|~ ديوان الشاعر احمد الصانع|~متجدد

[الدووووخي]

[ 16 ] ..
:

" السادس عشر " هجري
وميلادي ..
شهر تسعه
من هذي ( السنة )

الشوارع شي غريب
ذاك يبحث عن حبيب
وهذا ماله خلق يمشي
" العقل " عنَّه يغيب !

" السادس عشر " هجري
وميلادي ..
شهر تسعه
سنة ( 2007 )

لا تكلِّم .. أي أحد
حتَّى , لا تسلِّم بعد
ناس زحمة بلا عدد
منظر الشارع كئيب !

" السادس عشر " هجري
وميلادي ..
شهر تسعه
سنة ( 2007 )

ثارت أعصاب الشوارع
لا تسولف .. لا تطالع
إنتهى , وقت التواضع
[ التكبِّر ] .. له نصيب !

" السادس عشر " هجري
وميلادي ..
شهر تسعه
سنة ( 2007 )

:

[الدووووخي]

[ 17 ] ..

:

( مو قهر ) ..؟

لما أزرع طيب بـ عيون البشر
وما ألاقي ناتج أخلاقي " شكر "
كل عيون الناس نامت
وآنا عيني بس هامت
بـ " السهر "


( مو قهر ) ..؟

لا صار ما عندي [ مَفَر ]
يا أتم صاحي مع جراحي
وأعتب عـ النظر
وإلا ..
أحسب حاصل أرباحي
ويطلع الناتج " صفر " ..!


( مو قهر ) ..؟

إن كنت جالس أنتظر
يا يجي أو ما يجي
ما يجي ويمكن يجي
والصبر وين الصبر
وأعتبر إنَّه " مسافر "
ضاع في زحمة سفر !


( مو قهر ) ..؟

من بداية .. أوَّل أيام رمضان
كنت أتمنى يمر وكنت أحتريه
لأنه قلبي يُعتبر " فاقد حنان "
وحضرته لاهي ..!
وأنا مشغول فيه
كل هذا صار فـ السابع عشر ..!

:

[الدووووخي]

[ 18 ] ..
:

الحكي من فضَّه لو تسألني ليش
لأنه يبقى من ذهب هذا السكوت

إن خذاني الموت ما ودِّي تشيش
وما أبي تبكي على موتي بصوت

يعني لمَّا تبكي راح أرجع أعيش ؟
ما أبي الدمعه .. على خدِّك تفوت

صير عاقل حتى لو فكرك يطيش
دعوتك , تبني لي بـ الجنه بيوت

ما يموت .. إلا الذي ودِّك يعيش
وما يعيش إلا الذي , ودِّك يموت

[الدووووخي]

[ 19 ] ..
:

الموت حقٍ ,, والمفارق ,, بعد حق
ما دام مخلوقٍ .. إلى ( قلب ) مخلوق

تتعَدَّد الأسباب و العشق هو : عشق
واحد سرق له قلب , والثاني مسروق

القلب .. واقف في فراقك , ولا دق
وآخر كلامه قال : " ميِّت من الشوق "

وينك ..؟
تعال وشوف في عينك الفرق
وجهي , من غيابك ترى حيل مصفوق

على القليله مرِّني , بـ سرعة البرق
من فتره لـ فتره ( تجيني ) من الذوق

أشواقي تحرقني , لا يا سبَّة الحرق
كل يوم تبعِد تصعَد " النار " لي فوق !

:

[الدووووخي]

:

[ 20 ] ..
:

تبين الحين ..
بعد هذا الفراق أرجع ؟
تبين أسمع ؟
وأنا صوتك نسيته من غياب سنين !
أنا من عشت لي قلبين
أنا شخصين ..
وحبيبك قلبي الأول , ولكن مات
من أسبابك
وأنا في قلبي الثاني
أعيش بـ دنيتي تدرين ؟

أنا لو كان في إيدي أسامح
- كان
[ سامحتك ] ..
وذكَّرتك بـ غلطاتك
ولكن ..
" صج " .. ما أذكر
ولاني قادر ,,, أتذكَّر
أقول أحسن ترى تنسين
وعيشي مثل ما كنتي
إذاااا إنتي هذيك إنتي
وطلبتك لا تقولي وين
كفايه إحراج
وجودك واقفه بدربي
زعجني ..
وما أحب لـ إزعاج
دخيلك بس أبي تمشين

