بسم الله الرحمن الرحيم
نبذة عن الامير الشاعر محمد الاحمد السديري
الامير الشاعر محمد الاحمد السديري وهو غني عن التعريف لما له من شهرة واسعة ومكانة كبيرة وشاعرية فذة فهو اديب كبير ساهم في خدمة الادب الشعبي ورقيه وتألقه,
شاعرنا هو محمد بن احمد بن محمد بن تركي بن سليمان السديري - رحمه الله تعالى - ولد عام 1340ه تقريبا في مدينة ليلى بالافلاج حيث كان والده اميرا عليها ثم انتقل مع والده الى الغاط ونشأ وترعرع هناك في كنف والده ودرس الابتدائية على يد الشيخ عبدالمحسن المنيع شغف في بداية حياته بركوب الخيل وكان معروفا بسرعة العدو الجري حتى قيل: انه كان يلحق الصعاب من الابل ويمسك بها مارس هوايته المحببة ركوب الخيل والهجن كما انه كان مولعا بالقنص واقتناء الطيور النادرة,, في السابعة عشرة من عمره اختاره الملك عبدالعزيز - رحمهما الله - اميرا على الجوف سنة 1357ه واثبت وجوده ودرايته وكان مما قام به تصفية قطاع الطرق والخارجين على الدولة على الحدود الشمالية والشمالية الشرقية ثم انتقل الى منطقة جيزان عام 1363ه وتولى امارتها ومكث هناك، وعندما ثارت المشاكل على الحدود السعودية اليمنية بعد الاطاحة بالامام يحيى بن احمد سيطر معاليه على الحدود بحنكة ودهاء وعين عام 68ه قائد للفدائيين السعوديين في فلسطين ثم اختاره الملك عبدالعزيز محافظا لخطوط الانابيب وقرر رحمه الله ان يتخذ مدينة عرعر مركزا للمحافظة وكانت حينذاك صحراء قاحلة وخوله الملك عبدالعزيز للتصرف بالاراضي فأسس ثلاث مدن رئيسية هي عرعر والقيصومة وطريف وساعد ذلك على توطين القبائل حتى اصبحت مدن مليئة بالحركة والنشاط والتقدم,
بعد وفاة الملك عبدالعزيز نقل الى جيزان مرة ثانية ثم اعتزل المناصب الا انه عاد وتولى قيادة الجيش بالمنطقة الجنوبية ومكث ثماني سنوات حتى انتهت حرب اليمن وعاد وقضى بقية حياته متنقلا بين الطائف ومزرعته الخفيات شمال بريدة على طريق حائل حتى داهمته ازمة قلبية حادة لازم الفراش لمدة شهر حتى توفي عام 1398ه بالرياض ودفن بالخفيات في شمال القصيم - رحمه الله - وأسكنه فسيح جناته وقد رثاه عدد كبير من الشعراء بقصائد تدمي القلوب,
اما شعره فهو يعد من ابرز الشعراء وأرفعهم منزلة وله مكانة في قلوب عشاق الشعر ومحبيه,
ابو زيد ياليت الدهر ما غدى به=ياليت نفسه توهبت هبوبها
رحل عن الدنيا وذكراه باقية=وسط المجالس معجزاته حكوا بها
ابو زيد نطاح الامور الصعايب=لولا الشهود الناس ما صدقوا بها
الله من ناس تذكر محمد=إليا ابتلتهم مشكلة وابتلوا بها
نعم كان رحمه الله من المشهود لهم بمكارم الاخلاق فهو كريم سخي اليد يعطي ويساعد المحتاجين بلا حدود وكانت مجالسه دائما عامرة بالضيوف من جميع انحاء المملكة والخليج بل والدول العربية من ادباء وشعراء كما انه كان يتمتع بسعة الصدر وحب الناس ولا يمل من يجالسه من احاديثه الشيقة والممتعة وقد عرف عنه شجاعة نادرة وإقدام على الصعاب والحروب وكان ذكيا حاضر البديهة ملما بأحوال العرب واشعارهم وأدبهم وحروبهم ومواقفهم عالما بالانساب قوي الفراسة ومهما تحدثنا عنه لن نوفيه حقه ولكن دعونا نبحر مع قصائده الرائعة وشعره القوي العذب له عدد من القصائد يفاخر بها ويحق له الفخر منها قوله:
