أتعبني الحلم لين الواقـع أنكرنـي
كني مسكت الفرج بيـدي وهديتـه
مافيه داعي على فرقـاك تجبرنـي
حتى الجفا منـك ولعنـي وحبيتـه
الجـرح عـدى زمانـه لاتذكرنـي
هـذاك وقـتٍ تعذرتـه وجافيتـه
لوشفت دمع القصايد كان تعذرنـي
تصور إن الشعر يضحـك وبكيتـه
ماغيرونـي ياكـود الله يغيـرنـي
كم واحدٍ عنـك يبعدنـي ورديتـه
وفيت وأدري وفايـه مايصغرنـي
صوبت يم الهـدف لكنـي أخطيتـه
من طار سرب الغلا والشوق طيرني
شف ماعلى الأرض واحد ماتعديته
خذني على صدرك الدافي وسيرنـي
بعض الولع ياخذ الرجال من بيتـه
أبنشغـل فـي عيونـك لاتدورنـي
ودي بشيٍ أشوفـه مابعـد جيتـه
خليت قلبـي معـك والله يصبرنـي
مبطي وأنا أقول قلبي ويـن خليتـه
نسيت أعلمك طيفك جـا يسهرنـي
بس أنت ماشفتني وشلون ضميتـه
إشتقت لك مابغيتك عـاد تشكرنـي
تغيب والشوق ماعمـري تباطيتـه
ماخذ على خاطري والبعد قاهرنـي
مدري شسوي وأنا كل شي سويته
العام يوم الوعد تسبـق وتنطرنـي
مستغرب شلون هالموعد تناسيتـه
وين أنت رايـح ولاكنـك معبرنـي
ماكني اللي علـى العالـم تمنيتـه
لاصار هذي علومك راح تخسرنـي
ماعمر أحد راح من كيفه وناديتـه
عند الكرامه أبيعك وأنـت خابرنـي
الله وكيلك ترى كـل شـي مريتـه
كانه هجر بالسلامه روح وإهجرني
أخـوي لاصـد عنـي ماترجيتـه
المواضيع المتشابهه
العرض الشجري