اللهجة الحجازية

[سلطان العيون]

اللهجة الحجازية على مر التاريخ

اللهجة الحجازية :

هي لهجة أهل المنطقة الغربية في السعودية وتتمركز بالذات في مكه وجده والمدينة والمدن القريبة منها اكثر من باقي المدن اللي في الغربية وهي لهجة تأخذ من اللهجة البدوية و اللهجة المصرية ولكنها تميل الى المصرية والسبب انه ايام العثمانيين كان فيها مصارية كتير قد الجبل

وطبعا تختلف لهجة العجايز عن الجيل الحاضر ..

لهجة العجايز تحسوها معتقة ومصطلحاتها القديمة ما تنفهم وما يستخدموها الا عتقية البلد اما الشباب حقون دحين ما عاد صار يستخدموها . وكمان ما ننسى ان اللهجة الحجازية فيها الكثير من الأمثال القيمة

وبسم الرحمن نبدأ في بعض ما تختص بيه لهجتنا الحجازية الغاليه :

1- مصطلحات حجازية :

في كثير من المصطلحات الحجازية اللي من الصعب انو اي واحد غير حجازي يفهمها واتفضلوا هذي بعضها :

الدهليز : مدخل البيت

الكرتة : الفستان

الكرويتة : دكة خشبية

الزقاق : الشارع الضيق

تندرمة : ايس كريم

دحديرة : نزلة او منحدر

الدبش : اغراض العروسة قبل لا تتزوج

القابلة : بكره

المملك : المأذون الشرعي

الدقيسي :الفراغ اللي تحت الدرج أو المخزن

المرقعة : الدلع والمياعه في الكلام والتصرف

يتتريق : يستهزء

اللغوصة : نقل الكلام وتسبيب المشاكل

الدحلسة : اذا كنت بتتمصلح مع واحد عشان تبغى منه شي تقول يدحلس .

و في مصطلحات كتير غيرها .

2- أمثال حجازية :

إذا جيت رايح كتر من الفضايح.

بعد ما أكل واتكا قال ريحته مستكا.

حاجه ما تهمك وصي عليها جوز أمك.

ست وجاريتين على قلي بيضتين.

أعمى ويلضم خرز.

دلع الكبار زي الشقدف على الحمار.

اللي ماله أم حاله يغم.

كنس بيتك ورشُه ما تدري مين يخشوا.

كل حبه مسوسه لها كيال أعور.

على قد زيتوا سرجلوا.

الخايبه تتعلق بالحبال الدايب.

عقربه في الغار ولا ضره في الدار.

خاتم بفصو وكل شي ترصوا.

أهري وانكتي يا جاره وأنا ثابته زي العماره.

3- القاب حجازية :

عندنا في الحجاز وخصوصا مكه في اسماء يعطوها كنيه او لقب على سبيل المثال واحد اسمو عبد الله يقولولو أبو عابد ... وهذي بعضها :

عمر : أبوسراج

حسن : أبو على

حسين : أبو هلال

يوسف : أبو يعقوب

عبدالله : عبادي او ابو عابد

عبدالرحمن : الوجيه

عبد الرحيم : أبو رحمه

فيصل : أبو عبدالله

عبد العزيز : عزيز أو ابوسعود

فاطمة : فتو

مريم : منّة

ابراهيم : أبو خليل

[نجم]

والله معاني حلوة أول مره أسمع فيها ..

مصطلحات :: حجازيه

شكرا على النقل سلطان العيون ...

[سلطان العيون]

اللهجة الحجازية جميلة كـ جمال أهلها وروعتهم

[][عاشق الهلال][]

يعطيك العافيه ،،،

[سامي الشمري]

الله يعطيك العافية

و لهجة أهل الحجاز رائعة و جميلة


تحياتي لك

[شـــقـــاوي]

معاني حلوه

الف شكر اخوي على النقل

[صـــقــر شــمـر]

اقولك ياراجل

موضوعك كويس

وفنجالك عندنا

[سلطان العيون]

اقتباس المشاركة الأصلية كتبت بواسطة صـــقــر شــمـر اقولك ياراجل موضوعك كويس وفنجالك عندنا

ياهووووه

إيشبك شبكبك

إيش جاب فنجالي عندكم ؟؟

[باركر]

موضوعك جميل
اخوي سلطان العيون
شكراً قوي قوي
على قولة اخواننا الصعايدة