الله من هم بروحي سهجها=بخا في ضميري في كنين الحشا لاج
احر من نار قوقد وهجها=منها خطر روحي على سلك ديباج
وعين عسى المولى يعجل فرجها=يفوح ناظرها كما عين هداج
استرسلت للدمع مسمار هجها=غيظ يكظ عبارها مثل الامواج
كم واحد له غاية ماهرجها=يكنها لو هو للادنين محتاج
يخاف من عوجا طوال عوجها=هرجت قفا يركض بها كل هراج
يقضب عليك المخطية من حججها=حلو نباه وقلبه ابيض من الصاج
الله خلق دنيا وساع فججها=وعن ما يريب القلب لك كم منهاج
والرجل وان شطت لياليك سجها=عسى تواليها بتشر بالافراج
ااما قصيدته الثانية التي لاقت شهرة واسعة وصدى طيبا والتي تغنى بها اخيرا فنان العرب محمد عبده وأداها بلحن جميل واثبت ان الشعر الشعبي متى ما وجد من يخدمه بالشكل اللائق فانه ينجح نجاحا باهرا وان له عشاقه ومتذوقوه الذين يطربون له ويفهمونه ويتفاعلون معه,, القصيدة التي معانيها جزلة وتصويرها بديع وهي مترابطة وسلسة وبها من الحكم ما لا يقوله الا حكيم مجرب اذ يقول شاعرنا:
يقول من عدا على راس عالي=رجم طويل يدهله كل قرناس
في راس مرجوم عسير المنالي=تلعب به الارياح مع كل نسناس
في مهمة قفر من الناس خالي=يشتاق له من حس بالقلب هوجاس
قعدت في راسه وحيد لحالي=براس الطويل ملابقه تقل حراس
متذكر في مرقبي وش غدالي=وضعقت بالكفين ياس على ياس
اخذت اعد ايامها والليالي=دنيا تقلب ما عرفنا لها قياس
كم فرقت ما بين غالي وغالي=لوشفت منها ربح ترجع للافلاس
يقطعك دنيا ما لها اول وتالي=لو اضحكت للغبن تقرع بالاجراس
المستريح اللي من العقل خالي=ما هو بلجات الهواجيس عطاس
ماهوب مثلي مشكلاته جلالي=ازريت اسجلهن بحبر وقرطاس
حملي ثقيل وشايلة باحتمالي=واصبر على مر الليالي والليالي والاتعاس
وارسي كما ترسي رواس الجبالي=ولا يشتكي ضلع عليه القدم داس
يابجاد شب النار وادن الدلالي=واحمس لنا يابجاد ما يقعد الراس
ودقه بنجر ياظريف العيالي=يجذب لنا ربع على اكوار جلاس
وزله الى منه رقد كل سالي=وخله يفوح وقنن الهيل بقياس
وصبه ومده ياكريم السبالي=يبعد همومي يوم اشمه بالانفاس
فنجال يغدي ما تصور ببالي=وروابع تضرب بها اخماس واسداس
لاخاب ظني بالرفيق الموالي=مالي مشاريه على نايد الناس
لعل قصر ما يجيله ظلالي=ينهد من عال مبانيه للساس
لاصار ما هو مدهل للرجالي=وملجا لمن هو يشكي الضيم والباس
بحسناك يامنشي حقوق الخيالي=ياخالق اجناس ويامغني اجناس
تجعل مقره دارس العهد بالي=صحصاح دوِّ دارس مابه اوناس
البوم في تالي هدامه يلالي=جزاك ياقصر الخنا وكر الادناس
متى تربع دارنا والمغالي=وتخضر فياض عقب ما هيب يباس
نشوف فيها الديدحان متوالي=مثل الرعاف بخصر مدقوق الالعاس
ونثير على البيدا سوات الزوالي=يشرق حماره شرقة الصبغ بالكاس
وتكبر دفوف معبسات الشمارلي=ويبني عليهن الشحم مثل الاطعاس
