حرب الخليج الأولى في ذاكرت عبرود

[عبرود]

[align=center]بسم الله الرحمن الرحيم


السلام عليكم ورحمة الله وبركاته



اما بعد

احب ان اعتذر على كتابة الذكريات باللغة العامية لأني ما اعرف اكتبها بالفصحى

الجزء الأول

ازمة الخليج كانت في عام 1990م وفي هذيك الأيام كنت عايش في جده وفي حي الصفا وكان بيتنا عبارة عن شقه في عماره ملك لأبوي وكان عمري وقتها 14سنة وكنت في المرحلة المتوسطة وكنت ادرس في متوسطة الإمام فيصل بجدة
المهم دخلت ذاك اليوم في الساعة الثالثة عصراً المجلس حق بيتنا وكان جالس فيه ابوي الله يطول في عمره وزوج خالتي ابو سلطان الله يذكره بالخير وكانو حاطين على القناة الأولى وكانت فيه الاخبار الساعة الثالثة ظهراً وفجأه قال الموذيع خبر دخول القوات العراقية لدولة الكويت وبصراحه انا كنت اشوف المنظر في التلفزيون وكان على بالي مناورات للقوات الكويتيه في شوارع الكويت وبعد شوي سمعت زوج خالتي يقول لأبوي تصدق يابوعبرود بعد دخول القوات العراقيه للكويت بيصير شي بيسبب مشاكل في العالم وأولها السعوديه
وبصراحه ماكذب
المهم بعدها بكم يوم اشوف الناس مشغوله بالراديو وكل واحد شايل بيده رادو صغير ويتسمع على الأخبار وبصراحه انا كنت من المهتمين للاخبار في ذاك العمر وكنت احس اني شايب ههههههههه
وبصراحه حسيت بالوضع انه خطير مررره لما شفت عائلة كويتيه سكنت ببيت ولد خالتي الله يذكره بالخير اسمه ابوتركي وكنّا نعايره بأبو حديده لأنه كان عربجي وراعي مشاكل بس قلبه طيب مرررره
وبصراحه جلسنا حنا وجماعتنا مع ابو العائله الكويته وكان معاه اثنين او ثلاثه من أولاده وجلس يسولف لنا عن اللي صار لهم في الكويت وهم ينحاشون من القوات العراقيه وبصراحه كان يوصف لنا حالتهم وهم ينحاشون وبعدها عرفت ان الحرب تخوف من قلب
وبعد فتره اسمع الشياب عندنا يقولن
مادريتو صدام هدد السعوديه بضربها بالصوريخ كيماوية الله يستر بس لا يجينا شي وكان وقتها جالس معنا سواق عرقي يسوق عند واحد امير واسمه احمد علوان الله يذكر بالخير ويكثر من امثاله لأنه هذا الرجال يحب يساعد الناس مادياً برغم انه سواق وعلى قد حاله
المهم قال لنا احمد علوان: إذا كان صدام صادق بضربه لسعوديه بالصواريخ الكيماوية فالله يستر على الرياض والشريقة اما جده والجنوب ما يجيها شي ان شاء الله
قال له ابوي: وش دراك بأن الصورايخ ما توصل جده
رد عليه احمد علوان: لأن اخوي شغال في الدفاع الجوي العراقي وكلمني وقال لي بأن الصواريخ مداها يوصل للرياض فقط اما باقي المملكه يبيلها طيارة عشان توصلها الصواريخ
بس الناس عندنا ما صدقت كلامه ومن بعدها راحو للسواق واشترو الورق اللاصق وحطوه على الدرايش وبعضهم حطو اكياس زباله الله يكرمكم وملزقين عليه لزاقات شطرطونات الا ابوي الله يحفظه لي ما سوا ولا شي وقلت له ليش يابوعبرود ما تحط لصاق على القزاز
قال لي : ماله داعي عشان احمد علوان يقول الصواريخ ما توصل لنا في جده
وبعدها الناس ماخلت شي والا اشترته من اكل ومواد غذائية ومواد طبيه ومواد كهربائيه من انوار وكشافات وراديوهات

