السلام عليكم ورحمة الله وبركاته ..
بعض من قصائد الشاعر الكبير : :محمد بن احمد السديري - رحمه الله تعالى وأموات المسلمين أجمعين ..!!
شاعرنا هو محمد بن احمد بن محمد بن تركي بن سليمان السديري - رحمه الله تعالى - ولد عام 1340هـ تقريبا في مدينة ليلى بالافلاج حيث كان والده أميرا عليها ثم انتقل مع والده إلى الغاط ونشأ وترعرع هناك في كنف والده ودرس الابتدائية على يد الشيخ عبدالمحسن المنيع شغف في بداية حياته بركوب الخيل وكان معروفا بسرعة العدو الجري حتى قيل: انه كان يلحق الصعاب من الإبل ويمسك بها مارس هوايته المحببة ركوب الخيل والهجن كما انه كان مولعا بالقنص واقتناء الطيور النادرة,, في السابعة عشرة من عمره اختاره الملك عبدالعزيز - رحمهما الله - أميرا على الجوف سنة 1357هـ واثبت وجوده ودرايته وكان مما قام به تصفية قطاع الطرق والخارجين على الدولة على الحدود الشمالية والشمالية الشرقية ثم انتقل إلى منطقة جازان عام 1363هـ وتولى إمارتها ومكث هناك، وعندما ثارت المشاكل على الحدود السعودية اليمنية بعد الإطاحة بالإمام يحيى بن احمد سيطر معامليه على الحدود بحنكة ودهاء وعين عام 1368هـ قائد للفدائيين السعوديين في فلسطين ثم اختاره الملك عبدالعزيز محافظا لخطوط الأنابيب وقرر رحمه الله أن يتخذ مدينة عرعر مركزا للمحافظة وكانت حينذاك صحراء قاحلة وخوله الملك عبدالعزيز للتصرف بالأراضي فأسس ثلاث مدن رئيسية هي عرعر والقيصومة وطريف وساعد ذلك على توطين القبائل حتى أصبحت مدن مليئة بالحركة والنشاط والتقدم,
بعد وفاة الملك عبدالعزيز نقل إلى جازان مرة ثانية ثم اعتزل المناصب إلا انه عاد وتولى قيادة الجيش بالمنطقة الجنوبية ومكث ثماني سنوات حتى انتهت حرب اليمن وعاد وقضى بقية حياته متنقلا بين الطائف ومزرعته الخفيات شمال بريدة على طريق حائل حتى داهمته أزمة قلبية حادة لازم الفراش لمدة شهر حتى توفي عام 1398ه بالرياض ودفن بالخفيات في شمال القصيم - رحمه الله - وأسكنه فسيح جناته وقد رثاه عدد كبير من الشعراء بقصائد تدمي القلوب,
أما شعره فهو يعد من ابرز الشعراء وأرفعهم منزلة وله مكانة في قلوب عشاق الشعر ومحبيه ....
لا خاب ظني بالرفيق الموالي
يقول من عدّا على راس عالي
رجم طويل يدهله كل قرناس
في راس مرجوم عسير المنالي
تلعب به الأرياح مع كل نسناس
في مهمه قفر من الناس خالي
يشتاق له من حس بالقلب هوجاس
قعدت في راسه وحيد لحالي
برأس الطويل ملابقه تقل حراس
متذكّر في مرقبي وش غدالي
وصفقت بالكفّين ياس على ياس
اخذت اعد ايّامها والليالي
دنيا تقلب ما عرفنا لها قياس
كم فّرقت مابين غالي وغالي
لو شفت منها ربح ترجع للافلاس
ياما هفابه من رجال مدالي
ماكنّهم ركبو على قب الأفراس
ولاقلطوهن للكمين الموالي
ولاصار فوق ظهورهن قطف الانفاس
ولا رددواصم الرمك للتوالي
كل يبي من زايد الفعل نوماس
من بينهم سمر القنا والسلالي
مثل البروق برايح ليله ادماس
يقطعك دنيا مالها أول وتالي
لو اضحكت للغبن تقرع بالاجراس
المستريح اللي من العقل خالي
ماهو بلجّات الهواجيس غطاس
ماهوب مثلي مشكلاته جلالي
ازريت اسجلهن بحبر وقرطاس
حملي ثقيل وشايله باحتمالي
واصبر على مر الليالي والاتعاس
وارسى كما ترسى رواس الجبالي
