يا شايل(ن) نفسه على الخشم حذراك
النفس لا ثقلـت تهيـن الخشومـي
بالهون لا تكسر طريقك بمـا طـاك
ان طاح بك دربك حشى ما تقومـي
خلك وسيع البال واحـذر بممشـاك
واخذ الحذر لعـل عمـرك يدومـي
ان طعت راي ابليـس لشـر وداك
يغويك وتصبح وسط شـره تعومـي
والمال والصحه مصابيـح الافـلاك
تروح مثل العشب عقب الوسومـي
ودنياك لا تخلـف نوايـاك واريـاك
ودنياك لو زانت ترى مـا تدومـي
والدين لا تبيعه علـى شـان دنيـاك
من ضاع دينه مـا تفيـد العلومـي
اليا حفظت الدين يحفظـك مـولاك
منجي عباده فـي نهـار اللمومـي
وترى المراجل دربها صعب الادراك
جنـب وخلاهـا ردي العـزومـي
بالمرجله في اعلى المراقيب مرباك
والحـر عـن دار المذلـه يشومـي
رافق قوي الديـن لا تهـت قـداك
ينفعك واسـرارك عليهـا كتومـي
والا الردي قـدم المخاليـق يشنـاك
ولا من وراه الا البـلا والهمومـي
وجنب ردي القول ماهـوب يخفـاك
متفنجح(ن) بالبخل وسط الرخومـي
واصبر على جارك ولو جار واذاك
واصبر على جفوا الرفيق الشتومـي
ولا تشتكي على المخاليـق بلـواك
الشكوى للي فـي عبـاده رحومـي
وصلاة رب البيت حلال الاشـراك
على النبي اعـداد وبـل الغيومـي
المواضيع المتشابهه
العرض الشجري