المهم


بعد فترة من بداية الحرب أمر الملك فهد رحمه الله بفتح باب التطوع في الحرب مع الجيش السعودي بالمشاركه وأذكر ابوي الله يطول في عمره كان من الدفعه الأولى اللي في جده وكان معه في نفس الدفعه الامير عبدالعزيز بن فهد وبعض الأمراء وكان لابس لبس مموه أي لبس الصاعقه وكنت على بالي ان ابوي ترك الخطوط السعودية واشتغل في الجيش وبيني وبينكم انا خفت على ابوي وقلت ياساتر بيشترك في الحرب وبعدين حنا وش نسوي اذا راح والله كنت خايف عليه وبس ما بينت له وكان مكان التدريب حق المتطوعين في ساحة المطار القديم اللي الحين فيها سوق محمود سعيد
المهم كان ولد خالتي الله يذكره بالخير اسمه سلطان وكان هو وكيل رقيب في الدفاع الجوي وجاه امر بأنه ينتقل للجبه وبعدها بصراحه شفت وجهه قلب وصار عبوساً قمطريرا بس ما سألته الا بعد ما انتهت الحرب وقلت له ما خفت لما خذوك الجبهه
قال والله في البداية جلست افكر في اهلي وافكر بالموت وبعد ما وصلت للجبهه وشفت العالم هناك قسماً بالله جتني شجاعه وحماس مو طبيعي
واذكر بعد لما كانو يعرضون الكمامات في التلفزيون ويقولون لازم تشترونها قسماً بالله حسيت انها خلاص بتصير حرب بتمسح كل العالم على بكرة أبيها لأني بصراحه شفت منظر الجنود اللي مشتركين من جميع انحاء العالم وفي هذه الحرب وهم ينزلون من البواخر والطائرات في التلفزيون كان منظرهم مرعب مرررره وبعدها جلست افكر في صدام حسين الله يرحمه وانا صغير واقول في نفسي ليش يسوي كذا مو حرام عليه
المهم بعد فتره صار يطلع في التلفزيون تنبيه بمعرفة انواع اصوات صافرات الإنذار وكانت ثلاث انواع صافرة بداية الخطر وصافرة وقت وقوع الخطر وصافرة زوال الخطر وكنا اذا جت على التلفزيون نجلس نتسمع عليها ونتحفظها على بالنا اناشيد وكنا نرددها مع بعض حنا وبعض عيال الحاره عشان ماننساها
بعد فتره من بداية دخول القوات عراقيه للكويت صار اجتماع والله مدري وين فيه يافي مصر او الجزائر او عندنا في السعوديه لجميع رؤساء العالم وكان الاجتماع يتكلم عن معارضة دخول القوات العراقية للكويت وكان اللي مؤيد الدخول اربع دول وهي الأردن واليمن والسودان وفلسطين وبعد هذا الإجتماع صارت فتنه بيننا وبين الجنسيات الأربعه اللي كانت مؤيده للأحتلال ولما كنا صغار كنا نتحارش مع عيال حارتنا اليمنى والسودانية والفلسطينيين والأردنيين
وبعد فتره امر علي عبدالله صالح رئيس اليمن بجميع الجاليات المينية بمغادرة السعوديه والكويت على حسب رغبته وكنت اذكر وحده حرمة كانت تشتغل عند امي الله يشفيها لي ومربيتني اسمها فاطمة جمعنا انا وياها في جنات النعيم قالت انا بهاجر يأم عبرود وبعدها جلست امي تنصحها وتقول لها لا تروحين وكنت اذكر بعد جارنا اليماني الله يذكره بالخير كان اسمه عم جبران وكان ويوصلنا من المدرسه للبيت مع عياله وكان مقاول وتاجر وراعي خير ماشاء الله عليه وكان عياله زملائي في الإبتدائيه واذكر واحد فيهم اسمه ناجي مدري الحين هو حي او ميت المهم قال بيهاجر وراح باع البيت وباع الفرش حق البيت برخص التراب واذكر اعز اصداقي ايام المتوسطه اسمه احمد ياسين اتمنا يكون في صحه وعافيه حتى هو هاجر مع ابوه وبصراحه هذي من الأشياء اللي حزنتني مرررره ايام ازمة الخليج

