(( الهوى والنور ))

[أبو فيصل]

جميل الصدفه اللي جابتك حي الهوى والنور
عليك اجمل مساء مسيت عطني منه قنطاره

احيي فيك ذكرك قبل شوفك والنبا مغمور
واحيي فيك عطرك واسمك اللي ماليٍ داره

انا من مات حي لا طعن حربه ولا منحور
صويب العين مايبرى غدى قلبي لك الشاره

بغيت امشي واحس انه غدا مني القدم مبتور
بغيت آقف واشوف عظام كل الجسم منهاره

انا من خانته عبرة فرح ولا ضحك مسرور
يضيق به النفس وده يقول من الحكي خياره

اشيل غناي لك عرضه وابدل به على المجرور
وامول من طواريقي على عشاق سمّاره

ابكتب من قصيد الوزن وغيره من شعر منثور
انا لك شاعر يكتب وشعره نقوة افكاره

الا ياغايب عني مع حاضر كما الدستور
خيالك مايفارقني بفكري دق مسماره

الى من ضقت اسولف بك على نفسي وانا مقهور
واقول الوقت مايعطي على مااريد واختاره

عليك اقبل ومنك اقفي ولا بينت لك محظور
اخاف عيون بعض الخلق ترقبنا وسبّاره

وجدك الله ياحسن كما التحفه وانا جمهور
انا المبهور من حسنك وانا من خطفت ابصاره

ومنك العين تامرني وانا لك طايع مامور
على وصلك غدا حظي هوين وقصرت اشباره

اشوف ان الحسن عقبك ولو يذكر غدا مكبور
يقال انه حسن والا انت كل الزين وابهاره

الا يابو عيون حق وبعض الوصف خرس ٍ حور
عليك الصوت ماهو صوت كما ترنيم قيثاره

بقى قصرك على فالك عساه بطلتك معمور
تمشى بردهته حافي وتحيا عقبك ازهاره

بريح المسك والعنبر تخالطهم زراق بخور
الى اقبلت جا قبلك ولا اقفيت غدا استاره

على هالبوح والتلميح راس المال صدق شعور
وصدقني ترى فكري عقب طيفك محد زاره

انا بسألك تعذرني عساي بطلبتي معذور
اشوف الوقت مايعذر ولا في الناس عذاره

ذكرت اليوم والساعه ورحلة عمر يامستور
ذكرت الله في خلقك خلق هالزين واسراره

اعرف اني مـ انا بـ اول ولا اخر واحد ماسور
واجمل ماملكته منه طيف دام تذكاره

الا ياليت لي قلب يطيع الراي واهل الشور
ضحية موقف عابر ورحلة سفر طياره

وكان الوقت عصريه تعدينا حدود السور
ويم القاهره طرنا بجو حافل اخطاره

مقاعدنا بآخر صف ومقعد سيدي مشغور
على يسراي كان هناك اشوف اطباع جباره

اشوفه كل هالفتنه ثقل عقل وسلوك طهور
حصين محصن شامخ يبيّن كبر مقداره

واشوفه ديمتن تحيي نابت الارض بالممطور
بغيث يوم اشاهدها وجرفني فيه تياره

ذهلني مبرم العاتق وشلال الشعر موفور
وذاك المبسم الوردي بلون الزهر قطاره

وقد اطرق هايف رشيق وخاصر مضمور
قوام اعتدل طوله يثير قلوب جباره

اغني واغتني بذكره ولا اطمع كورد بالميسور
وعودي كم شكى مني بعزفي تبكي اوتاره

احبك والهوى جاير وبحت السر لك بسطور
وقلبي ماسلا عنك ولو يتعبه مشواره

ابرسل لك مع النسمه سلام الخافق المكسور
عسى يجبر عزاه انك تجيه وتنطفي ناره

اعرف النفس تواقه واعرف اني مـ انا مسحور
ولكن سحر زينه صار ياخلق الله شعاره

انا والليل والهاجس قطعنا بالخيال بحور
ابي منهو يوصلني ومن يعطيني اخباره

كلمات الشاعر / مخاوي الليل