ولا يشتكي ضلع عليه القدم داس
يا بجاد شب النار وادن الدلالي
واحمس لنا يا بجاد ما يقعد الراس
ودقه بنجر يا ظريف العيالي
يجذب لنا ربع على اكوار جلاس
وزلّه إلى منّه رقد كل سالي
وخلّه يفوح وقنّن الهيل بقياس
وصبه ومدّه ياكريم السبالي
يبعد همومي يوم اشمّه بالانفاس
فنجال يغدى ماتصور ببالي
وروابع تضرب بها اخماس واسداس
لا خاب ظني بالرفيق الموالي
مالي مشاريه على نايد الناس
لعل قصر ما يجيله ظلالي
ينهد من عالي مبانيه للساس
لا صار ماهو مدهل للرجالي
وملجا لمن هو يشكي الظيم والباس
بحسناك يا منشي حقوق الخيالي
ياخالق اجناس ويا مفنى اجناس
تجعل مقره دارس العهد بالي
صحصاح دو دارس مابه اوناس
البوم في تالي هدامه يلالي
جزاك ياقصر الخنا وكر الادناس
متى تربع دارنا والمفالي
وتخضر فياض عقب ماهيب يباس
نشوف فيها الديدحان متوالي
مثل الرعاف بخصر مدقوق الالعاس
وينثر على البيدا سوات الزوالي
يشرق حماره شرقة الصبغ بالكاس
وتكبر دفوف معبسات الشمالي
ويبني عليهن الشحم مثل الاطعاس
===================
سلطان شفت الموت مرّه ومرّه .. = .. والثالثة يا مير كشّر بنابه
مــا بـيـه لـكـنـّه بــلانـي بـشــره .. = .. زودٍ على خيله يجمّع ركابه
لو هو ظهر لي في صحاصيح برّه .. = .. نذرٍ علي انّي لبيّن صوابه
قالها قبل وفاته بأيام قلائل يخاطب فيها سمو الأمير سلطان بن عبدالعزيز
================================
الله من هم بروحي سهجها ...= ... بخافي ضميري في كنين الحشا لاج
احر من نار توقد وهجها ... = ... منها خطر روحي على سلك ديباج
وعين عسى المولى يعجل فرجها ... = ... يفوح ناظرها كما عين هداج
استرسلت للدمع من ما رهجها ... = ... غيظ يكض عبارها مثل الأمواج
كم واحد له غاية ما هرجها ... = ... يكنها لو هو للأدنين محتاج
يخاف من عوجا طوال عوجها ... = ... هرجت قفا يركض بها كل هراج
يقضب عليك المخطية من حججها ... = ... حلو نباه وقلبه اسود من الصاج
الله خلق دنيا وساع فججها ... = ... وعن مايريب القلب لك كم منهاج
والرجل وان شطت لياليك سجها ... = ... عسى تواليها تبشر بالافراج
=============================================
أرى الليل بساعات النحوس طويل
يقوله مكظوم الفواد عليل
ارا الليل بساعات النّحوس طويل
ينام من لاجال هم بخاطره
وناشيل من ظيم الهموم ثقيل
اشيل مالاشال حيد من الصفا
ولاني على شيل العظيم هزيل
إلى صارت النّفس العزيزه تسوقني
إلى مرقب عال ذراه ظليل
اصبر على ظيم الليالي وكودها
وناجي القلب بالفؤاد عليل
على اي درب يالنّديم تدلّني
واظنّك على عسر الدروب دليل
ونا عارف ياقلب مارادها جسك
ولك خالق ماهو عليك بخيل
الواحد اللي ماتعدّد فضايله
مّده إلى شح البخيل جزيل
ولي عشقة مابين الاضلاع غاطسة
على تبعد والمسير طويل
عشقتها والموت بيني وبينها
ابتعب وراها لو يقال هبيل
عهد المودة تم بيني وبينها
ولاينفصم دام البحور تسيل
ماصاب قيس بحب ليلي أصابني
على واحد مابي حذاه بديل
همّه يداعبني بنومي ويقظتي
وارجى متى غصنه على يميل
خليل يخايلني بعينه واخايله
ماله بنفسي بالعباد عديل
اخيله مخايلة العرب بارق الحيا
وناله على عسر السنين عميل
ان تم حبل الوصل بيني وبينه
ما يلتفت قلبي لكل جميل