المهم

ولما أطلق صدام حسين أول صاروخ على السعودية


معليش بقولكم وش صار في الجزء الثاني لأني بصراحه أحس أني نعسان شوي بروح اخذ لي شوي غفوه


محبكم في الله وسائق الليموزين / عبرود[/align]

[حنين]

ايه كنا صغار ولا نفهم شي ولا ندري فيه حرب او لا

تسلم ياعبرود

[طليفيح]

الله يقوم امك بالسلامه ويعيطها الصحه والعافيه ...

الخفجي راحت بالحرب ...

ننتظر الجزء الثاني عبرووووووووود ...

والله يعطيك العافيه

.....

[الدب الأبيض]

الله يعطيك العافية
إذا أنت صار لك أشياء أنت مو بالكويت
أحنا بالكويت صار لنا بلاوي أحنا أإللي أكلنانها مو أنتو أصلا

[الجوووري]

هلا وغلا


عبرود



مستمتعين بالقراءة

سلمت يمينك ..

بإنتظار الجزء الثاني .. عزيزي

[حماد التميمي]

الله يعطيك العافية اخوي عبروود

والله يقوم امك بالسلامه .,,,

[أبو رائد]

كاتبنا المميز / عبرود

الله يعطيك العافية

وتسلم على هذه الذكريات

طريقة سردها مميزة وجذابه


ننتظر البقية ..


ولك التحية ،،

[عبرود]

[align=center]أحب أشكر كل عضو وكل قارء تم مروره على موضوعي المتواضع وان شاء الله اعجبكم


الجزء الثاني


لما اطلق صدام اول صاروخ على السعوديه والله مدري وين بالضبط هل هو على الرياض او على الشرقيه كنت وقتها جالس في غرفتي واتسمع على شريط عبدالكريم عبدالقادر أغنية أسمها اجر الصوت ههههههههه الله يغفر لنا بس وكانت الساعه تقريباً 12 ليلاً أو 12ونصف ليلاً المهم وانا اتسمع على الشريط سمعت صوت صافرت الأنذار وقلت في نفسي شكل الدفاع المدني انهبل جالس يجرب صفارات الأنذار في اخر الليل وبعد دقايق شفت الصفرات الانذار طولت وهي تشتغل وقلت ياولد لايكون الوضع من جد وبعدها طلعت من غرفتي وشفت ابوي وامي وخالتي جالسين في الصاله قدام التلفزيون وقلت لهم وش اللي صاير هذي جد ولا تجربه قال لي ابوي لا من جد وبعدها رحت اركض على البلكونه وابي اشوف الصاروخ طبعاً بيتنا كان على شارع الأربعين في حي الصفا وكانت مسار الطائرات اللي تجي تهبط في جده لازم تمر من قدام بيتنا وانا جالس اراقب السماء في الليل وشفت طياره جايه من بعيد على بالي صاروخ وجلست اصرخ واقول يايبا تعال شف الصاروخ في السماء وبعدها جا ابوي وهو يركض ولما شافه طالع فيني وضربني وقال لي رح انقلع ادخل غرفتك بسرعه هههههههههه ورحت للغرفه وانا اصيح من الطق وبعدين شغلت التلفزيون وكان اللي يتكلم في التلفزيون سليمان العيسى الله يهديه قال اطلق صدام حسين صواريخ على جميع مناطق المملكه وكان وجهه عبوساً قمطريرا وعليه علامات الخوف وبعدها العالم راحت فيها وجلسو يفكرون وبعد دقايق تقريباً طلع المذيع جميل سمان وكان وجهه بشوش الله يذكره بالخير وكان يبي يوضح للناس بأن الوضع مطمأن وبأن الصاروخ اطلق على الرياض او الدمام فقط وبعدها العالم قامت تسب وتلعن في سليمان العيسى
وبعدين بعد فتره صرنا متعودين على اطلاق الصواريخ في بداية الأمر كان اهل الرياض واهل الشرقيه في قمة الرعب بس في المره الثانية صارو يطلعون في السطوح ويراقبون محل سقوط الصاروخ ويروحون له ههههههههههههه من جد شعب زاحف وكنت اتصل على عيال عمي وعيال خالتي في الرياض واقول لهم وش صار لكم لما طاح عليكم الصاروخ كان يقولون لي والله شكله يخوف بس الحين خلاص صرنا ما نخاف من الصورايخ هههههههههههه وكنت اقول ياحظكم عندكم صواريخ اما عندنا في جده مافي الا الدجه
وبعد فتره من بداية الحرب بدأت الأختبارات الفصل الأول وكان الأسأله مررره سهله وكان المدرسين ينجحون الطلاب عشان يفتكون مننا وعلى ما اعتقد كان في توجيه بزيادة الدرجات عشان وضع الحرب اللي حنا فيه وبعد الأختبارات بدأت الإجازة ورحنا للطائف وكان عندنا بيت جدي ابو امي الله يرحمه وكان موقعه في حي مسرا بالقرب من منزل العبيكان اللي فوق الجبل واجتمعنا حنا وجماعتنا كلنا فيه وكان الطريق اللي قدام البيت تمر فيه المواكب والضيوف الخاصين بالدولة والسبب كان في اجتماعات لرؤساء دول العالم في قصر المؤتمرات اللي في الطائف وكان من ضمن المواكب اللي مرت من قدام بيتنا موكب الشيخ جابر الصباح الله يرحمه وكان ساكن في الطائف هو بعض الأسره الحاكمة للكويت

