه ما يعرفهن
وقال لرفيقه : يا ولد انا رجال كبرت وابي اتزوج
ووش رايك في هالبنات؟

رفيقه عرف البنات من ازوالهن . وقال له من اللي اعجبتك فيهم؟
قال رفيقنا : ما يحتاج ابي ام برقع هذيك اللي عيونها على هالكبر اللي تقول عيون حر ونهودها اللي كنها مسطرات فناجيل وصدرها اللي كنه مسيح زبد ووروكها اللي كنها شط ساحليه (شط الساحلية يعني سنام الذلول الساحلية) وعوالي خدودها كنها الثلاث البيض (الثلاث البيض هي ليالي نصف الشهر اللي يكون فيها القمر كامل وصاير بدر)

قال رفيقه : أفا . ما لقيت الا هذي !!
ليش ما تاخذ الثانيه . تراها حليوه . والاولى اللي اعجبتك تراها ماهيب تكانة (تكانة معناها : ثقة وامرأة كفو)

قال : انا ابي الزين والشين مدبل كبدي ولو اني ابي الشين فتراه اكثر من العد

قال رفيقه له : هذا زواج ماهوب مطارح على عجله

قال ابيها واخلص علي

قال رفيقه: يا ابن الحلال تراها بنت كديش (واسمها مها وابوها من اردى العرب) .. الكديش (هو اخس فصيلة في الخيل واقرب ماله البغل والحمار)

والثانية اللي ما اعجبتك تراها بنت حصان (واسمها رثعا وابوها من اطيب العرب) ...... الحصان كناية عن الرجال الطيب واللي فيه خير ومروءة


قال هو : يا حوول حتى الزينه جاء اسمها زين مثلها والشينه جاء اسمها شين مثلها

قال رفيقه : أنا علمتك وأنت ابخص



المهم رفيقنا خطب . واهل البنت عطوه . ويحمدون ربهم لأنه هو طيب والا هم فيهم زين بس ما يبي احد قربهم من ربعهم
ولكنه عيا يدخل عليها وصار يؤجل . لأن كلمة رفيقه يوم يقول تراها بنت كديش . لأنه يبي منها عيال . ماهو سالفة وقفة وانقلابة

المهم . صار يسير عليهم
وكل ما سير عليهم في بيت الشعر
صارت تتظاهر انه تروح وتجيب حطب وتعطيه ابوها عشان توريه زولها
وكل شوي يشوف عيونها توايق عليه من رواق البيت كنها عيون بريعصي .
ومره ثانيه تسمعه صوتها وتحط نفسها تنادي اخوانها الصغار بيا لبيه ومن هالسوالف

الرجال قرصه قلبه منها وقال : هذي مها اللي يقولون ؟
هي ليت ما هي سفيهه
ولكن لأنه هاواها اختلق لها العذر وقال يمكن انها حبتني وداريه اني ابي اشوف زولها وتبي تشوف زولي

ويوم شافها يمه وابوها ما في الحمض احد قام يسولف مع الشايب ويقول للشايب
ما جاكم عسوس من نجد . وش حال الربيع والحياء . (العسوس هم المستكشفة اللي يبعثونهم البدو يدورون الربيع )
قال الشايب لا واله ما لفانا احد
قال : انا لقيت لي طرقي عند حمادة ام قرين .ويقول انه جاي ربيع على نجد يهول

(طبعاً كان قد خطط في نفسه انه يختبرها ويختبر ذكائها شوي ويبي بعد يقابلها عند حمادة الغدير يعني حج وحاجه)

وهالحماده هذي كل يوم اواجه عندها طرقي (الطرقي هو المسافر في لهجة البدو يعني عابر السبيل)
كود بس يجيني عندها طرقي ويعلمني عن ديرة اسمها رواق وابي اشد لها . يقصد رواق بيتهم )

عاد البنت بزعمها ذكيه . وقامت ترفع اخوها الصغير وتغني وتقول يا حضيف يا راعي الجوخ الاحمر . باللي تبي من بني عمك ابشر

يعني قالت خلاص ابي اجيك
وقال : اخسي يا بنت الكديش . اثرها ذكيه . بس لازم اشوف عن عقلها الليله

استاذن من شايب الغفله ومشى وهو ما عاد هو على حبه الاول لبنته خاصة يوم شاف حركاتها وعيونها مع الرواق

جاء الليل وراح للحماده الى هي جايته
وابتدى هو واياها قصة قيس وليى كل يعطي الثاني من حلو الكلام
مثل ما قالت عليا حبيبة ابو زيد في وصف كلام المحبين مع بعض ( لحم كلوةٍ بين اليدين يموع) <<<<<< يا عيني على الذوبان

وقال تكفين يا مها شيلي البرقع وخلي ليلنا يقصر لا يطول يبي يسكتها ويغير الموضوع عن سوالفهها المالهه والسامجه يوم شافها ما تعرف تسكت . يعني بربرتها واجد
ويم شالت برقعها إلى بسم الله الرحمن الرحيم الى لها خنفرٍ اقشر (الخنفر : الخشم)ما ينتعدل حتى بزرادية والى لها ثنايا طافحات تقول حفارات شيول بلدية
واكتشف انها ما فيها من الزين الا هالعيون اللي جارت كحلها والبياض ولا اكثر
وعافها ولكنه قال الزين ماهوب كل شيء . مير انا الحين ابي اشوف هي تكانة والا لا ؟
وقال يا مها : تحبينني ؟
قالت: اي نعم . الا اموت فيك يا بعد براطمي
قال: اجل انا تراني رجال فقير وحبيتك . ولكن والله ما عندي ما اقدر احط دفع لك (الدفع عند البدو هو المهر)
قالت: والعلم وش هو ؟
قال: انا حبيتك وانتي حبيتيني . وانا رثعا تبيني بس ما ابي الا انتي . ولكن ما به الا شيء واحد .
ابيك تفضين معي من شايبك ونتجوز ونجلي لديرة ما ياصلنا فيها احد (تفضين معي أي تنحاشين معي)
قالت : يعني ويش اسوي
قال : روحي جيبي خلاقينك وانا ابي اجيب ذلولي ونبي نترادف عليها وننحاش
قالت : خلاص . وابشر

الحقيقه استغرب ردها وقال ابي انتظر . يمكن انها ذلت مني وجارتني عشان تنحاش . اجل البنت طيبه
وعقب ساعه ما درى الا والمهبوله جايته زامة خلاقينها تبي تنحاش معه

الى مير يوم طابت نفسه منها كلياً
قال عودي عودي . الله لا يوفقني ان خذيتك

وراح تزوج رثعا وجابت رياجيل فيهم خير . والقصه مشهوره في اماكن معينه

وقال في ام زول زين وهي ما هي تكانه :


يا تيس مدري يا غزال
يا عنز مدري يا مهاه

كل الثنين من الحلال
مثل البهم طلْيٍ وشاه

شفي سليلات الرجال
اللي لهن قدرٍ وجاه

ماهن ربايا اهل الدلال
مخمّرة بيض الجباه

رثعا لها عمٍ وخال
اضفوا على جدك عباه

قومٍ تحوز من الخمال
حوز الخشوف من الرماه

مانيب ادور للجمال
في مزهبٍ وسطه حصاه


والباقي ما احفظه [/align]