هواها يعيفني من النوم ماحلا
متى نلتقي بالفرقدين نزيل
الايا مهات الريم روفي بعاشق
اسرتيه ولاله بالعباد خليل
ماله من الفزعه حذا وجه خالقه
وقلب تحاشا ان يقال ذليل
قلب على الصكات اقسى من الصفا
إلى صاب مرعوب الفواد جفيل
وعلى البال يطري لي من الناس نادر
جنسه إلى ضاق الزمان قليل
ان كبرت القالات مارف خافقه
والذل مايلقي عليه سبيل
اليا عتت جرد السنين واجذبت
سحب الحيا واصبح ثراه محيل
كريم ولا يرخي من البخل حاجبه
جوده إلى شح السحاب يخيل
اعني فتي وايل وذروة سنامها
سيف بحزات اللزوم صقيل
عبدالله الفيصل حجا من يلوذ به
له فوق نجم الفرقدين مقيل
احب من يصبر على كل شّده
إلى شاف من خطب الأمور جليل
ولا هوب رجاف فواده من العدا
دخيل للّي ما وراه دخيل
اخا الجود من يرقى من المجد ماعلا
وخا الذل يصبح للذليل قتيل
وخا الجود فيه يلقى ويرتجا
وخا الذل ما يقلى وراه حصيل
من عاش بالذل الطويل لقيته
ردى العزايم للجبان زميل
قيل الفتى بالعجز مايدرك العلا
ومرقا المعالي يالعظيم يهيل
===============================
أنا الوحيد وقومي اكثر من الروم
ياشن بقلبي منه صبحت مكضـوم
يعلم به اللي عن عباده غناوي
وعيني يابو ماجد حريب لها النوم
وكنه يعالجها الطبيب المداوي
شوف البغيض بنونها عمس وهزوم
والقلب ناشه بالمعاليق لاوي
ونا إلى جاني من الناس مزحـوم
احل عنه الكايدات الدعاوي
ارخص له النفس العزيزه بال سوم
ونا على فعل الجمايل رهاوي
وعديت من جور العنا راس مزموم
في راس مرقاب جديد المطاوي
رجم طويل نايف كل مرجوم
مهايف راسه عسير المهاوي
وهيّضت من وسط الحشا كل مكتوم
زفرات مايقوى لهن كل قاوي
وانا بعون الله ولو كنت مظلوم
لكسب المعالي وبالشدايد مهاوي
ارومها لو دونها حرب وسهوم
ويا حوينا بالشدايد محاوي
عساك يللي تنقل الكبر والزوم
من المرض تصلى بحر المكاوي
أنا الوحيد وقومي اكثر من الروم
وفي لمّه العربان كنّي خلاوي
وحتى صديقي صار من حسبة القوم
وضاعت عزوم مكثرين العزاوي
ودعيت عفن الريش يوم ادرج الحوم
ابالرخم ونا احسبنه نداوي
طير بحزات الهدد يلحقه لوم
اللي قنص به ضايع الفكر غاوي
خسران والخسران من ينقل البوم
يبشر بخيبات الرجا والبلاوي
الناس في دنياك معطي ومحروم
وكلا على طيب المعاني شفاوي
الطيب لاهل الطيب والرزق مقسوم
وطير السعد طير تعدّى الحراوي
طير نقلته طالني منه مثلوم
وبعض الطيور يضيّعن الهقاوي
ان احسبنه صاطي القلب ملحوم
وثره على الصيدات مثل العماوي
من المذله بارد الوجه ماسوم
وقلبه على درب الرذيله نحاوي
هقيت به لا شك انا صرت منجوم
وتوّي دريت إني على الدرب غاوي
من خلق في دنياه الفعل مذموم
على الردا بالحيل مشيه نحاوي
الله لا يسقيك يالواد ابو دوم
وعساك صحصاح بك الذيب عاوي
خمسين عام مايقولون ماسوم
يصحى سماك وكل مافيك خاوي
يجيك ما جا قوم صالح من الشوم
والبوم باركانك يجر الحداوي
يالله يامعبود يافارض الصوم
تقبل دعات اللي بجودك رجاوي
موحد يطلبك في ثاني التوم
برجي العفو وارضاك وامرك سماوي
من خلقت الدنيا إلى يومنا اليوم
صبح يفوت وليل يقفاه ضاوي
والناس تفنى بين مذنب ومرحوم
وهنيت من له عند ربه عراوي
=============================
إلى هب الهوى
إلى هب الهوى يزداد وجدي ..=.. على شانه يجي من يم نجدي
