أنا كذااااااااااااااا يا صاحبي ... !!!!

[أبو فهاد]

أنا كذا يا صاحبي... الصدق دايم مشهره
.................... والناس هذي ما تبي ....إلا من يجاملّها..

ماني بشيطان أذكره...والحق لازم أذكره
.................... أيه أذكره... واللي عقد روس الحبال يحلّها..

وترى الكذوب ليا حكى... تلقى كلامه فشخره
.................... يسرد عليك ولا يمل...حتى لو إنت تملّها..

والسالفة إليا قالها...لازم تجيك مبهره
.................... ولا من قضا تبهيرها...في وسط راسك سلّها..

كلام كله مسخره..في مسخره..في مسخره
.................... وإن كان تبغى تستريح...ياصاحبي شكلّها..

أما أنا ياصاحبي...ما أحب كثرالثرثره
.................... والسالفه.. لا جت غلط...ماظنتي أمهلّها..

أنا قبل ما أنطق خطأ...فمي لزوم أسكره
.................... واقطع لساني لو نوى...في كلمةٍ يزلّها..

بس الصراحة للأسف!!!في هالزمن مستنكره
.................... وأهل الصحيح بهالزمن...مع الأسف يا قلّها..

كلٍ يطبل للكذوب...يكذب وكلٍ يشكره
.................... يعني إذا تبغى تعيش...ياصاحبي طبلّها..

لاتلومني ياصاحبي...دنياك هذي مدبره
.................... واللي بقلبي خلّها...تكفى طلبتك خلّها..

ملّيت من دنيا بها...كل البشر متغيره
.................... والصدق أشوفه انتهى...والكذب قام يفلّها..

الحزن في قلبي كبير...والهم والله مكبره
.................... لو جيت أوزع للبشر...غطا البشر ذي كلّها..

الهم يسهرني وأنا...في كل ليلة أسهره
.................... واحتارت الدمعة تسيل...أو تنثبر بمحلّها..

وختامها ياصاحبي...أحمد لربي واشكره
.................... ولغير ربي ما نويت...نفسي أبد أذلّها ..

طبعي كذا ياصاحبي...طبعي كذا ما أغيّره
.................... أقولها.. واللي عقد روس الحبال يحلها..