يا لايم المجروح

[اميرة]

يا لايم المجروح

لبست من ضيم الزمان.. ولياله

ثوبٍ يد الحرمان دايم تزرّه

وشربت كاس الصبر حتى الثماله

وأفلست من حلوه.. وعانيت مرّه

شكواي للي كل حيٍ شكا له

ربي ولا يخفاه مثقال ذرّه

يعوض منهو يرجيه عما جرا له

ويزيل حزنٍ في ضميري مقرّه

يا لايم المجروح فيما مضى له

عذلك ونصحك يوجعه ما يسرّه

كلٍ يجي له في حياته جها له

لو يحترص دنياه لازم تغرّه

واللي عرف ميله يميّز عدا له

والكي نفعه ما يجي دون ضرّه

والمشكل اللي يندفع في هبا له

تفكيره الضحل وسلوكه يضرّه

يمشي على عمياه من شين فاله

لا فاد خير ولا كفى الناس شرّه