نكمل معكم بعدين لأني بصراحه بروح اوصل واحد للمطار اتصل علي قبل شوي


وللحديث بقية


محبكم في الله وسائق الليموزين/ عبرود[/align]

[عبرود]

الجزء الثالث والأخير


أذكر كل ما قربت تنتهي الإجازه الدراسيه يصدر امر بتمديد الإجازة حتى إشعار اخر وكانت هذي اطول إجازه دراسيه صارت في التاريخ بس والله مذكر كم مدتها بس بصراحه كانت جده في هذيك الأيام مرررره مزحومه من اهل الرياض واهل الشرقية ولما نطلع للكورنيش نعرف سيارتهم لأن أرقام اللوحات كانت لأهل الرياض عباره عن ستة ارقام وكانت تبدأ بـ 4أو 5 أو 6 أو 7 وأهل الشرقية كانت تبدأ برقم 3 وكانت عبارة عن سبعة ارقام
من المواقف الطريفة اللي صارت ايام ازمة الخليج مره من المرات كان السواق العراقي اللي اسمه احمد علوان الله يذكره بالخير داخل في تفتيش في احد شوارع جدة وكان راكب لكزس موديل 90م على عز الكزس القديمه ولما طلب منه العسكري الإثبات وشاف انه عراقي جلس يطالع فيه وهو خايف وقام الأخ احمد الله يوفقه وأعطى العسكري علكه (لبان) وبعد ما طلع من التفتيش ناظر احمد علوان مع المرأة الخاصة بالسيارة وشاف العسكري وهو يرمي العلكه على بالى ان فيها سمّ او متفجرات ههههههههههههه
والله اذكر كان يجي برنامج اسمه رسالة من التلفزيون الكويتي على القناة الأولى وكانت بداية البرنامج تجي انشوده ابياتها تقول على ما اعتقد

أرض الكويت تصيح اني رهينة
هيا انقذوني ادركوني ياعرب
دوا بها فهد العروبة حكمة
مادام قلبي والكويت تغتصب

وسبحان الله المذيع اللي كان يقدم الرساله هذه كان شنبه هذيك الأيام اسود أما الحين صار في شنبه شوي بياض وشيب

ومن الأشياء اللي اذكرها منظر في التلفزيون السعودي وهو عندما دخل الجنود العراقيين مدينة الخفجي كان منظر برج المياه الخاص بسكن وزارة الداخليه أو وزارة الدفاع كان منظره مرره مرعب وهو مصاب بطلقات ناريه من رصاص الجيش العراقي وكان على بالي أن الجيش العراقي بيحتل السعودية بس الله ستر ونصرنا عليهم