أنا يا .. بنت
ما أنسى ولا أقسى وتقولي : إنت !
أخاف مضيَّعه فيني
أنا مرتاح شوفيني
وتقولي : إبتسم لا هنت !
وسامحني أبي أرجع !
حسافه الحين ما ينفع
لأني كنت ..
أحب وحده مثل زولك
مثل لونك , مثل طولك
وهي خانت أنا ما خنت
ترى بعض المواقف دين

[الدووووخي]

[ 21 ] ..
:

دنياك .. يا [ قلبي ] تبي شوي تفكير
تكشف لك الدنيا .. خلايق و أخلاق

واحد يجي وتلقى مع " شوفته " خير
وواحد يجيك الخير من بعد لـ فراق

ما أبي ألاقي من عطاياك ,, تقصير
اللي يحبك صير له ( سرب عشَّاق )

أدري صعب لكن مع الوقت بـ تصير
أبيك ترضي بـ دنيتك , كل الأذواق

إفرد جناحك ,, في سما دنيتي طير
ما دام غيرك للـ [ معاليق ] ما لاق

في واحد وعشرين هجري , أنا غير
شقَّقت , من دفتر أحاسيسي أوراق

:

[الدووووخي]

:

[ 22 ] ..
:

لا تناقشني ,, ولا يطول [ الجدال ]
يا غلط , متغلِّف بـ كلمة " صحيح "

التفاهم .. بيني وبينك ,, مُحال
لا مريِّحني .. ولا إنتَ , مستريح !

يا تعلِّمني المشي ,, وأصعَد جبال
وإلا إسكِت ... لا تعلِّمني , أطيح !

إما تمسَح هـ الدَّمِع لو يوم سال
وإلا إتركني .. على كيفي أصيح

لا تجاوب عن سؤالي , في سؤال
لا تذمني .. وما أبي منِّك ,, مديح

ما فهم قلبك ..؟
أبضرب له مثال :
.. الصراحه
" إنت واحد مو صريح "

:

[الدووووخي]

[ 23 ] ..
:

هذا قلبي وهذا نبضي
صاحي مثل أوَّل ضميري

في غيابك وين حظي ؟
وأوِّلي " يشبهـ " أخيري

بسألك وشلون أرضي ؟
هي تَعَب , عمري وخيري

كيف أنا ويَّاي بعضي ؟
وبعضي الباقي لـ غيري !

العُمر ,, أيَّامه تمضي
وفـ السما ما شفت طيري !

السنه ماأبيها تقضي
وإنت [غايب] يا عشيري

:

[الدووووخي]

:

[ 24 ] ..
:

مو ضروري ..
أسْمَعْ أعذار الوداع
قلبي في حُلو الحَكِي لا تِخدعه

فِكرة غيابكْ تِجي بليَّا إجتماع
وين ما طيشك يسافر تتبعه !

وإنت رايح خذْ أساليب الخداع
وهم لا تنسى .. جميع الأقنعه

جيتني ناوي .. رحيلك بإندفاع
وإنصدَم قلبي , مِنْ اللي يسمعه

سَدِّدْ جُروحِكْ وأنا مِنِّي الدفاع
طِفِّي أفْراحِي .. وحِزني ولِّعَه

مِنْ كلامك كِلْ شَيْ أغْلِيهْ ضاع
وإنتَ في إيدكْ .. تِشِدْ الأمتعه

ليه نِتْلاقى..؟ وتِخليني بصراع
يعني قِصْدِكْ قلبي جَاي تودعه..؟

رُوحْ .. مُو إلاَّ إنتِلاقى بالوداع
خَلْ قلبي لِكْ .. ما أبي ترجعه

:

[الدووووخي]

[ 25 ] ..
:

حبيبي والزمن يرقص , على جرحي وإنت بعيد
وجيت من الشتات أسأل بعد جرح الزمن وينك ؟

أنا ما جا على بالي غيابك ,, إنت بـ التحديد
عنادك .. ليش ضيَّعني ..؟ وقف ما بيني وبينك

لك الله , كل ما أضحك ألاحظ هـ الجروح تزيد
حبيبي ضحكتي صعبه علي , وسهله بـ إيدينك

أقول إن الأمل باكر ,, يجي بكره بجرح جديد !
ورغم كل السنين اللي مضت لي .. تكرم سنينك

أنا ما جيت أبي منِّك , بعد جرحك .. تفك القيد
أبيك تحس في ( قلبٍ ).. رفض ينساك ويدينك

إذا يرضيك , تستقبل بدوني فرحتك بـ " العيد "
شسوي بـ قلب متعوِّد يشوف العيد , في عينك !

إذا عادي الزمن يرقص على جرحي وإنت بعيد
على هذا البرود اللي تعيشه [ الله يعينك ]

: