( قيمة رجال )

[فتاة الجروح]

بين القبايل شاع ذكره وصيته
لجله غني ويملك الجاه والمال
قـالوا تهني صرت شمعـة لبيته
وصاحوا علي يا بنت ما مثله ازوال
قلت العفو لو هو ذهب ما خذيته
أنا الغلا في داخلي قيمة ارجال
الـلي بـدون أفعـال لا ما بغـيـتـه
المسألة في بعضها ثوب وعقال
المرجـلـة ماهـي بـجـاه دريتـــه
ولا هي بتصنيف العزايم والأمثال
يبان عـشقـي لـلـثـري لا وطيته
مثل المراجل صدقها وقت الأفعال
سيف يذود الهم رمـح رميـته
يعشق صفات الذيب في كل الأحوال
فارس يحل المشكلة لا نخيته
يصمت كبير القوم فيهم إلى قال
نشمي ولد نشمي لنسل فديته
سمح عطوف ياهلي طيب الفال
شبل سديد الرأي يوم نصيته
نطقه سعد منظوم وقراح ازلال
يابوي من مثلك ترى ما هقيته
يابوي فعلك نايف كل الأجيال
ويابوي من قدي وأنا لك وفيته
المهرة اللي جبتها بنت رجال
لو يعتلي راس النشامى رقيته
ولو ينحني صبر أبرسي له جبال
لا واهني منهو تكدر ورجيته
عز الله إن الجرح يبرى وينزال
ما كل من يعشق صفاتي عطيته
وما كل من طب الميادين خيال
ولو يمدحونه للملا ما هويته
لجل الغلا في داخلي قيمتة ارجال