ياربـي تسهـل الامـر وتزيّـن الاحـوال
ترانـا بـلا رحمتـك هلّكـا ومتهـاويـن
ولا عندنا غيرك ليا صـك جـال(ن) جـال
ضعـوف ألاوادم ياقـوي فيـك متقويـن
أبي رحمتك حـي وفـي القبـر وألاهـوال
نهار الحسـاب مشيّـب الرضّـع الولّديـن
لنا حقوق وعلينا حقـوق وماحـط يشـال
زمـان يخلـي ضاحكينـه مـن الباكيـن
ماينزل به الراحـل ويرحـل بـه النـزال
ومواعيدنـا واجالنـا كـل شـي بحيـن
فياحـظ مـن طابـت فعايلـه والاعمـال
وياشين حـظ أللـي لاوحـده ولا ثنتيـن
هبوب الزمـان وكنتـه والبـراد اشكـال
تقلب به الدنيـا واهلهـا علـى الجنبيـن
ولا اصعب على الصاحيين من كثرة الجهال
ولا اقسى على الجهال من سطوة الصاحيين
عسى الله يصيب مـدور الشـر بالسـلال
وعسانـا لاظـلاّم ولاحـن بمظلومـيـن
ولانطـرد المقفـي ولانـكـره الاقـبـال
ولانخطي اليـا صـار مانقبـل المخطيـن
لو انهم تناسـوا فعلنـا مانقـص مثقـال
من اللي تناسوا جعلهم دايـم(ن) ناسييـن
ولا تذكرونـا غيـر فـي حـزة الانكـال
ليا اشتدت الازمة وخالط صفا الماء طيـن
نطب الخطر والخوف والموت طـب هبـال
تقـول اننـا بمقابـل المـوت مستريـن
بنفنـى وتفنـى عيالنـا بـس لانــزال
عزاز النفوس اللـي علـى حقنـا عييـن
على الراس كوفيه ومـن فوقهـا دسمـال
ومن فوق دسمالي عقال(ن) يميـل يميـن
ولـو ماتحـوش ايماننـا مـال مانهتـال
لو الوقت عاري وجه عشنـاه مستوريـن
ابو خمسة لاقـل مـن قيمـة ابـو ريـال
فبو نصف يقدر يقتل احـلام بـو قرشيـن
مايوجعك يالسائل سـوا جفـوة السـؤال
ليا صرت تقضي دين ظهرك بمثلـه ديـن
ولا فيه بيت(ن) سالم(ن) من بعض الاشكال
وهدّامـتـه قِـلّـه وبنّايـتـه كثـريـن
لنا ماضي وحاظر مانبكي علـى الاطـلال
مايبكي على الاطـلال ياكـود محروميـن
لهم ماضي(ن) حلوى لكن حاظر(ن) بطـال
وذولا عرب موتـى ولـو عادهـم حييـن
تقـل العوايـد يـوم تتعاقـب الاجـيـال
وسلوم الرجـال الاولـه تتعـب التالييـن
ولو نبكـي اللـي راح ياويـل حالـي وال
بعـد روّحـوا شيباننـا الزُحّـل الوافيـن
موصّيننا بالصدق فـي القـول والافعـال
وفي جمعة تهتـاب مـن قوهـا الطمعيـن
غدينا شتات وحن عيال(ن) علـى رجـال
رخصنا والاجناب اصبحوا عندنـا غالييـن
نحب الجمـل والحمـل ونعـذرب الجمـال
وهو اللي يقود الزمل من وين اليـا ليـن
من اول يـوم إن القـل والمـال ماينطـال
قبل شركة الكهرب تنـور بيـوت الطيـن
يوم ان الرفيق اغلى من الروح والمنـزال
ويوم ان الرفيق ان غاب نفقده فقد(ن) شين
وذالحين الاخ يقاطع اخـوه حيـل وحـال
ولـو حسّتـه الايـام ولاّ غـراب البيـن
اخوي ابن ابوي ان كان مايـردع العيـال
اليا عال فيني رحت به في ( سند الاثنين )
ابيعـه كـذا واشـرب ورا بيعتـه فنجـال
وانا دون عمري قبل يولـد الـى ذالحيـن
جروح العرب تبرى وجـرح الاخـو قتـال
وجرح العرب واحد وجرح الاخو جرحيـن
ولـو يبتلـى والله ماخليـه ليـن يهـال
علي القبر ولاّ أنتصر لـه مـن الغاوييـن
يقولـون جيبـك اكبـر اخوانـك العقـال
وانا اقول وقفة الاخ تسوى كنوز الصيـن
عطاني الزمن كل شـي إلا مـره واطفـال
عسى الله يكمّل زينتي فـي الحيـاة اميـن
لاتحزن ولا تزعـل تماسـك وهـد البـال
ترى العاقل اللي يحسب حساب وقته زيـن
رفيقـك تحمـل لـه ثـلاث لاشـك ثقـال
لكن رابعته افطن لها واخـذ حـق وديـن
والاولاد وهبـه لاعمـام(ن) ولا بـخـوال
عسى الله يصلح ماعطانا مـن الجنسيـن
ياكم بنت هامل جا ولدهـا بطـل الابطـال
وكم بنت شيخ(ن) جا ولدها قصير ايديـن
زكـاة العـوال معاكستهـا زكـاة المـال
لاطاب إلك واحد فدفـن عوالـك الباقييـن
الشاعر : علي بن حمري
المواضيع المتشابهه
العرض الشجري