ومن القصائد المتبادلة بينه وبين عدد كبير من الشعراء البارزين الذين لا يتسع المجال لذكرهم جميعا منهم سمو الامير سعود بن محمد وسمو الامير عبدالله بن محمد بن عبدالرحمن واصحاب السمو الملكي عبدالله الفيصل وخالد الفيصل والامير عبدالرحمن السديري والشعراء زبن بن عمير وناصر الفايز وعبدالله السلوم وعمير بن زبن وراشد بن جعيثن ومرشد البذال وسلطان بن بدر وفيحان بن عقيل وناصر بن بليهيد ورشيد الزلامي وقد اخترنا لكم ابياتا بينه وبين الامير خالد الفيصل اذ يقول سموه
ياقلبي اللي من هوى البيض معتاذ=واليوم اشوف الوجد والشوق بذه
حسبي على اللي للمواصيل جذاذ=حبل الوصل من بيننا البعد جذه
يسقي منازل لين العود رذاذ=يلقى بها ظبي الطعاميس لذه
الصاحب اللي عن هوى القلب مالاذ=لاقلت دوك القلب يازين غذّه
ولانيب من هرجه كثير وهذاذّ=ماشاف في ليله نهاره يهذّه
عساك تأتي لي يابو زيد نفاذ=قلب تحذى الشور ياخوك حذه
وقد اجابه شاعرنا الامير محمد السديري - رحمه الله - رغم صعوبة القافية الا عليه فانها لا تصعب مهما كانت فقال
أسهر طوال الليل واغضي على الحاذ=وعن الصديق القلب ما فيه شذه
شكواك خلت بسرة القلب تخاذ=ولا عاد في قلبي من الصبر فذّه
اللي يا بو بندر جعل قلبك افلاذ=مشربك ياممدوح الأفعال عذّه
طفل سهم عينه بالاعماق نفاذ=والحق عليك بقذة عقب قذّه
ان كان مالك فيه مدخل ومنفاذ=له الشبك في مدهل الصيد بذّه
وإليا دخل وسط الشبك يابن الافذاذ=غوجك لساعات المهمات حذّه
اما المساجلة الاخرى فهي بينه وبين صديقه الخاص الشاعر زبن بن عمير العتيبي - رحمهما الله - اذ قال شاعرنا محمد السديري
يازبن ودعناك في يوم الاثنين=لعلها لك ياخو صنعا مسافير
بجيرة الله ياعشير الغلامين=يامقفي عنا ذكرناك بالخير
نغليك يوم إنك بعيد عن الشين=وريف لضيفك في ليال المعاسير
يوم تغيبه عندنا قدر عامين=ويوم نشوفك فيه عز وتباشير
هذا الفراق اللي نظرناه بالعين=وعز الله انك ناوي بالمحادير
يازبن يالبراق بالله الى وين=واسلم ورد العلم يازبن العمير
فأجابه زبن بن عمير على الابيات الماضية قائلا
وانا بعد ودعتك الله بتسعين=وداعة من حفظ والي المقادير
ياباذل الحسنى على المستحقين=ونطاح بالضيقات وجه المناعير
ياللي بدرب الطيب جالك براهين=ولبست بالبيضا ثياب مشاهير
يبون دربك ناس واجد وعجزين=يجي لهم من دون دربك عواثير
ولا يختفي فعل به الناس دارين=لين انها تمحى الجبال المزابير
من يوم عنك اقفيت والقلب والعين=عندك,, وفي جسمي تشب السواعير
وله ابيات تظهر لنا حكمته وعقله وسعة علمه واطلاعه وايمانه بالله عز وجل فيقول عن المعجزات الثلاث
لولا الهرم والفقر والثالث الموت=يالا دمي بالكون ياعظم شانك
سخرت ذرات الهوى تنقل الصوت=وخليتها اطوع من تحرك بنانك
جماد تكلمها وهي وسط تابوت=تاخذ وتعطي ماصدر من بيانك
وعزمت من فوق القمر تبني بيوت=من يقهرك لو هو طويل زمانك
لولا الثلاث وشان من قدر القوت=نفذت كل اللي يقوله لسانك
المواضيع المتشابهه
العرض العادي
