بعد اشراقة يوم جميل تشقشق معه العصافير وكل شي في هذا الوجود يصبح ناصع البياض ولكن بيضا لايدوم طويلا .. و هنالك مجموعة من الكائنات تنظر لهذا اليوم بمنظر كئيب وعصيب عليها تودع فيها بعضها البعض وهم يقادون الى المجزرة الرهيبه
والتي يتحد فيها بنو البشر في تقديم افضل عروض ومهارات الذبح والسلخ والتقطيع .. ويدهرون محلات (( الرميح والرماية وغيرهم )) في بيع اجود السكاكين واحدها شفره
اقول ماودك تدخل بالموضوع بالعاميه اصرف لنا ولك .. طيب
كنت امتمدد على فراشي الوثير ومتغطي ببطانيتي (( ام نمر ))
وماعندي من الشيطان طاري الا داخلن على الشايب وماعنده تفاهم ابد وقم واخقلني من فراشي والا انا واصل اخر الغرفة (( كلها 4×4 ))
وماعرفت وين راسي من رجليني وضيعت طريق الخروج وجلست افكر أي الطرق اسلك للوصول الى كلمة (( نهاية )) بدون المرور على التماسيح والحيوانات المفترسه ..
لكن والدي حفظة الله ورعاه ماعطاني حتى فرصه لتشغيل مخي المتنبل وانما اكتفي بمعط البطانيه وانا كنت معها بس الحمدالله طحت ..
وقالي: قم قامه وعنز صامه .. ورانا ذبح وسلخ وانت ماغير (( تفاســ )) على هالفراش من كثر النوم نعنبوا دارك خيست .. تحلل الفراش خلاص يييزي نوم ،،
قهر : طيب يايبه وش فيك علي الواحد مايتهنى بالنومه هنا ابد ,,
انا قلتها والا ماقلتها ياجماعة الخير حتى مايمداني اتلايم على خشتي الا وركبة ابوي تفرقها لي .. المهم قمت وغسلت وعينت من الله خير وشمرت عن ذرعاني وانا طاقن البجامه ومستعد للذبح ومتجهز بجميع ادوات المعركة الحاسمه ..
كالتالي :-
1- مريله ( سماط) علي صدري وفيها مخابيت ..
2- مجموعة سكاكين حاده وكل سكينه له شغله
3- ساطور كبير جعله مايضرب راسك من زود الحده اللي فيه لو بس يهوز عليك انقطع راسك
4- مسن للسكاكين غرض سن السكين لو مامشى معي مضبوط ..
5- على هاللبس وهالفشخره يقاله عندي سنع <<== تراها مهيب مع العده بس انا قلتها .
___________________
المهم نزلت وانا امر على قطيع الغنم واطالع فيهن بنظره انتقاميه
مير يرد واحد من النعيميات ويقول : ارفق علينا ياهووه خوفتنا ..
والا الثاني يرد بتهكم :يمه تصدقون توحشت
وانا اوقف عندهم ايه هين خوذو راحتكم الوعد ان قاله الله اني لا اعلق رجلينك انت وياه على هالحديده ..
(( مااحلاني وانا اركد هالغنم ))
ويشوفني الوالد مير ينبسط عند الجماعه (( عماني وعيال عمي ))
ويقول : بعدي هذا ولدي كفو والله عز الله اني جبت رجال
قهر : وش دعوه يبه وانت شاك اني منب رجال من اول ..
قال الوالد : اقول اها بس اشتغل ولايكثر .
وقام كل واحد من العيال يستلم له ذبيحه ويجهز عليها والدمان تخرخر
ومافيه الا قوة تحدي في الذبح
وهم يقولون لي : وش فيك وراه ماتشتغل انت وخشك
وانا اطالع فيهم : معليش والله انا ما اذبح معكم لانكم مو من مستواي انتم تقعدون على الذبيحه الوحده نص ساعه والله حرام يالله ياجماعه انا بروح انام الحين وانتم اذا تعبتوا نادوني شرط اخلص لكم هالذبايح كلهن في ساعتين (( لانهن 8 وانا بالحالي ))
مير يضحكون علي ويرد واحد من عيال عمي : ترفق علينا ياراكان بن حثلين على غفله ..
