اخواني الأعزاء الموقف أبلغ من القصيد والحزن عميق بوفاة رجل عرف بدينه وكرمه ودماثة الخلق رجل رحل وترك ذكرى خالده فأعزي نفسي وأعزي عائلة العفارى من قبيلة الشملان من عنزة وأعزي أهل الخفجي عامة بهذه الأبيات ورحم الله أبو فرحان / ضيف الله عبيد الشملاني العنزي
المــوت حق وكـــل نفــسٍ قريبه = من الموت وأمر الله لـــزومٍ يجينا
يارب تجبــر كســرنا والمصيبــه = واللي عليكـــم يالعفـــــارى علينا
في موت أبو فرحان عقلي إغديبه = ولاهــي علينا عيــب يــومٍ بكـينا
دمعـــة حزن بالخـد ماهــي معيبه = عند الـوداع المـر هاض الكنيــنا
أبــكيــه دم وحـــزن قلـــبي يذيــبه = راع المواقــف يــوم شح السنينا
ولانملك الا الصبــر عنـد المنيـــبه = ودعواتنا من قلب لامــن دعيــنا
أمـــرٍ مـن الله والــمقـــدر يــجيبـه = ولــو ينفــدى بالروح دونه ثنينــا
ضيف الله اقفا والعــزا فــعل طيبه = مــاينــكره ياكــود خطو اللعيـــنا
لــو غاب راسه باقــي الصيت هيبه = يبقى شذى ذكــره مــع الغانميــنا
رجــلٍ يــهابــه بالمـــلاقــا حريـــبه = ومن يزبنــه ماشـاف جور الغبينا
وإنتــم عيالــه يالسيــوف العــطيبــه = عسى البقا في روســكم لاأعتزينا
وياللــه عسى قبره فيــاضٍ رحيــبــه = وتجعــل مداخيــله مع الصالحينا
عســاه بالفــردوس يـلــقــا حبـيــبــه = ويعــطا كتـابـه فـي شريف اليمينا
المواضيع المتشابهه
العرض الشجري