كلي .. هنا .. نــواف ... !

[نواف الفهاد]

العمر فاني و أكثر الناس فاني ،
و زيف الظلام يعلّمك قيمة الضيّ ،

تعرف مكاني يوم تعطيه ثاني ،
و يخذلك مايعطيك عقبي ولا شيء ..!!

[نواف الفهاد]

هي ضيقة البال وإلا ضيقة سنيني ،
ماعدت أميّز جروحي ليه ياسلمى ،

ماراح أعاتب سنيني لو تبكّيني ،
علّمني النور ما أشره على الظلما ..!!

[نواف الفهاد]

كان يردد لي وأنا أسمع أنا ،
عقبك الدنيا عساها في حريق ،

ولو فنا وكل الخلايق للفنا ،
كيف ألقالي لنسيانه طريق ؟

كان يقول إني أنا ساكن هنا ،
ويأشّر لقلبه وأنا بحبه غريق ،

ذوّقتني دنيتي كل العنا ،
من توفّى جعل مايمسّه حريق ..!!

[نواف الفهاد]

اليوم شفت الحقيقة وأنطلق قيدي ،
يابوي ياعلّ روحي فدوة لروحك ،

أبوي ياما نصحني قال ياوليدي ،
أترك صداقات زيفك و أفطن لروحك ..!!

[نواف الفهاد]

الحب سوق و داخل السوق به ناس ،
و قلوبنا بالسوق مثل البضايع ،

وأنا على كثر المشاعر والإحساس ،
أشعر بإني داخل السوق ضايع ..!!

[نواف الفهاد]

وأقفيت عني يوم أنا كنت محتاج ،
تارك بقايا شخص طاح متعثّر ،

قصة ألم لو دبلجوها بالإنتاج ،
تصبح قسم بالله ( مقطع مؤثر ) ..!!

[نواف الفهاد]

مات الوفا مسموح يادمعي تبين ،
البارحة منهو خذلني عذرته ،

على شرف دمعن نثرته من سنين ،
سوّيت لي حفلن كبير و شكرته ..!!

[نواف الفهاد]

مابقالي من شتات العمر غير ،
دمعتن بأقصى المحاجر ضايعه ،

يارفيقي خلّ نتفارق بخير ،
بعض لحظات المفارق رائعه ..!!

[نواف الفهاد]

تعاون بيني و بين المنشد علي القريني ..!
( العشر الأواخر من رمضان ) !

http://soundcloud.com/alqurini/10-1

[نواف الفهاد]

تقاسيمكم للبشر منها الفكر مبهوت ..
و يعلم بها اللي كل الأعمال ترفع له

أنا رجل لا أؤمن بمطوّع ولا سربوت ..
أنا أقول بأن أخلاق الإنسان تشفع له ..!!