كم من بنت تسوى 10 رجــــال

[السـبيـعـي]

دخل ( أبو سـعود ) مجلس الرجال وهو متشقق من الوناسة .. وقال لهم :
" أبشركم جاني بنت !! "
الرجال كلهم طالعوه من فوق لتحت .. ولا واحد منهم بارك له ألا أخوه .. جلس .. وهو متضايق من اللي صــــار .. وتنكد طول الجلسة .. بعد ما طلعوا .. ما بقى في المجلس ألا أخوه وشيخٍ كبير .. ناداه الشايب :
" تعــــال يا ولدي !! "
جاء وجلس جنبه .. وقال له الشايب :
" شف يا ولدي .. أنا حاس أنه ضايق صدرك من اللي صار .. لكن لا يهمونك .. اسمع قصتي .. وأكيد بينشرح خاطرك !!
أنا يوم كنت في عمرك .. كنت مثلهم ما أحب البنات !! .. وأحس أنهم عيب .. وكان عندي 5 أولاد .. ويوم جابت
زوجتي البنت .. تمنيت أنها تموت .. وتمنيت أني أذبحها بيدي علشان ارتاح من العار ومره كنت جالس في الخيمة مع زوجتي والبنت وراها تحبي .. يعني زوجتي ما كنت تقدر تشوفها .. شفت عقرب رايحه باتجاه البنت ..
قلت لنفسي " الحمدلله .. جعلها تقرصها وتموت !! "
المهم صرت ألهي زوجتي علشان ما تلتفت عليها لحد ما قرصتها العقرب مع يدها وصارت تبكي .. تحركت زوجتي تبغى تروح لها .. مسكت يدها وجلستها وقلت لها :
" اقعدي بس .. دلع بزران ما فيها شي !! "
مرت الدقايق وانا استنى انها تموت .. لكن ما فيه أمل .. جت العقرب مره ثانية وقرصتها مع رجلها .. وانا اقول " آلحين بتموت خلاص !! " .. وحاولت زوجتي تقوم لها .. مسكتها وانا اقول :
" اقعدي ما عليك منها !! "
وفي المرة الثالثة .. جت وقرصتها مع نفس اليد .. وصــــاحت البنت بصوت عــــالي .. طمرت زوجتي وهي تقول :
" لا خلاص .. أنا أبروح أشوف وش في البنت .. أكيد فيها بلى !! "
وما قدرت طبعاً أني أمسكها .. وأنا صراحه .. مبسووووط .. بتموت وأفتك منها !!
بعد ما شافت البنت انهبلت .. وقامت تولول .. قلت لها :
" ارتاحي .. ما فيها ألا العافية ما جاها شي !! "
وأنا ما زلت انتظر متى بتموت ؟؟!!
ارتفعت عليها الحرارة .. وانتفخت يدها .. قلت خلاص بتموت .. بس خاب ظني .. جاء الليل .. ونامت والدموع على خدها .. قلت لنفسي " إذا صحينا الصبح ألقاها ميته !! "
أصبحنا والبنت ما ماتت .. وطلع اللي كان في يدها .. عندها بس أيقنت بأن هالبنت مكتوب لها حياة !!
مرت السنين وكبروا العيال وكل واحد راح في طريق وما عاد سألوا عني وتوفت زوجتي .. والبنت تزوجت وسكنت جنبي .. وكل يوم تجي تقهويني وتزين الفطور والغدا والعشاء وتنظف البيت وترتبه وتغسل هدومي .. وكل يوم إذا جت تصب لي القهوة .. اشوف علامة قرصة العقرب في يدها .. ويذبحني الندم .. !!
ومره .. قررت أني أعلمها بالسالفة .. قلت لها :
" شوفي يا بنيتي .. انا باقول لك شي .. كان ودي أني قايله لك من زمــــان .. وابيك تسامحيني !! "
المهم قصيت عليها القصة كلها .. تخيل وش ردت علي ؟؟!!
قالت لي :
" أنا كلي لك يبــــــه
فيا وليدي .. ما عليك من النــــاس .. كم من بنت تسوى 10 رجــــال