السلام عليكم
كلمة (اختشى ) معناها اخجل او اخجلى وهى فعل أمر فى بعض الاحيان اذا كانت آخرها ياء وهى فعل ماضى أذا كان آخرها ألف يعنى نقول فلان (اختشا)بمعنى انكسف0
لست ضليعة أو متخصصة فى قواعد النحو واللغة العربية ولكن حبيت أوضح
حكاية اللى اختشوا ماتوا : يحكى انه قبل وجود شبكة مرفق المياه وتوصيل مواسير مياه الى البيوت كان اهالى القاهرة يستخدمون( زير) كبيرمملوء بالمياه فى كل بيت والزيرطبعا معروف لدى البعض وهو اناء كبير يشبه بعيد عنكم( القلة) بس على كبير , قولوا لى منعرفش( القلة)؟ أقول لكم الاناء الاحمر الفخار الذى يشبه اناء الزهور ويوضع على سور الشرفة نملاه (مويه) فى بلدنا ونشرب منه0 واللى ميعرفوش ارسل له صورته على ايميله0 ويكفى انى رحمتكم ومحبتش احكى عن (الكوز) اللى نحطه فوق الزير( ياعينى عليه) 0
ما علينا طبعا فى مثل هذه الظروف كان يصعب الاستحمام فى المنازل فكانت هناك ما يسمى( بالحمامات البلدية) اكرمكم الله (على رأى واحد معرفوش ) , هذه الحمامات كانت للاستحمام فقط , للذكور حمام( رجالى) وللنساء حمام(حريمى)
كانت الفكرة الاساسية لتشغيل هذه الحمامات هى وضع اوانى كبيرة على مواقد ضخمة لتسخين المياه0
فى يوم من الايام تسربت النيران من احد المواقد الى غرفة خلع الملابس الخاصة بحمام السيدات فى منطقة من المناطق وطبعا انتشرت النيران فى كل مكان واصبح الحمام كله عبارة عن كتلة من الجحيم واضطرت كل سيدة ان تخرج كما هى (بدون ملابس لمؤاخذه)0 الا بعض السيدات( اللى اختشوا ) وفضلن الموت داخل الحمام المشتعل بسبب خجلهن 0
ومن هنا يضرب بهن المثل فنقول( اللى اختشوا ماتوا), نقولها عندما نرى بعض الاشخاص المتبجحين
بصورة مبالغ فيها (يعنى تلاقى الواحد غلطان وعينه وسع الفنجان), عينه تبقى قوية كده ولما نبص له
نقول يا لهوى شوفى الراجل عينه عين القاتل ازاى يا اختى والله اللى اختشوا ماتوا ), ونمصمص شفايفنا كده ونعمل حركات0
ولكن لمن نقول فى حياتنا العامة كمجتمعات شرقية تعانى من بعض المشكلات (اللى اختشوا ماتوا)؟
1- نقولها للموظف فى أى مصلحة او هيئة حكومية عندما نقف امامه متوسلين ان ينجز لنا مصالحنا ولكنه (مطنش) ومنتظر ومستعد من منطلق مبدأ(عايز تنجز قب بالوينجز) وهى الورقة النقدية التى توضع له تحت الملف أوالطلب المقدم له0 (رشوة من الآخر)
2- نقولها لبعض الموظفات فى المصالح الحكومية عندما نجد كل واحدة منهن تضع امامها افطار يكفى اسرة وتطالبنا بالانتظار حتى تفرغ من افطارها لتنجز عملها ( ومش مشكلة انك تتعطل ولونطقت أو اعترضت تقوم عليك زى الغولة استعدادا لالتهامك مع الافطار)
3-نقولها للطبيب الذى قمنا بدفع مبلغ وقدره لمقابلته أملا فى علاج فعال ولانه طبيب شاطر ومعروف وتكلمه( ميردش) فهو يقوم بالكشف على المريض فقط وليس عنده وقت ان يسمعه او يناقشه فى الاعراض أو حتى يطمئنه على صحته0 بالرغم من ان قيمة الكشف عنده توازى أرقام فلكية0
4-نقولها عند ركوب احدى المواصلات العامة واعطاء المحصل قيمة اكبر من قيمة التذكرة لتعذر وجود( فكة )وعند مطالبته بالنقود المتبقية ينظر لك نظرة تجعلك تشعر بأنك (حثالة وبخيل وميت على القرش) ومن هنا تضطر لترك الباقى(بقشيش بالعافية)0
5- نقولها للموظف الذى يتواجد على مكتبه هاتف لتلقى واستقبال شكاوى الناس للابلاغ عن الاعطال , وغالبا يختار من( الصم) لان الهاتف يظل يرن بالساعات وهو كأنه آخد حبوب(تناحة), أو يقوم باشغال خط الهاتف طوال الوقت لمناقشة زوجته فى بعض الأمور المنزلية0
6- نقولها لواضعى المناهج التعليمية التى تصيب اولادنا بالبله المنغولى كلما تقدموا فى المراحل الدراسية0فهى مجرد موضوعات عقيمة قلما يستفيد منها الطالب وعندما نلجأ للشكوى نتعرض للسخرية وتجد المسئول يرد عليك بمنتهى البرود ليقول( ادى لابنك دروس, احنا بنحب حشو الكتب)0
7- نقولها لبعض الرؤساءالأفاضل والحكام المحترمين الذين يظهرون على شاشات التلفاز فى عز الكوارث والأزمات والمعمعة ليطمئنوا الشعب بقولهم (مفيش خوف بلدنا زى الفل,طنش تعيش وتاكل قراقيش)
8- نقولها للمعلم الذى كان من المفترض انه يمتهن مهنة الرسل والانبياء ثم يقوم باضطهاد الطلاب لاجبارهم على الدروس الخصوصية, وعند مواجهته يقول بعين بجحة( كل الفصل بياخد عندى اشمعنى ابنك؟)0
9- نقولها للمدير الذى يرسل مرؤوسيه( وراء الشمس) بالصاق او تلفيق تهمة ثم يقوم بنقلهم أو بفصلهم مؤقتا نظرا لتعديهم على جنابه بتقديم اقتراح للتجديد او للتطويرأو حشر أنوفهم عند مواجهته ببعض الأخطاء الجوهرية فى مراحل او خطوات العمل والتى كان من الضرورى اصلاحها0
10- نقولها لمن يدعون الدين والتدين ويلبسون قناع الالتزام لاقناعك انهم دعاة الاسلام وكثيرا ما يخفى وراءه التطرف أو التعصب , وهؤلاء الذين يصدرون فتاوى ليس لها أساس من الصحة وعند ابداء دهشتك تجد من يهمس فى أذنك ليقول( يا عمى متكبرش الحكاية كله اجتهاد)0
صحيح (اللى اختشوا ماتوا)
شاركوا معى بتقديم نماذج للى مختشوش وعايشين 0
خالص تحياتي
اسطورة الخريف
المواضيع المتشابهه
العرض العادي
