ياراضي شديد مساء الخير ماجور
عساك دايم من كبار العزاوي
مجلسك دايم بالمطاليق معمور
واللي لهم تقدير معهم تْخاوي
ياولد خالي ماانت خالي ومشكور
وصل رساله في بريد الشكاوي
ماهي مجرد سالفة وزن وبحور
والا روايه قالها كل راوي
على رموز الدرسعي رقم منشور
يجهل معانيّه شيوخ الفتاوي
ذكر الاسامي يجرح احساس وشعور
لكن على الترميز طبٍ شفاوي
بسوي اسقاطات بالشعر يانور
نور الضحى ماهوب نور الهواوي
التوريه فن ولها فهم دكتور
يكشف غموض المفردة والغطاوي
كلمة "ضياع" اتشاف في شطر مغمور
"سبعة" حروف اتضيع فيها الهقاوي
ناسٍ تعاهدلك على امان وتبور
القرد معهم والغزال امتساوي
من قبل راس الخير ما اجهلك يالزور
يومك ربيع ويوم فالصيف ذاوي
والعرش له قاده وناهي ومامور
مايلمس اطرافه عيال الشواوي
لولا النسب واهل الحسب وابن منصور
ماصار وجهي عند حقه سحاوي
من لاعرف قدر الرياجيل معثور
ماهوب في زود المراجل غناوي
يصير شر وخير ماله معي دور
اللي حياته مثل جار القهاوي
لو يعتذر ماهو محلل ومعذور
الصلح يركن في دروج الحزاوي
ماهو علي سنّه ولافرض مجبور
تعيش من دون الطحال الكلاوي
زولٍ يجي ويروح بالمجتمع ثور
ماطوّر افعاله بشيت الحساوي
محشور في كل اتجاهات محشور
ماهوب لاسارح ولاهوب ضاوي
ماله مع التاريخ صفحات وسطور
ماعنده الا مكر خبث وملاوي
والا انت ياراضي ولد خال مخبور
من وين ماوجهت حرٍ نداوي
المواضيع المتشابهه
العرض العادي
