من أبعد الناس هذا الرمح لو جانـي ***لو هو بصدري ماحسه مرتكز فيني
ماهمني لو رمونـي كـل عدوانـي *** شموخي أكبر من الحاقـد وكافينـي
لكن من أقرب قريب وحسبة أخواني *** لو هو خطاني احسه فـي شراينـي
اللي عطيته من المعروف وحسانـي *** عطـاي لله مابـي شـي يعطينـي
ياكبرهـا ويـن مالديـت بعيـانـي *** وغمضت عيني أحسه ملح في عيني
ماحرك الدمع في عينـي وبكانـي *** إلا من الخلف طعنـات السكاكينـي
يهزني له على المـردود شيطانـي *** واستغفر الله واعوذه من شياطينـي
ياما من النـوم لاغطّيـت صحانـي *** اشغلني رمحه وثوب الصبر كاسيني
المشكله يحتضنـي ويـن ماجانـي *** من قبل لا آصل يهلي بـي يحيينـي
يانفسـي أبـوي علمنـي وربانـي***وعن التسامح من الادنين موصينـي
وامي تصب الكـلام المـر بأذانـي***وتقول يا فلان جدانـك سلاطينـي
قم أرتفـع لاتناظـر يـوم للدانـي***ارفع مكانـك وعينـك للشياهينـي
من شان هذا ياقلبي وأنـت تقوانـي***الله يكافيـك مـن شـره ويكفينـي
قل حسبي الله لامنـه جنـا جانـي***والله على خير به طيحـه يورينـي
واليوم دار الزمان وشافت اعيانـي***الطيحه اللـي تضحكنـي وتبكينـي
طيحه تدك الحصون وتعقد لسانـي***ماني بشامت ولكن سـددت دينـي
أي والله الله كريم وعـز وجدانـي***لاقلـت يــارب لا لا لاتخليـنـي
من غيرك اللي من الثانيـن كفانـي***ومن غيرك اللي اذا ادعيه يغنينـي
من غيرك اللي الامن ضقت واساني***ومن غيرك اللي من الانذال يحميني
يـارب أشكـرك ياستارياحـانـي***واكرر الشكـر وأدعـي ماتخلينـي
دعوات يارب من طعنـات خلانـي***ولا البعيديـن مافيـهـم ولافيـنـي
قصيدة أعجبتني وحبيت أنقلها لكم ..
المواضيع المتشابهه
العرض العادي