المهم

بعد وقت طويل من بداية الحرب تقريباً بتسعة اشهر أو عشرة أشهر انتهت الإزمة وكانت في بداية عام 1991م وكنت جالس في المجلس واتفرج على التلفزيون وكان فيه منظر الدبابات والسيارات الكويتيه والسعوديه عليها اعلام الكويت والسعوديه وامريكا داخلة لدولة الكويت وهم يرقصون ويغنون على بالي تشجيع كورة او شي من ذا القبيل واذكر كان الجو حق الكويت كان مغيّم وكان الغيم عباره عن دخان أبار النفط اللي فجرها جنود صدام حسين قبل مايطلعون من الكويت وبصراحه كان في منظر ما انساه إلى الأن وهو انه كان في بعض الحريم والعوائل يرقصون مع الجنود الأمريكان وبعد كم يوم سمعت شريط محاضرة للشيخ احمد القطان وكان اسم المحاضرة
(ليتها لم تعود)
وكان موضوع المحاضره يتكلم عن رقص الحريم مع الجنود الأمريكان وعن بعض الحركات اللي مالها داعي والله ما اذكرها بالضبط
ومن الأشياء اللي كنت اذكراها في ايام الحرب مره من المرات وحنا في جدة كنّا نازلين من كوبري السليمانية ومتجهين إلى دوار الأمير سلطان بن سلمان اللي في المطار القديم وكان منظر عمائر الأسكان مررره حلو وهي مشتغله الأنوار فيه كأنها عماير امريكا وكانت عماير الأسكان هذي مهجوره ولا كان يسكن فيها احد بس سبحان الله بعد ما لجؤ الكويتين عندنا سكنو فيها وأحيوها وسبب احياء عماير الأسكان الحين هم الأسرا الكويتين الله يذكرهم بالخير وأذكر لما جانا الكوتي اللي كان ساكن عند ولد خالتي ابو تركي وهو جا يودعنا بصراحه كان منظر مررره مؤثر
آآآآخخخخخ


تبون الصراحه والله كانت احسن ايام عمري هذيك الأيام برغم انها كانت أيام حرب بس كانت كل العالم فيها تقول اخوان وكل واحد يفزع لثاني مو مثل الحين كل الناس بينهم حسد وسوق اسهم وخساير وطفره وقلّت أدب
وسبحان الله تلك الأيام هي بداية نهاية الساعده والمحبه والصداق والصراحه والتكاتف والتواصل بين الناس وبين العالم
وتبون الصراحه بعد هذيك الحرب تدهورت صحة الشيخ جابر الصباح وصحة الملك فهد رحمهم الله وسبحان الله جميع رؤساء دول الخليج تغيرو ما عدا رئيس عمان أسأل الله له طول العمر
وسبحان الله صارت سمعتنا حنا يالسعودين بشكل خاص والخليجين بشكل عام في تدهور بين العالم
آآآآآآآآآآآه ياهذيك الأيام
وسبحان الله كم فقدنا عزيزين على قلوبنا من بعد هذيك الأيام وإلى يومنا هذا

أسأل الله القدير رب العرش العظيم بأن يجمعنا معهم في جناة النعيم إنه سميع مجيب




هذا والسلام عليكم ورحمة الله وبركاته


محبكم في الله وسائق الليموزين / عبرود

[أزف الرحيل]

[align=center]تسلم يمناك يا عبرود .................فعلا ايام مرت علينا ..........

انت مثلي تحمل في ذاكرتك ذكريات ايام الغزو حلوه ومره .........

عاد احنا اهل الخفجي هههههههه تشردنا وحاله..........

رغم اني كنت ايامها طفله بس اذكر اغلب الذكريات ذيك الايام..........

ماشاء الله عليك سردك للقصه مايشتت ويحمسنا نقرأ للاخير........

تحـيــــاتي لك................................[/align]