أحزان نايف اليوسف ,,,,

[شهوده]

بسم الله الرحمن الرحيم

نايف اليوسف (( سجين الغربه )) إسم امتزج الحزن به وخالطه ضياع ابدي ’صوته يصل إلينا بقصائد نغماتها الأسى وعنوانها اليأس وحبرها الدموع , تحمل بين طياتها صرخة إنسان مظلوم حمل ذنبا لم يقترفه ’ضاع شبابه بين اسواار الحديد 000

هنا تقف الكلمات عاجزه 000 ؟؟

هذه قصيدة نايف وجهها لوالدته في رمضان 1426 هـ :
http://www.youtube.com/watch?v=PYenrfdStf0
سادس سنه في ديرة الغرب مسجون
سجن الغثا والبهذله والاذيه
سجانهم قلبه من الكره مشحون
عنده حياتي او مماتي سويه
هذا رمضان اقبل وانا فيه محزون
ياربي هون مشكلاتي عليه
وسط السجن مابه معي من يصومون
مسلم ومن حولي وجيه اجنبيه
دايم حزين وضايق الصدر مغبون
مليت من جو السجن والاسيه
يمه كفايه وقت الافطار تبكون
تبكون نابف مالكم مقدريه
ودي يايمه بينكم بس وشلون
ودي بتمره من يدينك هنيه
يمه فطوري خالي الطعم واللون
مشتاق للمرقوق والمحلبيه
مشتاق للمسجد مع اللي يصلون
اصلي الاوقات صبح وعشيه
ودي معي في ليلة القدر تدعون
ينفك قيد اللي حياته شقيه
يالله يارحمان ياخالق الكون
تغفر لعبدك كل ذنب وخطيه
وصيتي تكفون لامت مدفون
في دار ابو متعب ديار الحميه

000

هنا القلب المنفطر والدة نايف االيوسف لانستطيع القول إلا كان الله في عونها كتبت جزء لايتجزأ من حزنها على فراق ابنها في هذه الاسطر المؤثره ::
http://www.youtube.com/watch?v=KvYFf...eature=related
اصيح بأعلى الصوت نايف فقدناك
عساك تسمع صرختي يوم اناديك
انا امك اللي عيدها يوم لقياك
ياسعد نفسي لو عيوني تلاقيك
والقلب ناره تشتعل عقب فرقاك
ماتطفي النيران ياكود اياديك
لبست ثوب الحزن بعدك ولا انساك
والنوم ودع يوم غابت لياليك
تاهت بي الخطوات ودروبي اشواك
والدمع من عيني على الخد يبكيك
اراجع الماضي واعيد ذكراك
تشدني الذكرى وابكي لماضيك
سجين بالغربه وياكبر بلواك
الله يعينك دايم في بلاويك
هذا القدر مكتوب مكتوب ماجاك
اصبر عسى الله بالنهايه ينجيك
بديار بوش سجنك الموحش هناك
ياليت لي قدره على الدرب واجيك
ياسجن ارفق مسندي وسط مبناك
ماشاف شمس ومظلمات مبانيك
مدري ياعمري كيف الاحوال وياك؟؟
طمني عنك طمن امك تحاكيك
من يغسل هدومك ومن قام يرعاك
من يطبخ الوجبات منهو يواسيك
منهو اللذي بالليل لانمت غطاك
خوفي عليك البرد بالحيل يوذيك
ودي قبل موتي مشاهد محياك
ودي اضمك في يديني واحاكيك
ياحافر قبري دخيلك رجيناك
تحط فوق النصب نيشان بأوصيك
يمكن يحين الوقت ترجع لمرباك
وتزور قبري مسرع في خطاويك
ياسيدي سلطان تكفى طلبناك
ياراعي الفزعات تشكر مساعيك
شلال طيبك منبعه دوم يمناك
خيرك مغطي كل بيت بأراضيك
وقت الشدايد مالها غير شرواك
يبشر بعزه كل من جاك ناصيك
ياسيدي سلطان حنا فداياك
بأرواحنا نفديك نفديك نفديك
الجود وانت الجود يمشي بممشاك
يمشي وراك ويتبعك مايجاريك
متعبني مدحك لو اعدد سجاياك
والشعر يرفع رايته مايوفيك
يالله عسى المولى يصونك ويرعاك
ويعود نايف ياعسى الله يخليك
ابختصرها ياذرى كل من جاك
شروى تجيك تنتهي ماتعديك




ليس بعد هذا من حديث ؟؟



لاأريد كلمة شكر او ايا كان من انواع الثناء فقط ماأريده منكم هي دعوه لسجين الغربه ((نايف)) بأن يفكـ الله اسره عاجلا غير آجل ويعود لأرض الوطن سالما معافا
يعيش بين احضان والدته فقد يكون فيكم احدا لو اقسم على الله لأبره


وللحزن امتداد عند نايف ووالدته في قصائد اخرى لهم ان استدعت الحاجه لكتابتها فلن ارتدد في ذلك 00

[فاصله]

الله يفك أسره وجميع أسرى المسلمين
يعطيك العافيه

[ححرف!]

مولمة

الله يعطيك العآفيه
...
.

[وافية الخصال]

يوه ياقلبي انا وين سمعتها بالليل تحزن ياناس

[شهوده]

اقتباس المشاركة الأصلية كتبت بواسطة فاصله الله يفك أسره وجميع أسرى المسلمين يعطيك العافيه

اميييييييين يارب
الله يعافيك ويخليك
منوره..

[شهوده]

اقتباس المشاركة الأصلية كتبت بواسطة ـع ـزووز! مولمة الله يعطيك العآفيه ... .

الله يعافيك ويخليك
منور,,

[شهوده]

اقتباس المشاركة الأصلية كتبت بواسطة وافية الخصال يوه ياقلبي انا وين سمعتها بالليل تحزن ياناس

الله يكون في عون امه واهله
منوره..