الولد لاطاب طيبه من خواله

[عالمي صريح...؟]

[size=5]الولد وان طاب طيبه من خواله... وان تردى فعلم انهم خايبيني
أشرب الفنجال واكب البيالة... طيـبٍ واحـب سلـم الطيبينـي



السلام عليكم ورحمة الله وبركاته

من لا يعرف .. هذين البيتين .. بيتين اشهر من نار على علم ..

قد يجهل البعض قائلهما .. ولكن اكيد سمع بالبيتين من قبل ..
حتى اصبح مضرب مثل يتداوله كثير من الناس ..
قائل هذين البيتين ..
الشاعر / راشد بن حسن بن مانع بن رحيان الضاعني العجمي الملقب بـ ( ابن الذيب ) ..
وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..
راشد بن حسن .. كان يشتغل في شركة ارامكوا السعوديه .. وكان يملك سيارة الشركه (جمس ارامكوا ) ..
وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة الشركه ..
حتى اشتهر عند البدوان .. لا جا احد يبي يروح مكان ولا عنده مطيه والا موتر .. يمشي في طريقه ويقول عسا يلقاني ( ابن الذيب ) على الطريق والا انا القاه ..
ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..
جاء يوم من الايام الا عجوز وعندها غنم شوي تعد على الاصابع .. و ( راشد بن حسن ) .. كان مشغول ومتأخر على الدوام شوي ..
وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..

يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..
قالت له العجوز .. خلاص رح الله يستر عليك يا ولدي ..
انا جالسه هنا انتظر ( ابن الذيب ) ..
هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو نفسه اللي هي تكلمه ..
يوم انصدم ( راشد بن حسن ) بقولها .. وتعجب !!
قال اركبي يا خاله انا ( ابن الذيب ) وابشري بعزك ..
ابوصلك انتي وغنمك ..
وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم ؟؟؟؟؟
حتى وصل علم .. للشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا من المحاوله معه .. واعجبتهم شهامته ..
وصل العجوز إلى منصاها والمكان اللي تبيه ..



وقال هذى القصيده .





قالها ابن الذيب من هاجـوس بالـه
كلمةٍ يلعـب بهـا والبـال زينـي

قالهـا يومـه طرالـه ماطـرالـه
من هواجيسٍ تشيـب المرضعينـي

حالفٍ ماخذ على الطرقـي ريالـه
وبالثـلاث محـرم أنـه مايجينـي

لالقيت اللي على ( السكـه ) لحالـه
يلتفـت ويقـول ويـن المستحينـي

أوقف الموتر حيـا وأبـي الجمالـه
يوم ولد الـلاش وجهـه مايلينـي

الطمع في كـروة الرجلـي رذالـة
.خص وان جابه مجـال الغانمينـي

والردي في حالـةٍ ماهـي بحالـه
واعوينـه مـن كـلام الطيبيـنـي

الردي لـو بـان مايذكـر عمالـه
مايعد الـلاش مقصـور اليمينـي

أركبه لعيـون مـن زيـنٍ دلالـه
ماتحاكـوا فـي قفـاه الرامسينـي

مابغى غيري وانـا مابغـى بدالـه
.قاعدٍ لـي بالرجـا مـدة سنينـي

الولد وان طاب طيبه من خوالـه
بالخـوال يسـال قبـل الوالدينـي

أشـرب الفنجـال واكـب البيالـة
تابـعٍ سلمـي سلـوم الأوليـنـي

ولاقعدنـا بالعمـل بنـا الرزالـة
.ناخـذ العليـا طريـق الفايزينـي

غرني بعض الرجال بكثـر مالـه
مادرى ان الموت في حبل الوتينـي

كيف ينفعني وابا(..........) خالـه
مايقوم البيـت دام السـاس طينـي

ماش وين اللـي عوايـده الجمالـة
.مثل ابن ظافر حمد ليتـه يجينـي

الثنـا والجـود دايـم فـي خيالـه
علمـه ظافـر سلـوم الطيبيـنـي

جـوّد العليـا ولزمّـهـا عيـالـه
وادركوا من علمتـه دنيـا ودينـي

واهني من باع حظه واشتـرى لـه
وسار في درب النبي وأخزى اللعيني

موقفـه ماكـل رجــال ينـالـه
من بغـى ممشـاه يقعـد مرتينـي

كم ذبح من حايلٍ مـن حـر مالـه
وعادته لطمـة خشـوم العايلينـي




و البيتين اللي بأول الموضوع يقال انهم محرفين.. والبيتين الصحيحين كما ذكروا فالقصيده ..

وللمعلومية::الشاعر راشد بن الذيب هو والد الشاعر المعروف حاليأ

محمد ابن الذيب[/size]

[فهدالقحطاني]

الف شكر على القصة والقصيدة

[غلفص]

والولد وان طاب طيبة من خوالة

وشرايك يالعالمي :::: هالبيت وأن كان معناة صحيح ,,,, لكن فيه هضم لحق أبوي اللي رباني

[عالمي صريح...؟]

شكرا يافهد القحطاني


ياغلفص رح اسال ابن الذيب وشكرا على المرور

[ميس الريم]

عالمي صريح الشكر الجزيل لك على طرح الموضوع

قصة جميلة وأبيات شعر رائعة بحق

لا عدمنا رجالا بهذا الخلق الرفيع وكرم النفس الاصيل

[أبو الوليد]

عالمي صريح




موضوع رائـــــــع




سلمت ع القصيدة والقصة




لا هنت




بانتظار الجديد من مواضيعك المفيدة



اللهم علمنا ما ينفعنا وانفعنا بما علمتنا وزدنا علما


اللهم بلغنا رمضان ووفقنا لصيامه وقيامه


~~ وفقك الباري ~~



.. .. ومضـــــــــــــــــــــة .. ..

• دافع الخطرة ,فإن لم تفعل صارت فكرة.
فدافع الفكرة, فإن لم تفعل صارت شهوة. فحاربها,
فإن لم تفعل صارت عزيمة وهمّة, فإن لم تدافعها صارت فعلا,
فإن لم تتداركه بضدّه صارت عادة فيصعب عليك الانتقال عنها.

[عالمي صريح...؟]

شكرآ ميس الريم وشكرآ ابو الوليد....


على المرور,,,,,,,,,,,,

[فتى الرائدية]