يـمـر ديـــار وضـاح الـثـنايـا ..=.. مـجـاديله على المتنين رجدي
عليه انـوح في سمر اللـيالي ..=.. واحسب ان السهر والنوم يجدي
بعد فرقـاه غـاب الحظ عني ..=.. وإلى شفته فهو عزّي ومجدي
ولا عـلـم ولا طـيـف لـفـانـي ..=.. نسيم الريح زاد الوجد وجدي
أنا على ذكراك
يا مرحبـاً ياللي البعد ناديـت
ومية هلا مني والاخرى قفتها
جاوبت باسماك العزيزه ولبيت
وروحي لروحك يالهوا رايمتها
انا الذي لك بالمودة تلاجيت
روح تبي روح وهي مالكتها
وتفتحن ازهار قلبي وهليت
وعيني تراعي عشقة عاشقتها
للقلب ياوضاح الانياب تليت
وردون ثوبي عبرتي غرقتها
بسفك الدموع وبالتجلد تلهيت
فاخت وعبرات بصدري حدتها
إلى بكت عيني ذكرتك وونيت
ودنياي من فرقاك ضاقت سعتها
وان غبت يامظنون عيني وصديت
قلت الفراق وغيبتك مغضبتها
اكره إلى قفيت وافرح إلى جيت
وعندك خبر نفس تعرف اشفقتها
ياما لشوفك ياحبيبي تعنيت
وكم خطوة للقاك رجلي خطتها
ان شفت غيرك صدت النفس واغضيت
وناس تبي لاماي غيره عصتها
حبك بقلبي هزني واستخفيت
وجنات عطفك فرحتي غاديتها
انا على ذكراك عشت وتغذيت
وهواجسي فرحاتنا مانستها
اقسمت لك باللي فرض حجة البيت
انا العهود اسنيننا ماخلفتها
ليتك يابو تركي بعينك تحليت
شقر القرون الناعمة ناقضتها
روحي معه تقعد إلى غبت وابطيت
وروحه على ماتشتهي عاسرتها
============================================
اخترت بعد الدار عن قرب الانجاس
قالوا وحيد وقلت ماعندي اوناس = وقالو غريب وقلت بأرض بعيده
ابعدت مابي شوف ناس من الناس = بعّدت عن بعض الملا وتعديده
مطاوع قلبي على كل الأجناس = والبعد عن شوف المكاره يفيده
اخترت بعد الدار عن قرب الانجاس = عن دارهم نلقى ديار جديده
في وسط نجد ابتع هوا كل نسناس = واطرب لشوف اطيورها وتغريده
اعشق ليالي نجد لو انّها ادماس = وايّامها عندي جنان سعيده
شمى لعشب رياضها يقعد الراس = ومافات من ساعات عمري بعيده
شوف الزهر يبعد عنا كل هوجاس = ويريح عن قلب الشقا ما يكيده
وحس الرعد في رايح المزن رجّاس = دقات عود عند سمعي فريده
وان قال لي بعض المخاليق لا باس = قلت الهضايم بالضماير مجيده
الله من هم بالاضلاع غطاس = اقام وسط القلب وابطى شديده
فكّرت بالدنيا بتقدير واحساس = ولاجت لي الدنيا على مانريده
اللي نبي تقطّعت عنه الأرماس = وعنه اختفت كل العلوم الأكيده
القلب يبغض كل غادر وبلاس = اللي يلطخّ دم الأجواد بيده
واحب من يتعب على كل نوماس = ومن فيض جوده مايمده الزهيده
اللي ليا كادت والارياق يباس = يصبر على كود الأمور الشديده
وللنفس عن طرق المثاليم حباس = يتعب على كل العلوم الحميده
واحب نجد وكل حبّي على ساس = حب بقلبي له قصور مشيده
عندي وعرها مع سهلها والاطعاس = غابات ورد في زهور نضيده
برياضها محلا هدد كل قرناس = ان شاف حفّان الحبارى تصيده
عدل المناكب لأبرق الريش دّواس = ماناش في مخلاب كفه يجيده
ياحلو هدّاته على الجول غلاس = ينحر كثيره ويتعدى الفريده
اجرد عديم لهايش الخرب فراس = والطايره لو ترتفع ماتكيده
ايّام عجّات الهدد كلها اوناس = ياحلو بالخد البياح تهديده
وسلامتكم وتعيشون .................................................. ..!\
المواضيع المتشابهه
العرض العادي
