القدس

[عصفورة جدة]

الــــقـــــدس ::

--------------------------------------------------------------------------------

تخيلوا لو يفزع الجار للجار

في مجتمع حاقد وغاضب ومشحون

وتخيلوا لو تلتفت كل الانظار

للمشهد اللي وقفت دونه عيونه

وتخيلوا لما راح الحرب تندار

ما بين حكام العروبه وصهيون

إلى متى نستقبل ذنوب بأعذار

وإلى متى نستنزف جروح بطعون

نتبع خطى تيار ونصد بتيار

نبعد وعدوان المسلمين يدنون

لو كان بقلوب العرب صبر واصرار

ماكان سوو فيكم اللي يسوون

بإهمالكم بدلتم الثار بالعار

بعتم تراب القدس وأنتم تشوفون

حنا كذا بمعارض الراي شطار

لين إستوى بالمجد عالي ومطمون

من كثر ما كنا نجامل ونحتار

صرنا نخاف نعارض اللي يقولون

القدس تصرخ والسماء تحصد أعمار

والدم ينزف والأرامل يموتون

وأرواح تسلب سلب وأعصاب تنهار

وأطفال تعدم والبشر ما يحسون

خمسين عام نحارب الشرك بحجار

وبسكوتنا نبني عمارات وحصون

ننسى وكن اللي حصل شي ما صار

نسكت وكأن ما بيننا شخص مغبون

لين شربوا من دم الإسلام كفار

وبعروقنا صاروا يروحون ويجون

إستضعفوا لين أضعفوا كل الأقطار

ساقوا غضبهم والأوادم يصلون

يستدرجون العزل السمح الأبرار

يستمتعون بقتل الأطفال بالهون

ماكنه الا شعب مخلوق غدار

في قلب لا ساكن ولاهو بمسكون

بالذل ما تلقى على صيته غبار

كبارهم واطين وصغارهم دون

لا بارك الله فيهم صغار وكبار

ولا جمع الله شملهم وين يسعون

وما تنطفي شمس الحقيقه ولو جار

فينا زمان الضعف والذل والهون

دام الفشل والضعف ثلثين الأضرار

لابد ما نضحك ولابد يبكون

وإن كانت قلوب العرب تنذر إنذار

ليش نتجاهلهم وهم يستبدون

الناس قالت حارب النار بالنار

وماالله خلق للآدمي عمر مضمون

وإن كانت الفزعه من أحرار لاحرار

حنا البروق اللي غدت سحب ومزون

وحنا السكوت اللي سبق عصف وإعصار

وحنا سباع الكون يالعنة الكون

وحنا عرب والعرب ما تترك الثار

بأفعالنا ماهي بقولة يقولون

نزعل ولكن بالزعل دمنا حار

نفزع لاشفنا العذارا يصيحون

عقالنا معهم من العلم مقدار

ومجنونا ينطح ثمانين مجنون

ياشعب يا ثاير وياشعب مغوار

هون من أسباب المعاناة وتهون

أصرخ على كل البشر واجهر اجهار

وخل اليهود إن ما درو عنك يدرون

وإجمع شتات الوقت تذكار تذكار

واذكر مواقف كل طاعن ومطعون

حارب بدين الخالق النافع الضار

واستذكر الرحمن وابليس ملعون

اطرد من ارض الله عدوين الاذكار

وان جوك والا جعلهم ما يردون

ورح قلهم حنا على كل مشوار

وذوقوا مرارة نصف ما تستحقون

واذا رضيتوا قولوا الوقت دوار

وإذا زعلتوا سوو اللي تسوون


..
..
..
..

الــشــاعـــر : حـــامد زيـــد