[align=center]
بسم الله الرحمن الرحيم
السلام عليكم ورحمة الله وبركاته
اما بعد
طبعاً مثل كل مره الموضوع باللغة العامية لأني بصراحه ما اعرف اكتبه بالفصحى
طبعاً الموضوع هذا صارت أحداثة في مدينة الرياض
يوم من الأيام من بعد صلاة العصر طلعت من المسجد وجسلت افكر وين اروح له وبعد تفكير طويل قررت ان اروح لسوق الزّل في شارع الثميري واتمشى فيه شوي
المهم
بعد ماوصلت للسوق دخلت محل خاص بالملابس داخليه والأشمغة والثياب الجاهزه وأشتريت لي ثوبين اماراتيه وكنت ابي اجربها وبصراحه مرره مريحه والثوب الواحد قيمته 30 ريال الله يديم الرخص
المهم
وبعد ما طلعت من محل الملابس رحت للخياط اللي قريب من المحل وقلت له تكفى قصر لي ثيابي هذي وابيك تخلصها لي الحين
قال لي الخياط : يبيلها نصف ساعه وبعدين تخلص
قلت له : مو مشكله انا بروح مشوار وبجيك بعد نصف ساعة
المهم
طلعت من عند الخياط وركبت سيارتي وجلست افكر وين أروح وين أروح بعدها مشيت في شارع الثميري ووصلت لأخر الشارع وطلعت على شارع عام وقلت في نفسي امش مع الشارع هذا وشف وين يوصل نهايته وبعد ما مشيت في الشارع وصلت إلى أخر الشارع وكان نهايته حرف T وكان قدامي مقبرة العود وجلست اطالع في جدار المقبرة وقلت في خاطري خلني ادخلها وأشوفها من الداخل وشفيها
المهم
رحت مشيت لها حتى وصلت للباب حق المقبره ونزلت من السيارة ودخلت من باب المقبرة وجلست اطالع القبور واقول دعاء زيارة القبور
(السلام على أهل الديار من المؤمنيين والمسلمين ويرحم الله المستقدمين منكم ومنا والمستأخرين, وإنا إنشاء الله بكم لاحقون)
وبعدها جلست اتذكر اللي مدفونين فيها وأعرفهم وهم جدي ابو امي الله يرحمه وأتذكر بعض الشيّاب اللي اعرفهم وهم اخويان جدي وبعض معارفنا وجلست اتذكر ملوكنا الخمسة أللي مدفونين فيها وهم الملك عبدالعزيز والملك سعود والملك فيصل والملك خالد واخيراً الملك فهد الله يرحمهم جميعاً
وأنا اناظر للقبور جلست اتخيل تخيلات قسماً بالله ان دموعي انزلت بكثرة من قوة التخيلات اللي تخيلتها
من ضمن التخيلات اللي تخيلتها
تخيلت ان جدي جالس على قبره ويطالع فيني ويقول لي ها ياعبرود كيف حال الأهل و البيت من بعد ما توفيت مثل ما هو عليه ولا تغير ؟
وتخيلت الملوك الخمسة وهم يطالعون فيني ويقولون لي ها ياعبرود كيف وضع الشعب السعودي الحين من بعد ما توفينا مثل ما هو ولا تغير ؟
وتخيلت باقي الأموات وهم جالسين على قبورهم ويطالعون فيني وهم يقولون لي ياعبرود خذها نصيحه مننا وأنصح اللي يعزون عليك وقل لهم بأنهم يخافون الله ويبعدون عن المعاصي بقدر المستطاع وخلهم يكثرون من الاستغفار وقل لهم يبعدون عن المعاصي سواءً كانت صغيره أو كبيره والله حنا الحين نشوف شي انتم ماتشوفونها وندمانين على الايام اللي عشناها معكم
وتبون الصراحه كل التخيلات هذي اللي تخيلتها حسيت انها حقيقية
لذا
أسأل الله القدير رب العرش العظيم بأن يرحم موتاناوموتا المسلمين وأن يدخلهم جنات النعيم وأن يرحمهم برحمته أنه هو الغفور الرحيم
هذا والسلام عليكم ورحمة الله وبركاته
محبكم في الله وسائق الليموزين / عبرود[/align]
المواضيع المتشابهه
العرض العادي
