[poem=font="simplified arabic,5,darkblue,bold,italic" bkcolor="transparent" bkimage="" border="none,4,gray" type=0 line=1 align=center use=ex num="0,black"]
قالو تهوجس قلت من ضيقت البال = من كثرماتطري علي الطواري
ياكثرمافكرت في بعض الاحوال = وياكثرماقررت واصدر قراري
لاضاق صدري قمت اغني بموال = من قدح راسي مايجي باختياري
وابعدت عن ديرة هل القيل والقال = ونصيت جوٍ فيه جول الحباري
وسويت لي من صافي البن فنجال = وبالحاجر المسيول شبيت ناري
بارض ٍ خلا مايشتغل فيه الارسال = مايشتغل ياكود رقم الطواري
والارض خضرا عقب ماسيلها سال = والما تشوفه في جميع الخباري
والعشب اشوفه قدمي الوان واشكال = ومن نبتت الرقروق فيها مواري
هذي طرات الروح ياطيب الفال = يالي عن ظروف الزمن مانت داري
لكن لاحدك زمانك على الجال = سوق القدم مع واسعات البراري
اخير من مجلس كثيرين الاقوال = الي على الفتــــــــنه تسل الشباري
ناسٍ لهم في نقلت الهرج مدخال = تقول مجــــــــــبورٍ عليها جباري
ماعندهم ياكود وش صار وش قال = هـــــذي سوالف ذاهبين الذراري
وقت الضحى مجلاسهم عند فوال = والظهر تلقاهم بمطعم بخاري
رجالهم وقت الرخا ماله امثال = لاشفت زوله قلت سبع الغداري
ومن كشخته مايرتدي ثوب وعقال = يحط جنز وبعض الاحيان عاري
ولاجا لزومه لاتقــــدم ولاقال = عن ماقفه يعلن هبوط ااضطراري
هذاك ماله مع هل الطيب منزال = خله مع الاطفال يلعــــــــــب اتاري
والا علوم الطيب تحتاج رجال = تحتاج رجالٍ يدوس الغــــــــــداري[/poem]
العرض العادي