ويقوم الوالد ويرنعني براس خراوف ويقولي : لاتكثر بربره طلع لك ضحيه امك وخلها تجي بعد تسمي عليها
قهر : طيب والله يانتم ماينقعد عندكم .. واطلع ضحية الوالده
وهو يقولي ياخي وانا بايعها اخليك تذبحني تبيني امووت
وانا اطالع فيه واتله من مربطة واحطه بحجر امي واقولها يالله يام محمد سلمي عليه .. واذا بتوصينه بشي من الحين تراني ناوي اذبحه ذبحه ماقد مرت على احد ابد وهي تقوم تبتسي اميمتي (( الله يخلف علينا بس تبي تضحي بها وتبتسي عليها ))
وهي تصيح وانا اقولها وش فيك ياميمتي يالله انجزي علينا:chirs:
وهي ترفع راسها وتلوحن بطشت اللحم وتقول فاردز بس لايكثر انا اصيح لاني تذكرت اميمتي وابيي وجدي وجدتي ووو ..
اقول : يمه مابقي احد ماذكرتيه وش رايك بعد ماتضحين عن شارون وبوش مابقي الا هم لا ومعمر القذافي بعد هههههههه .. وهي اللي ماصدقت خبر على طول قومي واصمخي راسي بالحنا
(( هالعجز عندهم اعتقد اذا جو يذبحون الضحيه يحنونها الله يخلف وش عقبه يوم جت تموت تدلعونها ))
__________________
وانا اجر الخاروف عند المسلخ ناوي اذبحه واسمي واقول بسم الله والله اكبر
مير يرفع الخاروف راسه : وين يابو الشباب جهاد هي ..
قهر : وانا اقوله انسدح بس لايكثر ..
واحط السكين على رقبته وهو اللي يضحك ويضحك
وانا اطالع فيه : وش فيك تضحك
قالي : يالدبشه انت حاط السكين على رقبتي من ورا من عند ظهري
وانا اللي احمق واقوم وارفعه وامسط به مرتن ثانيه على ظهره
وهو يضحك وقالي : طيب ليش ماقلبت السكين وحطيتها على حنجرتي مهوب لازم تقلبن انا كلي ...
اقوله لاوالله المصاله اللي فيك غطت على بطارخ
واسمي واحط السكين واذبح واذبح واحتري دم يطلع وماطلع شي وانا احتري دم يطلع ماااش واستغرب هالخاروف معلوبن علينا فيه معطيناها الراعي بدون دم ..
مير التفت على ابوي يقالي ذهين وبعلمه اني اكتشفت شي مير اشوفه فوق راسي واقف معه الساطوره
واقوله : يبه هالمعلون الراعي بايع علينا خاروف بدون دم والمشكله ان الخاروف قاعد يرفس
وهو يقولي: ياملعون الصلايب طالع وين انت تذبح نعنبوا دارك احد يذبح الخاورف مـع - الذنبه – قم وصكن بالصاطوره هاك الصكه ماقمت والا هم قاعدين ياكلون الحميسه ..
وجيت باكل معهم – على بالي ماسويت شي –
وانا امد يدي واقولهم: وش رايكم بذبحي مهوب ممتاز
ويطالع فيني ابوي وقالي: اقول قم رح عند امك خلها تعطيك اللحم وتوزعه على الجيران .. كود تنفعنا بالتوزيع ..
قهر : طيب يايبه ولو انك دايمن تحطمني ماقد يوم فرحتني ومدحتني عن الناس – وانا خانقتني العبره – ماقد يوم حسستني بالحنان
انا مدري ليه الله بلاني باهل مثلكم والله لو ابوي وامي اوروبيين كان الحين مستانس عندهم ويدلعوني اخر دلع لكن يالله هذي الاقدار ..
مير يقول ابوي : وانا ابوك ماودك بعد اوديك للملاهي تلعب .. وانا اتشقق خشتي من الفرحه واقوله ايه يبه ايه ابي ملاهي عتيقه
– والله من الغبار بعد –
________________________
مير يقوم ويلخن ببريق الشاهي ويلحقن راس خاروف كان قاعد يشلوط فيه على الجمر .
وانا اطلع عند امي وهي تقول تعال دووك وتبدى تعدد هالاكياس شين ازرق وشين احمر وشين بنفسجي وشين مكتوب عليها – اهلا وسهلا – و – تشرفنا بزيارتكم –
المهم وتقولي : هذي لبيت الدحيم وهذي لبيت ابو صالح وهذا لبيت مدري من ..
المهم عددت لي الجيران وانا والله ماحولك احد مير انقز للجيران واطق عليهم واعطيهم لحمتهم كل ماطقيت على الجيران وعطيتهم لحمه قالوا لي اصبر شوي لاتروح واجلس احتريهم بعدها يجيبون لي كيس ثاني ..
وعلى هالحال يوم طالعت واثر الجيران بهم فسق الحين اعطيهم لحمة كتف يروحون يرجعونها لي بس يبدلون الكيس بدل ماهي بكيس ازرق يحطونها بكيس احمر وين نلعب على بعض حنا؟؟؟
ومير احمق وارجع للبيت واجدع هالاكياس على اميمتي
مير تقولي : هاه وزعتهن ؟
قلت لها: ايه يمه رحت بدلت اكياسهن وجيت ماستفدنا شي يايمه .. الا من جيرانا اللي بالحاره الثانيه
– هذا من اول والا الحين مانعرف جارنا اللي ملاصق لنا –
حضرمي عطيته اضلاع نعيمي وعطاني كتف تيس الله والعالم انه ناوي يحطهن مندي هالليلة
مير تقولي امي : طيب لايكثر خذ هالكيسه وودها لجارنا اللي باخر العاير بالشقق فيه واحد يذكرونه انه عزوبي رح عطه هاللحمه ..
قلت : طيب وانتي وش دراك عنه لا وبعد موصفه الشقه .. الا والله ما امداني اكمل هاللكلمة الا وهي تلخن بفخذ نعيمي يسورب دمان ..
وانا اطلع ونص خشتي مطلي بدم وهذا اللي حصلناه من هالضحايا بس نرطش بالدمان والفرث ..
المهم واطق على هالعزوبي الباب الا وهو طالع علي وكله نووم ..
قال لي : ايش فيك يابويا كل شوي وانتم مزعجيني اشبكم اليوم بلا في اشكالكم – طلع خوينا حجازي –
قلت : ابد الله يسلمك حبينا نعايد عليك ونعطيك من ضحيتنا .. وعلى فكره مايحتاج تتعب نفسك بس هات كيسه ثانيه علشان انقل اللحمه فيها واخلي الكيسه هذي عندك خخخ – على بالي زي عادة الجيران –
قالي: يابوي اشبك تستعبط انتا
ويصكني بهاك الكف
مير انط واقوله والله العظيم اني ما استبعط عليك خذ هذي اللحمه حلال عليك ومانبي لاكيس ولايحزنون ..
وهو يرد : ايوه حسبت ناس ماتيجي الا بالعين الحمرا..
وياخذ اللحمه ويصك الباب بخشتي مير ينطبع على خشتي العين السحريه ورقم 7 وارجع لبيتنا وانا حمقاااان
وتقابلني اميمتي وتقولي : وديت اللحمه
قلت لها : ابشرك هالمره وديتهن كلهن اللحمه والكيسه
-------------------------------------------------------
﴿ مخرج في ازحم طريق ﴾
1- كل عام وانتم بخير
2- كل سنه وانتم طيبين
3- الظروف خلت العنز خاروف
4- لاتنسون المساكين والفقراء من لحم الضحايا .
5- متى امركم اخذ حقي من اللحم
:p
تشاووووووو
..:::: اغـــتـــيـــال الــخــرفــان ::::..
العرض العادي
